Tataroha Diana I Sulie A Jisas Kraes Nge A Mak E Uusue 13 - Tataroha Diana

A Jisas E Ere Lalai I Sulie Ohoilana Huilume I Jerusalem Na Nume Maaꞌi Peine

¹ Aana maholo a Jisas ko iisitaa mwaanie Nume Maaꞌi Peine, oto ngaeta iini aana mo pwaarongoisuli ingeie ko teꞌuri hunie, “Haꞌa-uusuli, o ke lio kaꞌu. Mo heri-herine Nume Maaꞌi Peine ngeena kire tohungei lio diana. Mo heu kire asuiꞌi eeni na kire tohungei peine oto hiitoꞌo.”

² Oto a Jisas ko aalamie uuri, “?O leesie mo heri-herine nume ngeena? Aana nga maholo oho-aasileni kei saro lae, na nga taꞌa-taꞌa ho heu e saꞌa oore ike loꞌu aana leu e oꞌoꞌo aana.”

³ Oto loꞌu mola i puri a Jisas e iiꞌo taꞌau i lengine Uuwo Ni Ei Olif aana leu kire sai lio haꞌaholo wau hunie Nume Maaꞌi Peine. Oto a Pita na a Jemes na a Jon na a Andru, kire lae mai maraada i saana.

⁴ Oto kire ko teꞌuri hunie, “O ke unue oodoiꞌemeelu maholo uri taa ni walu ola ngeena kei reu, na nga tolimaa uri taa huni haataꞌinie uri maholo e karaꞌini oto hunie walu olana kei reu.”

⁵ Oto a Jisas ko aalamire uuri, “Omu ke lio talamiu mwaanie nga iini e eeroꞌomu.

⁶ Aena aana mo iini hunge kire kei lae mai aana sataku, na kire kei teꞌuri, ‘Ineu oto a Kraes,’ na kire kei haꞌapweue mwala hunge.

⁷ Na omu kei rongoa mo oohotaa aana taꞌena nga leu aana walumalau, taꞌe mwaanie saemiu e liki-liki. Aena aana walu ola ngeena kire kei holaꞌi reu i naꞌo, taꞌe haꞌamangolana walumalau haꞌike ue ni ngeena.

⁸ Haiseuninge kei lae i matolana mo henue hai aaopaꞌi, na i matolana mo aalahanga hailiu. Hiolonga kei toolea mo iini hunge i laona walumalau, na nunu kei tola ahusie mo henue hunge. Taꞌe walu ola ienini ko haataꞌinie mola uri mo ola paine kei lae ue mai mala huꞌe ko aehota hiingeꞌinie sapesalunge hunie toꞌo-mwelanga.

⁹ “Oto omu ke lio talamiu aena aana mwala kei tooleꞌomu i laona leinge, na kire kei repusiꞌomu noꞌone i laona mo nume ni palo-palo, aena aana omu ko lulu i sulieu. Na kire kei tooleꞌomu i naꞌona mwala paine na mo inemauri haahie asunge ineu, hunie kire kei leiꞌomu. Aana maholo walu olana kei reu uurini, maholo iꞌomu otona huni unu diana aana Tataroha Diana hunire.

¹⁰ Aana tarohaꞌinilana Tataroha Diana kei holaꞌi lae hunie ahutana mwala aana walumalau, hai dinge ooreta ke si lae mai.

¹¹ Na maholo mo ramo kei tapoliꞌomu huni tooleꞌomu i laona leinge, omu ke suꞌuri tolahiꞌe oto hiitoꞌo aana nga taa omu kei unue. Aana maholona, omu ke unu tahangaꞌinie mo neꞌisaenga i laona manatamiu, aena aana omu saꞌa ere tohumiu ike, taꞌe Liꞌoa Maaꞌi ni kei hatongaꞌi huniꞌomu ngeena.

¹² Aana maholona kei tohungei aaela huniꞌomu toꞌohuu, aana mwala kei niie mo eeside maraada hunie horoꞌilada, na mo mamaꞌa kire kei deu urine noꞌone aana mo mwela ikire, na mo mwela noꞌone kire kei taꞌelaꞌi honosie mo meuꞌana ikire huni horo maesire.

¹³ Na ahutana mwala kei teungeꞌiniꞌomu aena aana omu ko lulu i sulieu. Taꞌe iini nge kei uure aꞌailaꞌa taraꞌasi aani hiiwalaimolinge lai hule aana haꞌamangolana, nge a God ke si haꞌa-uurie.”

¹⁴ (Mo iini nge kire saaie walana a Jisas i sulie tataꞌalanga ie, kire ke loꞌongaꞌi diana i sulie hunie kire ke rongo saie loꞌongaꞌinge aana.) Oto a Jisas ko heꞌi teꞌuri loꞌu, “Omu kei leesie mei ola aaela liutaa nge ko esuie naꞌonga hunie mo henue. Daniel 9:27 Mei olana kei uure i laona Nume Maaꞌi Peine a God, leu e kaꞌa malisine ike uri ke uure aana. Aana maholona mwala wau i Jiudia kire ke tahi takoie mo toloi henue, hunie kire ke lai mumuni.

¹⁵ Na mala nga iini e iiꞌo taꞌi koluhana nume ingeie, nge ke tahi oto na ke suꞌuri waelie loꞌu nga maholo huni lai toolea nga mo ola ingeie hai nume.

¹⁶ Na mala nga iini ko euꞌesu i hohola, ke tahi oto na ke suꞌuri waelie loꞌu nga maholo huni lai toolea nga mo toꞌoni ingeie mai nume.

