Matiu 27 - Tataroha Diana

Kire Toolea A Jisas I Naꞌona A Paelat Hunie Ke Leie

¹ Oto e dangi maahuꞌo-huꞌo, na ahutana mo naꞌohai pris na mo rato ni mwane kire mani loko na kire oalaꞌinie oto horoꞌilana a Jisas kei lae uri taa.

² Oto kire pwasue, kire ko si toolea, na kire ko toliꞌaasie i nimana Paelat, mwane ni Rom nge ko aalaha haahie mo Jiu aana maholona.

A Jiudas E Horoꞌie Maraana

³ A Jiudas iini nge e pweloa, maholo e saie uri kire ko lei mae oto aana a Jisas, ko si oonisae. Oto ko tola aalihoꞌi aana oolu aawalai mei toꞌoha nge e hele-hele aani ngeena hunie mo naꞌohai pris na mo rato ni mwane.

⁴ Oto ko teꞌuri hunire, “Nou deu oorahaꞌaa oto aana nou talei pwelo tototala mola aana iini e kaꞌa dau huꞌisie ike nga mei ola.” Oto mo rato ni mwane kire ko aalamie uuri, “Leu ngeena kaꞌa roroꞌanga ike iꞌemeelu ni ngeena. Roroꞌanga oto iꞌoe maraamu.”

⁵ Oto a Jiudas e si aasie mo toꞌoha ngeena i aano wai Nume Maaꞌi, na ko iisitaa oto, ko si lae liꞌo maraana.

⁶ Mo naꞌohai pris kire soꞌohie mo toꞌoha ngeena, na kire ko unue uuri, “Mei toꞌoha aani siwe ni ienini. Kolu saꞌa neꞌie ike peꞌie mo toꞌoha aana Nume Maaꞌi aana haꞌatolanga ikolu e uure honosie mei toꞌoha aani epu.”

⁷ Oto kire ere-ere i sulie, kire ko si loꞌongaꞌi huni holie mola mei aano huni heitolingeꞌinie mo awataa aana. Oto kire lae, kire ko si holie mei aano mwaanie ngaeta mwane ko euꞌesu nime aani mwakano.

⁸ Aena urine nge kire si haaraꞌinie mei aano ngeena aana Aano Ni Epu hule oto mai aana mo dinge ienini.

⁹ I leune nge nga taa a Propet Jeremaea e unue oto mai waite e si toꞌohuu, aana e unue uuri, Kire toolea oolu aawalai mei toꞌoha ngeena, mei ola mwala ni Israel kire loꞌongaꞌinie oto huni holi talana aana,

¹⁰ na kire aasie mei toꞌoha aana oto huni holie mei aano mwaanie mwane ko euꞌesu nime aani mwakano, mala oto a aalaha e hatongaꞌinie hunieu. Sekaraea 11:12-13

A Jisas E Uure I Naꞌona A Paelat

¹¹ Oto kire toolea mai a Jisas i naꞌona a Paelat, na a Paelat ko si dolosi aana uuri, “?Uri iꞌoe ni oto inemauri mo Jiu?” Oto a Jisas ko aalamie uuri, “Nge kaꞌu oto o ko unuena.”

¹² Taꞌe maholo mo naꞌohai pris na mo rato ni mwane kire ere-ere aana, e kaꞌa aalamire ike oto ooꞌoo.

¹³ Oto a Paelat ko si teꞌuri hunie, “?Uri o kaꞌa rorongoa ike mo ola hunge oto kire ko unuꞌi eemune?”

¹⁴ Taꞌe a Jisas e kaꞌa aalamie loꞌu nga taꞌa-taꞌa kele mei wala, oto hule aana a Paelat na ko si tohungei pangataꞌinie loꞌu mola.

A Paelat E Toliꞌaasie A Jisas Hunie Maenga

¹⁵ Suli helisi aana maholo Houlaa Ni Liumwaanie, aalaha ni Rom ngeena e sai luhesie taꞌena nga iini mwala ko haꞌatohue mwaanie nume ni hoꞌo.

¹⁶ Oto aana maholona, ngaeta mwane satana a Jisas Barabas, ingeie i laona nume ni hoꞌo. Na mo ola aaela a mwane ngeena e asuiꞌi ahutana mwala kire mani saiꞌi.

¹⁷ Oto maholo ahutana mwala kire mani loko, a Paelat ko si dolosi aada uuri, “?Iini uri taa aana e ro mwane ie nge omu saetoꞌo aana ne ke luhesie huniꞌomu? ?A Jisas Barabas, wa a Jisas iini sailana uri a Kraes?”

