Matiu 16 - Tataroha Diana

Ruana Nga Maholo A Jisas E Kaꞌa Sare Asuie Nga Huꞌi-huꞌite

¹ Ngaeta maholo mo Parise na mo Sadiusi kire lae mai saana a Jisas aana kire ko sare lupweꞌi oohongie mola a Jisas aana kire loꞌongaꞌinie uri e kaꞌa uure ike mwaanie a God. Oto kire ko unue hunie uuri, “O ke asuie kaꞌu nga huꞌi-huꞌite hunie melu ke leesie.”

² Taꞌe a Jisas e aalamire ko teꞌuri, “Maholo omu ko leesie dangi e marahalisi i seulehi, oto omu ko tolana unue oto uuri, ‘Kei dei diana oto i hoꞌowa eena, aana dangi e marahalisi oto.’

³ Na i maahuꞌo-huꞌo omu ko unue loꞌu uuri, ‘Kei nemo oto eena, aana salo e nonoroꞌa na e kokohoaꞌa.’ Omu sai lio saie taane dai diana na dai taꞌaa aana leesilana salo mala ngeena, taꞌe omu saꞌa roroꞌa lio saie ike tolimaa aana mo ola ko reu siꞌiri ie.

⁴ !Haꞌike eena! Pwaunge ienini, omu lae otoi aaela hiitoꞌo. Suata omu kaꞌa sai kinetaꞌiniꞌomu ike nana a God. Omu ko sukaau taane hunie nga huꞌi-huꞌite, taꞌe nou saꞌa asuie ike. Taꞌa-taꞌa huꞌi-huꞌite nou sai haataꞌinie aamiu oto nga taa e rau aana a Propet Jona oto waite.” Oto e si taꞌelaꞌi, ko lae oto mwaanire.

A Jisas E Haꞌapasulie Mo Pwaarongoisuli Mwaanie Haꞌa-uusulinge Mo Parise

⁵ Maholo a Jisas na mo pwaarongoisuli kire aatoholo oto hunie poꞌo ni eesi poꞌo taꞌau, nge mo pwaarongoisuli kire si saie uri kire pulongo huni tola bred ada.

⁶ Oto a Jisas ko teꞌuri hunire, “Omu ke lio talamiu mwaanie iis mo Parise na mo Sadiusi.”

⁷ Oto mo pwaarongoisuli ko lae peꞌi ere hailiu i matolada maraada uuri, “Ohe ko ere urine i sulie kolu kaꞌa tola bred ike peꞌikolu.”

⁸ A Jisas e saie mone neꞌisaenga ikire, oto ko dolosi aada uuri, “?E ue ni omu ko tolahiꞌe hiitoꞌo aana uri omu kaꞌa tola bred ike peꞌiꞌomu? !Hiiwalaimolinge iꞌomu e lae otoi mwei-mwei hiitoꞌo!

⁹ ?Uri omu kaꞌa saie ike ue? ?Uri omu kaꞌa aamasitoꞌo ike aana maholo nou nisie e lime kele ho bred ana lime sinolai mwane? ?E nite luꞌe nge omu haꞌahonuꞌi?

¹⁰ ?Na loꞌu aana e hiu kele ho bred ana e hai sinolai mwane? ?E nite luꞌe nge omu haꞌahonuꞌi?

¹¹ ?E ue ni omu kaꞌa saenanau aana uri nou kaꞌa ere-ere ike huniꞌomu mola i sulie mo bred? Oto no ko unue loꞌu huniꞌomu uri omu ke lio talamiu mwaanie iis mo Parise na mo Sadiusi.”

¹² I leune nge mo pwaarongoisuli ko si saie uri a Jisas e kaꞌa haꞌa-haꞌapasulire ike mola aana iis huni bred, taꞌe mwaanie mo haꞌa-uusulinge mo Parise na mo Sadiusi.

A Pita E Unu Tahangaꞌinie A Jisas Uri Ingeie Oto A Kraes

¹³ Maholo a Jisas na mo pwaarongoisuli ingeie kire lae hunie poꞌo ni henue karaꞌinie huilume i Sisaria Pilipae, nge e si dodolosi aada uuri, “?Haꞌalaa mwala ko unu-unue uri ineu a Kale Ni Iinoni a tei?”

¹⁴ Oto kire ko aalamie uuri, “Ngaeta mo iini ko unu-unue uri iꞌoe a Jon Loto Maaꞌi e mauri eelihoꞌi. Na nga mo iini ko unu-unue uri iꞌoe a Propet Elaeja. Na ngaeta mo iini loꞌu ko unu-unue uri iꞌoe a Propet Jeremaea wa nga iini hikana mo propet oto i naꞌo.”

