Matiu 23 - Tataroha Diana

A Jisas E Haꞌapasulie Mwala Mwaanie Mo Parise Na Mo Haꞌa-uusuli

¹ Oto a Jisas ko si unue hunie mwala na mo pwaarongoisuli ingeie uuri,

² “Mo Parise na mo haꞌa-uusuli aana mo Haꞌatolanga, kire toꞌo aana nanamanga huni unue nga taa huniꞌomu aana mo Haꞌatolanga a Mosis.

³ Aena ngeena omu ke rongo hunire na omu ke dau i sulie nga taa kire ko unue huniꞌomu. Taꞌe mwaanie omu lae-lae i sulie tolahada, aana tolahada e kaꞌa diana ike. Mo haꞌa-uusulinge ikire, ikire maraada, na kire saꞌa dau ike i suliꞌi noꞌone.

⁴ Kire ko da ludaa e hiꞌe aana mo haꞌatolanga hunie mwala. Taꞌe hule aana ikire maraada na kire saꞌa nii kiꞌi huni peꞌie mwala huni suluꞌie ludaa ngeena.

⁵ “Ahutana nga moi taa kire ko euꞌesuiꞌi, mo ola mola uri hunie mwala ke lee-leesire. E toꞌohuu, a God e unue taane uri kie ke hoꞌo-hoꞌosie mo toꞌoni lauleuniꞌe na ngaeta mo ola loꞌu huni aama-aamasitoꞌo aana mo haꞌatolanga ingeie. !Taꞌe lio kaꞌu! Ikire, kire ko esu peine loꞌu aana mo olana, hunie uri mwala ko leesiꞌi na kire ke unue uuri, ‘Ikire ni oto mwala maaꞌi.’

⁶ Mo Parise ngeena na mo haꞌa-uusuli aana mo Haꞌatolanga, saeda noꞌone uri kire ke toꞌo aana mo pweui tolinge aana ngauhe, na mo naꞌohai iiꞌo-iiꞌoha aana mo nume ni palo-palo.

⁷ Saeda noꞌone uri mwala ke haꞌamaꞌu aada maholo kire ko walo liu i laona mo leu ni uusiꞌe, na saeda noꞌone uri mwala ke haaraꞌinire aana, ‘Haꞌa-uusuli.’ ”

⁸ “Taꞌe iꞌomu, omu ke suꞌuri toliꞌaasie mwala ke haaraꞌiniꞌomu aana, ‘Haꞌa-uusuli,’ aena aana omu toꞌo aana mola e taꞌa-taꞌa haꞌa-uusuli, na iꞌomu mo mwaasine haliꞌite.

⁹ Na mwaanie omu haaraꞌinie nga iini mei aano uuri, ‘Mamaꞌa,’ aana e taꞌa-taꞌa iini oto Aamamiu, ingeie taꞌau i Lengi.

¹⁰ Na mwaanie mwala e haaraꞌiniꞌomu uri, ‘Aalaha,’ aena aana ineu a Kraes oto taꞌa-taꞌa aalaha iꞌomu.

¹¹ Na nga iini hikemiu nge ko sare aalaha, ke neꞌi iinoni auꞌesu oto namiu.

¹² Aana taꞌena nga iini ko haꞌapainaꞌaa maraana, nge a God kei haꞌamwai-mweiꞌaa. Na taꞌena nga iini ko haꞌamwai-mweiꞌaa maraana, nge a God kei haꞌapainaꞌaa.”

¹³ Oto a Jisas ko heꞌi unue loꞌu uuri, “Aama-aamasilemiu mo Parise na mo haꞌa-uusuli aana mo Haꞌatolanga a Mosis. !Iꞌomu oto mwala eero-eero! Aana omu ko lupweꞌi deu-deu mola mala uri omu ko lulu i sulie a God. !Taꞌe haꞌike! Iꞌomu maraamiu omu kaꞌa sare sili ike i laona Aalahanga a God, na omu kaꞌa toliꞌaasie ike nga mo iini ke sili loꞌu.

¹⁴ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Aana omu ko lupweꞌi deu mala uri iꞌomu oto mwala maaꞌi aani unulana mo aarengaꞌinge tewa i maana mwala. Taꞌe hule aana omu ko haꞌa-haꞌamweꞌu-mweꞌue mola mo nao keni, na omu ko leue mola mo nume ikire peꞌie ahutana toꞌo-toꞌolada. Aena urine, haꞌaloilemiu kei peine liutaa.