¹⁸ A Paelat e dolosi aada urine aana e saie mone uri mwala paine aana mo Jiu kire toolea mai a Jisas i saana aena aana kire ko upwesie.

¹⁹ Oto maholo a Paelat e iiꞌo i aano i lengine naunekume ni leinge, huꞌe ingeie e uusungeꞌinie mai mei wala hunie na ko unue uuri, “Mwaanie o euꞌesuie nga mei ola aana mwane oodotaꞌi ngeena, aena aana nou tohungei hii aaela i rodo aana nou maꞌahu polea.”

²⁰ Na aana maholo a Paelat ko pwaarongo i sulie mei wala huꞌe ingeie ko unue ngeena, mo naꞌohai pris na mo rato ni mwane kire ko unue oto uri mwala ke haꞌatohu aana a Paelat hunie ke luhesie a Barabas, na ke horo maesie a Jisas.

²¹ Oto a Paelat ko dolosi loꞌu aada uuri, “?A tei hikana e ro mwane ienini omu saetoꞌo aana uri ne ke luhesie huniꞌomu?” Oto kire ko meni unue uuri, “!A Barabas!”

²² Oto a Paelat ko heꞌi teꞌuri loꞌu hunire, “?Ko urine, nga taa nge ne kei da aana a Jisas iini nge sailana uri a Kraes?” Oto kire ko meni aalamie uuri, “!Horo maesie i lengine poꞌu-poꞌu!”

²³ Oto a Paelat ko heꞌi dolosi loꞌu aada uuri, “?Aana e ue? ?Haꞌalaa nga mei taa nge e dau aaelasie?” Taꞌe kire ko si meni tea paine mola liutaa uuri, “!Horo maesie i lengine poꞌu-poꞌu!”

²⁴ A Paelat e lio-lio na ko lio aasaie oto uri kei uure honosire uri taa, na maaola-olanga ko karaꞌi reu oto. Oto e si da nimei wei, ko hodalie nimana i maadaelu na ko unue uuri, “!Lio kaꞌu! No ko hodalie nimeku mwaanie nou roroꞌa aana horo-maesilana a mwane ie. Nga roroꞌanga ineu haꞌike, taꞌe roroꞌanga oto iꞌomu maraamiu.”

²⁵ Oto ahutana mwalana ko aalamie a Paelat uuri, “!E diana mola! !Neꞌewau! !Roroꞌanga oto iꞌemi maraamami! !Maꞌalana nga mei haꞌaloinge ko si hite aana mo kalemami haahie maelana, taꞌe i sulie mei ola emi saetoꞌo aana mone oto!”

²⁶ Oto a Paelat e si luhesie a Barabas hunire. Na e unue hunie mo ramo uri kire ke holaꞌi wini-winie a Jisas, nge kire ke si horo maesie i lengine poꞌu-poꞌu.

Mo Ramo Kire Haꞌamwasi Aana A Jisas

²⁷ Oto mo ramo kire toolea a Jisas i laona lolata ahuie toohi peine a Paelat. Kire si soie mai ahutana mo ramo aana pulitaa ikire, na kire mani ruru i saana a Jisas huni haꞌamwasi aana.

²⁸ Oto kire taꞌaasie mo toꞌoni ingeie mwaanie, na kire ko haꞌatoꞌonie mala inemauri aana toꞌoni tetewa nonoroꞌa mala mo aalaha ko hoꞌo-hoꞌosiꞌi.

²⁹ Oto mo ramo ngeena kire asuie rorodara aani walo kau-keu, kire ko neꞌie i pweune a Jisas. Na kire neꞌie mai rade i laona nime i pwalo-pwalona oto mala mo inemauri ko hele-hele aani. Oto kire pouruuru haahie, kire ko si haꞌa-haꞌamwasi aana, kire ko teꞌuri, “!Lahea inemauri mo Jiu!”

³⁰ Oto kire ngisuhie na kire da mai rade mwaanie, kire ko si reu-repusie pwaune.

³¹ Maholo kire haꞌa-haꞌamwasi mango aana a Jisas urine, oto kire ko si taꞌaasie toꞌoni nonoroꞌa mwaanie, na kire ko haꞌatoꞌonie loꞌu aana mo toꞌoni ingeie. Oto kire ko si toolea i sinaha huni lai horo maesie i lengine poꞌu-poꞌu.

