Matiu 10 - Tataroha Diana

A Jisas E Lio Hilisie Aawalai Pwaarongoisuli Mwana Rue

¹ Oto e haaraie mai aawalai pwaarongoisuli mwana rue ingeie i saana, na ko niie nanamanga e saka hunire hunie kire ke oohe aasie ahutana mo liꞌoa aaela na huni haꞌa-uurie mwala peꞌie taꞌena nga maelaa hai aaopaꞌi.

² Ie satana aawalai hurulaꞌaa mwana rue: Eetana a Saemon (haaraꞌinilana loꞌu a Pita), na a Andru (aasine a Saemon), na a Jemes (kalena Sebedi), na a Jon (aasine a Jemes),

³ Na a Pilip, na a Batolomiu, na a Tomas, na a Matiu (mwane e susulu toꞌoha aana takis nana aalahanga ni Rom), na ngaeta Jemes loꞌu (mwane kalena a Alpeas), na a Tadeas,

⁴ na ngaeta Saemon loꞌu (ngaeta iini aana pulitaa nge ko sare haiseuni huni taꞌaasie aalahanga ni Rom mwaanie hanue i Israel), na a Jiudas Iskariot (iini nge e pweloa a Jisas).

A Jisas E Uusungeꞌinie Aawalai Pwaarongoisuli Mwana Rue Huni Tarohaꞌinie Aalahanga A God

⁵ Aawalai mwane mwana rue ienini a Jisas e uusungeꞌinire peꞌie mo haꞌananaunge uuri, “Mwaanie omu lae-lae i saana mo Aapoloa Aaopa, wa i saana mo Samaria.

⁶ Taꞌe omu ke lae i saana mo sipu e takalo kaꞌu, mwala ni Israel.

⁷ Omu ke lae peꞌi laeliwala aana Aalahanga a God ko karaꞌini oto mai.

⁸ Omu ke haꞌa-uurie mo iini ko mweri, omu ke taꞌea loꞌu mo iini e mae oto, omu ke haꞌa-uurie mo iini ko sapesalu aana maelaa ni osa, na omu ke oohe aasie mo liꞌoa aaela. Omu hele mwaakule kaꞌu, na omu ke nii mwaakule loꞌu.

⁹ Mwaanie omu too-toolea nga mei toꞌoha i laona mo mweꞌi iꞌomu.

¹⁰ Na mwaanie omu too-toolea loꞌu nga mwaꞌi aana omu ko lae aani laeha, wa nga ro toꞌoni, wa nga ro hoꞌohaahiꞌae, wa nga apaꞌa. Aana e diana hunie mwala ke peꞌiꞌomu, aana iinoni auꞌesu e malisine uri nga taa e saetoꞌo aana niilana kei lae hunie.

¹¹ “Oto maholo omu ko lai aarapuu aana nga hanue, omu ke lio hunie a tei kei tola koniꞌomu, na omu ke iiꞌo kaꞌu mola peꞌie hule aana omu kei lae loꞌu mwaanie hanuena.

¹² Na maholo omu ko lai sili i laona nga nume, omu ke haꞌadianaꞌara uuri, ‘Hanuelamanga ke iiꞌo peꞌiꞌomu.’

¹³ Mala mwala aana numena ko tola koniꞌomu, hanuelamanga ke oore peꞌire, taꞌe mala kire kaꞌa tola koniꞌomu oto, kire saꞌa hele aana ike hanuelamanga omu unue ngeena.

¹⁴ Na mala uri nga hanue kaꞌa tola koniꞌomu oto, wa kire ke rongo huniꞌomu, nge omu ke lae mwaanie hanuena, na omu ke tataaꞌinie mo wasa-wasa mwaanie aeꞌaemiu, domana uri nga haꞌapasunge hunire uri a God kei haꞌaloire.

¹⁵ No ko unue oto huniꞌomu, aana dinge ni leinge, haꞌaloilana mwala aana huilume ngeena kei aaela loꞌu hiitoꞌo liutaa aana haꞌaloinge nge kei lae hunie mwala tataꞌala aana e ro huilume i Sodom na i Komora.”

