Matiu 28 - Tataroha Diana

A Jisas E Taꞌelaꞌi Mwaanie Maenga

¹ Oto i purine Dinge Maaꞌi Mo Jiu, na ko si mwaasisine aana eetana nga dinge aana wiki haalu, a Meri ni Makdala na ngaeta Meri loꞌu, kirerue lae mai huni leesie kilipweꞌu.

² Aana maholona painehaꞌana nunu ko hite oto, aana ensel a God e siho mai uure i Lengi. E lae mai taꞌaasie hau mwaanie maana kilipweꞌu, oto e si iiꞌo i lengine.

³ Sapena ensel ngeena e raa oto mala waꞌariri, na mo toꞌoni ingeie kire rereꞌa oto liutaa aana taꞌena nga ola e rereꞌa.

⁴ Oto mo ramo nge kire ko kakalie kilipweꞌu ngeena, kire aparaꞌi peꞌie maꞌunge. Kire ko eriri oto, na kire raputeꞌi i aano urihana oto mwala e mae.

⁵ Oto ensel ko ere hunie e ro keni na ko teꞌuri, “!Mwaanie more maꞌu-meꞌu! Nou saie taane uri more ko heitalea a Jisas, iini kire horo maesie i lengine poꞌu-poꞌu.

⁶ Ingeie haꞌike oto i leu. E taꞌelaꞌi eelihoꞌi oto loꞌu mala e unue kaꞌu oto huniꞌomu waite. More ke lae kaꞌu mei leesie leu e eno-eno aana.

⁷ Oto more ke lae oto lau-leu, na more ke haꞌarongoa mo pwaarongoisuli ingeie uri e taꞌelaꞌi oto mwaanie maenga. Ko lae oto i naꞌo huni maaꞌoohiꞌomu hai Kalili, na omu ke si leesie oto hai leune. Nga taa nou sare unue huniꞌomu ni otona.”

⁸ Oto e ro keni ngeena kirerue ko tolana lae oto mwaanie kilipweꞌu peꞌie maꞌunge na saemangonga oto liutaa noꞌone. Oto kirerue ko si huru huni lai haꞌarongoa mo pwaarongoisuli ingeie.

⁹ Oto a Jisas ko tolana oodoirerue loꞌu na ko unue uuri, “Hoꞌowa diana.” Oto kirerue lae mai saana, kirerue ko hele aana aeꞌaena peꞌi haꞌamaꞌunge aana.

¹⁰ Oto a Jisas ko teꞌuri hunirerue, “Mwaanie more maꞌu-meꞌu, taꞌe more ke lae taꞌi unue hunie maeni eesiku uri kire ke lae hai Kalili, na kire ke si leesieu oto hai leune.”

Mo Rato Ni Mwane Kire Eero Haahie A Jisas E Taꞌelaꞌi

¹¹ Maholo na e ro keni ko lae-lae ue i sulie tala, ngaeta mo iini aana mo ramo nge kire kakakalie kilipweꞌu, kire lae oto taꞌau i henue i Jerusalem na kire ko haꞌarongoa oto mo naꞌohai pris aana nga moi taa e rau.

¹² Oto mo naꞌohai pris kire loko peꞌie mo rato ni mwane, kire ko si meni wala. Oto kire ko niie mei toꞌoha oto paine hunie mo ramo ngeena,

¹³ na kire ko teꞌuri, “Omu ke hahuꞌei unue oto oodoie mwala uri mo pwaarongoisuli ingeie kire lae mai pelie rae aana i rodo maholo na omu ko maꞌahu.

¹⁴ Mala uri a Paelat ko peleꞌi rongoa leune, iꞌemeelu melu ke si ere-ere taane peꞌie aana, mwaanie omu roroꞌa loꞌu aana.”

¹⁵ Oto kire toolea mei toꞌoha ngeena, na kire ko deu oto i sulie nga taa mo rato ni mwane kire hatongaꞌinie hunire. Oto tataroha ngeena ko taro hailiu i matolana mo Jiu hule oto mai aana mo dinge ienini.

A Jisas E Haataꞌi Aana Mo Pwaarongoisuli

¹⁶ Oto aawalai pwaarongoisuli mwana eeta kire lae oto hunie uuwo i Kalili, leu nge a Jisas e unue kire ke lae aana.

¹⁷ Na maholo kire leesie a Jisas, oto kire ko si pouruuru ni haꞌamaꞌunge aana, taꞌe aana e urine na ngaeta mo iini aada kire neꞌisae rue-ruaꞌa mola ue.

¹⁸ Oto a Jisas ko lae mai saada, na ko ere hunire uuri, “A God e niie oto ahutana nanamanga hunieu, haahie ahutana mo ola i Lengi na mai aano i leu.

¹⁹ Aena urine, omu ke lae, na omu ke da hunie taꞌena nga iinoni ni welumalau ke neꞌi pwaarongoisuli oto ineu. Omu ke loto maaꞌi aada aana satana a Mamaꞌa na a Kale na Liꞌoa Maaꞌi.

²⁰ Omu ke haꞌa-uusulire hunie kire ke tola i sulie oto taꞌena nga ola nou hatongaꞌinie huniꞌomu. Na omu sai norutoꞌo aana uri ne ke iiꞌo peꞌiꞌomu oto tarau, lai hule aana haꞌamangolana walumalau.”