Kire Uie A Jisas I Lengine Poꞌu-poꞌu

³² Maholo kire ko iisitaa taꞌau mwaanie huilume peꞌie a Jisas, na kire ko oodoie ngaeta mwane uure mwaanie huilume paine i Saerin, satana a Saemon. Oto mo ramo ngeena kire ko deu rarahie oto uri ke aangaꞌinie poꞌu-poꞌu mwaanie a Jisas.

³³ Oto kire lae taꞌi hule aana leu kire haaraꞌinie aana i Kolkota, loꞌongaꞌinge aana uuri, “Leu ni rarata.”

³⁴ I leune i Kolkota, mo ramo ko niie waen hunie a Jisas uri ke inu. Waen ngeena kire aaropwaie peꞌie ai ahaꞌi huni uure honosie sapesalunge, taꞌe maholo a Jisas e mami aahongana, oto kaꞌa sare inuhie ike.

³⁵ Oto mo ramo kire si uie a Jisas i lengine poꞌu-poꞌu. Mango urine, kire ko si ado aana mo toꞌoni ingeie na kire ko inie daes huniꞌi.

³⁶ Oto kire si iiꞌo i aano i leune, kire ko kakalie.

³⁷ Oto kire neꞌie i hahona pwaune a Jisas mo wala huni haataꞌinie uri nga taa e dau aaelasie. Kire ko uusue uuri, A JISAS NI IENINI, INEMAURI MO Jiu.

³⁸ Na kire uie e ro mwane horopeli noꞌone peꞌie a Jisas i lengine ngaeta ro poꞌu-poꞌu. Nga iini i pwalo-pwalona na nga iini i meu-meuline.

³⁹ Oto mwala ko liu i leune, kire ko ere maaleledie, na kire ko teileꞌinie pwaude,

⁴⁰ na kire ko haꞌa-eetaa uuri, “Mwane nge o unue uri o kei oho aasie Nume Maaꞌi Peine na uri o kei taꞌe aalihoꞌi aana loꞌu mola i laona e oolu aata hai dinge eena. Mala o ko neꞌie Kalena a God toꞌohuu, o ke haꞌa-uuriꞌo kaꞌu maraamu. !O ke siho mai i aano mwaanie poꞌu-poꞌu!”

⁴¹ E urine noꞌone mola aana mo naꞌohai pris, na mo haꞌa-uusuli aana haꞌatolanga, na mo rato ni mwane. Ikire na kire ko haꞌamwasi aana a Jisas noꞌone urine, na kire ko unue uuri,

⁴² “E roroꞌa haꞌa-haꞌa-uurie kaꞌu mwala aaopa, taꞌe e saꞌa haꞌa-uurie ike maraana. Mala ke siho oto mai i aano mwaanie poꞌu-poꞌu aana maholo ienini, haꞌalaa kolu ko hiiwalaimoli uri ingeie oto Inemauri ikie mo Jiu.

⁴³ !Iiei! E nou-norutoꞌo aana a God, na e unue oto maraana uri ingeie Kalena God. Kolu ke lio-lio kaꞌu, ohe a God ko haꞌa-uurie oto molana.”

⁴⁴ E ro horopeli, nge kire uirerue peꞌie a Jisas, na kirerue ko ere aaelasie oto noꞌone mola urine.

A Jisas E Mae

⁴⁵ Oto i upui aatowaa, rodohono e dau haahie ahutana hanue hunie e oolu maholoi sato.

⁴⁶ Na ola mala oolune nga maholoi sato i aapau, a Jisas e si soi oto paine aana erenga ni Jiu uuri, “?Eloi, Eloi, lama sabaktani?” nge neꞌisaenga aana uuri, “?God ineu, God ineu, e ue oto o aatopuri eeku?”

⁴⁷ Oto ngaeta mo iini aana mwala e uure-uure i leune kire rongo, kire ko teꞌuri, “!Rongo kaꞌu! Ko soie a Elaeja.”

⁴⁸ Oto ngaeta iini aada e huru peꞌie mei loi-losi, e haꞌahonue aana waen ahaꞌi, ko susuꞌie aana mai ei, oto ko susueꞌinie taꞌau hunie ngidune a Jisas hunie ke inu.

⁴⁹ Taꞌe ngaeta mo iini ko teꞌuri, “Oto kolu ke maaꞌoohi keꞌu. Ohe kolu ko leesie a Elaeja ko lae mai haꞌa-uurie.”

