Tataroha Diana I Sulie A Jisas Kraes Nge A Luk E Uusue 8 - Tataroha Diana

Ngaeta Mo Keni Kire Peꞌi-peꞌie A Jisas Aana Toꞌo-Toꞌolada

¹ Oto purihaꞌana walu olana e saro mango, a Jisas e si lae i sulie ahutana mo henue paine na mo kele huilume mwai-mwei aana poꞌo ni henuena, aana ko laengaꞌinie Tataroha Diana aana Aalahanga a God. Aawalai pwaarongoisuli mwana rue ingeie kire lae noꞌone peꞌie.

² Na ngaeta mo keni noꞌone peꞌire, mo iini nge haꞌa-uurilada e lae mwaanie mo liꞌoa aaela na mo maelaa. Ngaeta mo iini aada, a Meri (keni aana huilume i Makdala nge a Jisas e oohea e hiu liꞌoa aaela mwaanie),

³ na a Susana, na a Joana nge poro ingeie a Kusa (nge ingeie naꞌohai mwane auꞌesu haahie ahutana mo mwane auꞌesu i nume a Herod Antipas), na mo keni hunge loꞌu. Mo keni ngeena kire ko peꞌi-peꞌie a Jisas na mo pwaarongoisuli ingeie aana toꞌo-toꞌolada.

A Jisas E Aalahuu Aana Iini Ko Hesi Lite

⁴ Na mwala hunge e ruru mei saana Jisas uure mwaanie taꞌena nga hanue. Oto ingeie ko si ere ni aalahuunge hunire uuri,

⁵ “Ngaeta mwane auꞌesu hohola e oꞌoꞌo, oto ko lai hesie mo litei ola ingeie mala mo kooni. Hasinge ngeena ko lae mola aana tataaꞌinilana mo lite, na maholo ko tatataaꞌinie mo litei ola hailiu i laona hohola ingeie, ngaeta mo lite iini eeni kire ko teke i sulie tala. Oto mwala ko uuriꞌi na mo menu ko ngeuꞌi mola.

⁶ Ngaeta mo iini eeni kire ko teke i lengine mei heu-heue. Oto maholo kire ko pwito poi, kire ko tolana nunulu mola aena aana leune e aꞌate.

⁷ Ngaeta mo litei ola kire ko teke i matolana mo walo kau-keu. Oto kire ko pwito tararuru peꞌie mo walo kau-keu, taꞌe mo walo kau-keu kire paine haahiꞌi na kire ko si melusiꞌi mola.

⁸ Taꞌe ngaeta mo litei ola kire teke i lengine mei mwakano diana, na kire ko pwito diana. Oto kire ko si hungu haꞌatangalau loꞌu.” Oto a Jisas e si ere ooreta hunire uuri, “Mwaanie omu rorongo aasie mola mo wala ienini, taꞌe omu ke loꞌo-loꞌongaꞌi diana i suliꞌi.”

?Aena E Ue Nge A Jisas E Haꞌa-uusuli Aani Aalahuunge Haliꞌite?

⁹ Oto mo pwaarongoisuli ingeie kire ko dolosi aana uuri, “?Nga taa ni loꞌongaꞌinge aana aalahuunge ienini?”

¹⁰ Oto a Jisas ko unue uuri, “A God e lio hilisiꞌomu hunie omu ke saenanau aana walaimolinge mumuni aana Aalahanga a God. Taꞌe hunie mo iini aaopa, no ko ere ni aalahuunge oto haꞌalaa, hunie uri kire ko lio-lio na kire ke suꞌuri lio saiꞌi, kire ko rorongo na mwaanie kire rongo saiꞌi.”

A Jisas E Luhesie Aalahuunge Aana Iini Ko Hesi Litei Ola

¹¹ Na a Jisas e heꞌi unue loꞌu uuri, “Loꞌongaꞌinge aana aalahuunge ienini e lae uuri. Mo lite walana God ni ngeena.

¹² Tala nge mo lite ngeena kire teke i sulie e urihana mo iini nge kire rongoa taane mo wala. Taꞌe e kaꞌa tewa na a Satan e lae mai ko taꞌaasie mwaanie manatada, hunie uri kire ke suꞌuri hiiwalaimoli na mwaanie uri haꞌa-uurilada e lae.

¹³ Na mo iini nge manatada e urihana mei mwakano hau-heue ngeena, kire rongoa walana God, na oto lau-leu kire ilenimwaꞌe haahie. Taꞌe ola mala nga ai ke uure i laona mei mwakano urine, haꞌalaa imi-imine e kaꞌa susuꞌimi ike hiitoꞌo i aano. Kire hiiwalaimoli mola haꞌawali, na aana maholo malaahongalada kei lae, oto kire ko tolana toliꞌaa mola.