¹⁷ Na aama-aamasilana mo huꞌe ko hiꞌe-hiꞌe aani mwela, na mo iini nge kire ko haꞌa-haꞌasusuhie ue mo wee-wee ikire.

¹⁸ Taꞌe omu ke aarengaꞌi mola hunie walu ola ngeena ke suꞌuri hule aamiu aana maholo e aasa aana mo waro-waro ni wawai.

¹⁹ Aana siꞌohaꞌanga kei tola aana maholona, kei peine liutaa aana loꞌu taꞌena nga ola ko totola uure oto mai aehotalana walumalau hule mai aana mo dingena. Na e saꞌa heꞌi aaela loꞌu urine aana nga dinge.

²⁰ Mala uri a God kaꞌa holo oꞌoruꞌe aana maholo ni siꞌohaꞌanga ngeena, nge nga iini saꞌa mauri ike loꞌu. Taꞌe i sulie a God e loꞌongaꞌinie mo iini nge e lio hilisire oto, nge mone kei holo oꞌoruꞌe aana maholona.

²¹ “Oto aana maholona mala uri nga iini ko unue huniꞌomu, ‘!Lio kaꞌu! A Kraes oto ie,’ wa ‘!Lio kaꞌu! Ingeie oto waune,’ taꞌe omu ke suꞌuri hiiwalaimoli aana.

²² Aena aana mo kraes eero-eero na mo propet eero-eero hunge kire kei lae mai. Na mala ko mwadaꞌu, kire kei haꞌatakaloa mo iini nge a God e lio hilisire oto. Kire kei haataꞌinie mo tolimaa na mo huꞌi-huꞌite aana mwala, taꞌe mwaanie omu hiiwalaimoli aada.

²³ Aena urine, nge no ko holaꞌinaꞌo haꞌapasuliꞌomu oto aana walu olana, hunie omu ke lio diana talamiu.”

A Jisas E Ere Lalai I Sulie Maholo Kei Eelihoꞌi Loꞌu Mei Aano

²⁴ Oto a Jisas ko heꞌi teꞌuri loꞌu, “Oto loꞌu mola i purine mo dinge ni siꞌohaꞌanga ngeena, sato kei ulue oto maana, na e saꞌa pwaa loꞌu. Waro-waro e saꞌa heꞌi sineli loꞌu.

²⁵ Na mo heeꞌu taꞌau i laona salo kei teke i aano, na ahutana mo ola taꞌau i laona salo kei hei-oolisi mango. Aesaea 13:10, 34:4

²⁶ Oto purihaꞌana, mwala kei leesieu oto a Kale Ni Iinoni, ne kei lae oto mai i laona mei uuru peꞌie nanamanga paine na manikuluꞌanga.

²⁷ Na aana maholona, ne kei uusungeꞌinie mo ensel hunie kire ke lae aana e hai suꞌu-suꞌue aana walumalau, huni soꞌokonie mo iini nou lio hilisire mwaanie e hai maai dengi aana walumalau, uure aana ngaeta ngongoꞌai welumalau lai hule aana ngaeta ngongoꞌai welumalau.”

A Jisas E Aalahuu Aana Ai Fik

²⁸ Oto a Jisas ko heꞌi teꞌuri loꞌu, “Saeku omu ke rongo saie erenga ni aalahuunge ie i sulie ai fik. Maholo mo sasarana ko aehota ure na ure-urana ko maau, nge omu saie oto uri maholo hunie mo waro-waro ni madoro e karaꞌini oto mai eena.

²⁹ Na e urine noꞌone aana maholo omu kei leesie walu ola ienini ko reu uurini, omu ke si manataꞌinie uri e karaꞌinie oto maholo no ko ere i sulie ni ngeena.

³⁰ No ko unue oto huniꞌomu uri walu ola ienini kei saro oa mango mola ue oodoie mwala aana pwaunge siꞌiri ie na kire kaꞌa mae ue.

³¹ I Lengi na i aano kei suu, taꞌe walaku e saꞌa suu ike oto ooꞌoo.”

Mwala Ke Iiꞌo Aakau Hunie Oolinge Mai A Kraes

³² A Jisas e unue noꞌone uuri, “Nga taꞌa-taꞌa iini e kaꞌa saie ike hai dinge wa maholoi sato uri taa ne kei ooli loꞌu mei. Maꞌalana mo ensel taꞌau i Lengi, wa uri ineu a Kale, na melu kaꞌa saie ike. Taꞌe a Mamaꞌa taꞌau i Lengi haliꞌite nge e saie maholona.

³³ Aena urine, omu ke lio talamiu na omu ke dau aakau taraureꞌi suli maholo, aena aana omu kaꞌa saie ike maholo ne kei ooli loꞌu mei.

³⁴ Aena aana kei urihana, mwane e lae mwaanie nume ingeie hunie ngaeta hanue. Oto e neꞌie mo mwane auꞌesu ingeie hunie kire ke lio i sulie nume, na e niie mo esunge hai aaopaꞌi hunie mwala auꞌesu ingeie, oto e si unue hunie kakalihe hunie ke kakali diana.

³⁵ Na e urine loꞌu mola huniꞌomu, omu ke lio-lio na omu ke dau-deu aakau diana. Aena aana omu kaꞌa saie ike maholo nge mwane e toꞌo aana nume kei hule, mwaanie ohe i seulehi, wa i upui rodo, wa i waꞌalie, wa i maahuꞌo-huꞌo.

³⁶ Mwaanie da na e tolana hule mola lau-leu, na e lae mola mai leesie omu ko maꞌahu liu.

³⁷ Oto nga taa no ko unue huniꞌomu ienini, no ko unue noꞌone hunie ahutana mwala. Dau aakau suli maholo.”