Tataroha Diana I Sulie A Jisas Kraes Nge A Luk E Uusue 6 - Tataroha Diana

Mo Parise Kire Ere Haitapali Peꞌie A Jisas Haahie Hai Dinge Maaꞌi

¹ Ngaeta Dinge Maaꞌi Mo Jiu a Jisas e lai liu i laona mo hohola aani ola mala kooni. Oto mo pwaarongoisuli ingeie kire ko aroa mo hue-huei ola, kire taꞌaasie hule-huleni, oto kire ko ngeuꞌi.

² Oto ngaeta mo Parise kire ko dolosi uuri, “?E ue nge omu ko deu esunge mola aana Dinge Maaꞌi ikie, mei ola e aapu aana Haꞌatolanga a Mosis?”

³ Oto a Jisas e aalamire ko teꞌuri, “Omu saie taane nga taa nge a Deved Inemauri e asuie, aana maholo ingeie na ngaeta mo iini loꞌu peꞌie kire hiolo. ?Taꞌe e ue ni omu kaꞌa rongo saie ike neꞌisaenga aana?

⁴ A Deved e lae sili i laona nume maaꞌi a God, na e ngaue ho bred maaꞌi, ola niilana e lae hunie a God. Taꞌe mo Haꞌatolanga a Mosis e unue e kaꞌa malisine ike ke ngaue, aana taꞌe mo pris haliꞌite kire sai ngaue taungei bred maaꞌi urine. Na a Deved e nii noꞌone ana mo iini kire lae peꞌie. Taꞌe maꞌalana e urine, a God kaꞌa leie ike haahie.”

⁵ Oto a Jisas ko heꞌi teꞌuri loꞌu hunire, “Ineu a Kale Ni Iinoni oto nou aalaha haahie Dinge Maaꞌi.”

A Jisas E Haꞌa-uurie Mwane Nimana E Heko

⁶ Oto aana ngaeta Dinge Maaꞌi Mo Jiu loꞌu, a Jisas e lai sili i nume ni palo-palo huni haꞌa-uusulie mwala. Na ngaeta mwane i leune kiꞌine i pwalo-pwalona e heko.

⁷ Oto mo Parise na mo haꞌa-uusuli aana mo Haꞌatolanga a Mosis, kire ko talei toꞌo-toꞌomaaie ohe kei haꞌa-uurie a mwaena aana Dinge Maaꞌi, aana kire sare leesie uri a Jisas ke dau aaelasie nga mei ola hunie kire ke ere aana na kire ke toolea huni leie haahie.

⁸ Taꞌe a Jisas e saie mone mola loꞌongaꞌinge ikire, ko si teꞌuri hunie mwane kiꞌine e heko ngeena, “O ke uure kaꞌu i naꞌona mwala.” Oto a mwaena e taꞌelaꞌi, e si uure haadaꞌi i naꞌona mwala.

⁹ Oto a Jisas ko teꞌuri hunie mo iini kire ko upwesie ngeena, “Taꞌa-taꞌa mei ola nou sare dolosie aamiu. ?Nga taa ni Haꞌatolanga ikolu e toliꞌaasie huni esuie aana Dinge Maaꞌi? ?Huni peꞌie iinoni wa huni waelie mola? ?Huni haꞌa-uurie iinoni wa huni horoꞌie?”

¹⁰ E ere mango urine, ko si toꞌomaaie nga iini, na e toꞌomaaie loꞌu nga iini. E toꞌomaaire mango, oto ko unue hunie mwane kiꞌine e heko ngeena uuri, “O ke lalaaꞌinie kiꞌimu.” Oto a mwaena ko lalaaꞌinie kiꞌine, na e diana oto loꞌu.

¹¹ Oto mo Parise na mo haꞌa-uusuli aana mo Haꞌatolanga a Mosis kire ko tohungei saewasu, na kire ko aehota ere oto i matolada maraada uuri, “?Ohe kolu kei uaa kaꞌu a mwane ngeena?”

A Jisas E Lio Hilisie Aawalai Hurulaꞌaa Mwana Rue

¹² Aana maholona a Jisas e hanetaa taꞌau i lengine ngaeta uuwo huni aarengaꞌi. E iiꞌo taꞌau i leune hai rodo laku aani aarengaꞌinge hunie a God.

