Tataroha Diana I Sulie A Jisas Kraes Nge A Mak E Uusue 14 - Tataroha Diana

Mo Rato Kire Neꞌisae Huni Horo Maesie A Jisas

¹ Oto Houlaa Ni Liumwaanie e karaꞌini oto. (Houlaa ngeena kire haaraꞌinie noꞌone uri Houlaa Ni Bred Iis Haꞌike Aana.) Oto e ro hai dinge mola i naꞌona houlaa ngeena, na mo naꞌohai pris na mo haꞌa-uusuli aana mo Haꞌatolanga a Mosis kire mani loko, oto kire ko heitalea nga tala mumuni huni pweloa a Jisas huni horo maesie.

² Taꞌe kire unue uuri, “Kolu saꞌa tapolie ike aana maholo mwala kei loko hunie houlaa, mwaanie kire maaola-ola i tehulaꞌana.”

Ngaeta Keni E Huie Rumu E Wasu Mangoni I Pweune A Jisas

³ Maholona na a Jisas e iiꞌo wau aana huilume i Betani i nume a Saemon, iini nge maelaa ni osa e hite aana kaꞌu wai naꞌo. Oto maholo a Jisas ko ngeu i leune, ngaeta keni e lae mai saana. A keine e toolea mai ho ateꞌa diana e honu aana rumu e wasu mangoni, na holitana e paine. Oto e tahanie na ko lingisie oto i pweune a Jisas.

⁴ Maholo ngaeta mwala i leune kire leesie, oto kire ko saewasu na kire ko ere hailiu i matolada uuri, “?E ue a keni ngeena ko si waetaꞌinie mola ho rumu diana urine?

⁵ Mala uri ke haꞌaholingeꞌinie, haꞌalaa e sai terie mei toꞌoha e sada aana waaitana nga mwane auꞌesu hunie halisi leku. Na e malisine mei toꞌoha aana ke niie hunie kira maitale.” Na kire ko tohungei ere aaelasie a keine oto hiitoꞌo.

⁶ Taꞌe a Jisas e teꞌuri hunire, “!Ei! ?Omu ko kotahie huni taa? !Toliꞌaasie mola! Tohungei mei ola diana ni ko esuie hunieu ie.

⁷ Kira maitale kire ko oꞌoꞌo peꞌiꞌomu oto tarau, na omu sai peꞌire mola aana taꞌena nga maholo. Taꞌe ineu nou saꞌa iiꞌo tewa ike loꞌu peꞌiꞌomu.

⁸ A keni ngeena e asuie tohungei mei ola diana hunieu, aana e huie rumu wau-wesu haahie sapeku oto lalai loosie maholo kire kei heitolingeꞌinieu ni ngeena.

⁹ No ko unue oto huniꞌomu uri taꞌe-taꞌena nga leu i laona walumalau nge laeliwalanga aana Tataroha Diana kei lae-lae aana, unulana mei ola a keni ie ko esuie ngeena kei lae-lae huni aamasitoꞌonga aana.”

A Jiudas E Neꞌisae Huni Pweloa Jisas Hunie Mo Naꞌohai Pris

¹⁰ Oto a Jiudas Iskariot, ngaeta iini aana aawalai pwaarongoisuli mwana rue, e iisitaa, ko si lae i saana mo naꞌohai pris huni pweloa Jisas hunire.

¹¹ Mwala paine ngeena kire ko tohungei saemango huni rongoa nga taa e unue, na kire ko heiholotaꞌi oto huni nii toꞌoha nana. Oto uure aana maholona a Jiudas ko aehota lio hunie nga maholo huni pweloa a Jisas hunire.

A Jisas Na Mo Pwaarongoisuli Kire Ngau Aana Ngaunge Aana Liumwaanie

¹² Oto e hule aana eetana nga hai dinge aana Houlaa Ni Bred Iis Haꞌike Aana, na dinge ngeena oto dinge huni horoꞌie mo kalei sipu hunie ngaunge aana Liumwaanie. Oto mo pwaarongoisuli a Jisas kire ko dolosi aana uuri, “?O saetoꞌo aana uri melu ke dau aakau aana ngaunge aana Liumwaanie huniꞌo i tei?”