¹⁴ Nga mo iini loꞌu manatada e urihana mei mwakano e honu aana walo kau-keu ngeena, kire rongoa noꞌone walana God, taꞌe kire neꞌisae painesie mola mau-meuringe aana walumalau. Kire tolahiꞌe, na kire saetoꞌo aana mola toꞌo-toꞌonga, na kire ko saehanalie taꞌena nga ola. Oto mo wala diana ngeena kire kaꞌa pwito kohi, na kire kaꞌa hungu ike loꞌu.

¹⁵ Taꞌe mo iini loꞌu, mo iini urihana mei mwakano diana ngeena, kire rongoa mo wala ngeena, na kire koni diana aani i laona manatada. Kire tola i sulie mo haꞌa-uusulinge ngeena, na kire ko si hungu eeni norutoꞌonga peꞌi esunge susuleꞌi hunie Aalahanga a God.”

?A Tei Kei Neꞌie Laite I Hahana Nime?

¹⁶ Oto a Jisas ko heꞌi unue loꞌu uuri, “Na nga taꞌa-taꞌa iini e saꞌa haꞌakaunie ike mola nga laite na ke pwaohaꞌinie nga nime haahie, wa ke mumunie mola i hahana nga tahe. Taꞌe kei aaroroa oto i lengi hunie ke matapwa i laona numena, na hunie ahutana mwala nge ko sili mei nume kire sai lio diana.

¹⁷ Aana taꞌena nga ola mumunilana e lae, nge haataꞌinilana kei saronai lae taane mai haadaꞌi aana leu matapwa. Na nga taa nge aaluhilana e lae, aelilana kei saronai lae taane mai haadaꞌi huni leesie.

¹⁸ Aena ngeena, omu ke rorongo mwako. Aana taꞌena nga iini e mwaꞌe-mwaꞌe huni rongo i sulie mo haꞌa-uusulinge ineu, nge sapeilana saenanaunge ni Lengi kei lae loꞌu hunie. Taꞌe a tei nge e kaꞌa mwaꞌe-mwaꞌe huni rongo i sulie mo haꞌa-uusulinge ineu, nge maꞌalana uri nga kele mei saenanaunge ni Lengi e toꞌo aana, taꞌe taꞌaasilana kei lae mola mwaanie.”

?Kira Tei Mo Tohungei Eesine A Kraes?

¹⁹ Oto nikana Jisas na mo eesine mwane kire mani hute, kire sare lae mai saana, taꞌe kire kaꞌa sai lae mai karaꞌinie, aena aana mwala e hunge.

²⁰ Oto ngaeta iini aana mwala ngeena ko unue hunie a Jisas uuri, “!Lio kaꞌu! A nikemu na mo eesimu kire uure mola taꞌi sinaha, na kire ko sare leesiꞌo.”

²¹ Oto a Jisas ko aalamie uuri, “A nikeku na mo eesiku oto ahutana mo iini nge ko rongoa walana God na kire ko lulu i sulie oto.”

A Jisas E Ere Aana Ooru

²² Aana ngaeta hai dinge a Jisas ko teꞌuri hunie mo pwaarongoisuli ingeie, “Kolu ke aatoholo kaꞌu hunie raune aasi poꞌo taꞌau.” Oto kire taꞌelie iiola, kire ko si lae,

²³ na lae-lae a Jisas e lae otoi eno huni maꞌahu, no ko maꞌahu eelisuu oto. E kaꞌa tewa na painehaꞌana mawasidengi ko hite aada oto i laona aasi, na iiola ko aehota honu oto aana aasi, hule aana kire ko karaꞌi dodo oto.

²⁴ Oto mo pwaarongoisuli kire ko haꞌalioa Jisas na kire ko teꞌuri hunie, “!Poro paine! !Poro paine! !O ke lio kaꞌu, kolu ko karaꞌi mae oto!” Oto a Jisas e taꞌelaꞌi ko ere aana ooru na aahe, oto kire ko tolana aapwanaꞌi na ko hoolaa oto.

²⁵ Oto a Jisas ko si teꞌuri hunie mo pwaarongoisuli ingeie, “?Nge i tei hiiwalaimolinge iꞌomu?” Taꞌe kire ko meꞌu peꞌi pangataꞌinge, na kire ko unue oto hunire maraada uuri, “?A tei mwane ni ie? !Oto hule aana e ere aana mola ooru na aahe, oto kire ko meni tola i sulie oto walana!”