¹³ Oto e dangi hoꞌowa e soie mo iini ko lulu i sulie mai i saana, ko si lio hilisie aawalai mwane mwana rue mwaanire, na ko haaraꞌinire aana mo hurulaꞌaa.

¹⁴ Na satana aawalai mwane mwana rue ngeena e uuri, a Saemon nge a Jisas e heꞌi haaraꞌinie loꞌu aana a Pita, na a Andru aasine, na a Jemes, na a Jon, na a Pilip, na a Batolomiu,

¹⁵ na a Matiu, na a Tomas, na a Jemes kalena Alpeas na a Saemon, ngaeta iini aana pulitaa nge ko sare haiseuni huni taꞌaasie aalahanga ni Rom mwaanie hanue i Israel,

¹⁶ na a Jiudas kalena Jemes, na a Jiudas Iskariot iini oto e pweloa Jisas.

Mwala Hunge Kire Aehota Lae I Sulie A Jisas

¹⁷ Oto a Jisas na mo hurulaꞌaa ingeie kire siho mai mwaanie uuwo, kire si lae mai uure i laona mei oote. Aana maholona nge mwala hunge aana mo iini ko lulu i sulie a Jisas kire si loko mai i saana. Mwala hunge kire loko noꞌone uure mai mwaanie i Jerusalem na mwaanie ahutana oto poꞌo ni henue i Jiudia na mwaanie mo henue i sulie hatalea i Taea na i Saedon.

¹⁸ Mwala ngeena kire lae mai huni rongoa a Jisas ko haꞌa-uusuli, na uri hunie haꞌa-uurilada ke lae mwaanie mo maelaa ikire. Mo iini ko siꞌohaꞌa aana mo liꞌoa aaela e hite aada na kire hule noꞌone, oto a Jisas e haꞌa-uurire.

¹⁹ Ahutana mwala kire mani deu-deu uri kire ke kopi mola aana a Jisas, aena aana nanamanga ingeie ko haꞌa-uurie ahutana mo maelaa ikire.

Ilenimwaꞌenga Toꞌohuu E Aaopa Mwaanie Ilenimwaꞌenga Ni Welumalau

²⁰ Na a Jisas e toꞌo-toꞌomaaie mo pwaarongoisuli ingeie, ko si unue hunire uuri, “Deidehiꞌomu mo iini nge omu meitale, aena aana Aalahanga a God oto toꞌolamiu.

²¹ Deidehiꞌomu mo iini nge omu ko hiolo oto ie, aena aana omu kei pote taane. Deidehiꞌomu mo iini nge omu ko ngara-ngara oto ie, aena aana omu kei mwesi taane.

²² Deidehiꞌomu mo iini nge mwala ko maalelediꞌomu, na kire ko teungeꞌiniꞌomu, na kire ko ere aaelasiꞌomu uri iꞌomu mo iinoni aaela aana omu ko lulu i sulieu a Kale Ni Iinoni.

²³ Omu ke tohungei ilenimwaꞌe aana maholona na omu ke mao-mao peꞌi saediananga, aena aana waaitemiu e paine oto taꞌau i Lengi. Na urine e haataꞌi diana aana uri omu urihana mo propet a God oto i naꞌo, aana mo weuwada i naꞌo kire taungeꞌinire noꞌone urine.

²⁴ Taꞌe aama-aamasilemiu mo iini omu toꞌo-toꞌo oto, aana ahutana walu ola e mani mwadaꞌusiꞌomu mango oto, taꞌe aasanga paine kei reꞌusiꞌomu taane.

²⁵ Aama-aamasilemiu mo iini omu ko pote oto ie, aana omu kei saronai hiolo taane. Aama-aamasilemiu mo iini omu ko mwesi peꞌi saediananga aana maholo ienini, aana omu kei saronai saehuu peꞌi ngara aamasiꞌomu taane.

