Tataroha Diana I Sulie A Jisas Kraes Nge A Luk E Uusue 3 - Tataroha Diana

A Jon Loto Maaꞌi E Dau Aakau Aana Saena Mwala Hunie Hulanga A Jisas

¹ Oto e hule aana aawalai helisi mwana lime aana mo helisi nge a Taebirias e inemauri haahie aalahanga mo Rom. Aana maholona a Pontias Paelat ko aalaha haahie poꞌo ni henue i Jiudia, na a Herod Antipas ko aalaha haahie poꞌo ni henue i Kalili. A Pilip, aasine a Herod, ko aalaha haahie e ro poꞌo ni henue i Iturea na i Trakonaetis, na a Lisanias ko aalaha haahie poꞌo ni henue i Abilin.

² E ro naꞌohai pris mo Jiu aana maholona oto a Anas na a Kaiapas. Aana maholona, nge mei wala e si uure mwaanie a God hunie a Jon kalena Sekaraea, na ingeie i laona hanuesala.

³ Oto a Jon ko lae oto i sulie ahutana mo henue kali-kelie wai peine i Jodan na ko tarohaꞌinie hunie mwala uri kire ke aaliꞌu toꞌohuu mwaanie oorahaꞌaa, nge kire ke si loto maaꞌi hunie a God ke saeꞌaasie mo oorahaꞌaa ikire.

⁴ E asuie oto urine mala uusulana e lae i laona uusu-uusu a Propet Aesaea aana e unue uuri, Nga iini ko soi-soi peine i laona hanuesala uuri, “Omu ke dau aakau aana tala loosie laenga mai a Aalaha, na omu ke haꞌa-oodohie tala ni lae ingeie.

⁵ Omu ke aanomie ahutana mo deiderie. Omu ke haꞌasadaa mo uuwo na mo toloihenue, na omu ke haꞌa-oodohie mo tala kire mwaꞌilu, na omu ke mwanaa mo tala hunie kire ke mwana-mwanaꞌa.

⁶ Hunie ahutana mwala ke mani leesie haꞌa-uuringe a God.” Aesaea 40:3-5

⁷ Mwala oto hunge kire lae mai saana a Jon hunie ke loto maaꞌi aada. Oto e si teꞌuri mola hunire, “!Iꞌomu oto mo mwaa ala-ala! ?Omu ko loꞌo-loꞌongaꞌi uri mala omu ko loto maaꞌi haꞌalaa, omu ko tehisie saewasunge a God nge kei lae maine?

⁸ !E aasa! Taꞌe omu ke hungu eeni hue-huei ola diana i laona mau-meuringe iꞌomu huni haataꞌinie uri omu oonisae toꞌohuu oto mwaanie ahutana mo oorahaꞌaanga iꞌomu. Na mwaanie omu loꞌo-loꞌongaꞌinie uri omu kei tehisie saewasunge a God aena aana omu hute aana komu a Ebraham. Leune e saꞌa peꞌiꞌomu ike aana no ko unue huniꞌomu uri a God e sai huꞌisie mola mo heu ienini hunie kire ke neꞌi iinoni haalu hunie komu a Ebraham.

⁹ Aana a God e urihana mwane e neꞌi aakau oto aana hau tou-tohu i aeꞌaena mo ei, na mo ei nge kire kaꞌa hungu ike aani hue-huei ei diana, kei tohu aasiꞌi na aasileni kei lae i laona dunge.”

¹⁰ Oto mwala ko dolosi aana uuri, “?Nge ko urine, nga taa kaꞌu melu ke si esuie?”

¹¹ Oto a Jon ko aalamire ko teꞌuri, “A tei ko toꞌo aana nga ro toꞌoni, ke niie nga iini nana iinoni nge e kaꞌa toꞌo aana ike nga iini. Na a tei ko toꞌo ngaulaa, ke nii-niiꞌi noꞌone urine.”

¹² Ngaeta mwala susulu toꞌoha hunie aalahanga ni Rom kire lae noꞌone mai uri hunie a Jon ke loto maaꞌi aada. Oto kire ko dolosi aana uuri, “?Haꞌa-uusuli, oto iꞌemeelu, melu kei ue?”

¹³ Oto a Jon ko teꞌuri hunire, “Omu ke suꞌuri tola toꞌoha liutaa aana loꞌu nga taa kire hatongaꞌinie huniꞌomu mwaanie mwala.”

¹⁴ Ngaeta mo ramo ko dolosi noꞌone aana a Jon uri, “?Nge iꞌemeelu? ?Melu kei ue?” Oto ko teꞌuri hunire, “Mwaanie omu deu-deu rarahie nga iini hunie mo toꞌoha ingeie, wa omu ke ere-ere aana mola tototala. Taꞌe omu ke ilenimwaꞌe mola haahie holitemiu.”

¹⁵ Mwala ko meni maaꞌoohie mone a Kraes, oto kire ko loꞌongaꞌi heiliu oto i sulie a Jon. Kire ko loꞌongaꞌi oto uuri, “Ohe ingeie ni oto a Kraes.”

¹⁶ Oto a Jon ko si aalamire ko teꞌuri, “Ineu a Kraes haꞌike. Ineu no ko loto maaꞌi eemiu mola aani wei, taꞌe iini nge ko lae mai i puriku, e paine loꞌu liutaa aaku, hule aana ineu na nou kaꞌa diana ike malisine ne ke asu mala koni-konihe huni luhesie hoꞌohaahiꞌae ingeie. Ingeie ke si loto maaꞌi aana ngaeta mwala aana Liꞌoa Maaꞌi, na ngaeta mwala kei lotohire aana dunge ni haꞌamotaahinge.

