Tataroha Diana I Sulie A Jisas Kraes Nge A Luk E Uusue 9 - Tataroha Diana

A Jisas E Uusungeꞌinie Mo Hurulaꞌaa Huni Tarohaꞌinie Aalahanga A God

¹ Oto a Jisas e soie mai ahutana aawalai hurulaꞌaa mwana rue i saana, na ko niie nanamanga e saka hunire hunie kire ke oohe aasie ahutana mo liꞌoa aaela, na huni taꞌaasie taꞌena nga maelaa.

² Na e uusungeꞌinire hunie kire ke lai laeliwala aana Aalahanga a God na huni haꞌa-uurie mo iini ko mweri.

³ Oto ko si teꞌuri hunire, “Maholo omu ko lae, omu ke suꞌuri toolea loꞌu nga mei ola peꞌiꞌomu, nga apaꞌa, wa nga mwaꞌi, wa nga mei ngeulaa, wa nga mei toꞌoha. Maꞌalana uri nga ro toꞌoni na suꞌuri loꞌu, taꞌe mo iini oto omu hoꞌosiꞌi mola.

⁴ Maholo omu ko lai sili aana nga nume, omu ke iiꞌo oto i leune lai hule aana maholo ni lae mwaanie hanuena.

⁵ Mala uri mwala aana hanuena kaꞌa takuhiꞌomu oto, nge omu ke lae mwaanie hanuena, na omu ke tataaꞌinie mo wasa-wasa mwaanie aeꞌaemiu, domana uri nga haꞌapasunge hunire uri a God kei haꞌaloire.”

⁶ Oto mo hurulaꞌaa e tauleꞌi, kire ko si lae i sulie ahutana mo henue huni tarohaꞌinie Tataroha Diana, na kire ko haꞌa-uurie mwala aana taꞌena nga leu.

A Herod E Rongo Tarohana A Jisas

⁷ Maholo a Herod Antipas, aalaha ni Kalili, e rongo tarohana walu ola nge ko reune, ko tohungei teipuꞌo-puꞌo, aena aana ngaeta mwala ko unue uuri, “A Jon Loto maaꞌi ni e mauri loꞌu.”

⁸ Ngaeta mo iini ko unue uuri, “A Elaeja e maau aameelu.” Na ngaeta mo iini ko unu-unue ue uuri, “Nga iini aana mo propet oto i naꞌo ni e heꞌi meuri loꞌu ngeena.”

⁹ Oto a Herod ko unue uuri, “A Jon nou lamasie kaꞌu oto pwaune. ?A tei mwane ni no ko rongo tarohana loꞌu ienini?” Oto ko si eriꞌapasie uri ke leesie a Jisas.

A Jisas E Haꞌangaue Lime Sinolai Mwane

¹⁰ Maholo mo hurulaꞌaa kire ooli mei, oto kire ko haꞌarongoa Jisas aana walu ola nge kire lae peꞌi esuiꞌi. Oto e toolera kire ko lae maraada hunie huilume i Betsaeda.

¹¹ Oto maholo mwala e rongo tarohana urine, kire ko si lae i sulire. Na a Jisas e takuhie mwalana, e haꞌa-uusulire i sulie Aalahanga a God, na e haꞌa-uurie mo iini ko mweri.

¹² Oto maholo karaꞌinie sato kei suu, aawalai hurulaꞌaa mwana rue kire lae mai saana a Jisas, oto kire ko teꞌuri hunie, “O ke uusungeꞌinie mwala ngeena hunie kire ke lai loꞌohi ngeulaa ada na mo leu ni maꞌahu ikire aana mo huilume, aena aana ikolu aana hanuesala ni ie.”

¹³ Oto a Jisas ko teꞌuri hunire, “Iꞌomu, omu ke nii ngeulaa mola ada.” Oto kire ko aalamie uuri, “!Haꞌike eena! Melu toꞌo aana mola e lime aata ho bred na e ro ho iiꞌe. ?Taꞌe mo ola urine kei adona mwala hunge urine uri taa? ?Ohe o saetoꞌo aana melu ke lae holi ngeulaa ada?”

