Tataroha Diana I Sulie A Jisas Kraes Nge A Mak E Uusue 12 - Tataroha Diana

A Jisas E Aalahuu Aana Mo Mwane Aaela Ko Lio I Sulie Hohola

¹ Oto a Jisas ko aehota ere ni aalahuunge hunire uuri, “Ngaeta mwane e oꞌoꞌo oto ko hesie hohola aani grep. Oto e para ahuie, na e asuie leu huni losie mo grep hunie kei neꞌi waen, na e tohue saohai nume huni kakakali. Oto e haꞌamangoa hahuꞌana hohola ingeie ngeena urine, e si haꞌahaulaa aana ngaeta mo mwane hunie kire ke lio i sulie aana maholo ko lae i suli henue.

² Oto e hule aana maholo ni soꞌokoninge, a mwaena ko uusungeꞌinie ngaeta koni-konihe ingeie huni toolea mai nga taa mo mwane ko lio i sulie hohola ingeie kei niie hunie.

³ Taꞌe mo mwane ngeena kire wini-winie mola koni-konihe ngeena, na kire uusungeꞌi eelihoꞌi aana mola mwaakule.

⁴ Oto poro painena ko heꞌi uusungeꞌinie loꞌu ngaeta koni-konihe ingeie wau i saada. Oto kire ko heꞌi seunie loꞌu, na kire rapu i pweune, na kire ko horo waelie oto hiitoꞌo.

⁵ Oto a mwaena ko heꞌi uusungeꞌinie loꞌu ngaeta koni-konihe ingeie, taꞌe kire horo maesie loꞌu mola. Na mo iini hunge aana mwala auꞌesu ingeie, taꞌa-taꞌa taungei mei olana e rau noꞌone aada urine, aana kire rapusie ngaeta mo iini aada, na kire horo maesie ngaeta mo iini aada noꞌone.

⁶ Oto lae-lae a mwaena e toꞌo aana mola taꞌa-taꞌa iinoni e oore loꞌu huni haꞌatolaa, taꞌe taꞌa-taꞌa mwela mouteꞌi ingeie ni otona. Oto a porona ko si uusungeꞌinie oto a kalena, aana e loꞌongaꞌi uuri, ‘A kaleku haꞌalaa kire kei haꞌamaꞌu aana.’

⁷ Taꞌe mwala auꞌesu ngeena kire ko si meni ere i sulie mola uuri, ‘Mwane nge kei toꞌo aana hohola ngeena oolisie aamana oto ie. Kolu ke horo maesie mola hunie kolu ke toꞌo aana oto hohola ienini.’

⁸ Oto kire tapolie na kire ko horo maesie oto. Na kire ko aasie oto wau i purine para aana hohola.”

⁹ Oto a Jisas ko dolosi aada uuri, “?Haꞌalaa nga taa nge poro paine haahie hohola ngeena kei esuie aana mwala ngeena? Maholo kei lae mai, nge kei tohungei horo suuheꞌinie oto mwala aaela ngeena, na kei haꞌahaulaa loꞌu hohola ngeena aana ngaeta mwala aaopa.

¹⁰ Omu saie kaꞌu oto Uusu-uusu Maaꞌi e unue uuri, Hau nge mwala tou-tohu nume kire leledie kaꞌu, e si neꞌie tohungei heu susu aana nume.

¹¹ A God ni e asuie urine, na e lai lio manikuluꞌe i maaka mo iinoni. Sam 118:22-23 ?Taꞌe e ue omu kaꞌa rongo saie?”

¹² Oto mo naꞌohai mwane aana mo Jiu kire ko sare tapolie mola a Jisas, aana kire rongo saie mola uri aalahuunge a Jisas aana mo mwane aaela ngeena ko ere mola i sulire. Taꞌe kire maꞌuteꞌinie mola mwala e hunge, oto kire toliꞌaasie, kire si lae mola mwaanie.

Mo Rato Ni Jiu Kire Lupweꞌi Dolosi I Sulie Takis

¹³ Oto mo naꞌohai mwane aana mo Jiu kire ko uusungeꞌinie ngaeta mo Parise na ngaeta mo iini aana pulitaa a Herod huni lai pweloa a Jisas aani dolosinge.

¹⁴ Kire lae mai saana a Jisas, oto kire ko teꞌuri, “Haꞌa-uusuli melu saie uri walaimolinge ni oto o ko unu-unuena. Oto o kaꞌa aapwasu ike aana nga taa mwala aaopa ko loꞌo-loꞌongaꞌinie aena aana o kaꞌa lio ike hunie maana mo iinoni, taꞌe o ko haꞌa-uusuli mola i sulie hari-huninge a God hunie mo iinoni. Oto o ke unue oodoiꞌemeelu. ?Uri e adona taane huni niie takis hunie aalahanga ni Rom wa haꞌike?”

¹⁵ Taꞌe a Jisas e lio saie mola mo pwelonga ikire, oto ko aalamire uuri, “?E ue omu ko sare lupweꞌi pwaoau? Omu ke haataꞌinie kaꞌu seleni hunie takis ngeena aaku.”