A Jisas E Haꞌa-uurie Mwane Liꞌoa Aaela E Hite Aana

²⁶ A Jisas na mo pwaarongoisuli ingeie kire aatoholosie aasi uure i Kalili hunie poꞌo ni henue mo Kerasa.

^27-29 Maholo a Jisas ko siho hai oone i leune mwaanie iiola, na ko oodoie oto ngaeta mwane mo liꞌoa hunge aaela aana. Mwala aana hanuena kire ko pwesue kaꞌu mo kiꞌine na mo aeꞌaena aani iieli heu, taꞌe ko mousiꞌi mola na ko tehi oto i henuesala. Ko lae tewa oto mai, na mwaena e kaꞌa sai hoꞌosie nga mei sala wa nga toꞌoni, na iiꞌolana oto tarau mola i saana mo kilipweꞌu. Oto maholo a Jisas e oodoie a mwaena, ko si ere aana mo liꞌoa aaela ngeena hunie kire ke iisitaa mwaanie. Oto a mwaena ko uulo na ko lai pouruuru oto i naꞌona Jisas peꞌie mei wala paine uuri, “!Jisas Kalena God, iini e paine liutaa! ?O kei uaau oto eena? !No ko eitanaiꞌo, uri o ke suꞌuri haꞌaloieu!”

³⁰ Oto a Jisas ko dolosi aana uuri, “?A tei ni satamu?” Oto a mwaena ko aalamie uuri, “Sataku a Hunge.” E ere urine aena aana mo liꞌoa aaela hunge ni kire aana.

³¹ Na mo liꞌoa aaela ngeena kire aitanaie a Jisas uri ke suꞌuri uusungeꞌi aasire i laona kalinge ni haꞌamotaahinge nge e kaꞌa toꞌo kaona.

³² Maholona na hakaa ni poo oto paine ko susude taꞌau i sulie uuwo i leune. Oto mo liꞌoa aaela ngeena kire aitanaie a Jisas uri ke toliꞌaasire hunie kire ke lai sili i laona mo poo ngeena. Oto a Jisas e si toliꞌaasire mola.

³³ Na maholo mo liꞌoa aaela ngeena kire iisitaa mwaanie a mwaena, oto kire si lai sili i laona mo poo. Amaa ni poo ngeena e mani tehi, na kire ko lai pola oto i sulie maoꞌi i laona aasi, na kire ko meni inu oto.

³⁴ Oto mwala nge kire lio-lio i sulie mo poo ngeena kire leesie nga taa e raune, kire si huru na kire ko lae otoi tarohaꞌinie tataroha aana i laona huilume ikire, na loꞌu aana mo henue kali-kelie.

³⁵ Oto mwala kire lae mai huni leesie nga taa e raune, kire lai hule i saana a Jisas, na kire ko lio oodoie uri mwane nge a Jisas e oohea mo liꞌoa aaela mwaanie, e iiꞌo oto i saana Jisas. E manata na e hoꞌo sala oto. Oto mwala ngeena ko si meni meꞌu oto.

³⁶ Na mo iini e leesie mei olana, kire ko si haꞌarongoa mwala aana uri a Jisas e haꞌa-uurie a mwaena uri taa.

³⁷ Oto ahutana mwala aana poꞌo ni henuena kire ko si meni eitanaie a Jisas uri ke lae mwaanire, aena aana kire ko tohungei meꞌu oto hiitoꞌo. Oto a Jisas e taꞌelie iiola ko si lae mwaanire.

³⁸ Oto mwane nge mo liꞌoa aaela e iisitaa mwaanie ngeena ko eitanaie a Jisas uri ke hakusie, taꞌe a Jisas e uusungeꞌi eelihoꞌi mola aana, na ko unue hunie uuri,

³⁹ “O ke aalihoꞌi mola i saana uluhe iꞌoe, na o ke haꞌarongoa mwala aana walu ola diana nge a God e asuiꞌi huniꞌo.” Oto a mwaena e si lae hailiu i laona huilumena peꞌi tarohaꞌinie oodoie mwala nga taa a Jisas e asuie aana.

A Jisas E Haꞌa-uurie Kele Pule A Jaeras Mwaanie Maenga

⁴⁰ Maholo a Jisas e aalihoꞌi loꞌu hunie poꞌo ni eesi taꞌau, na mwala oto hunge kire maaꞌoohie i leune peꞌie saemangonga oto liutaa haahie.

