Tataroha Diana I Sulie A Jisas Kraes Nge A Mak E Uusue 1 - Tataroha Diana

1A Jon Loto Maaꞌi E Dau Aakau Aana Tala Hunie A Kraes

¹ Tataroha Diana i sulie a Jisas Kraes, Kalena a God e aehota oto mala

² uusulana e lae i laona uusu-uusu a Propet Aesaea, aana e unue uuri, Ne kei uusungeꞌinie hurulaꞌaa ineu wau i naꞌomu hunie ke dau aakau aana tala iꞌoe loosiꞌo. Malakae 3:1

³ Nga iini ko soi-soi peine i laona hanuesala uuri, “Omu ke dau aakau aana tala loosie laenga mai a Aalaha, na omu ke haꞌa-oodohie tala ni lae ingeie.” Aesaea 40:3

⁴ Oto a Jon Loto Maaꞌi e iiꞌo i henuesala, na ko tarohaꞌinie hunie mwala uri kire ke aaliꞌu toꞌohuu mwaanie oorahaꞌaa, nge kire ke si loto maaꞌi hunie a God ke saeꞌaasie mo oorahaꞌaa ikire.

⁵ Na mwala hunge kire lae mai saana uure mwaanie i Jerusalem na taꞌena nga leu loꞌu aana poꞌo ni henue i Jiudia. Kire ko haꞌahoue oto mo oorahaꞌaa ikire, oto a Jon ko si loto maaꞌi aada i laona wai peine i Jodan.

⁶ A Jon e hoꞌo-hoꞌosie mola toꞌoni aaela kire asuie aana iihune kamel, na e hoꞌosie haahie danumana rorotoꞌoni aani teꞌe-teꞌei puluke. Na ngaulaa ingeie oto mo oru na mo ngingidue.

⁷ Na e tarohaꞌinie i naꞌona mwala uuri, “Ngaeta iini kei lae mai puriku, ingeie e paine loꞌu liutaa aaku, hule aana ineu na nou kaꞌa diana ike malisine ne ke asu mala koni-konihe huni luhesie hoꞌohaahiꞌae ingeie.

⁸ Ineu no ko loto maaꞌi eemiu mola aani wei, taꞌe ingeie kei loto maaꞌi eemiu aana Liꞌoa Maaꞌi.”

A Jon E Loto Maaꞌi Aana A Jisas

⁹ Oto aana maholona a Jisas e lae mai mwaanie i Nasaret aana poꞌo ni henue i Kalili, na a Jon e loto maaꞌi aana i laona wai i Jodan.

¹⁰ Aana maholo a Jisas e taꞌelaꞌi poi mwaanie wai, e lio na ko leesie taꞌau i Lengi e taha, na Liꞌoa Maaꞌi ko siho oto i lengine mala hiroikuu.

¹¹ Na mei wala uure taꞌau i Lengi ko teꞌuri, “Iꞌoe oto hahuꞌana kaleku, na nou tohungei manata diana huniꞌo, na no ko ilenimwaꞌe oto liutaa haahiꞌo.”

A Satan E Malaahongana A Jisas

¹² Na oto lau-leu Liꞌoa Maaꞌi e toolea i laona hanuesala

¹³ aana leu nga mwala haꞌike aana, taꞌe mo ola mauri ni meꞌesu haliꞌite kire iiꞌo wau i leune. Oto a Satan e malaahongana hunie hai aawalai hei dinge wau i leune, oto mo ensel kire si lio i sulie.

A Jisas E Soie E Hai Mwane Wee-weesi

¹⁴ Oto i purine kire neꞌie a Jon i nume ni hoꞌo, a Jisas e lae hunie poꞌo ni henue i Kalili na ko tarohaꞌinie Tataroha Diana a God.

¹⁵ Na e ere uurini, “E hule oto aana pongi nge holosilana e lae, uri Aalahanga a God e karaꞌini oto. Omu ke aaliꞌu mwaanie mo oorahaꞌaanga iꞌomu, na omu ke hiiwalaimoli aana Tataroha Diana.”

¹⁶ Maholo a Jisas e lae-lae i reune Aasi I Kalili, na ko leesie ro mwane wee-weesi, a Saemon na a Andru aasine. Kirerue ko weesi aani huꞌo.

¹⁷ Oto a Jisas ko teꞌuri hunirerue, “More ke lae mai i sulieu, na more ke lulu i sulieu hunie ne ke haꞌasaiꞌomoreꞌi aana tolahai weesinganga hunie mo iinoni.”

¹⁸ Oto e ro mwaasine ngeena ko tolana toliꞌaasie oto mo huꞌo ikirerue, na kirerue ko lulu i sulie oto a Jisas.

¹⁹ Oto maholo ko ada loꞌu hao, na ko heꞌi leesie loꞌu ngaeta ro mwaasine, a Jemes na Jon peꞌie aamadarue a Sebedi. Ikire i laona iiola, na kire ko seumaa aana mo huꞌo ikire.

²⁰ Oto a Jisas e soirerue, na kire ko toliꞌaasie oto aamada a Sebedi na mo koni-konihe i laona iiola, kirerue ko lulu i sulie oto.

A Jisas E Haꞌa-uurie Mwane Liꞌoa Aaela Nge Aana

²¹ Oto kire ko lae oto hunie huilume i Kapaneam, na aana Dinge Maaꞌi Mo Jiu, a Jisas e lae huni haꞌa-uusuli taꞌau i laona nume ni palo-palo ikire.

²² Na ahutana mwala ko meni pangataꞌinie haꞌa-uusulinge ingeie, aana haꞌa-uusulinge ingeie e kaꞌa urihana ike mo haꞌa-uusuli aana mo Haꞌatolanga a Mosis, aana ko haꞌa-uusuli aana nanamanga.

²³ Na nga mwane liꞌoa aaela aana ingeie noꞌone wau i laona nume ni palo-palo aana maholona. A mwaena ko toolea oto aawaranga paine na ko unue uuri,

²⁴ “!Aaia! !Jisas ni Nasaret! ?O kei ue emeelu loꞌu eena? ?Ohe o lae oto mai huni waeliꞌemeelu ni ngeena? Ineu nou saiꞌo mola. Iꞌoe iini maaꞌi a God.”

²⁵ Oto a Jisas ko si ere aana liꞌoa aaela ngeena ko teꞌuri, “O ke rohu oto, na o ke lae mwaanie a mwane ngeena.”

²⁶ Oto liꞌoa aaela ngeena e papataꞌinie a mwaena hailiu, e si aawara, na ko iisitaa oto mwaanie.

²⁷ Na ahutana mwala ko meni pangataꞌi, na kire ko dolosi heiliu oto i matolada uuri, “?Haꞌa-uusulinge haalu uri taa ni ie? Mwane ngeena ko ere aana nanamanga. E ere hunie mo liꞌoa aaela, oto kire tola oto i sulie.”

²⁸ Na oto lau-leu tataroha aana e taro oto ahusie ahutana mo henue kali-kelie i Kalili.

A Jisas E Haꞌa-uurie Mwala Hunge Mwaanie Mo Maelaa Hai Aaopaꞌi

²⁹ Oto a Jisas na e hai mwane peꞌie, kire iisitaa mwaanie nume ni palo-palo, kire ko si oodohie nume a Saemon na Andru.

³⁰ Na keni hungaona a Saemon e eno taane i nume aana ko tohungei mataꞌi oto hiitoꞌo. Oto kire haꞌarongoa a Jisas aana.

³¹ Na e lae mai saana, oto e hele i kiꞌine na ko taꞌea. Oto mataꞌi e tolana mango oto mwaanie, ko si raretaꞌinire.

³² Oto aana maholo ko seulehi oto, nge mwala kire toolea mai mo mae-maeaꞌa hunge i saana a Jisas, na ngaeta mo iini mo liꞌoa aaela aada noꞌone.

³³ Ahutana mwala ni Kapaneam kire loko tarakoni i maana nume.

³⁴ A Jisas e haꞌa-uurie mwala hunge aana mo maelaa hai aaopaꞌi e hite aada, na e oohe aasie noꞌone mo liꞌoa aaela mwaanie mwala hunge. E kaꞌa toliꞌaasie ike mo liꞌoa aaela ngeena kire ke ere, aena aana kire manataꞌinie oto.

A Jisas E Tarohaꞌi Weu Aana Poꞌo Ni Henue I Kalili

³⁵ Oto i maahuꞌo-huꞌo na e kaꞌa dangi ue, a Jisas e taꞌelaꞌi na e lae maraana takoie leu nga mwala haꞌike aana, nge e si aarengaꞌi.

³⁶ Lae-lae a Saemon na ngaeta mo iini loꞌu peꞌie, kire lae huni heitalea.

³⁷ Oto maholo kire lio oodoie, kire ko teꞌuri hunie, “Ahutana mwala ko loꞌohiꞌo.”

³⁸ Taꞌe a Jisas e aalamire uuri, “Haꞌike, taꞌe kolu ke lae aana ngaeta mo huilume loꞌu, hunie ne ke laeliwala noꞌone nada, i sulie nou lae mai huni esu oto urine.”

³⁹ Oto e si lae kalie ahutana mo huilume i Kalili peꞌi laeliwalanga i laona mo nume ni palo-palo mo Jiu, na peꞌi oohe aasie mo liꞌoa aaela loꞌu noꞌone.

A Jisas E Haꞌa-uurie Mwane Maelaa Aaela E Waelie Sapena

⁴⁰ Na ngaeta mwane e toꞌo aana maelaa ni osa, e lae mai pouruuru i naꞌona a Jisas, na ko haꞌatohu aana uuri, “Mala o ko mwaꞌe-mwaꞌe, o ke kuraa sapeku hunie ne ke rereꞌa adona iiꞌonga loꞌu peꞌie mwala a God.”

⁴¹ A Jisas e aamasie oto liutaa, oto e si susueꞌinie wau nimana huni hele i sapena mwaena, na ko teꞌuri, “Iau, nou mwaꞌe-mwaꞌe taane. Sapemu ke mola oto.”

⁴² Oto mola lau-leu aana maholo e ere urine, maelaa ni osa ngeena e tolana mango oto mwaanie, na sapena e mola oto.

^43-44 Oto a Jisas ko si ere aana a mwaena uuri, “!O ke rongo! Mwaanie o haꞌa-haꞌarongoa nga iini aana nga taa e rau. Taꞌe o ke oodo mola i saana mo pris hunie kire ke saie uri sapemu e mola oto. Na o ke niie uuraaꞌinge hunie a God mala mo Haꞌatolanga a Mosis e unue. Urine ahutana mwala kire ke si meni saie uri sapemu e mola oto.”

⁴⁵ Taꞌe a mwaena e lae taꞌau ngeena na ko aehota tarohaꞌinie oto hailiu. Na aena ko tohungei ere hiitoꞌo i sulie leune, oto hule aana a Jisas e kaꞌa sai lae haadaꞌi ike loꞌu takoie nga huilume. A Jisas e lae mola aana mo henuesala nge nga mwala haꞌike aani, na mwala kire ko si lae mola mai saana uure mwaanie taꞌena nga leu.