Tataroha Diana I Sulie A Jisas Kraes Nge A Mak E Uusue 15 - Tataroha Diana

Kire Toolea A Jisas I Naꞌona A Paelat

¹ Oto i maahuꞌo-huꞌo na e kaꞌa dangi kohi ue, mo naꞌohai pris peꞌie mo rato ni mwane na mo haꞌa-uusuli aana haꞌatolanga na ahutana pulitaa ni lei-lei, kire oalaꞌinie oto nga taa kire kei esuie aana a Jisas. Oto kire pwasue a Jisas, kire si toolea, na kire ko lai toliꞌaasie oto i nimana a Paelat.

² Oto a Paelat ko dolosi aana Jisas uuri, “?Uri iꞌoe ni oto Inemauri mo Jiu?” Oto a Jisas ko aalamie uuri, “Nge kaꞌu oto o ko unuena.”

³ Na mo naꞌohai pris kire ko ere waelie a Jisas oto aana mo ola hunge.

⁴ Oto a Paelat ko heꞌi dolosi loꞌu aana Jisas uuri, “?E ue ni o kaꞌa aalamire? O saie kaꞌu mola kire ko tohungei ere waeliꞌo ngeena.”

⁵ Taꞌe a Jisas e kaꞌa ere ike loꞌu. Oto a Paelat ko tohungei pangataꞌi oto hiitoꞌo.

A Paelat E Leie A Jisas

⁶ Suli helisi aana maholo Houlaa Ni Liumwaanie, a aalaha ni Rom ngeena e sai luhesie taꞌena nga iini mwala ko haꞌatohue mwaanie nume ni hoꞌo.

⁷ Aana maholona, ngaeta mwane satana a Barabas kire neꞌie i nume ni hoꞌo i sulie ingeie nga iini aana mo iini nge kire horo maesie ngaeta mwala aana maholo kire haiseuni huni taꞌaasie aalahanga ni Rom mwaanie i Israel.

⁸ Oto mwala kire ruru mei saana a Paelat na kire ko aehota haꞌatohu aana uri ke luhesie nga iini mwaanie nume ni hoꞌo oto mala ko euꞌesuie suli helisi.

⁹ Oto a Paelat ko dolosi aada uuri, “?Ohe omu saetoꞌo aana Inemauri mo Jiu nge ne ke luhesie huniꞌomu?”

¹⁰ E ere mola urine aena aana e saie uri mo naꞌohai pris kire niie mola a Jisas hunie aena aana kire ko upwesie.

¹¹ Taꞌe mo naꞌohai pris kire ko unue hunie mwala hunie kire ke unue hunie a Paelat uri ke luhesie mola a Barabas.

¹² Oto a Paelat ko dolosi loꞌu aana mwala uuri, “?Ko urine, nga taa kaꞌu ne ke si da aana mwane nge omu haaraꞌinie Inemauri mo Jiu?”

¹³ Oto kire ko si meni tea paine mola uuri, “!Horo maesie i lengine poꞌu-poꞌu!”

¹⁴ Oto a Paelat ko heꞌi dolosi loꞌu aada uuri, “?Aana e ue? ?Haꞌalaa nga mei taa nge e dau aaelasie?” Taꞌe kire ko si tea paine mola uuri, “!Horo maesie i lengine poꞌu-poꞌu!”

¹⁵ A Paelat e sare haꞌasaedianaꞌaa mola mwala, oto e luhesie mola a Barabas hunire. Na e unue hunie mo ramo uri kire ke holaꞌi wini-winie a Jisas, nge kire ke si horo maesie i lengine poꞌu-poꞌu.

Mo Ramo Kire Haꞌamwasi Aana A Jisas

¹⁶ Oto mo ramo kire toolea a Jisas i laona lolata ahuie toohi peine a Paelat. Kire si soie mai ahutana mo ramo aana pulitaa ikire, na kire mani ruru i saana a Jisas huni haꞌamwasi aana.