¹⁴ Sulie ola mala e lime sinolai mwane ni ngeena. Oto a Jisas ko teꞌuri hunie mo pwaarongoisuli ingeie, “Omu ke haꞌa-iiꞌosie mwala aani pulitaa ni lime aawalai iinoni nga pulitaa.”

¹⁵ Oto mo pwaarongoisuli ko deu oto i sulie nga taa a Jisas e unue hunire, na mwala kire iiꞌo oto aani pulitaa.

¹⁶ Oto a Jisas e hele aana lime ho bred ngeena na e ro ho iiꞌe, oto ko si lio i lengi, na ko paalahea a God. Oto e nisie mo ho bred ngeena, ko si niiꞌi hunie mo pwaarongoisuli ingeie hunie kire ke haꞌa-adoa mwala aani. Na e teꞌurine noꞌone aana e ro ho iiꞌe hunie ahutada mango.

¹⁷ Oto ahutana mwala kire mani ngeu pote, na i purine kire ngau mango, mo pwaarongoisuli ko si haꞌahonue aawalai luꞌe mwana rue aana mo ooretai ngeulaa.

A Pita E Unu Tahangaꞌinie A Jisas Uri Ingeie A Kraes

¹⁸ Ngaeta hai dinge a Jisas e iiꞌo mola peꞌie aarengaꞌinge, na mo pwaarongoisuli ingeie mola kire iiꞌo peꞌie. Oto ko si dolosi aada uuri, “?Haꞌalaa mwala ko unu-unue uri ineu a tei?”

¹⁹ Oto kire ko aalamie uuri, “Ngaeta mo iini ko unu-unue uri iꞌoe a Jon Loto Maaꞌi e mauri eelihoꞌi. Na nga mo iini ko unu-unue uri iꞌoe a Propet Elaeja. Na ngaeta mo iini loꞌu ko unu-unue uri iꞌoe nga iini hikana mo propet oto i naꞌo ni e heꞌi meuri loꞌu ngeena.”

²⁰ Oto a Jisas ko heꞌi dolosi loꞌu aada uuri, “?Oto e ue aana iꞌomu? ?Haꞌalaa omu ko unu-unue uri ineu a tei?” Oto a Pita ko aalamie uuri, “Iꞌoe oto a Kraes, a Haꞌa-uuri nge a God e haiholotaꞌinie kei lae mai.”

²¹ Oto a Jisas ko ere honosire mwaanie kire haꞌarongoa loꞌu nga iini aana leune.

A Jisas E Ere I Sulie Sapesalunge Na Maenga Ingeie

²² Oto a Jisas ko heꞌi unue loꞌu uuri, “Leu oto i sapeku uri hunie ineu a Kale Ni Iinoni, ne ke sapesalu oto hiitoꞌo. Aana mo naꞌohai pris na mo haꞌa-uusuli aana mo Haꞌatolanga a Mosis na ngaeta mo rato loꞌu, kire kei leledieu. Oto kire kei horo maesieu, taꞌe aana oolune nga hai dinge ne kei taꞌelaꞌi eelihoꞌi loꞌu mola mwaanie maenga.”

²³ Na ko heꞌi unue loꞌu hunie ahutada uuri, “Mala uri nga iini ko sare lulu i sulieu, nge ke pulongosie walu ola e sae haahiꞌi, na ke lulu i sulieu i suli hei dinge, maꞌalana ke sapesalu i tehulaꞌaku, hule aana maenga i lengine poꞌu-poꞌu. Iini nge ko aangaꞌinie poꞌu-poꞌu ingeie urine, haꞌalaa e sai lulu i sulieu.