²⁶ Aama-aamasilemiu maholo mwala ko ere haꞌadianaꞌaꞌomu, aana leune e haataꞌi diana aana uri omu meni sada oto peꞌie mo propet eero-eero i naꞌo, i sulie taꞌa-taꞌa taungei olana e rau keꞌu noꞌone aada.”

Kie Ke Manata Diana Hunie Ahutana Mwala

²⁷ Oto a Jisas e heꞌi unue loꞌu uuri, “Taꞌe ineu no ko unue huniꞌomu, mo iini omu ko pwaarongoa ere-erenga ineu, uri omu ke manata diana noꞌone hunie mo maelonga iꞌomu. Omu ke dau diana hunie mo iini ko maalelediꞌomu.

²⁸ Omu ke aitanaie a God hunie ke haꞌadianaꞌaa mo iini ko ere aaelasiꞌomu, na omu ke aarengaꞌi talana mo iini ko teungeꞌiniꞌomu.

²⁹ Mala nga iini ko mwakataꞌiniꞌo aani hidelilana papalimu, nge o ke toliꞌaasie ngaeta poꞌo ni papali loꞌu hunie. Mala nga iini ko toolea toꞌoni ni eeluhi iꞌoe, toliꞌaasie noꞌone toꞌoni ni lengi iꞌoe hunie.

³⁰ Omu ke nii-nii hunie taꞌena nga iini ko suke aamiu. Mala uri nga iinoni ko toolea nga mei ola iꞌoe, suꞌuri suke aalihoꞌi loꞌu aana.

³¹ Mo ola nge saemiu mwala ke dauꞌi huniꞌomu, nge iꞌomu noꞌone omu ke dauꞌi hunie mwala.

³² ?Aana mala uri omu kei manata diana mola hunie mo iini e manata diana huniꞌomu, omu unue uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa na kire ko maa-manata diana noꞌone mola urine hunie mo iini e manata diana hunire.

³³ ?Na mala uri omu kei deu diana mola hunie mo iini ko deu-deu diana huniꞌomu, omu ko loꞌo-loꞌongaꞌi uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa na kire ko teteꞌurine noꞌone mola.

³⁴ ?Na mala uri omu ko sai nii ola mola hunie mo iini nge omu saie uri kire kei heꞌi suꞌuꞌi loꞌu huniꞌomu, omu ko loꞌo-loꞌongaꞌi uri a God kei haꞌadianaꞌaꞌomu haahie leune? !Haꞌike oto ooꞌoo! Aena aana mo iinoni oorahaꞌaa kire sai nii urine noꞌone hunie ngaeta mo iinoni oorahaꞌaa uri hunie kire ke suꞌu sada aani loꞌu hunire.

³⁵ !Taꞌe haꞌike! Omu ke manata diana hunie mo maelonga iꞌomu na omu ke dau diana hunire. Omu ke nii-nii na omu ke suꞌuri loꞌongaꞌinie loꞌu suꞌuleni eelihoꞌi huniꞌomu. Mala uri omu kei teꞌurine nge waaitemiu ke si peine loꞌu liutaa, na omu ke si neꞌi kalena God, iini e paine liutaa. Aana ingeie noꞌone hule aana e diana hunie mo iini e oorahaꞌaala na mo iini kaꞌa sai paalahea.

³⁶ Omu ke hai-hei aamasi oto mala Aamamiu i Lengi ko hei-hei aamasi hunie taꞌena nga iinoni.”

Mwaanie O Lupweꞌi Leie Mwala

³⁷ Oto a Jisas ko heꞌi teꞌuri loꞌu, “Mwaanie omu talei lei-leie taꞌena nga iinoni, mwaanie a God e leiꞌomu noꞌone urine. Mwaanie omu talei lei-lei maesie nga mwala, hunie a God ke suꞌuri lei maesiꞌomu noꞌone. Na omu ke sae-sae aasi hunie mo iinoni, hunie a God ke si saeꞌaasi noꞌone huniꞌomu.

³⁸ Omu ke nii-nii hunie taꞌena nga iinoni, nge a God ke si nii loꞌu liutaa huniꞌomu. Aana toꞌohuu niilana kei lae huniꞌomu, hule aana omu kaꞌa saie omu kei hele uri taa aani aana nimemiu, oto kire ko maalingi mola. Aana nga tolahai niinge uri taa nge omu ko nii-nii hunie mwala aana, nge a God kei nii noꞌone huniꞌomu aana.”