¹³ Oto a Jisas ko uusungeꞌinie ngaeta ro iini hikada, na ko teꞌuri hunirerue, “More ke lae i laona huilume paine i Jerusalem ngeena, na nga mwane e aangaꞌinie ho ateꞌa aani wei kei oodoiꞌomoreꞌi. Oto more ke lae oto i sulie

¹⁴ taꞌi nume nge kei lai sili aana. Oto more ko teꞌuri hunie mwane nge e toꞌo aana numena, ‘A Haꞌa-uusuli e unue uri o ke haataꞌinie aamereꞌi duru nge kei hele aana ngaunge aana Liumwaanie peꞌie mo pwaarongoisuli ingeie.’

¹⁵ A mwane ngeena ke si haataꞌinie duru peine ingeie taꞌau i lengi aamoreꞌi, iini kire dau aakau oto aana. Nge more kei deu aakau aana mo ola hunikolu i leune.”

¹⁶ Oto e ro pwaarongoisuli kire tauleꞌi, kire ko lae oto wau i Jerusalem, na kire ko lae oodoie oto ahutana walu ola, mala a Jisas e unuꞌi hunire. Oto kirerue ko deu aakau oto aana mo ola hunie ngaunge aana Liumwaanie.

¹⁷ Oto i seulehi, a Jisas e lae mai hule i nume peꞌie aawalai pwaarongoisuli mwana rue.

¹⁸ Na maholo kire ko ngeu oto, a Jisas ko si teꞌuri, “No ko unue oto toꞌohuu huniꞌomu uri nga iini hikemiu nge ko ngeu peꞌieu oto molana kei pweloau.”

¹⁹ Oto kire ko tohungei hii aaela, na kire ko meni aehota dolosi oto aana uuri, “?Mwaanie ohe ineu?”

²⁰ Oto a Jisas ko teꞌuri hunire, “Ingeie oto ngaeta iini eemiu aawala mwana rue nge ko toongaꞌinie mei bred tararuru peꞌieu i laona nime siꞌiri.

²¹ Ineu a Kale Ni Iinoni ne kei mae taane oto mala mo Uusu-uusu Maaꞌi e unue. Taꞌe aama-aamasilana a mwane ngeena nge kei pweloau a Kale Ni Iinoni, aana kei lae otoi diana hunie iinoni ngeena mala uri ke suꞌuri hute.”

A Jisas E Aehotaa Tolahai Ngeu Maaꞌinge

²² Oto maholo kire ko ngeu ngeena, a Jisas e hele aana ho bred, oto ko ere ni paalahenga, ko si nisie, na ko haꞌa-adoa mo pwaarongoisuli aana. Oto ko teꞌuri, “Hele aana. Ngaue. Hasiꞌoku nge ienini.”

²³ Oto e hele aana loꞌu kao-kaoi waen, na ko ere ni paalahenga, oto e niie hunire, na ahutada kire mani inu aana.

²⁴ Oto a Jisas ko teꞌuri, “Apuku oto ienini nge e aahe i tehulaꞌana mwala hunge, na mei epu nge ko haꞌa-oaie haiholotaꞌinge haalu a God ko esuie peꞌie mo iinoni ingeie.

²⁵ No ko unue oto huniꞌomu uri nou saꞌa inuhie loꞌu nga mei waen lai hule aana ne kei inuhie waen haalu i laona Aalahanga a God.”

²⁶ Oto kire kanalie kana maaꞌi, nge kire si lae mwaanie hanuena huni hanetaa hunie Uuwo Ni Ei Olif.

A Jisas E Unue Uri A Pita Kei Taateingeꞌinie

²⁷ Oto a Jisas ko teꞌuri hunire, “Ahutemiu, omu kei meni tehi mwaanieu. Aana i laona mo Uusu-uusu Maaꞌi a God e unue uuri, Ne kei horoꞌie a kakali sipu, oto mo sipu kei tatanga hailiu oto. Sekaraea 13:7

²⁸ Taꞌe i purine ne kei taꞌelaꞌi loꞌu mwaanie maenga, ne kei lae i naꞌomiu huni maaꞌoohiꞌomu oto hao aana poꞌo ni henue i Kalili.”