²⁴ Aana taꞌena nga iini ko sare kinetaꞌinie mola maurihaꞌana, nge kei deu tekelaꞌinie oto. Taꞌe nga iini nge ko deu tekelaꞌinie maurihaꞌana i tehulaꞌaku, nge kei haꞌa-uurie tohungana maurihaꞌana eena.

²⁵ ?Haꞌalaa nga mei taa diana nge iinoni kei terie aana kei toꞌo aana oto ahutana mo toꞌo-toꞌonga aana walumalau ie, na ko deu tekelaꞌinie mola maurihaꞌana oto i tehulaꞌani? ?Oto uri toꞌo-toꞌolana kei peꞌie aana maholona? !Haꞌike oto ooꞌoo! Nga mei ola hunie ke niie huni tola aalihoꞌi aana maurihaꞌana, haꞌike loꞌu.

²⁶ Mala uri nga iini ko masa huni unu tahangaꞌinieu na mo haꞌa-uusulinge ineu, nge ineu noꞌone ne kei masa huni unu tahangaꞌinie aana maholo ne kei lae mai peꞌie manikuluhaꞌaku na manikuluhaꞌana a Mamaꞌa na mo ensel maaꞌi.

²⁷ Toꞌohuu no ko unue oto huniꞌomu uri ngaeta mo iini hikemiu mwala nge omu uure ngeena, omu kei saronai leesie Aalahanga a God kei lae mai, omu ke si mae.”

A Jisas E Haataꞌinie Manikuluꞌanga Ingeie

²⁸ Oto ola mala e walu hei dinge e mango i purine a Jisas e unue walu ola ienini, e si toolea a Pita, na a Jon, na a Jemes, na kire ko hanetaa taꞌau i lengine toloi henue huni aarea God.

²⁹ Na maholo ko aarea God ngeena, nge maana ko si lio aaopa, na mo toꞌoni ingeie kire ko tohungei lio wana-wana na ko raa oto mala waꞌariri.

^30-31 Oto mola aana maholona a Mosis na Elaeja ko tolana maau peꞌie manikuluhaꞌana a God, na kirerue ko ere oto peꞌie a Jisas i sulie maelana nge kei reu i Jerusalem huni haꞌa-oaie oalaꞌinge a God.

³² Aana maholona na a Pita peꞌie e ro oana kiraelu ko maꞌahu. Oto maholo kiraelu lio, kire ko si leesie rarangana God e raa kali-kelie a Jisas na e ro mwane e uure oto peꞌie.

³³ Oto maholo e ro mwane ko deu huni lae oto mwaanie a Jisas, a Pita ko teꞌuri hunie, “Poro paine, e tohungei diana aana iꞌemeelu oto i leu. Melu kei esuie oto nga oolu aapa-aapa i leu—nga iini nemue, nga iini nana a Mosis, na nga iini nana a Elaeja.” A Pita e talei ere mola urine, taꞌe e kaꞌa saie ike nga taa ko unue.

³⁴ Maholo a Pita ko ere-ere ue urine, na mei uuru ko tolana lae oto mai, na e oolu mwane ngeena ko tohungei meꞌu oto aana mei uuru ngeena ko siho oto mai haahire.

³⁵ Na kire ko rongoa mei wala e uure mai mwaanie mei uuru ngeena ko teꞌuri, “Tohungei Kaleku ni ienini, iini nou lio hilisie. Omu ke rongo hunie.”

³⁶ Oto maholo mei wala ngeena e mango, kiraelu ko si leesie mola a Jisas e uure maraana. Oto mo pwaarongoisuli kiraelu rohu mola haahie, na kiraelu kaꞌa haꞌarongoa loꞌu nga iini aana mo dingena, aana nga moi taa nge kiraelu leesiꞌi.

A Jisas E Haꞌa-uurie Kele Mwaꞌu Liꞌoa Aaela E Hite Aana

³⁷ Oto aana hai dinge loꞌu i sulie, i purine a Jisas na e oolu pwaarongoisuli kiraelu siho toli mei mwaanie uuwo, oto kire ko oodoie mwala oto hunge.