³⁹ Oto a Jisas ko ere ni aalahuunge loꞌu uuri, “Nga iinoni e ulu e saꞌa naꞌona ike loꞌu ngaeta ulu, mwaanie kirerue mani domu mola i laona kalinge.

⁴⁰ Iinoni haꞌa-uusulilana ko lae-lae ue, e kaꞌa paine ike liutaa aana haꞌa-uusuli ingeie. Taꞌe mala kei esu waaꞌiniꞌini nge ke si urihana mola haꞌa-uusuli ingeie.

⁴¹ ?E ue kaꞌu o ko ili lio susulie kele ngangaꞌai ola oto mola mwai-mwei i maana aasimu? Taꞌe hule aana iꞌoe, rotoi ei leku e eno honosie maamu na o kaꞌa sai hiingeꞌinie.

⁴² Na e kaꞌa diana ike noꞌone uri hunie o ke unue hunie aasimu uuri, ‘Kaꞌu, ne ke taꞌaasie kele ngangaꞌai ola ngeena mwaanie maamu,’ na hule aana iꞌoe maraamu rotoi ei laku noꞌone mola e eno honosie maamu. !Nga hero-heronga kaꞌa urine ike! Mala uri o ko teꞌurine, nge o ko lupweꞌi deu-deu mola ni ngeena. Taꞌe o ke holaꞌi taꞌaasie kaꞌu rotoi ei laku ngeena mwaanie maamu hunie maamu ke manola. Oto o ke si lio susulie kele ngangaꞌai ola i maana aasimu hunie o ke kae aasie.”

O Sai Lio Saie Ai Aana Hue-Huana

⁴³ Oto a Jisas ko heꞌi teꞌuri loꞌu, “Ai diana e saꞌa roroꞌa hungu ike aani hue-huei ei aaela, wa ai aaela ke hungu eeni hue-huei ei diana.

⁴⁴ Taꞌena nga ai, lio sailana ko lae-lae oto aana hue-huana, aana mwala e saꞌa hisue ike nga hue-huei fik mwaanie nga puli-pulisi poo, wa kire ke hisue nga hue-huei grep mwaanie nga walo kau-keu.

⁴⁵ Iinoni diana e toꞌo aana mo loꞌongaꞌinge diana i laona saena, na kei haataꞌiniꞌi aana mo ola diana kei esuiꞌi. Taꞌe iinoni aaela e toꞌo aana mo loꞌongaꞌinge aaela i laona saena, na kei haataꞌiniꞌi aana mo ola aaela kei esuiꞌi. Aana iinoni ko ere-ere i sulie nga taa nge saena e honu aana.”

Iini Ko Tola I Sulie A Jisas E Urihana Mwane Saenanau E Tohue Nume Diana

⁴⁶ Oto a Jisas e heꞌi teꞌuri loꞌu, “?E ue ni omu ko soieu na ni omu unue oto, ‘!Aalaha ineu!’ taꞌe hule aana omu saꞌa dau i sulie nga taa no ko unue?

⁴⁷ Taꞌe-taꞌena nga iini ko lae mai seeku na ko rongoa walaku peꞌi sulu i suliꞌi,

⁴⁸ e urihana iinoni saenanau e tohue nume ingeie aana e eli kokoro talana mo hunu, na e neꞌie mo heu i poo-pootana mo hunu aana nume ngeena. Oto lae-lae maholo wai kei kone na kei halolo aana nume ngeena, taꞌe hule aana e saꞌa asuleꞌi ike, aena aana e tohu diana aana.

⁴⁹ Taꞌe nga iini nge ko rongoa walaku na e kaꞌa sulu ike i sulie, ingeie e urihana iinoni e tohue nume ingeie mola i lengine oone mwaakule. E kaꞌa eli kokoro ike wa ke neꞌie mo heu ehuie mo hunu. Oto lae-lae maholo kone kei halolo aana numena, na kei tolana aaꞌoho taꞌingelu oto.”