⁵⁰ Na a Jisas ko heꞌi soi loꞌu aana mei wala paine, na ko mae oto.

⁵¹ Oto mola aana maholoi satona, sala kire lohea honosie Hahuꞌana Leu Maaꞌi i laona Nume Maaꞌi Peine e aꞌari hunie e ro aapa, uure oto taꞌi lengi lai hule oto hai aano. Na nunu peine e aanuie mwakano, hule aana mo heu kire talihite oto hunie e ro aapai heu.

⁵² Mo kilipweꞌu kire taha, na mo iini hunge aana mwala a God nge kire mae oto waite, kire taꞌelaꞌi oto loꞌu mwaanie maenga.

⁵³ Kire iisitaa mwaanie mo kilipweꞌu, na i purine a Jisas e taꞌelaꞌi mwaanie maenga, kire si laehie huilume maaꞌi i Jerusalem na mwala hunge kire leesire.

⁵⁴ Oto naꞌohana mo ramo ni Rom na mo ramo peꞌie nge ko kakalie a Jisas, kire leesie nunu na ngaeta mo ola loꞌu e raune, kire ko si tohungei meꞌu oto hiitoꞌo na kire ko unue uuri, “A mwane ie Kalena God oto toꞌohuu.”

⁵⁵ Mo keni hunge kire uure noꞌone wau haꞌatau mwaanie poꞌu-poꞌu, kire ko haꞌa-haꞌamaesie nga taa ko reu. Mo keni ngeena kire lae oto mai peꞌie a Jisas uure i Kalili huni peꞌi-peꞌie i sulie tala.

⁵⁶ Ngaeta mo keni aada nge kira Meri ni Makdala, na a Meri nikana Jemes na Josep, na nikana e ro kalena Sebedi.

A Josep Ni Arimetia E Haitolingeꞌinie A Jisas

⁵⁷ Aana maholona nga mwane toꞌo-toꞌo ni Arimetia, satana a Josep, ko lae oto mai. A mwane ngeena e hiiwalaimoli noꞌone aana a Jisas. Na maholo ko lae oto hunie i seulehi aana dingena,

⁵⁸ a Josep e lae mai saana Paelat. Oto ko haꞌatohue rae aana Jisas aana a Paelat. Oto a Paelat e unue kire ke toliꞌaasie hunie.

⁵⁹ Oto a Josep e lae i oohosie rae aana Jisas, ko si uloa aani sala rereꞌa diana,

⁶⁰ na ko neꞌie i laona kilipweꞌu haalu ingeie, ola kire si didie mola mwaanie hau oto paine. Oto e honoa maana kilipweꞌu ngeena aana ho heu oto paine, ko si lae mwaanie.

⁶¹ A Meri ni Makdala na ngaeta Meri loꞌu, kirerue iiꞌo taane i leune kire ko lee-leesie nga taa ko reu.

Mo Ramo Kire Kakalie Kilipweꞌu

⁶² Oto aana hai dinge i purine dinge ni talamaꞌinge hunie Dinge Maaꞌi Mo Jiu, mo naꞌohai pris na mo Parise kire ruru i saana a Paelat.

⁶³ Oto kire ko teꞌuri hunie, “Mwane Ouꞌou, melu ko si aamasitoꞌo aana nga taa mwane eero-eero ngeena e unue na e mauri ue aana e teꞌuri, ‘I purine oolu hei dinge ne kei taꞌelaꞌi loꞌu.’

⁶⁴ Oto o ke unue hunie mo ramo iꞌoe, hunie kire ke kakali diana aana kilipweꞌu ingeie lai hule aana oolune nga hai dinge, mwaanie mo pwaarongoisuli ingeie kire lae mola mai pelie rae aana i rodo. Oto kire ke si unue hunie mwala uuri, ‘E taꞌelaꞌi oto mwaanie maenga,’ na eeronga ngeena kei tohungei aaela oto hiitoꞌo loꞌu liutaa aana iini holaꞌinaꞌo nge e unue uri ingeie a Kraes, Kalena God.”

⁶⁵ Oto a Paelat ko si unue hunire uuri, “Kohi taane. Omu ke toolea ngaeta mo ramo ineu, hunie kire ke kakali diana aana kilipweꞌu mala loꞌongaꞌinge iꞌomu.”

⁶⁶ Oto kire lae taꞌau, kire puluie haꞌa-ara ikire i reutana hau peine ngeena mwaanie nga iini e tahanie kilipweꞌu, na kire ko toliꞌaasie mo ramo i saana huni kakalie.