³⁸ Oto ngaeta iini hikada ko aawara, na ko unue uuri, “!Haꞌa-uusuli! No ko eitanaiꞌo uri o ke peꞌie kaꞌu kele mwaꞌu ineu, aana taꞌa-taꞌa mwela mouteꞌi ineu ni otona.

³⁹ Maholo liꞌoa aaela kei hulesie, oto ko aawara na ko eriri oto, na huto-huto ko tahe oto aana wawana. Liꞌoa aaela ngeena ko talei waelie oto mola tarau urine, na e kaꞌa sai mango ike loꞌu mwaanie.

⁴⁰ Nou haaraie kaꞌu mo pwaarongoisuli iꞌoe uri kire ke taꞌaasie mwaanie, taꞌe kire dau kasoa mola.”

⁴¹ Oto a Jisas ko teꞌuri, “Iꞌomu pwaunge siꞌiri ie, iꞌomu mo iinoni aaela, suata mone hule aana omu kaꞌa hiiwalaimoli ike aana a God. !No ko talei haꞌaweoau oto mola peꞌiꞌomu! ?Uri ne kei iiꞌo tewa kaꞌu loꞌu uri taa peꞌiꞌomu, omu ke si hiiwalaimoli?” Oto ko si teꞌuri hunie a mwaena, “Toolea kaꞌu mei a kalemu i leu.”

⁴² Oto maholo nge a mwaꞌune ko lae mai takoie a Jisas, liꞌoa aaela ko reputeꞌi lae-laeꞌi oto aana a mwaꞌune i aano. Taꞌe a Jisas e ere aana liꞌoa aaela ngeena, ko si haꞌa-uurie a mwaꞌune, na ko toliꞌaasie oto hunie aamana.

⁴³ Oto ahutana mwala ko si meni pangataꞌinie loꞌu painehaꞌana nanamanga a God ngeena. Maholo na ahutana mwala ko papangataꞌinie ue walu ola nge a Jisas ko deuꞌine, a Jisas ko si teꞌuri hunie mo pwaarongoisuli ingeie,

A Jisas E Heꞌi Ere Loꞌu I Sulie Maenga Ingeie

⁴⁴ “Mwaanie omu pupulongosie nga taa nge no ko unue huniꞌomu ienini. Ineu a Kale Ni Iinoni, pwelolaku kei lae i laona nimana mo iinoni.”

⁴⁵ Taꞌe mo pwaarongoisuli ko teipuꞌo-puꞌo mola aana nga taa nge a Jisas e ere urine hunire aana. A God e mumunie loꞌongaꞌinge aana mo wala ienini mwaanire, mwaanie kire rongo saiꞌi. Oto aana maholona, ikire na kire ko meꞌu loꞌu mola huni dolosi aana a Jisas, uri nga taa loꞌongaꞌinge aana erenga ingeie.

?A Tei Ni E Paine Liutaa?

⁴⁶ Oto mo pwaarongoisuli ingeie ko aehota ere haitelili maraada i sulie uri a tei hikada kei peine liutaa.

⁴⁷ Taꞌe a Jisas mone e saie mola loꞌongaꞌinge ikire, oto e si toolea kele mwela, ko haꞌa-uuresie i sulie,

⁴⁸ na ko teꞌuri hunire, “Taꞌena nga iini nge ko tola konie nga kele mwela mala ienini aana sataku, nge ko tola konieu eena. Na taꞌena nga iini nge ko tola konieu, ko tola konie noꞌone iini e uusungeꞌinieu mei eena. Aana a tei hikemiu nge ko haꞌamwai-mweiꞌaa toꞌohuu, ingeie ni oto e paine liutaa.”

⁴⁹ Oto a Jon ko aalamie a Jisas uuri, “Poro paine, melu leesie nga iini ko oohe liꞌoa aaela mwaanie mwala aana satamu, na melu ere aana oto mwaanie e heꞌi teꞌurine loꞌu, aana ingeie haꞌike aana pulitaa ikolu.”