¹⁷ Oto kire haꞌatoꞌonie a Jisas aana toꞌoni tetewa nonoroꞌa mala mo aalaha ko hoꞌo-hoꞌosiꞌi, na kire asuie rorodara aani walo kau-keu, kire si neꞌie i pweune.

¹⁸ Oto kire ko si haꞌa-haꞌamwasi aana, kire ko teꞌuri, “Lahea inemauri mo Jiu.”

¹⁹ Na kire ko pou-pouruuru honosie peꞌi aala pwaunge hunie, na kire ko reu-repusie pwaune aana mai rade, na kire ko ngi-ngisuhie.

²⁰ Maholo kire haꞌa-haꞌamwasi mango aana a Jisas urine, oto kire ko si taꞌaasie toꞌoni nonoroꞌa mwaanie, na kire ko haꞌatoꞌonie loꞌu aana mo toꞌoni ingeie. Oto kire ko si toolea i sinaha huni lai horo maesie i lengine poꞌu-poꞌu.

Kire Uie A Jisas I Lengine Poꞌu-poꞌu

²¹ Maholo kire ko toolea taꞌau a Jisas i sulie tala mwaanie i Jerusalem, na kire ko oodoie mwane satana a Saemon, ko si hule mola uure i meꞌesu. (A Saemon mwane ni Saerin, na ingeie aamana Aleksanda na Rufas.) Oto mo ramo kire ko deu rarahie hunie ke aangaꞌinie poꞌu-poꞌu a Jisas.

²² Kire toolea a Jisas takoie leu satana Kolkota, nge sailana uuri, “Leu ni rarata.”

²³ Na i leune kire ko niie waen hunie, ola kire pwaie peꞌie ai satana mur, ola huni taꞌaasie salunge. Taꞌe a Jisas kaꞌa inuhie ike.

^24-25 Oto mo ramo kire ko uie oto a Jisas i lengine poꞌu-poꞌu aana siwana nga maholoi sato i hoꞌowa. Na kire ko oopaa mo toꞌoni ingeie i matolada hailiu, na kire ko inie daes huni leesie uri a tei kei toolea nga mei sala aana toꞌoni ingeie.

²⁶ Na mei wala kire uusue i pweune poꞌu-poꞌu huni haataꞌinie nga taa kire unue e dau aaelasie. Kire uusue uuri, INEMAURI MO Jiu KAꞌU IE.

²⁷ Na kire uie ngaeta ro mwane horopeli noꞌone peꞌie a Jisas, nga iini i pwalo-pwalona na ngaeta iini i meu-meuline.

²⁸ Na Uusu-uusu Maaꞌi ko oa oto aana e ere uuri, Iidumilana kei lae peꞌie mo iini nge ko waelie mo haꞌatolanga. Aesaea 53:12

²⁹ Na mwala kire ko liu i sulie tala, kire ko teileꞌi pweu mwaanie a Jisas peꞌi haꞌamwasinge aana uuri, “!Nge kaꞌune! Iꞌoe, ni o unue uri o kei ohoie Nume Maaꞌi Peine, na uri o kei esu eelihoꞌi loꞌu mola aana i laona oolu hei dinge.

³⁰ !Hoe! O ke siho kaꞌu mei mwaanie poꞌu-poꞌu na o ke haꞌa-uuriꞌo maraamu.”

³¹ Mo naꞌohai pris na mo haꞌa-uusuli aana mo Haꞌatolanga a Mosis, kire ko haꞌamwasi aana a Jisas noꞌone mala ahutana mwala. Na hule aana kire ko teꞌuri hunire maraada, “E roroꞌa haꞌa-haꞌa-uurie kaꞌu mwala aaopa, taꞌe e saꞌa haꞌa-uurie ike maraana.

³² Kolu ke lio-lio kaꞌu ohe kolu ko leesie inemauri mo Jiu ie ko siho mai mwaanie poꞌu-poꞌu. Nge kei urine haꞌalaa kolu ke si hiiwalaimoli aana uri ingeie a Kraes.” E ro mwane nge kire uirerue noꞌone peꞌie a Jisas, kire ko tohungei ere aaelasie noꞌone.