¹⁶ Oto kire toolea mai ngaeta seleni ni Rom hunie, oto ko dolosi aada uuri, “?A tei ni nunune na satana aana seleni ienini?” Oto kire ko aalamie uuri, “Inemauri ni Rom ni ngeena.”

¹⁷ Oto a Jisas ko teꞌuri hunire, “Ko urine, omu ke nii eelihoꞌi aana hunie inemauri ngeena mo ola ingeie, na hunie a God mo iini a God.” Na maholo kire rongo urine, oto kire ko si tohungei pangataꞌinie a Jisas.

Mo Rato Kire Lupweꞌi Dolosi I Sulie Taꞌelaꞌinge Mwaanie Maenga

¹⁸ Oto i puri, ngaeta mo Sadiusi kire lae mai saana a Jisas. Ikire mo Sadiusi ngeena kire hiiwalaimoli uri nga iini saꞌa taꞌelaꞌi ike loꞌu mwaanie maenga. Oto kire ko teꞌuri hunie a Jisas,

¹⁹ “Haꞌa-uusuli, a Mosis e uusue haꞌatolanga ie hunikie. Mala uri nga mwane ko mae mwaanie huꞌe, na e kaꞌa toꞌo kalena, nge aasine mwane ke toꞌo aana loꞌu mola nao keni iihana, hunie ke haꞌahute mwela oolisie aasine nge e mae ngeena. Diutronomi 25:5-6

²⁰ Oto wau i naꞌo, e hiu mwaasine mwane kire mani hute na kire oꞌoꞌo i leu. A naꞌohada e tola huꞌe, oto e mae mola na e kaꞌa toꞌo mwela.

²¹ Oto ruana nga mwane ko heꞌi toꞌo aana loꞌu a keine, na ko heꞌi mae loꞌu mola, na e kaꞌa toꞌo mwela ike noꞌone. Na ko reu oto loꞌu urine hunie oolune nga aasine.

²² Na lae-lae ko reu oto urine hunie ahutana e hiu mwaasine mwane ngeena. Ahutada kire mani toꞌo aana a huꞌena, taꞌe lae-lae kire mae na a huꞌena kaꞌa toꞌo mwela. Oto a huꞌena e si mae ooreta.

²³ ?Haꞌalaa, kei hule aana hai dinge taꞌelaꞌinge, a huꞌe ngeena kei neꞌi huꞌe a tei aana e hiu mwaasine ngeena, aana kire mani toꞌo aana mola urine?”

²⁴ Oto a Jisas ko aalamire uuri, “Neꞌisaenga iꞌomu e tohungei takalo oto hiitoꞌo, aena aana omu kaꞌa saie ike mo Uusu-uusu Maaꞌi wa nanamanga a God.

²⁵ Maholo mwala kei taꞌelaꞌi mwaanie maenga, nga tola-huꞌanga wa nga toꞌo-poronga haꞌike loꞌu. Taꞌe kire kei iiꞌo oto mola mala mo ensel taꞌau i Lengi.

²⁶ ?Taꞌe hatarie taꞌelaꞌinge mwaanie maenga, aana e ue omu kaꞌa rongo saie nga taa a Mosis e uusue? Maholo a God e ere peꞌie a Mosis i saana kele ai nge e kaꞌa waru aana dunge, e unue hunie a Mosis uuri, Ineu oto God nge a Ebraham na Aesak na Jekob ko palo-paloa. Eksodas 3:6

²⁷ Kie mani saie oto uri mo iini e mauri mola kire ko palo-paloa God. Oto uusu-uusu ie ko haataꞌinie uri maꞌalana Ebraham, na Aesak na Jekob kire mani mae oto, taꞌe kire mauri mola ue taꞌau i Lengi. !Neꞌisaenga iꞌomu mo Sadiusi ko lae takalo oto hiitoꞌo!”

Ngaeta Haꞌa-uusuli E Dolosi I Sulie Naꞌohai Haꞌatolanga

²⁸ Ngaeta haꞌa-uusuli aana mo Haꞌatolanga a Mosis e iiꞌo noꞌone i leune, ko pwaa-pwaarongo i sulie kire ko ere-ere haitelili peꞌie a Jisas. E rongo saie uri a Jisas ko niie mei wala ni aalaminge diana hunie mo Sadiusi, oto ko dolosi aana uuri, “?Nga haꞌatolanga uri taa ni oto e roroꞌa liutaa?”

²⁹ Oto a Jisas ko aalamie uuri, “Naꞌohai haꞌatolanga oto ienini, !Rongo diana aana, iꞌomu mo Israel! A God, aalaha ikie, ingeie oto taꞌa-taꞌa God.