⁵⁰ Oto a Jisas ko teꞌuri hunie, “Omu ke suꞌuri uure honosie, aena aana nga iini nge e kaꞌa uure honosikolu, ingeie iini peꞌikolu eena.”

Mo Samaria Kire Sereꞌinie A Jisas

⁵¹ Maholo ko karaꞌinie oto uri a God kei tola aalihoꞌi loꞌu aana a Jisas i saana taꞌau i Lengi. Oto a Jisas e loꞌongaꞌinie uri ke lae hunie i Jerusalem,

⁵² na e uusungeꞌinie ngaeta mo mwane uri kire ke lae i naꞌo. Oto mo mwane ngeena kire lae aana ngaeta huilume i Samaria huni deu aakau aana ahutana mo ola loosie a Jisas.

⁵³ Taꞌe mwala aana huilume ngeena, kire kaꞌa sare takuhie ike a Jisas, aena aana kire lio saie uri ko lae hunie i Jerusalem.

⁵⁴ Maholo ngaeta ro pwaarongoisuli ingeie, a Jemes na a Jon kirerue leesie urine, oto kirerue ko unue hunie a Jisas uuri, “?E ue Poro paine, o saetoꞌo aana mere ke unue nga dunge ke siho mai uure i Lengi hunie ke waelie mwala ngeena?”

⁵⁵ Taꞌe a Jisas e aaliꞌu oto ko si ere aadarue mola.

⁵⁶ Oto a Jisas na mo pwaarongoisuli ingeie kire si lae loꞌu mola hunie ngaeta huilume.

Mo Iini Ko Neꞌisae Mouteꞌi Haꞌalaa Kire Sai Lulu I Sulie A Jisas

⁵⁷ Maholo kire ko lae oto i sulie tala, ngaeta mwane ko si teꞌuri hunie a Jisas, “Nou mwaꞌe-mwaꞌe ni lulu i suliꞌo aana taꞌena nga leu o ko lae aana.”

⁵⁸ Oto a Jisas e aalamie ko teꞌuri, “Mo usu ni meꞌesu na hule aana kire toꞌo liwe ni maꞌahu ikire, na mo menu loꞌu kire mani toꞌo niuꞌi taane noꞌone, taꞌe ineu a Kale Ni Iinoni hule aana nga leu ni mamalo ineu na haꞌike loꞌu.”

⁵⁹ Oto ko teꞌuri loꞌu hunie ngaeta mwane, “O ke lulu i sulieu.” Taꞌe a mwaena e unue uuri, “Poro paine, o ke holaꞌi toliꞌaasieu keꞌu hunie ne ke lai heitolingeꞌinie aamaku.”

⁶⁰ Taꞌe a Jisas e aalamie oto ko teꞌuri, “Haꞌike, taꞌe o ke lulu i sulieu oto molana, na mwaanie o maaꞌoohie mo tolahiꞌanga ni welumalau e mango nge o ke si lulu i sulieu. Taꞌe o ke lae oto molana huni tarohaꞌinie Aalahanga a God.”

⁶¹ Ngaeta mwane loꞌu e unue uuri, “Ne kei lulu i suliꞌo taane, Poro paine, taꞌe o ke holaꞌi toliꞌaasieu keꞌu hunie ne ke lai haꞌarongoa mwala taꞌau i nume ineu.”

⁶² Taꞌe a Jisas e unue uuri, “Taꞌena nga iini ko esu i hohola ingeie, taꞌe ko talei loꞌo-loꞌongaꞌinie loꞌu mola nga mo ola aaopa kei waelie oto hohola ngeena. Na e urine noꞌone mala nga iini ko sare neꞌi pwaarongoisuli ineu taꞌe ko loꞌo-loꞌongaꞌinie mola mo ola aaopa. Iinoni urine e kaꞌa malisine ike Aalahanga a God.”