Matiu 22 - Tataroha Diana

A Jisas E Aalahuu Aana Aaharota

¹ Oto a Jisas e heꞌi ere ni aalahuunge loꞌu hunire uuri,

² “Aalahanga a God e urihana ngaeta inemauri e dau aaharota i sulie a kalena.

³ Oto inemauri ngeena ko haꞌarongoa mai ngaeta mwala hunie ngauhe. Maholo e dau aakau mango oto aana ahutana mo ola hunie ngauhe, ko si uusungeꞌinie mo koni-konihe ingeie huni soie mwala ngeena ke lae mai. Taꞌe mwalana kaꞌa sare lae ike mai.

⁴ “Oto ko heꞌi uusungeꞌinie loꞌu ngaeta mo koni-konihe, ko teꞌuri hunire, ‘Unue hunie mo iini nge haꞌarongolada e lae uri nou deu aakau oto aana walu ola hunie ngauhe. Nou hunu mangoa oto mo puluke diana ineu, na hule aana nou hunue oto noꞌone mo iini nou nii-nii eni hunie kire ke pwiꞌe diana huni ngeuꞌi.’

⁵ “Taꞌe mwalana kaꞌa sare rongo loꞌu hunie mo koni-konihe ngeena, na kire lae mola i sulie saeda. Nga iini e lae mola i hohola ingeie, na ngaeta iini mola aana uusiꞌe.

⁶ Oto ngaeta mo iini kire tapolie mola mo koni-konihe ngeena, kire ko repusire na kire ko horo maesire oto.

⁷ Oto inemauri ngeena e tohungei saewasu, ko uusungeꞌinie mo ramo ingeie huni horo aasie mwala e talei horo ngeena, na oto huni uunu aasie huilume ikire aana dunge.

⁸ “Purine leune e rau, inemauri ngeena ko si unue hunie mwala auꞌesu ingeie uuri, ‘Ngauhe e dau aakau mango oto, taꞌe mo iini nge haꞌarongolada e lae, kire kaꞌa malisine oto laenga mai.

⁹ Oto omu ke lae loꞌu i lio aana mo maai tala rue, na taꞌena nga iini omu ko lio oodoie, haꞌarongoa mai hunie ngauhe ineu.’

¹⁰ Oto mwala auꞌesu ngeena kire ko lae hailiu loꞌu i sulie mo tala paine. Kire ko tarakonie mai ahutana mwala kire ko lio oodoire, mo iini e diana na nga mo iini e aaela, lai hule aana nume ni aaharota e saro honu aana mwala.

¹¹ “Oto a inemauri e lai sili i nume huni leesie mwala e hule, na ko leesie ngaeta mwane e kaꞌa toꞌoni ike aana nga toꞌoni ni aaharota.

¹² Oto ko teꞌuri hunie, ‘?Malahuku, e ue o lae mola mai urine na o kaꞌa toꞌoni aana nga toꞌoni ni aaharota?’ Taꞌe a mwaena e kaꞌa nguuhie ike.

¹³ “Oto inemauri ngeena ko unue hunie mwala auꞌesu ingeie uuri, ‘Omu ke pwasue e ro nimana na e ro aeꞌaena, oto omu ko aasie i laona rodohono poꞌoi sinaha, leu nge mwala kei iiꞌo ni ngaranga peꞌi saehuunge oto hiitoꞌo aana.’ ”

¹⁴ Oto a Jisas ko si haꞌamangoa aalahuunge ngeena uuri, “Iau, aana mwala hunge haꞌarongolada e lae, taꞌe tootaꞌi iini mola lio hilisilada e si lae hunie Aalahanga a God.”

Mo Rato Ni Jiu Kire Lupweꞌi Dolosi I Sulie Takis

¹⁵ Oto mo Parise kire iisitaa, kire ko si lai ere-ere i sulie uri kire kei pweloa a Jisas uri taa aani dolosinge.