²⁹ Oto a Pita ko aalamie uuri, “Ineu nou saꞌa roroꞌa ni toliꞌaasiꞌo ike, maꞌalana ahutana mo mwane ngeena kire ko tehi mwaaniꞌo.”

³⁰ Oto a Jisas ko teꞌuri hunie a Pita, “No ko unue oto huniꞌo uri i naꞌona kue kei ngara haꞌarue i rodo siꞌirini, o kei taateingeꞌinieu haꞌa-oolu uri o kaꞌa manataꞌinieu ike.”

³¹ Taꞌe a Pita ko tohungei ere aꞌailaꞌa oto uuri, “Ineu nou saꞌa roroꞌa ni ere ike urine, maꞌalana no ko mae peꞌiꞌo.” Na ahutana mo pwaarongoisuli kire ko meni ere oto noꞌone urine.

A Jisas E Lai Aarengaꞌi Weu Aana Hohola I Ketsemani

³² A Jisas na mo pwaarongoisuli ingeie kire lai hule aana leu satana i Ketsemani. Oto a Jisas ko teꞌuri hunire, “Omu ke iiꞌo kaꞌu i leu, maholo no ko lai aarengaꞌi.”

³³ Oto e toolea a Pita na Jemes na Jon peꞌie, na ko si aehota tolahiꞌe hiitoꞌo peꞌie saehuunge oto paine.

³⁴ Oto a Jisas ko teꞌuri huniraelu, “Saeku ko lae otoi hiꞌe na e malisine oto maenga. Omu ke iiꞌo kaꞌu i leu na omu ke lio-lio.”

³⁵ Oto a Jisas ko kele lae loꞌu taꞌau mwaanire, na ko lae pouruuru i aano haahie maana, na ko aehota aarengaꞌi uri mala ko mwadaꞌu sapesalunge ngeena ke suꞌuri hite aana.

³⁶ Oto ko eitanaie a God uuri, “Mamaꞌa, iiola o niie mai hunie ne ke hotelaꞌinie ko aasaieu oto. Mala ko mwadaꞌu, aana nou saie walu ola e mwadaꞌu mola huniꞌo, oto saeku o ke oolisie aana nga iini mwa-mwate. Taꞌe neꞌewau oto, o ke dau mola i sulie nga taa o saetoꞌo aana, na o ke suꞌuri deu i sulie nga taa nou saetoꞌo aana.”

³⁷ Oto a Jisas e aalihoꞌi loꞌu mei saana oolu pwaarongoisuli, na ko leesie kire ko maꞌahu mola. Oto ko teꞌuri hunie a Pita, “?E Saemon, uri o ko maꞌahu mola? ?Ohe o kaꞌa sai lio-lio ike peꞌieu nga kele maholoi sato?”

³⁸ Oto a Jisas ko heꞌi teꞌuri loꞌu hunire, “Omu ke lio-lio peꞌi aarengaꞌinge, mwaanie malaahonga e hane haahiꞌomu. Nou saie uri manatamiu e aꞌailaꞌa taane huni esuie mo ola diana, taꞌe sapemiu ni mola ko tataku.”

³⁹ Oto a Jisas ko heꞌi eelihoꞌi loꞌu huni aarengaꞌi, na ko ooni aana loꞌu mola taꞌa-taꞌa taungei aarengaꞌinge.

⁴⁰ Oto ko heꞌi ooli loꞌu mei i saana mo pwaarongoisuli ingeie, na ko leesie kire ko maꞌahu loꞌu mola, i sulie maada e hiꞌe oto hiitoꞌo. Na maholo kire lio loꞌu, kire kaꞌa saie ike loꞌu nga taa kire kei unue hunie.

⁴¹ Oto i purine oolune nga maai aarengaꞌinge, e aalihoꞌi loꞌu mei saada, oto ko teꞌuri hunire, “?Uri omu ko maꞌa-maꞌahu, na omu ko mamamalo ue? !E ado oto! E hule oto aana maholo kire kei pweloau a Kale Ni Iinoni i nimana mo iinoni oorahaꞌaala.

⁴² !Omu taꞌelaꞌi! !Kolu ke lae! !Lio kaꞌu! Iini nge ko pweloau ko hule oto.”