Mwala Kei Teungeꞌinie Kira Hiiwalaimoli

¹⁶ Oto a Jisas ko heꞌi teꞌuri loꞌu hunie mo hurulaꞌaa, “Omu ke rongo kaꞌu. No ko uusungeꞌiniꞌomu i matolana mwala e oorahaꞌaa, na saeda huni horoꞌiꞌomu mala mo wawaulo ni meꞌesu ko seunie mo sipu. Aena ngeena omu ke saenanau aana mo tala ni horonga ikire, taꞌe iꞌomu, omu ke maneko mola mala hiroikuu.

¹⁷ Na loꞌu, omu ke lio talamiu aana mo iinoni, aena aana kire kei tooleꞌomu i laona leinge, na kire kei repusiꞌomu i laona mo nume ni palo-palo.

¹⁸ Na tolalamiu kei lae-lae i naꞌona mo mwane paine aana mo aalahanga ni welumalau na i naꞌona mo inemauri hunie leilemiu i tehulaꞌaku. Aana maholo walu olana kei reu uurini, maholo iꞌomu otona huni unu diana aana Tataroha Diana hunire, na loꞌu hunie ahutana mo iinoni ni welumalau.

¹⁹ Maholo kire ko tooleꞌomu i laona leinge, omu ke suꞌuri tolahiꞌe hiitoꞌo aana nga taa omu kei unue wa omu kei ere luhesie uri taa, aena aana a God kei niie taane huniꞌomu nga taa ni unue iꞌomu aana maholona.

²⁰ Aana omu saꞌa ere tohumiu ike taꞌe peꞌie Liꞌoa a Aamamiu ni kei ere i lalo aamiu.

²¹ “Aana maholona kei tohungei aaela huniꞌomu toꞌohuu, aana mwala kei niie mo eeside maraada hunie horoꞌilada, na mo mamaꞌa kire kei deu urine noꞌone aana mo mwela ikire, na mo mwela noꞌone kire kei taꞌelaꞌi honosie mo meuꞌana ikire huni horo maesire.

²² Na ahutana mwala kei teungeꞌiniꞌomu aena aana omu ko lulu i sulieu. Taꞌe iini nge kei uure aꞌailaꞌa taraꞌasi aani hiiwalaimolinge lai hule aana haꞌamangolana, nge a God ke si haꞌa-uurie.

²³ Maholo mwala ko teungeꞌiniꞌomu aana nga hanue, omu ke tahi takoie ngaeta hanue. Aana toꞌohuu no ko unue huniꞌomu uri omu saꞌa roroꞌa haꞌamangoa ike asunge iꞌomu aana ahutana mo henue i Israel na ineu a Kale Ni Iinoni no ko hule oto mai peꞌie manikuluhaꞌana a God.

²⁴ “Iinoni haꞌa-uusulilana ko lae-lae ue, e kaꞌa paine ike liutaa aana haꞌa-uusuli ingeie, wa nga koni-konihe ke paine liutaa aana aalaha ingeie.

²⁵ E malisine uri tolahana pwaarongoisuli ke urihana oto haꞌa-uusuli ingeie, na koni-konihe ke urihana oto aalaha ingeie. Ineu oto pwaune nume ikolu, na oto mala mwala ko haaraꞌinieu aana naꞌohana mo liꞌoa aaela, iꞌomu, mwala aana nume kire ke si haaraꞌi aaelasiꞌomu loꞌu liutaa.

²⁶ “Taꞌe maꞌalana e urine, omu ke suꞌuri meꞌuteꞌinire, aana taꞌe-taꞌena nga mei ola iinoni ko mumumunie, haataꞌinilana kei saro lae mola, na taꞌena nga mei ola ko reu mumuni, sailana kei saronai lae taane.

²⁷ Nga taa no ko unu-unu mumuni aana huniꞌomu, omu ke si unu haadaꞌi aana. Na loꞌu nga taa omu ko rorongoa mola maraamiu, omu ke si soingeꞌinie hunie ahutana mwala ke rongoa.

