Tataroha Diana I Sulie A Jisas Kraes Nge A Luk E Uusue 24 - Tataroha Diana

A Jisas E Taꞌelaꞌi Mwaanie Maenga

¹ Oto mola i maahuꞌo-huꞌo i hoꞌowa aana dinge i purine Dinge Maaꞌi Mo Jiu, mo keni kire lae mai saana kilipweꞌu, na kire toolea mai mo ola wasu diana nge kire dau aakau eeni.

² Na kire lio oodoie hau taꞌaasilana e lae oto mwaanie maana kilipweꞌu.

³ Oto kire sili hao i laona kilipweꞌu, taꞌe kire kaꞌa lio oodoie ike loꞌu rae aana a Jisas Aalaha.

⁴ Maholo kire ko loꞌo-loꞌongaꞌi peꞌie taipuꞌo-puꞌonga i sulie nga taa e raune, na e ro mwane kire toꞌoni aani toꞌoni rereꞌa wana-wana kire uure oto peꞌire.

⁵ Oto maholona mo keni kire liotoli oto i aano aana kire ko tohungei meꞌu hiitoꞌo. Oto e ro mwane ngeena ko teꞌuri hunire, “?E ue ni omu ko heitalea iini e mauri oto loꞌu i matolana mo iini e mae?

⁶ Ingeie haꞌike oto i leu, taꞌe e taꞌelaꞌi oto. Omu ke aamasitoꞌo aana nga taa e unue huniꞌomu maholo na ingeie ue peꞌiꞌomu hai Kalili. Aana e unue uuri,

⁷ ‘Kire kei niieu a Kale Ni Iinoni i laona nimana kira oorahaꞌaala huni horo maesieu i lengine poꞌu-poꞌu, na oolune nga hai dinge ne kei taꞌelaꞌi loꞌu.’ ”

⁸ Oto mo keni kire si aamasitoꞌo aana nga taa a Jisas e unue.

⁹ Oto kire lae mwaanie kilipweꞌu, kire ko si lai haꞌarongoa aawalai pwaarongoisuli mwana eeta, na ngaeta mo iini loꞌu.

¹⁰ Mo keni nge kire haꞌarongoa mo hurulaꞌaa aana nga taa e rau, nge a Meri ni Makdala, na a Joana, na Meri nikana Jemes, na ngaeta mo keni loꞌu.

¹¹ Taꞌe mo hurulaꞌaa kire loꞌongaꞌinie mola uri nga taa mo keni e unue e kaꞌa rongo ike mala nga mei ola, na kire kaꞌa hiiwalaimoli ike aada.

¹² Taꞌe a Pita e taꞌelaꞌi, na ko huru oto i saana kilipweꞌu. E lae taꞌau i aongaꞌi, na ko leesie mola taꞌe sala rereꞌa nge kire uloa sapena Jisas aana. Oto e si eelihoꞌi mola peꞌi tola ohie nga taa e raune.

A Jisas E Haataꞌi Aana E Ro Iini I Sulie Tala Hunie I Emeas

¹³ Oto loꞌu mola aana hai dingena, ngaeta ro iini aana mwala ko lulu i sulie a Jisas ko lae hunie huilume i Emeas, ola mala aawalai kilomita mwana eeta haꞌataulie i Jerusalem.

¹⁴ Na kirerue ko lae peꞌi ere-ere i sulie walu ola e raune.

¹⁵ Maholo kirerue ko lae peꞌi totola i sulie walu olana, na a Jisas maraana ko lae oto mai saadarue na ko hekusirerue oto.

¹⁶ Kirerue leesie taane a Jisas, taꞌe kirerue kaꞌa lio saie ike.

¹⁷ A Jisas ko teꞌuri hunirerue, “?Nga taa ni more ko lae peꞌi ere-ere i suliena?” Oto kirerue uure hahuroto na maadarue ko rehitou oto.

