Matiu 1 - Tataroha Diana

A Jisas E Hute Aana Komu A Deved Inemauri

¹ Ie uusu-uusu aana mo naꞌohai weuwana a Jisas Kraes uure oto mai aana pongine a Ebraham lae mai hule aana a Deved Inemauri, na hunie a Jisas Kraes.

² A Ebraham aamana Aesak, na a Aesak aamana Jekob, na a Jekob aamana Jiuda na mo mwane aasine,

³ na a Jiuda aamana Peres (aasine a Sera na nikadarue a Tama), na a Peres aamana Hesron, na a Hesron aamana Ram,

⁴ na a Ram aamana Aminadab, na a Aminadab aamana Nason, na a Nason aamana Salmon,

⁵ na a Salmon aamana Boas (nikana a Rehab), na a Boas aamana Obed (nikana a Rut), na a Obed aamana Jesi,

⁶ na a Jesi aamana Deved Inemauri. Na a Deved Inemauri aamana Solomon (nge e hute aana huꞌe e toꞌo-toꞌo aana kaꞌu a Iuraea),

⁷ na a Solomon aamana Rihoboam, na a Rihoboam aamana Abaeja, na a Abaeja aamana Asa,

⁸ na a Asa aamana Jehosapat, na a Jehosapat aamana Joram, na a Joram aamana Iusaea,

⁹ na a Iusaea aamana Jotam, na a Jotam aamana Ehas, na a Ehas aamana Hesekaea,

¹⁰ na a Hesekaea aamana Manase, na a Manase aamana Amon, na a Amon aamana Josaea,

¹¹ na a Josaea aamana Jekonaea na mo mwane aasine nge kire hute aana maholo mo Babilon kire laue mo Israel mwaanie i Jerusalem.

¹² Na a Jekonaea aamana Sialtiel aana maholo mo Israel kire iiꞌo wau aana aalahanga i Babilon, na a Sialtiel aamana Serababel,

¹³ na a Serababel aamana Abaeud, na a Abaeud aamana Elaeakim, na a Elaeakim aamana Aso,

¹⁴ na a Aso aamana Sadok, na a Sadok aamana Akim, na a Akim aamana Eliud,

¹⁵ na a Eliud aamana Eleasa, na a Eleasa aamana Matan, na a Matan aamana Jekob,

¹⁶ na a Jekob aamana Josep nge e toꞌo aana a Meri na a Meri nikana a Jisas, sailana uri a Kraes.

¹⁷ Oto uure aana a Ebraham lae mai hule aana a Deved Inemauri, aawalai naꞌohai hute-hutanga mwana hai. Na uure loꞌu aana Deved Inemauri lae mai hule aana maholo mo maelonga kire toolea mo Israel hunie aalahanga ikire i Babilon, ngaeta aawalai naꞌohai hute-hutanga mwana hai loꞌu. Na ngaeta aawalai naꞌohai hute-hutanga mwana hai loꞌu, uure aana maholo mo Babilon kire toolea mo Israel hunie i Babilon lae mai hule aana maholo a Kraes e hute.

Hutelana A Jisas Kraes

¹⁸ Hutelana a Jisas Kraes e lae uurini. A Meri, nikana Jisas e haiholotaꞌi huni toꞌo aana a Josep, taꞌe i naꞌona kirerue ke si iiꞌo ruru, a Meri ko hiꞌe-hiꞌe oto aani mwela aana Liꞌoa Maaꞌi.

¹⁹ A Josep mone nga mwane oodotaꞌi, na e kaꞌa sare haꞌamasaa ike keni ingeie a Meri i maana mwala, oto ko loꞌo-loꞌongaꞌi huni toliꞌaasie mola mwa-mwanoto maraana.

²⁰ Maholo a Josep ko loꞌo-loꞌongaꞌi ue urine, ensel a God ko si waꞌaraa hunie aani maꞌahu-polenga na ko teꞌuri, “Josep, iini o hute mai aana komu a Deved Inemauri, suꞌuri meꞌu huni toꞌo aana a Meri. Kele mwela nge ko hiꞌe-hiꞌe aana ngeena, e lodo aana Liꞌoa Maaꞌi.

²¹ A Meri kei haꞌahutaa kele mwela mwane, oto o ke haaraꞌinie aana a Jisas, oolisilana uuri, ‘God ko haꞌa-uuri.’ O ke haaraꞌinie urine aena aana ingeie kei haꞌa-uurie mwala ingeie mwaanie mo oorahaꞌaa ikire.”

²² Mo ola ienini ko reu huni haꞌa-oaie nga taa a God e unue aana propet uuri,

²³ Nga keni raoriꞌi kei hiꞌe-hiꞌe aani mwela, na kei haꞌahutaa kele mwela mwane, na kire kei saie aana Imaniuel, Aesaea 7:14 ere-oolisilana uuri, “God peꞌikie.”

²⁴ Oto i purine maꞌahu-polenga ngeena, nge a Josep ko si toꞌo aana a Meri na ko deu i sulie nga taa ensel a God e unue hunie.

²⁵ A Josep e lio i suli diana aana a Meri mala keni raoriꞌi lai hule aana a Meri e haꞌahutaa kele mwela mwane ngeena. Oto a Josep e si haaraꞌinie kele mwela mwane ngeena aana a Jisas.