¹⁶ Oto kire ere tararuru peꞌie pulitaa a Herod Inemauri, na kire ko uusungeꞌinie taꞌau mo pwaarongoisuli ikire i saana a Jisas peꞌie ngaeta mo mwane aana poꞌo ni mwane a Herod. Oto mo mwaena kire ko unue hunie a Jisas uuri, “Haꞌa-uusuli, melu saie uri walaimolinge ni oto o ko unu-unuena, aana o ko haꞌa-uusuli i sulie hari-huninge a God hunie mo iinoni. Oto o kaꞌa aapwasu ike aana nga taa mwala ko loꞌo-loꞌongaꞌinie, aena aana o kaꞌa lio ike hunie maana mo iinoni.

¹⁷ Aena ngeena, o ke unue oodoiꞌemeelu nga taa o loꞌongaꞌinie. ?Uri e adona taane huni niie takis hunie aalahanga ni Rom wa haꞌike?”

¹⁸ Taꞌe a Jisas e lio saie mone uri kire ko lupweꞌi pwaoa mola, ko si teꞌuri hunire, “!Iꞌomu kira dau hahota! ?Aana e ue ni omu ko sare lupweꞌi pwaoau urine?

¹⁹ Omu ke haataꞌinie kaꞌu seleni hunie takis ngeena aaku.” Oto kire ko haataꞌinie ngaeta seleni ni Rom aana.

²⁰ Oto a Jisas ko dolosi aada uuri, “?A tei ni nunune na satana aana seleni ienini?”

²¹ Oto kire ko unue uuri, “Inemauri ni Rom ni ngeena.” Oto a Jisas ko teꞌuri hunire, “Ko urine, omu ke nii eelihoꞌi aana hunie inemauri ngeena mo ola ingeie, na hunie a God mo iini a God.”

²² Oto kire ko si tohungei pangataꞌinie hahuꞌana aalaminge ingeie, na kire ko lae oto mwaanie.

Mo Sadiusi Kire Lupweꞌi Dolosi I Sulie Taꞌelaꞌinge Mwaanie Maenga

²³ Oto loꞌu mola aana hai dingena, ngaeta mo Sadiusi kire lae mai saana a Jisas. Ikire mo Sadiusi ngeena kire hiiwalaimoli uri nga iini saꞌa taꞌelaꞌi ike loꞌu mwaanie maenga.

²⁴ Oto kire ko teꞌuri hunie, “Haꞌa-uusuli, a Mosis e uusue haꞌatolanga ie hunikie. Mala uri nga mwane ko mae na e kaꞌa toꞌo kalena, nge aasine mwane ke toꞌo aana loꞌu mola nao keni iihana, hunie ke haꞌahute mwela oolisie aasine nge e mae ngeena. Diutronomi 25:5-6

²⁵ Oto wau i naꞌo, e hiu mwaasine mwane kire mani hute na kire oꞌoꞌo i leu. A naꞌohada e tola huꞌe, oto e mae mola na e kaꞌa toꞌo mwela. Oto aasine mwane e toꞌo aana loꞌu naona.

²⁶ Ruana nga mwane ngeena ko heꞌi mae loꞌu urine. Oolune nga mwane ko heꞌi urine loꞌu, na lae-lae ahutana hiu mwaasine ngeena kire mani mae mango oto urine.

²⁷ Oto a huꞌena e si mae ooreta.

²⁸ ?Haꞌalaa, kei hule aana hai dinge taꞌelaꞌinge, a huꞌe ngeena kei neꞌi huꞌe a tei aana e hiu mwaasine ngeena, aana kire mani toꞌo-toꞌo aana mola urine?”

²⁹ Oto a Jisas ko aalamire uuri, “Neꞌisaenga iꞌomu e tohungei takalo oto hiitoꞌo, aena aana omu kaꞌa saie ike mo Uusu-uusu Maaꞌi wa nanamanga a God.

³⁰ Maholo mwala kei taꞌelaꞌi mwaanie maenga, nga tola-huꞌanga wa nga toꞌo-poronga haꞌike loꞌu. Taꞌe kire kei iiꞌo oto mola mala mo ensel taꞌau i Lengi.