³⁰ O ke manata diana hunie a God, aalaha iꞌoe, oto aana ahutana saemu, na aana ahutana maurihaꞌamu, na aana ahutana mo neꞌisaenga iꞌoe, na aana ahutana aꞌailaꞌanga iꞌoe. Diutronomi 6:4-5

³¹ “Oto ruana nga naꞌohai haꞌatolanga loꞌu ienini, O ke manata diana hunie auhenue iꞌoe oto mala o manata diana huniꞌo maraamu. Levitikas 19:18 Na nga haꞌatolanga kaꞌa liutaa ike loꞌu aana e ro haꞌatolanga ienini.”

³² Oto a haꞌa-uusuli ngeena ko teꞌuri hunie a Jisas, “E toꞌohuu oto, Haꞌa-uusuli. E toꞌohuu oto mala o unue uri taꞌa-taꞌa God mola e neꞌi aalaha, na nga God aaopa loꞌu mwaanie haꞌike.

³³ Oto ikie iinoni kie ke manata diana hunie a God oto aana ahutana saeka, na aana ahutana mo neꞌisaenga ikie, na aana ahutana aꞌailaꞌanga ikie, na kie ke manata diana noꞌone hunie mo iinoni, mala kie manata diana hunikie maraaka. Na e tohungei roroꞌa oto liutaa hunie kie ke lulu i sulie e ro haꞌatolanga ie, liutaa aana kie ke uunu ola hunie a God.”

³⁴ Oto a Jisas e saie uri aalaminge a haꞌa-uusuli ngeena e lae aani saenanaunge, ko si teꞌuri hunie, “Iꞌoe, o karaꞌinie oto Aalahanga a God.” Oto i puri, mwala ko si meꞌu mola huni dolosie loꞌu nga mei ola aana a Jisas.

A Jisas E Aꞌailaꞌasie Mo Parise Aana Dolosinge

³⁵ Oto maholo a Jisas e haꞌa-uusulie mwala i laona Nume Maaꞌi Peine, e dolosie mei dolosinge uuri, “?E ue nge mo haꞌa-uusuli aana mo Haꞌatolanga a Mosis ko unue uri a Kraes kei hute mola mai aana komu a Deved Inemauri?

³⁶ Taꞌe a Liꞌoa Maaꞌi e unue hunie a Deved ke uusue i sulie a Kraes uuri, A God e unue hunie aalaha ineu, uuri ‘O ke iiꞌo kaꞌu i pwalo-pwaloku aana naꞌohai iiꞌo-iiꞌoha, lai hule aana ne kei kama haahie mo maelonga iꞌoe i aano hunie o ke uuri puli-pulisire.’ Sam 110:1

³⁷ A Deved maraana ni e unue uri a Kraes e neꞌi aalaha ingeie. ?Taꞌe e ue? ?Mwane nge e hute mola aana komu a Deved maraana, kei heꞌi neꞌi aalaha ingeie loꞌu uri taa eena?” Na mwala hunge kire rongoa peꞌi ilenimwaꞌenga.

A Jisas E Haꞌapasu Honosie Mo Haꞌa-uusuli Aana Mo Haꞌatolanga A Mosis

³⁸ Oto a Jisas ko heꞌi haꞌa-uusulie loꞌu mwala na ko teꞌuri, “Omu ke lio talamiu mwaanie mo haꞌa-uusuli aana mo Haꞌatolanga a Mosis nge kire ko walo liu peꞌi toꞌoni tetewa lauleuniꞌe ngeena. Aena kire saetoꞌo aana uri mwala ke haꞌapainaꞌara maholo kire ko walo liu i laona mo leu ni uusiꞌe.

³⁹ Na kire ko lio hilisie mo naꞌohai iiꞌo-iiꞌoha i laona mo nume ni palo-palo, na mo naꞌohai tolinge aani ngeuhe.

⁴⁰ Taꞌe kire ko haꞌamweꞌu-mweꞌue mola mo nao keni, hule aana kire ko pelie loꞌu mo nume ikire mwaanire. Oto kire ko si aarengaꞌi tewa loꞌu i maana mwala hunie mwala ke neꞌisae uri ikire mwala maaꞌi. !Ikire ngeena haꞌaloilada kei lae loꞌu liutaa!”

Mei Nao Keni E Niie E Ro Peni Pulu

⁴¹ A Jisas e iiꞌo i hoorana leu ni nii-nii toꞌoha i laona Nume Maaꞌi Peine, oto ko haꞌa-haꞌamaesie mwala kire ko niie mo niinge ikire. Mwala hunge kire toꞌo-toꞌo kire ko niie mei toꞌoha oto paine.

⁴² Na lae-lae mei nao keni meitale e lae loꞌu mei, oto ko niie mola e ro kele peni pulu.

⁴³ Oto a Jisas e soie mai mo pwaarongoisuli ingeie, oto ko teꞌuri hunire, “No ko unue oto huniꞌomu uri nao keni meitale ienini e nii peine liutaa aana ahutana mwala ko nii ie.

⁴⁴ Aana ahutana mwala ngeena, kire ko niie mola kele ngangaꞌai ola aana toꞌo-toꞌonga ikire. Taꞌe mei nao keni meitale ie, kele mei toꞌoha uri huni meu-meuri aana ingeie oto ko nii mangoa ienini.”