Tataroha Diana I Sulie A Jisas Kraes Nge A Mak E Uusue 3 - Tataroha Diana

A Jisas E Haꞌa-uurie Mwane Kiꞌine E Heko

¹ Oto a Jisas e lae loꞌu i laona nume ni palo-palo mo Jiu, na ngaeta mwane ingeie i leune kiꞌine e heko.

² Oto ngaeta mo iini kire ko lio hunie ohe kei haꞌa-uurie a mwaena aana Dinge Maaꞌi ikire, hunie kire ke ere aaelasie i laona leinge.

³ Oto a Jisas ko teꞌuri hunie mwane kiꞌine e heko ngeena, “O ke uure kaꞌu i naꞌona mwala.”

⁴ Oto e teꞌuri hunie mo iini kire ko upwesie ngeena, “?Nga taa ni Haꞌatolanga ikolu e toliꞌaasie huni esuie aana Dinge Maaꞌi? ?Huni peꞌie iinoni wa huni waelie mola? ?Huni haꞌa-uurie iinoni wa huni horoꞌie?” Taꞌe kire rohu mola, na nga iini kaꞌa ere ike.

⁵ A Jisas e saehuu i sulie saeda e hau, oto e toꞌomaaire mola peꞌi saewasunge. Oto ko teꞌuri hunie a mwaena, “O ke lalaaꞌinie kiꞌimu.” Oto e lalaaꞌinie kiꞌine, na e diana oto loꞌu.

⁶ Oto lau-leu mo Parise kire iisitaa, na kire lae oto i meni wala peꞌie ngaeta mwala aana pulitaa a Herod huni horo maesie a Jisas.

Mwala Hunge Kire Loko I Saana A Jisas

⁷ Taꞌe a Jisas na mo pwaarongoisuli ingeie kire lae wau hunie poꞌo ni eesi i Kalili. Na mwala hunge kire lae i sulie, uure oto mwaanie mo poꞌo ni henue i Kalili na i Jiudia

⁸ na i Idumea, na uure mwaanie i Jerusalem, na mwaanie poꞌo hao aana wai peine i Jodan, na uure noꞌone mwaanie mo huilume mo Aapoloa Aaopa i Taea na i Saedon. Na mwala hunge kire hule i saana Jisas i sulie kire rongoa tataroha aana mo ola ko esuiꞌi.

⁹ Na lokotaa e paine hiitoꞌo mone, oto a Jisas e unue hunie mo pwaarongoisuli ingeie uri kire ke dau aakau aana nga iiola hunie, mwaanie mwala kire loko haahie.

¹⁰ I sulie a Jisas e haꞌa-uurie mango mwala hunge, oto mo mae-maeaꞌa hunge kire ko eriꞌapasie loꞌu uri kire ke kopi mola aana.

¹¹ Na maholo mwala nge mo liꞌoa aaela nge aada kire leesie a Jisas, oto kire ko raputeꞌi oto i naꞌona peꞌi ngaranga uuri, “!Iꞌoe oto Kalena God!”

¹² Taꞌe a Jisas e ere honosire mwaanie kire haꞌarongoa nga iini uri ingeie a tei.

A Jisas E Lio Hilisie Aawalai Hurulaꞌaa Mwana Rue

¹³ Oto a Jisas e soie ngaeta mo iini mai saana, na ko hanetaa loꞌu taꞌau i lengine toloi henue.

¹⁴ Oto e lio hilisie aawala mwana rue mwaanie pulitaa ngeena hunie kire ke neꞌie mo hurulaꞌaa ingeie. Oto e si haꞌatolara hunie kire ke lai tarohaꞌi,

¹⁵ na e niie hunire nanamanga huni oohe aasie mo liꞌoa aaela.

¹⁶ Oto ie satana aawala mwana rue nge a Jisas e lio hilisire: A Saemon nge a Jisas e haaraꞌinie loꞌu aana a Pita,

¹⁷ Na Jemes kalena Sebedi, na Jon aasine a Jemes, nge a Jisas e haaraꞌinirerue mo Kalena Lou-lou i sulie kirerue sai saewasu lau-leu.