²⁸ Mwaanie omu meꞌu-meꞌuteꞌinie mo iini ko sare horoꞌiꞌomu, aana kire sai horoꞌie mola sapemiu, taꞌe e aasa hunie kire ke horoꞌie maurihaꞌamiu. Taꞌe omu ke maꞌuteꞌinie mola a God aana taꞌe ingeie haliꞌite nge e toꞌo aana nanamanga huni deu tekelaꞌinie sape na maurihaꞌai i laona dunge ni haꞌamotaahinge.

²⁹ Omu ke saie kaꞌu uri e ro kele pipisu nga iini e sai holiꞌi mola aana nga taꞌa-taꞌa kele peni pulu, taꞌe hule aana nga iini aadarue e saꞌa mae na Aamamiu e kaꞌa toliꞌaasie.

³⁰ Na loꞌu omu ke saie uri a God hule aana e sai susulie warai iihune pwaumiu.

³¹ Oto omu ke suꞌuri meꞌu, aena aana omu tohungei hiꞌe loꞌu liutaa aana mo pipisu oto hunge.”

Mwaanie O Mamasa Huni Houleꞌinie A Kraes

³² “Oto mala uri nga iini nge ko unu tahangaꞌinie i naꞌona mo iinoni uri ingeie iinoni ineu, nge ineu noꞌone ne kei unu tahangaꞌinie i naꞌona Aamaku i Lengi.

³³ Taꞌe mala uri nga iini kei taateingeꞌinieu i naꞌona mo iinoni, nge ne kei taateingeꞌinie noꞌone i naꞌona Aamaku i Lengi.”

A Jisas E Kaꞌa Toolea Ike Mai Lokonga, Taꞌe Oopanga

³⁴ Oto a Jisas ko heꞌi teꞌuri loꞌu, “Mwaanie omu neꞌi-neꞌisae uri nou lae mai hunie ne ke toolea mai hanuelamanga hunie walumalau. !Haꞌike! Nou kaꞌa lae ike mai hunie ne ke toolea mai hanuelamanga, taꞌe horonga kei lae i tehulaꞌana haꞌa-uusulinge ineu.

³⁵ Aana nou lae mai huni oopaa ro haꞌi-aamana, na ro haꞌinikana, na ro mahungaona keni.

³⁶ Mo tohungei iinoni oto aana uluhe nga iini, nge ke si neꞌi maelonga ingeie. Maeka 7:6

³⁷ Nga iini nge ko manata diana hunie aamana wa nikana liutaa aaku, e kaꞌa malisine ike ke neꞌi pwaarongoisuli ineu. Na nga iini ko manata diana hunie kalena mwane wa kalena keni liutaa aaku, e kaꞌa malisine ike ke neꞌi pwaarongoisuli ineu.

³⁸ Na nga iini e kaꞌa mwaꞌe-mwaꞌe huni sapesalu hule aana maenga i lengine poꞌu-poꞌu i tehulaꞌaku, e kaꞌa malisine ike ke neꞌi pwaarongoisuli ineu.

³⁹ Na nga iini nge ko kinetaꞌinie maurihaꞌana kei lio oodoie maenga huu. Na taꞌena nga iini nge ko deu tekelaꞌinie maurihaꞌana i tehulaꞌaku, kei lio oodoie maurihe huu.”

O Kei Hele Aana Waaite Taꞌau I Lengi

⁴⁰ Oto a Jisas ko heꞌi teꞌuri loꞌu, “Nga iini ko tekuhiꞌomu nge ko tekuhieu eena. Na nga iini nge ko tekuhieu ko tekuhie noꞌone iini e uusungeꞌinieu mei.

⁴¹ Nga iini ko tekuhie nga propet aena aana uri ingeie ko unu-unue walana a God, nge kei hele waaite oto mala propet ngeena. Na nga iini ko tekuhie nga iinoni diana aena aana iinonine e diana, nge kei hele waaite oto noꞌone mala iinoni diana ngeena.

⁴² Omu ke saie mola uri maꞌalana nga iini ko niie mola nga mei wei wawai ana nga taꞌa-taꞌa kele iini aana mo iini ko lulu i sulieu, aena aana uri ingeie pwaarongoisuli ineu, na kei hele waaite oto.”