³¹ ?Taꞌe hatarie taꞌelaꞌinge mwaanie maenga, aana e ue omu kaꞌa rongo saie nga taa a God e unue huniꞌomu aana mo Uusu-uusu Maaꞌi?

³² Aana a God e unue uuri, Ineu oto God a Ebraham, na Aesak na Jekob ko palo-paloa. Eksodas 3:6 Kie mani saie uri mo iini e mauri mola ko palo-paloa a God, e kaꞌa ike mo iini e mae. Oto uusu-uusu ie ko haataꞌinie uri maꞌalana Ebraham, na Aesak na Jekob kire mani mae oto, taꞌe kire mauri mola ue taꞌau i Lengi.”

³³ Oto ahutana mwala e rongo urine, kire ko si meni pangataꞌinie haꞌa-uusulinge diana a Jisas.

Ngaeta Haꞌa-uusuli E Dolosi I Sulie Naꞌohai Haꞌatolanga

³⁴ Maholo mo Parise kire rongoa uri mo Sadiusi kaꞌa sai aalamie oto a Jisas, kire si meni lae mai saana huni haꞌatataroa.

³⁵ Oto ngaeta haꞌa-uusuli aana mo Haꞌatolanga a Mosis, e dolosi aana uuri,

³⁶ “?Haꞌa-uusuli, iini uri taa ni naꞌohai haꞌatolanga aana mo Haꞌatolanga a Mosis?”

³⁷ Oto a Jisas ko aalamie uuri, “Naꞌohai haꞌatolanga oto, O ke manata diana hunie a God, aalaha iꞌoe, oto aana ahutana saemu, na aana ahutana maurihaꞌamu, na aana ahutana mo neꞌisaenga iꞌoe. Diutronomi 6:5

³⁸ Aana naꞌohai haꞌatolanga oto ie na e hiꞌe liutaa.

³⁹ Na ruana nga haꞌatolanga e urihana loꞌu eetana, O ke manata diana hunie auhenue iꞌoe oto mala o manata diana huniꞌo maraamu. Levitikas 19:18

⁴⁰ Aana aahuꞌine ahutana mo Haꞌatolanga a Mosis na mo haꞌa-uusulinge mo propet ni oto e ro haꞌatolanga ienini.”

A Jisas E Aꞌailaꞌasie Mo Parise Aana Dolosinge

⁴¹ Maholo mo Parise kire mani loko, a Jisas e si dolosi aada uuri,

⁴² “?Nga taa ni loꞌongaꞌinge iꞌomu aana a Kraes? ?Kalena a tei ni ingeie?” Oto mo Parise e aalamie uuri, “A Kraes kei hute mola mai aana komu a Deved Inemauri.”

⁴³ Oto a Jisas ko teꞌuri hunire, “E toꞌohuu oto. ?Taꞌe e ue ni a Deved e si haaraꞌinie loꞌu aana aalaha? Aena aana a Deved e ere aana nanamanga ni Liꞌoa Maaꞌi uuri,

⁴⁴ A God e unue hunie aalaha ineu, uuri ‘O ke iiꞌo kaꞌu i pwalo-pwaloku aana naꞌohai iiꞌo-iiꞌoha, lai hule aana ne kei kama haahie mo maelonga iꞌoe i aano hunie o ke uuri puli-pulisire.’ ” Sam 110:1

⁴⁵ Oto a Jisas ko teꞌuri loꞌu, “A Deved maraana ni e unue uri a Kraes e neꞌi aalaha ingeie. ?Taꞌe e ue? ?Mwane nge e hute mola aana komu a Deved maraana, kei heꞌi neꞌi aalaha ingeie loꞌu uri taa eena?”

⁴⁶ Nga iini aana mo Parise hunie ke aalamie mo dolosinge a Jisas na haꞌike loꞌu. Na uure i purine hai dingena, nga taꞌa-taꞌa iini hunie ke sare dolosie loꞌu nga mei ola aana, haꞌike oto ooꞌoo.