Mo Ramo Kire Tapolie A Jisas

⁴³ Oto maholo a Jisas ko ere-ere ue, na a Jiudas Iskariot ko hule oto peꞌie pulitaa paine, mo iini nge mo naꞌohai pris na mo haꞌa-uusulie aana mo Haꞌatolanga na mo rato ni mwane kire uusungeꞌinire mai peꞌie. Mwala ngeena kire mani hele naihi peꞌi diꞌe,

⁴⁴ na a Jiudas e unu aakau oto aana nga tolimaa hunire uuri, “Iini nge ne kei nono peꞌie, a Jisas otona. Ingeie oto omu ke tapolie na omu ke toolea.”

⁴⁵ Oto a Jiudas ko oodohie oto a Jisas, na ko unue hunie uuri, “Haꞌa-uusuli.” Na ko nono oto peꞌie.

⁴⁶ Oto kire tapolie a Jisas na kire ko hele maꞌutaꞌa oto aana.

⁴⁷ Taꞌe ngaeta iini e uure i leune e darasie naihi ingeie, oto ko lama mousie oto aalingana ngaeta koni-konihe a Naꞌohana Mo Naꞌohai Pris.

⁴⁸ Taꞌe a Jisas ko teꞌuri hunire, “?Uri omu unue ineu nga horopeli nge omu ko lae mai honosieu peꞌi naihi na peꞌi diꞌe urine?

⁴⁹ Ahutana dinge kaꞌu no ko talei oꞌoꞌo mola peꞌi haꞌa-uusulinge taꞌau i laona Nume Maaꞌi Peine. ?Aana e ue kaꞌu omu kaꞌa tapolieu oto aana maholona? Taꞌe ahutana mo ola ienini ko reu oto huni haꞌa-oaie nga taa mo propet e uusue i laona mo Uusu-uusu Maaꞌi.”

⁵⁰ Oto ahutana mo pwaarongoisuli kire si toliꞌaasie a Jisas, na kire ko meni tehi oto mwaanie.

⁵¹ Ngaeta iini nge e lae i sulie a Jisas aana maholona nga saanau nge e hoꞌosie mola mei sala mwaakule. Mo ramo ko sare tapolie noꞌone,

⁵² taꞌe e toliꞌaasie mola mei sala ingeie, oto e si tehi mola mwaakule mwaanire.

Kire Toolea A Jisas I Naꞌona Pulitaa Ni Lei-lei

⁵³ Oto kire toolea a Jisas taꞌau i nume a Naꞌohana Mo Naꞌohai Pris. Maholona mo naꞌohai pris, na mo rato ni mwane, na mo haꞌa-uusuli aana mo Haꞌatolanga a Mosis, kire mani loko aakau oto taꞌau i laona nume ngeena.

⁵⁴ Oto a Pita ko holo maholoi tala taane mola i sulire. E lae taꞌi sili i laona lolata aana nume a Naꞌohana Mo Naꞌohai Pris, oto e iiꞌo i aano peꞌie mo mwane ko kakakali, ko si rakani aana dunge.

⁵⁵ Oto mo naꞌohai pris na ahutana oto pulitaa ni lei-lei kire ko meni heitalengaꞌinie nga mo ola huni eerotaꞌinie a Jisas huni horo maesie haahie. Taꞌe kire kaꞌa dau oodoie ike nga mei ola.

⁵⁶ Mwala hunge kire ere aaelasie a Jisas aani eeronga, taꞌe kire ko meni ere hai aaopaꞌi mola, na mo laladonga ikire kaꞌa sada.

⁵⁷ Oto lae-lae ngaeta mo mwane kire uure, kire ko eerotaꞌinie a Jisas uuri,

⁵⁸ “Melu rongoa e unue uuri, ‘Ne kei ohoie Nume Maaꞌi Peine nge mwala kire asuie ie, na i laona oolu aata hai dinge ne kei esuie loꞌu nga iini haalu nge nga iinoni saꞌa asuie ike.’ ”

⁵⁹ Taꞌe maꞌalana kire ko ere urine, taꞌe mo ere-erenga ikire kaꞌa mani sada ike.