¹⁵ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Omu ko haꞌaweoꞌomu maraamiu aani loꞌohinge i sulie mo mala-malau hunie nga mo iini ke lae i suliꞌomu. Oto maholo omu ko lio oodoie nga mo iini, omu ko si da oto kire ke aaela oto hiitoꞌo loꞌu liutaa aamiu hunie ikire noꞌone kire ke adona laenga i laona dunge ni haꞌamotaahinge mala iꞌomu.

¹⁶ “Aama-aamasilemiu aana omu ko naꞌona mwala, taꞌe iꞌomu maraamiu maamiu e ulu. Aana omu ko haꞌa-uusulie mwala uuri, ‘Nga iini ko tohe mola takoie Nume Maaꞌi Peine e kaꞌa roroꞌa ike, taꞌe uri kei tohe takoie mo kol aana Nume Maaꞌi Peine, haꞌalaa ke si roroꞌaie.’

¹⁷ !Iꞌomu kira pweu na kira ulu! ?Uri omu kaꞌa saie ike uri Nume Maaꞌi e roroꞌa oto liutaa aana kol? Aena aana Nume Maaꞌi mone ko si da kol ngeena ko maaꞌi.

¹⁸ Na omu ko unue hunie mwala uuri, ‘Mala nga iini ko tohe mola takoie ora ni uunu-uunu aana ko heiholotaꞌi, e kaꞌa roroꞌa ike, taꞌe uri nga iini ko tohe takoie uuraaꞌinge i lengine ora ni uunu-uunu haꞌalaa ko roroꞌaie.’

¹⁹ !Iꞌomu mo ulu! ?Uri omu kaꞌa saie ike uri ora ni uunu-uunu e roroꞌa oto liutaa aana uuraaꞌinge? Aena aana ora ni uunu-uunu mone ko si da uuraaꞌinge ngeena ko maaꞌi.

²⁰ Oto aana maholo nga iini ko tohe takoie ora ni uunu-uunu, e urihana ko tohe takoie ora ni uunu-uunu na oto ahutana mo uuraaꞌinge i lengine ni ngeena.

²¹ Na maholo nga iini ko tohe takoie Nume Maaꞌi Peine, e urihana ko tohe takoie oto Nume Maaꞌi Peine na noꞌone takoie a God, iini nge ko oꞌoꞌo i leune.

²² Na maholo nga iini ko tohe takoie i Lengi, nge ko tohe oto takoie naunekume ni aalaha a God, na ko tohe noꞌone takoie God nge e iiꞌo i lengine.

²³ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Omu ko niie taane tangahuluꞌana tari-olanga iꞌomu hunie a God, na lai hule oto aana toꞌo-olanga iꞌomu aani sihola. Taꞌe hule aana omu kaꞌa aapwasu ike aana tohungana haꞌa-uusulinge aana mo Haꞌatolanga, mala leinge toꞌohuu, na aamasinge, na hiiwalaimolinge. Mo naꞌohai ola uri hunie omu ke dau i suliꞌi kaꞌu ienini. Na loꞌu mwaanie omu pulongosie mo haꞌa-uusulinge mwai-mwei mala niilana tangahuluꞌana tari-olanga iꞌomu.

²⁴ Iꞌomu, omu ko kakalie taane mwala mwaanie kire waelie mo Haꞌatolanga, taꞌe hule aana maamiu e ulu noꞌone mola. Omu urihana mola iinoni e taꞌaasie kele ho nonoasi mwaanie wai ni inu ingeie, taꞌe e si oono haꞌilekune mola painehaꞌana kamel.

²⁵ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Aana omu urihana mola mo nime na mo kao-kao kire hoda rereꞌa aana aapa poꞌoi sinaha, taꞌe wau i laona e honu mola aana ngaulaa e kasu. Omu ko sasare lio kohi i maana mwala, taꞌe hule aana saemiu e honu oto mola aana horo-pelinge na taꞌena nga loꞌongaꞌinge aaela.