¹⁸ Na Andru, na Pilip, na Batolomiu, na Matiu, na Tomas, na Jemes kalena Alpeas, na Tadeas, na Saemon ngaeta iini aana pulitaa nge ko sare haiseuni huni taꞌaasie aalahanga ni Rom mwaanie hanue i Israel,

¹⁹ na Jiudas Iskariot nge e pweloa Jisas hunie mo maelonga ingeie.

A Jisas E Nanama Liutaa Aana Satan

²⁰ Mango urine, oto a Jisas e aalihoꞌi loꞌu hai nume, na pulitaa paine e hule loꞌu i saana. Oto a Jisas na mo pwaarongoisuli ingeie, nga maholo huni ngeunge na haꞌike loꞌu.

²¹ Oto aana maholo uluhe iinoni a Jisas kire rongoa urine, kire unue uuri, “Ko pweu oto toꞌohuu.” Oto kire ko teuleꞌi huni lae mai toolea loꞌu i henue hunie kire ke lio i sulie oto wau.

²² Maholo kire kaꞌa hule ue, na mo haꞌa-uusuli aana mo Haꞌatolanga a Mosis nge kire lae mai uure taꞌau i Jerusalem, kire ko teꞌuri, “Aakalo paine haahie mo liꞌoa aaela, a Bielsebul, ingeie oto aana. A Bielsebul ni ko niie nanamanga hunie huni oohe aasie mo liꞌoa aaela urine.”

²³ Oto a Jisas ko soire wau takoie, na ko ere ni aalahuunge uuri, “?Ohe a Satan kei taꞌaasie loꞌu a Satan? !E aasa!

²⁴ Taꞌena nga aalahanga kei oopa aani heiseuninge honosie maraana, nge kei naꞌonga oto.

²⁵ Na e urine loꞌu mala nga uluhe ni iinoni kei oopara loꞌu maraada, uluhe iinoni ngeena nge kei eiꞌaa oto.

²⁶ Na mala mo iini a Satan kire taꞌelaꞌi honosire maraada, nge kire saꞌa uure aꞌailaꞌa ike loꞌu, taꞌe kire kei eiꞌaa oto.”

²⁷ Na a Jisas ko heꞌi ere ni aalahuunge loꞌu i sulie nanamanga ingeie e saka liutaa aana Satan, oto ko teꞌuri, “Nga mwane saꞌa sili ike i laona nume ngaeta ramo hunie ke pelie toꞌo-toꞌolana, taꞌe kei holaꞌi tapolie na kei pwesue, nge purine ke si toolea ahutana mo ola ingeie.

²⁸ “Toꞌohuu no ko unue huniꞌomu, a God e sai saeꞌaasie taꞌena nga oorahaꞌaa mo iinoni ko esuiꞌi, hule aana e sai saeꞌaasie mo iini ko ere mwakataꞌinie.

²⁹ Taꞌe iini ko ere mwakataꞌinie Liꞌoa Maaꞌi, nge saeꞌaasilana e saꞌa lae ike oto ooꞌoo, aana e asuie mei oorahaꞌaa e iiꞌo huu.”

³⁰ A Jisas e ere urine i sulie kire unue uuri, “Liꞌoa aaela nge aana.”

?Kira Tei Tohungei Uluhe Ni Iinoni A Jisas?

³¹ Oto nikana peꞌie mo eesine mwane kire mani hute, kire hule na kire uure mola taꞌi sinaha i sulie mwala hunge kire loko kali-kelie a Jisas. Oto kire ko haꞌatolaa mei wala hunie,

³² kire ko teꞌuri, “!Lio kaꞌu! A nikemu na mo eesimu kire uure mola taꞌi sinaha, na kire ko sare leesiꞌo.”

³³ Oto a Jisas ko aalamire uuri, “?A tei ni a nikeku, na kire a tei ni mo eesiku?”

³⁴ Oto ko lio wau hunie ahutana mwala kire iiꞌo kali-kelie, na ko teꞌuri, “Iꞌomu oto mo nikeku na iꞌomu oto mo eesiku.

³⁵ Aena aana iini nge ko esuie nga taa e toꞌohie saena God, ingeie oto aasiku na a nikeku.”