⁶⁰ Oto Naꞌohana Mo Naꞌohai Pris e uure i naꞌoda, ko si dolosi aana a Jisas uuri, “?E ue? ?Uri o kaꞌa toꞌo aana ike nga mei ola huni aalamie mo ola nge kire ko ere waeliꞌo aani ngeena?”

⁶¹ Taꞌe a Jisas e tolirohu mola. Oto Naꞌohana Mo Naꞌohai Pris ko dolosi loꞌu aana a Jisas uuri, “?Ohe iꞌoe ni oto a Kraes, Kalena God, iini e diana liutaa?”

⁶² Oto a Jisas ko aalamie uuri, “Ineu kaꞌu otona. Na aana nga maholo omu kei meni leesieu a Kale Ni Iinoni ne kei iiꞌo aana naꞌohai iiꞌo-iiꞌoha i pwalo-pwalona God Hahuꞌana Nanama, na kei lae mai i laona mei uuru uure taꞌau i salo.”

⁶³ Oto Naꞌohana Mo Naꞌohai Pris ngeena ko aꞌarie toꞌoni ingeie, aana ko tohungei saewasu, na ko teꞌuri, “!Ngeena kolu kaꞌa saetoꞌo aana ike loꞌu nga iini ke ere takoie!

⁶⁴ Omu meni rongoa oto maraamiu uri e ere mwakataꞌinie a God. ?Haꞌalaa nga taa nge omu kei unue aana?” Oto kire ko meni aalamie uuri, “!E malisine oto ke mae!”

⁶⁵ Oto ngaeta mwala ko aehota ngisuhie oto a Jisas. Na ngaeta mo iini kire ko pwesu honosie maana, oto kire ko si hidelie, na kire ko teꞌuri, “O ke unue kaꞌu uri a tei e hideliꞌo huni haataꞌinie uri iꞌoe propet toꞌohuu.” Oto mwala kakakali kire toolea a Jisas, na kire ko hidelie noꞌone.

A Pita E Taateingeꞌinie A Jisas

⁶⁶ A Pita e iiꞌo mola i laona lolata aana nume nge kire ko leie a Jisas aana, na ngaeta keni auꞌesu a Naꞌohana Mo Naꞌohai Pris ngeena e lae poi tapaliu.

⁶⁷ Maholo a keine e leesie a Pita ko rakani aana dunge, oto ko lio hahuroto aana, na ko teꞌuri hunie, “Iꞌoe o lae-lae noꞌone peꞌie a Jisas mwane ni Nasaret.”

⁶⁸ Taꞌe a Pita ko taateingeꞌinie, na ko teꞌuri, “Nou kaꞌa saie ike nga taa o ko ere i sulie.” Oto e taꞌelaꞌi, ko lai uure wau i aena maa aana para ahuie lolata ngeena. Na maholona kue ko ngara oto.

⁶⁹ Oto keni auꞌesu ngeena, ko leesie loꞌu weu a Pita na ko ooni aana mei walana loꞌu hunie mwala nge kire uure ngeena, ko teꞌuri, “Ingeie ngaeta iini oto aada ni ngeena.”

⁷⁰ Taꞌe a Pita ko heꞌi taateingeꞌinie loꞌu. E kaꞌa tewa loꞌu na ngaeta mwala nge kire uure ngeena, kire ko teꞌuri hunie a Pita, “Saꞌa mola iꞌoe ngaeta iini oto aada, i sulie iꞌoe noꞌone mwane ni Kalili.”

⁷¹ Oto a Pita e ere ni hoꞌasinge ko teꞌuri, “!Toꞌohuu oto mala God taꞌau i Lengi! !Nou kaꞌa manataꞌinie ike mwane nge omu ko unue ngeena!”

⁷² Oto mola aana maholona, kue ko heꞌi ngara loꞌu ruana nga ngaranga. Hoe, a Pita ko aamasitoꞌo aana mei wala nge a Jisas e unue uuri, “I naꞌona kue kei ngara haꞌarue i rodo siꞌirini, o kei taateingeꞌinieu haꞌa-oolu uri o kaꞌa manataꞌinieu ike.” Oto a Pita e si saie mola uri mei walana e oa oto, ko si ngara oto paine.