²⁶ !Iꞌomu mo Parise oto mwala maamiu e tohungei ulu! Omu ke holaꞌi hoda rereꞌa kaꞌu aana aapa poꞌo i laona nime, nge aapa poꞌoi sinaha kei rereꞌa noꞌone.

²⁷ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Omu urihana mola mo kilipweꞌu kire mole rereꞌa aani. Leesileni poꞌoi sinaha kire tohungei lai lio diana, taꞌe wai laloni, kire honu mola aani suisuli haliꞌite na kasuhaꞌana mo rae.

²⁸ Iꞌomu, omu urine noꞌone. Aana leesilemiu poꞌoi sinaha uri iꞌomu ni oto mo iinoni diana, taꞌe wai lalo aamiu, e honu oto mola aana lupweꞌi-deunge na oorahaꞌaa.

²⁹ “Aama-aamasilemiu mo Parise na mo haꞌa-uusuli aana mo Haꞌatolanga. !Iꞌomu oto mwala eero-eero! Omu ko esu diana aana mo kilipweꞌu mo propet, na omu ko haꞌalaunie mo kilipweꞌu mo iini e oodotaꞌi hunie kire ke lio diana.

³⁰ Na omu ko unue uuri, ‘!Saehuu oto hiitoꞌo! Mala emi ke iiꞌo aana pongine mo aamamami, haꞌalaa emi saꞌa dau ike mala ikire huni horoꞌie mo propet.’

³¹ Taꞌe omu ko ere urine nge omu tohungei haataꞌi diana aana oto uri iꞌomu, omu uure oto mwaanie mwala nge kire horoꞌie mo propet ni ngeena.

³² Nge ko urine oto, omu ke lae taraꞌasi mola huni haꞌamangoa oto mei roroꞌanga mo aamamiu e aehotaa kaꞌu.

³³ !Iꞌomu oto mo mwaa toꞌohuu! !Komu ni mwaa ala-ala! ?Uri omu kei tehisie haꞌaletehinge a God uri taa eena? Leilemiu kei lae, na uusungeꞌinilemiu kei lae mola hunie leu ni haꞌamotaahinge.

³⁴ Oto no ko unue huniꞌomu uri, ne kei uusungeꞌinie huniꞌomu nga mo propet, na mwala saenanau, na nga mo haꞌa-uusuli. Taꞌe omu kei horo maesie ngaeta mo iini aada, nga mo iini omu kei repu taalengasire i lengine mo poꞌu-poꞌu, na nga mo iini omu kei repu lae-laeꞌi aada i laona mo nume ni palo-palo iꞌomu, na omu kei teungeꞌinire hailiu i suli henue.

³⁵ Oto iꞌomu, omu kei roroꞌa aana maelana ahutana mwala oodotaꞌi nge horo maesilada e lae mai aano. Omu kei aehota roroꞌa aana horoꞌilana ahutana mo mwane oodotaꞌi, uure aana a Ebol lai hule aana horoꞌilana a Sekaraea, mwane kalena Barakaea nge omu horo maesie karaꞌinie ora ni uunu-uunu aana Nume Maaꞌi Peine.

³⁶ No ko unue oto huniꞌomu pwaunge siꞌiri ie, nge leinge haahie horoꞌilana mwala oodotaꞌi ngeena ke si lae huniꞌomu.”

A Jisas E Ngarasie Mo Jerusalem Aana Kire Kaꞌa Hiiwalaimoli Aana

³⁷ Oto a Jisas ko heꞌi ere uuri loꞌu, “!Aaia Jerusalem, Jerusalem! Iꞌomu oto omu ko horo suuheꞌinie mo propet na omu ko uuꞌi maesie mo iini a God e uusungeꞌinire mai huniꞌomu. Mo maholo hunge nou sasare peꞌiꞌomu mala pwa-pwa ni kue ko lokoa mo kalena i hahana apa-apana huni haꞌa-uurire. Taꞌe omu kaꞌa saetoꞌo aaku ike.

³⁸ Oto omu ke saie, a God kei toliꞌaasie hanue iꞌomu, na kei naꞌonga oto.

³⁹ Na no ko unue oto huniꞌomu uri omu saꞌa heꞌi leesieu loꞌu lai hule aana omu kei ere i sulieu uuri, God o ke haꞌadianaꞌaa iini ko lae mai nunuhaꞌana satana Aalaha.” Sam 118:26