¹⁷ Ingeie ni e toꞌo aana nanamanga huni leie ahutana iinoni. Aana e urihana iinoni nge ko taꞌaasie mo hule-hulei kooni mwaanie mo tohungei ola. Oto ko si neꞌi konie mo tohungei ola i lengine haa i laona nume ni duru ingeie. Taꞌe mo hule-hulei ola aaela ngeena, nge kei uunuꞌi aana dunge nge e saꞌa mwaꞌa ike loꞌu.”

¹⁸ Mo tala hunge a Jon Loto Maaꞌi e lae peꞌi laeliwala aana Tataroha Diana hunie mwala aani, na huni ere haꞌasusue mwala.

¹⁹ Na e tohungei ere aana a Herod Antipas hiitoꞌo haahie e toꞌo aana loꞌu mola a Herodias, huꞌe a mwane aasine. Na e ere aana noꞌone a Herod haahie ahutana mo ola aaela e dau huꞌisiꞌi.

²⁰ Oto a Herod e si sapeie loꞌu mo aaelanga ngeena aana e neꞌie a Jon i laona nume ni hoꞌo.

A Jon E Loto Maaꞌi Aana A Jisas

²¹ Maholo kire kaꞌa neꞌie ue a Jon i laona nume ni hoꞌo, ngaeta hai dinge e loto maaꞌi aana mwala, na e loto maaꞌi loꞌu aana a Jisas. Na aana maholo a Jisas ko aarea a God, nge i Lengi e si taha,

²² na Liꞌoa Maaꞌi e siho mai i lengine mala hiroikuu. Oto mei wala e uure mai Lengi, na ko teꞌuri, “Iꞌoe oto hahuꞌana kaleku, na nou tohungei manata diana huniꞌo, na no ko ilenimwaꞌe oto liutaa haahiꞌo.”

Uusulana Mo Weuwana A Jisas

²³ Maholo a Jisas e aehotaa asunge ingeie, na ola mala e oolu aawalai helisi mola ue e mango aana, na mwala e loꞌongaꞌi uri ingeie kalena Josep. A Josep e uure mwaanie a Hilae.

²⁴ A Hilae e uure mwaanie a Matat. A Matat e uure mwaanie a Livae. A Livae e uure mwaanie a Melkae. A Melkae e uure mwaanie a Janae. A Janae e uure mwaanie a Josep.

²⁵ A Josep e uure mwaanie a Matataeas. A Matataeas e uure mwaanie a Emos. A Emos e uure mwaanie a Neham. A Neham e uure mwaanie a Eslae. A Eslae e uure mwaanie a Nagae.

²⁶ A Nagae e uure mwaanie a Meata. A Meata e uure mwaanie a Matataeas. A Matataeas e uure mwaanie a Semein. A Semein e uure mwaanie a Josek. A Josek e uure mwaanie a Joda.

²⁷ A Joda e uure mwaanie a Joanan. A Joanan e uure mwaanie a Risa. A Risa e uure mwaanie a Serababel. A Serababel e uure mwaanie a Sialtiel. A Sialtiel e uure mwaanie a Nirae.

²⁸ A Nirae e uure mwaanie a Melkae. A Melkae e uure mwaanie a Adae. A Adae e uure mwaanie a Kosam. A Kosam e uure mwaanie a Elmadam. A Elmadam e uure mwaanie a Ere.

²⁹ A Ere e uure mwaanie a Josua. A Josua e uure mwaanie a Eliesa. A Eliesa e uure mwaanie a Jorim. A Jorim e uure mwaanie a Matat. A Matat e uure mwaanie a Livae.

³⁰ A Livae e uure mwaanie a Simeon. A Simeon e uure mwaanie a Jiuda. A Jiuda e uure mwaanie a Josep. A Josep e uure mwaanie a Jonam. A Jonam e uure mwaanie a Elaeakim.

³¹ A Elaeakim e uure mwaanie a Milia. A Milia e uure mwaanie a Mena. A Mena e uure mwaanie a Matata. A Matata e uure mwaanie a Netan. A Netan e uure mwaanie a Deved Inemauri.

³² A Deved Inemauri e uure mwaanie a Jesi. A Jesi e uure mwaanie a Obed. A Obed e uure mwaanie a Boas. A Boas e uure mwaanie a Salmon. A Salmon e uure mwaanie a Nason.

³³ A Nason e uure mwaanie a Aminadab. A Aminadab e uure mwaanie a Admin. A Admin e uure mwaanie a Anae. A Anae e uure mwaanie a Hesron. A Hesron e uure mwaanie a Pires. A Pires e uure mwaanie a Jiuda.

³⁴ A Jiuda e uure mwaanie a Jekob. A Jekob e uure mwaanie a Aesak. A Aesak e uure mwaanie a Ebraham. A Ebraham e uure mwaanie a Tera. A Tera e uure mwaanie a Neho.

³⁵ A Neho e uure mwaanie a Sirag. A Sirag e uure mwaanie a Riu. A Riu e uure mwaanie a Pileg. A Pileg e uure mwaanie a Eba. A Eba e uure mwaanie a Sila.

³⁶ A Sila e uure mwaanie a Keinan. A Keinan e uure mwaanie a Afaksad. A Afaksad e uure mwaanie a Siem. A Siem e uure mwaanie a Noa. A Noa e uure mwaanie a Lamek.

³⁷ A Lamek e uure mwaanie a Metusala. A Metusala e uure mwaanie a Inok. A Inok e uure mwaanie a Jered. A Jered e uure mwaanie a Mahelalel. A Mahelalel e uure mwaanie a Kenan.

³⁸ A Kenan e uure mwaanie a Enos. A Enos e uure mwaanie a Set. A Set e uure mwaanie a Adam. A Adam e uure mwaanie a God.