Tataroha Diana I Sulie A Jisas Kraes Nge A Mak E Uusue 16 - Tataroha Diana

A Jisas E Taꞌelaꞌi Mwaanie Maenga

¹ Oto i seulehi, aana maholo Dinge Maaꞌi Mo Jiu e si mango, a Meri ni Makdala, na a Salome, na a Meri nikana Jemes, kire holie ngaeta mo ola wasu mangoni uri hunie kire ke lai huiꞌi haahie sapena a Jisas.

² Na oto mola i maahuꞌo-huꞌo aana eetana nga hai dinge aana wiki, mo keine ko lai hule aana kilipweꞌu na sato ko si pwaa.

³ Na maholo kire ko lae ngeena kire ko lae peꞌi unu-unue uuri, “?Taꞌe hau oto paine nge kire honoa maana kilipweꞌu aana, a tei nge kei taꞌaasie hunikolu?”

⁴ Kire ko ere urine aana hau ngeena e lae wai peine oto hiitoꞌo. Taꞌe maholo kire hule taꞌau, na kire ko leesie oto hau ngeena, taꞌaasilana e lae oto.

⁵ Oto maholo mo keni ngeena kire lae sili hao i laona kilipweꞌu, na kire ko leesie mwane saanau e toꞌoni aani toꞌoni rereꞌa, e iiꞌo aana aapa i pwalo-pwalona kilipweꞌu. Oto mo keine kire ko tohungei meꞌu.

⁶ Taꞌe a mwaena ko teꞌuri hunire, “Omu ke suꞌuri meꞌu. Nou saie uri omu ko heitalea a Jisas ni Nasaret nge kire horo maesie i lengine poꞌu-poꞌu. Taꞌe ingeie haꞌike oto i leu. E taꞌelaꞌi oto mwaanie maenga. !Lio kaꞌu! Leu nge kire neꞌi-neꞌie aana kaꞌu ie.

⁷ Omu ke lai haꞌarongoa mo pwaarongoisuli ingeie na a Pita uuri, ‘A Jisas ko lae oto i naꞌo loosiꞌomu hai Kalili. Na omu ke si leesie oto hai leune, mala e unue oto huniꞌomu.’ ”

⁸ Oto mo keine kire kaꞌa unue loꞌu nga mei ola, taꞌe kire si tehi mola mwaanie kilipweꞌu peꞌi meꞌunge na ariringe.

A Jisas E Haataꞌi Aana Meri Ni Makdala

⁹ I purine a Jisas e taꞌelaꞌi mwaanie maenga i maahuꞌo-huꞌo aana eetana nga hai dinge aana wiki, e holaꞌi haataꞌi aana a Meri ni Makdala, iini nge e oohe aasie kaꞌu e hiu liꞌoa aaela mwaanie.

¹⁰ Oto a Meri e lae, ko lai haꞌarongoa mo pwaarongoisuli ingeie. Kire iiꞌo ni saehuu oto mola peꞌi ngaranga,

¹¹ na maholo kire rongoa uri a Jisas e mauri eelihoꞌi oto, na uri a Meri e leesie, kire kaꞌa hiiwalaimoli ike aana.

A Jisas E Haataꞌi Loꞌu Aana Ngaeta Ro Pwaarongoisuli

¹² Oto loꞌu i puri, a Jisas ko heꞌi haataꞌi loꞌu, aana ngaeta ro iini aana maholo kirerue ko lae i sulie tala takoie ngaeta hanue, taꞌe e kaꞌa lio ike loꞌu mala holaꞌinaꞌo.

¹³ Kirerue aalihoꞌi taꞌau i Jerusalem, oto kire ko lai haꞌarongoa mo pwaarongoisuli, taꞌe kire kaꞌa hiiwalaimoli ike noꞌone aadarue.

A Jisas E Haataꞌi Loꞌu Aana Aawalai Pwaarongoisuli Mwana Eeta

¹⁴ Oto loꞌu i puri a Jisas ko heꞌi haataꞌi loꞌu aana aawalai pwaarongoisuli mwana eeta aana maholo kire ko ngeu. E ere aada aena kire kaꞌa hiiwalaimoli ike aana, na i sulie saeda e hau hule aana kire kaꞌa hiiwalaimoli ike aana mo iini nge kire leesie a Jisas e taꞌelaꞌi.

¹⁵ Oto a Jisas ko teꞌuri hunire, “Omu ke lae i sulie ahutana mo henue i laona walumalau, na omu ke tarohaꞌinie Tataroha Diana hunie ahutana mo iinoni.

¹⁶ Taꞌena nga iini nge ko hiiwalaimoli eeku na loto-maaꞌilana e lae, nge a God kei haꞌa-uurie. Taꞌe a God kei lei mae aana iini nge e kaꞌa hiiwalaimoli ike aaku.

¹⁷ Na mo iini ko hiiwalaimoli eeku, nge a God kei niie nanamanga hunire, huni esuie mo huꞌi-huꞌite. Kire kei sikeraꞌinie mo liꞌoa aaela mwaanie mo iinoni aana sataku, na kire kei ere aana mo erenga hai aaopaꞌi.

¹⁸ Na maꞌalana kire ko hele aana mo mwaa ala-ala, wa kire ko inuhie nga mo ola ni maesiꞌi, taꞌe kire saꞌa roroꞌa ni maesiꞌi ike. Na kire kei hele i sapena mo mae-maeaꞌa aana nimada, kire kei awaa oto.”

A Jisas E Tahelaꞌi I Lengi

¹⁹ Oto i purine Aalaha ikie a Jisas e ere mango urine peꞌire, a God e tahelaꞌinie oto taꞌau i Lengi na e lai iiꞌo oto aana iiꞌo-iiꞌoha paine i pwalo-pwalona God.

²⁰ Oto purihaꞌana, mo pwaarongoisuli ingeie kire si lai tarohaꞌinie Tataroha Diana hailiu i laona walumalau. Na a God e iiꞌo peꞌire, na e haꞌawalaimoliꞌaa laeliwalanga ikire aana e niie nanamanga hunire huni esuie mo huꞌi-huꞌite.