¹⁵ Oto a Jisas ko heꞌi dolosi loꞌu aada uuri, “?Oto e ue aana iꞌomu? ?Haꞌalaa omu ko unu-unue uri ineu a tei?”

¹⁶ Oto a Saemon Pita ko aalamie uuri, “Iꞌoe oto a Kraes, Kalena God Mau-meuriꞌe.”

¹⁷ A Jisas ko aalamie a Saemon Pita uuri, “!Hahuꞌana oto, Saemon kalena Jon! Aana mei walaimolinge aaku ie nga iinoni e kaꞌa haataꞌinie ike aamu, taꞌe Aamaku i Lengi ni e haataꞌinie aamu.

¹⁸ Oto no ko unue huniꞌo Pita, iꞌoe oto hau, na i lengine poo-poota aani heu ie ne kei tohue soihaadaꞌinge ineu, na maꞌalana maenga na e saꞌa tari mwadaꞌu ike aana huni ohoie.

¹⁹ Ne kei niie mo kii aana Aalahanga a God huniꞌo. Nga moi taa o ko uure honosiꞌi mei aano, mo ola nge a God kei uure honosiꞌi ni otona. Na nga moi taa o ko toliꞌaasiꞌi mei aano, mo ola nge a God kei toliꞌaasiꞌi eena.”

²⁰ Oto a Jisas e si ere honosire mwaanie kire haꞌarongoa loꞌu nga iini uri ingeie oto a Kraes.

A Jisas E Ere I Sulie Sapesalunge Na Maenga Ingeie

²¹ Uure aana maholona nge a Jisas e si talaꞌai unu diana aana hunie mo pwaarongoisuli ingeie uuri, “E malisine uri ne ke tohungei lae oto hunie i Jerusalem. I leune mo rato ni mwane aana mo Jiu na mo naꞌohai pris na mo haꞌa-uusuli aana mo Haꞌatolanga a Mosis, kire kei haꞌasapesaluꞌaau aana mo ola hunge, na kire kei horo maesieu. Taꞌe aana oolune nga hai dinge ne kei taꞌelaꞌi loꞌu mwaanie maenga.”

²² Oto a Pita ko toolea a Jisas mwaanie ngaeta mo pwaarongoisuli, ko si lai ere aana uuri, “!O ke suꞌuri ere urine, aalaha paine ineu! A God e saꞌa roroꞌa toliꞌaasie ike leune huniꞌo.”

²³ Taꞌe a Jisas e aaliꞌu i lengine a Pita oto ko si unue mola hunie uuri, “!Tahi mwaanieu Satan! O ke suꞌuri neꞌie hau ni haꞌatataro hunieu. O kaꞌa saie ike neꞌisaenga a God, taꞌe o ko ere mola i sulie lio-lionga mo iinoni.”

²⁴ Oto a Jisas ko si unue hunie mo pwaarongoisuli ingeie ko teꞌuri, “Mala nga iini ko sare lulu i sulieu nge ke pulongosie maraana, na ke lulu i sulieu maꞌalana ko sapesalu oto hiitoꞌo mala mo iini i lengine mo poꞌu-poꞌu.

²⁵ Aana nga iini ko sare kinetaꞌinie mola maurihaꞌana, nge kei deu tekelaꞌinie oto. Taꞌe nga iini ko deu tekelaꞌinie maurihaꞌana i tehulaꞌaku, nge kei lio oodoie maurihe huu.

²⁶ ?Haꞌalaa nga mei taa diana nge iinoni kei terie aana kei toꞌo aana oto ahutana mo toꞌo-toꞌonga aana walumalau ie, na ko deu tekelaꞌinie mola maurihaꞌana oto i tehulaꞌani? ?Oto uri toꞌo-toꞌolana kei peꞌie aana maholona? !Haꞌike oto ooꞌoo! Nga mei ola hunie ke niie huni tola aalihoꞌi aana maurihaꞌana, haꞌike loꞌu.

²⁷ Taꞌe ineu a Kale Ni Iinoni ne kei lae taane mai peꞌie mo ensel aana manikuluhaꞌana Aamaku huni waaie nga iini oto i sulie helelana. Sam 62:12

²⁸ Toꞌohuu no ko unue oto huniꞌomu uri ngaeta mo iini hikemiu mwala nge omu uure ngeena, omu kei saronai leesieu, a Kale Ni Iinoni, ne kei lae mai mala aalaha, omu ke si mae.”