⁴¹ Oto ngaeta mwane satana a Jaeras e lae mai, na ingeie nga naꞌohai mwane aana nume ni palo-palo mo Jiu aana hanuena. A mwaena ko pouruuru i aano oto i naꞌona Jisas, na ko eitanaie a Jisas uri ke lae kaꞌu taꞌau i nume ingeie,

⁴² aana kele pule ingeie ko karaꞌi mae oto. A pulena taꞌa-taꞌa mwela mouteꞌi, na ola mala aawalai helisi mwana rue ue aana. Maholo a Jisas ko lae hunie nume a Jaeras, mwala oto hunge ko si lae mai kali-kelie.

⁴³ Na i matolana mwala e hunge ngeena, ngaeta keni noꞌone i leune maelaa madaꞌa aana apu raha-raha ko seunie oto hunie aawalai helisi mwana rue. A keine e nii mangoa oto toꞌo-toꞌolana hunie mwala kure-kure, taꞌe nga iini na e kaꞌa haꞌa-uurie ike.

⁴⁴ A keni ngeena e lae poi i matolana ruruhaa i purine a Jisas, oto ko kopi aana ngongoꞌana toꞌoni ingeie, na apu raha-raha ngeena ko tolana mango oto mwaanie.

⁴⁵ Oto a Jisas ko dolosi uuri, “?A tei ni e kopi eeku?” Taꞌe kire ko meni taateingeꞌinie mola. Oto a Pita ko teꞌuri, “Aalaha, mwala hunge kaꞌu kire ruru kali-keliꞌo ngeena, na kire ko lae peꞌi helipaꞌo uri huni leesiꞌo.”

⁴⁶ Taꞌe a Jisas ko teꞌuri, “!Haꞌike! Nga iini e kopi eeku, aana nou hiingeꞌinie uri nanamanga ineu e haꞌa-uurie nga iini.”

⁴⁷ Na a keine e saie mola uri e saꞌa mumuni ike loꞌu, oto ko si eriri na ko lai pouruuru oto i naꞌona Jisas. Oto ko unu tahangaꞌinie hunie a Jisas i naꞌona mwala uri aena nga taa e kopi aana, na uri haꞌa-uurilana e tolana lae oto mola aana maholona.

⁴⁸ Oto a Jisas ko si unue hunie a keine uuri, “Kaleku, hiiwalaimolinge iꞌoe e haꞌa-uuriꞌo oto. O ke lae ni henuelama.”

⁴⁹ Maholo na a Jisas ko ere-ere ue, ngaeta mwane e uure taꞌau i nume a Jaeras, e lae mai hule i saada, oto ko teꞌuri hunie a Jaeras, “Kele pule iꞌoe e mae oto. O ke suꞌuri haꞌaweoa loꞌu a Haꞌa-uusuli.”

⁵⁰ Oto maholo a Jisas e rongo urine, ko si teꞌuri hunie a Jaeras, “O ke suꞌuri tolahiꞌe, taꞌe o ke hiiwalaimoli mola aaku na a kalemu haꞌa-uurilana kei lae oto.”

⁵¹ Maholo a Jisas e lai hule taꞌau i nume a Jaeras, e kaꞌa toliꞌaasie ike nga iini ke sili loꞌu peꞌie hai nume. Taꞌe a Pita, a Jon, na Jemes peꞌie aamana na nikana a pulena, nge a Jisas e toliꞌaasire hunie kire ke lae sili i nume peꞌie.

⁵² Na aana maholona, ahutana mwala ko meni ngara-ngarasie oto a pulena peꞌi saehuunge. Taꞌe a Jisas e teꞌuri hunire, “Omu ke suꞌuri ngara-ngara. A pule ie e kaꞌa mae ike, taꞌe ko maꞌahu mola.”

⁵³ Oto ahutana mwala ngeena kire ko meni mwesi mola mwaanie a Jisas, aena aana kire saie uri a pulena e pwani mae.

⁵⁴ Oto a Jisas e sili hai nume, e hele i nimana pulena na ko soie uuri, “!Kaleku, o ke taꞌelaꞌi!”

⁵⁵ Oto mangona pulena ko tolana aalihoꞌi oto loꞌu, na ko taꞌelaꞌi oto. Oto a Jisas ko si unue hunire uri kire ke nii ngeulaa ana.

⁵⁶ Oto nikana a pulena na aamana, kirerue ko si tohungei pangataꞌi oto hiitoꞌo. Taꞌe a Jisas ko si ere honosire mola uri mwaanie kire haꞌa-haꞌarongoa nga iini aana walu ola e raune.