¹⁸ Oto ngaeta iini aadarue, iini nge satana a Kleiopas, ko teꞌuri hunie a Jisas, “!Haꞌike eena! Saꞌa mola iꞌoe oto taꞌa-taꞌa iini ni Jerusalem nge o kaꞌa sasaie ike nga taa e rau aana mo dinge e mango haona.”

¹⁹ Oto a Jisas ko dolosi aadarue uuri, “?Nga mo ola uri taa?” Oto kirerue ko unue uuri, “Mo ola nge kire rau aana a Jisas iini ni Nasaret. A mwaena ingeie nga haꞌa-uusuli diana na propet nanama nge a God e neꞌisae paine haahie na ahutana mwala kire haꞌamaꞌu aana.

^20-21 Oto iꞌemeelu, melu loꞌo-loꞌongaꞌinie uri ingeie ni oto iini kei esuie mwala ni Israel ke iiꞌo luhetaꞌi mwaanie aalahanga ni Rom. Taꞌe mo naꞌohai pris na mo aalaha, kire niie oto hunie mo Rom kire ke lei mae aana na kire horo maesie oto i lengine poꞌu-poꞌu. Na oolune nga hai dinge uure oto aana mo olana e rau loꞌu ie.

²² Oto ngaeta mo keni aameelu ko si ladoa loꞌu mo ola ni pangataꞌinge uri kire haꞌahuꞌolie kilipweꞌu,

²³ taꞌe kire kaꞌa lio oodoie ike rae aana i laona. Mo keine kire aalihoꞌi mei, oto kire ko unue uri kire leesie mo ensel e haataꞌi hunire, na mo ensel ngeena kire unue uri a Jisas e mauri loꞌu.

²⁴ Ngaeta mo iini aameelu kire lae noꞌone i saana kilipweꞌu, na kire lio oodoie oto mala mo keni e unue kaꞌu. Taꞌe kire kaꞌa leesie ike a Jisas.”

²⁵ Oto a Jisas ko teꞌuri hunirerue, “!Mwae! More tohungei pweu na more kaꞌa sai lio saie ike nga taa e toꞌohuu lau-leu. E malisine uri more ke hiiwalaimoli oto aana mo ola mo propet kire unuꞌi.

²⁶ Aana kire unue uri a Kraes kei saro sapesalu na kei mae oto urine, nge ke si lai iiꞌo aana manikuluhaꞌana.”

²⁷ Oto a Jisas ko aehota luhesie hunirerue mo ola uusuleni e lae i sulie maraana i laona mo Haꞌatolanga a Mosis lae hule aana mo Uusu-uusu Maaꞌi mo propet.

²⁸ Maholo kiraelu lae mai karaꞌinie huilume nge kirerue ko lae huniena, oto a Jisas ko deu uri ke liu taraꞌasi mola mwaanirerue.

²⁹ Taꞌe kirerue haaraie, kire ko teꞌuri, “Kolu ke iiꞌo kaꞌu i leu aana ko seulehi oto, na karaꞌinie ke rodo oto.” Oto a Jisas e si lae na ko iiꞌo oto peꞌirerue aana nume kirerue iiꞌo aana.

³⁰ Oto maholo kiraelu iiꞌo i aano huni ngeu, a Jisas e hele aana ho bred na ko ere ni paalahenga haahie. Oto e nisie, ko si niie hunirerue.

³¹ Oto aana maholoi satona, maadarue e si taha na kirerue ko lio saie oto a Jisas. Taꞌe e tolana waa loꞌu mola mwaanirerue.

³² Oto kirerue ko si ere hailiu hunirerue uuri, “!Mwae! Maholo nge e ere-ere hunikure i sulie tala na e luhesie loꞌongaꞌinge i laona mo Uusu-uusu Maaꞌi, e tohungei rongo hai saiꞌi oto.”

³³ Oto kirerue ko tolana taꞌelaꞌi oto aana maholona, na kirerue ko eelihoