Matiu 4 - Tataroha Diana

A Satan E Malaahongana A Jisas

¹ Oto Liꞌoa Maaꞌi a God e naꞌona loꞌu a Jisas huni lae i laona hanuesala hunie a Satan kei malaahongana.

² A Jisas e iiꞌo i laona hanuesala hunie hai aawalai hei dinge na hai aawalai hei rodo, na e kaꞌa hikana nga mei ngeulaa aana maholona, oto ko hiolo.

³ Oto a Satan e lae mai saana na ko teꞌuri hunie, “Mala o ko neꞌie Kalena God toꞌohuu, o ke unue mo heu ngeena ke neꞌi bred.”

⁴ Taꞌe a Jisas e aalamie ko teꞌuri, “Mo Uusu-uusu Maaꞌi e unue uuri, Iinoni e saꞌa mauri ike mola aani bred hahaiteli, taꞌe walana a God haꞌalaa ko meuri aana.” Diutronomi 8:3

⁵ Oto a Satan ko heꞌi toolea loꞌu a Jisas i Jerusalem, na ko lai haꞌa-uuresie oto taꞌau i lengine ho susumaa aana Nume Maaꞌi Peine,

⁶ ko si teꞌuri loꞌu hunie, “Mala o ko neꞌie Kalena God toꞌohuu, o ke toliꞌaasiꞌo uure i lengi i leu hunie o ke teke hao i aano. Aana mo Uusu-uusu Maaꞌi e unue uuri, A God kei uusungeꞌinie mo ensel ingeie hunie kire ke talaꞌahuaꞌo aana nimada, mwaanie aeꞌaemu e hite aana nga ho heu.” Sam 91:11-12

⁷ Oto a Jisas ko aalamie a Satan uuri, “Taꞌe mo Uusu-uusu Maaꞌi e unue noꞌone uuri, Omu ke suꞌuri oohongie a God Aalaha iꞌomu.” Diutronomi 6:16

⁸ Oto a Satan ko heꞌi toolea loꞌu a Jisas hunie toloi henue e lai lengi liutaa, na ko haataꞌinie aana ahutana mo henue paine aana walumalau ie, na oto taꞌena nga ola manikuluꞌe aani.

⁹ Na a Satan ko teꞌuri hunie a Jisas, “Mala uri o kei pouruuru ni haꞌamaꞌunge aaku na o kei palo-paloau, nge ne kei niie ahutana mo ola ienini namue.”

¹⁰ Oto a Jisas ko aalamie loꞌu uuri, “Tahi mwaanieu Satan aana mo Uusu-uusu Maaꞌi e unue uuri, Omu ke palo-paloa mola taꞌe a God Aalaha iꞌomu, na omu ke asu mola nana taꞌe ingeie haliꞌite.” Diutronomi 6:13

¹¹ Oto aana maholona a Satan e lae mwaanie a Jisas, na mo ensel ko si lae oto mai saana huni peꞌie.

A Jisas E Aehota Haꞌa-haꞌa-uusulie Mwala

¹² Maholo a Jisas e rongoa uri a Jon ingeie i laona nume ni hoꞌo, oto ko lae oto hunie poꞌo ni henue i Kalili.

¹³ Aana maholona a Jisas e lai liu i Nasaret, oto e lai iiꞌo aana huilume i Kapaneam karaꞌinie Aasi I Kalili aana poꞌo ni henue e ro komu ni Jiu, a Sebulun na a Naptali.

¹⁴ A Jisas e lai iiꞌo i leune huni haꞌa-oaie nga taa nge a Propet Aesaea e unue uuri,

^15-16 Raa-raa e raa haahire mo iini aana poꞌo ni henue a Sebulun na a Naptali, na mo iini poꞌo i eesi aana wai i Jodan, na mo Aapoloa Aaopa aana poꞌo ni henue i Kalili. Mwala ngeena kire iiꞌo kaꞌu i laona rodohono na i mamalutana maenga, taꞌe maholo ie, kire ko si leesie matapwanga paine. Aesaea 9:1-2

¹⁷ Uure aana maholona a Jisas e lai iiꞌo i Kapaneam, na ko aehota lae-laeliwala uuri, “Omu ke aaliꞌu mwaanie mo oorahaꞌaanga iꞌomu aena aana Aalahanga a God ko karaꞌini oto mai.”

A Jisas E Soie Hai Mwane Wee-Weesi

¹⁸ Maholo a Jisas e lae-lae i reune Aasi I Kalili na ko leesie e ro mwane wee-weesi, kirerue ko weesi aana huꞌo. Ngaeta mwane oto a Saemon nge ruana nga sata ingeie a Pita, na a Andru, aasine.

¹⁹ Oto a Jisas ko teꞌuri hunirerue, “More ke lae mai, na more ke lulu i sulieu hunie ne ke haꞌasaiꞌomoreꞌi aana tolahai weesinganga hunie mo iinoni.”

²⁰ Oto e ro mwaasine ngeena ko tolana toliꞌaasie oto mo huꞌo ikirerue, na kirerue ko lulu i sulie oto a Jisas.

²¹ Oto maholo ko ada loꞌu hao, na ko heꞌi leesie loꞌu ngaeta ro mwaasine, a Jemes na Jon e ro kalena Sebedi. E ro mwaasine ngeena peꞌie aamadarue ikiraelu i laona iiola, kire ko seumaana huꞌo ikiraelu. Oto a Jisas ko soie loꞌu e ro mwaasine ngeena hunie kirerue ke lulu i sulie noꞌone.

²² Oto loꞌu mola aana maholona, e ro mwaasine ngeena kirerue ko toliꞌaasie oto aamadarue i laona iiola, na kirerue ko lulu i sulie oto a Jisas.

Mwala Hunge Kire Aehota Lae I Sulie A Jisas

²³ A Jisas e lae-lae kalie ahutana mo henue aana poꞌo ni henue i Kalili, peꞌi haꞌa-uusulinge i laona mo nume ni palo-palo mo Jiu, na peꞌi tarohaꞌinilana Tataroha Diana i sulie Aalahanga a God. Na e haꞌa-uurie noꞌone ahutana mwala nge kire toꞌo aana taꞌena nga maelaa hai aaopaꞌi.

²⁴ Oto tataroha aana a Jisas e taro oto i sulie ahutana mo henue aana poꞌo ni henue i Siria. Oto mwala ko toolea oto mai mwala hunge peꞌie mo maelaa hai aaopaꞌi i saana a Jisas, mo iini sapesalunge e paine aana sapeda, na mo iini mo liꞌoa aaela nge aada, na mo iini kire ko kokokoꞌa, na ngaeta mo iini sapeda e mae mango oto. Taꞌe a Jisas e haꞌa-uurire mango.

²⁵ Na aana maholona mwala hunge ko si lae mai huni lae i sulie a Jisas, uure mwaanie i Jerusalem na mo poꞌo ni henue i Kalili na i Dekapolis na i Jiudia na aapa poꞌo taꞌau aana wai i Jodan.