A Jisas E Mae

³³ Oto i upui aatowaa, rodohono e dau haahie ahutana hanue hunie e oolu maholoi sato.

³⁴ Na aana oolune nga maholoi sato i aapau, a Jisas e si soi oto paine aana erenga ni Jiu uuri, “?Eloi, Eloi, lama sabaktani?” nge neꞌisaenga aana uuri, “?God ineu, God ineu, e ue oto o aatopuri eeku?”

³⁵ Oto ngaeta mo iini aana mwala e uure-uure i leune kire rongo, kire ko teꞌuri, “!Rongo kaꞌu! Ko soie a Elaeja.”

³⁶ Oto ngaeta iini aada e huru peꞌie mei loi-losi, e haꞌahonue aana waen ahaꞌi, ko susuꞌie aana mai ei, oto ko susueꞌinie taꞌau hunie ngidune a Jisas hunie ke inu, na ko teꞌuri, “Oto kolu ke maaꞌoohi keꞌu. Ohe kolu ko leesie a Elaeja ko lae mai oohosie mwaanie poꞌu-poꞌu.”

³⁷ Oto a Jisas e si soi oto paine, na ko mae oto.

³⁸ Oto mola aana maholoi satona, sala kire lohea honosie Hahuꞌana Leu Maaꞌi i laona Nume Maaꞌi Peine e aꞌari hunie e ro aapa, uure oto taꞌi lengi lai hule oto hai aano.

³⁹ Naꞌohana mo ramo ni Rom e uure-uure i saana poꞌu-poꞌu, na e leesie ahutana walu ola e rau aana maholo a Jisas e mae, oto ko teꞌuri, “A mwane ie Kalena God oto toꞌohuu.”

⁴⁰ Ngaeta mo keni kire uure noꞌone wau haꞌatau mwaanie poꞌu-poꞌu, kire ko haꞌa-haꞌamaesie nga taa ko reu. Ngaeta mo iini aada nge kira Meri ni Makdala, na a Salome, na a Meri (nikana a Jemes Saanau na a Josep).

⁴¹ Mo keni ngeena kire lae-lae peꞌie a Jisas aana maholo e oꞌoꞌo wau i Kalili, na kire peꞌi-peꞌie. Mo keni hunge kire lae noꞌone mai peꞌie hunie i Jerusalem, ikire noꞌone i leune aana maholona.

A Josep Ni Arimetia E Haitolingeꞌinie A Jisas

⁴² Walu ola ienini e rau aana hai dinge ni deu-aakaunge loosie Dinge Maaꞌi Mo Jiu. Oto i sulie ko lae oto hunie i seulehi, maholo Dinge Maaꞌi ikire ko aehota,

⁴³ nge a Josep ni Arimetia, e toliꞌaasie maꞌunge, ko lae oto i saana Paelat huni haꞌatohue rae aana a Jisas. A Josep ngaeta naꞌohai mwane aana pulitaa ni lei-lei na ngaeta iini aana mwala ko maa-maaꞌoohie Aalahanga a God kei lae mai.

⁴⁴ A Paelat e tohungei pangataꞌi aana e rongoa uri a Jisas e mae oto. Oto e soie mwane paine aana mo ramo, na ko dolosi aana uuri, “?Ohe a Jisas e mae oto toꞌohuu?”

⁴⁵ A mwaena e teꞌuri, “Iau, e mae oto.” A Paelat e rongo urine, ko si maaie rae aana Jisas hunie a Josep ke toolea.

⁴⁶ A Josep e holie mei sala diana, na e lai oohosie rae aana Jisas mwaanie poꞌu-poꞌu, ko si uloa aana mei sala ngeena, na ko lai neꞌie i laona kilipweꞌu kire didie aana hau. Oto e honoa maana kilipweꞌu ngeena aana ho heu oto paine.

⁴⁷ Na a Meri ni Makdala na a Meri nikana Josep kirerue leesie leu nge kire neꞌie sapena a Jisas aana.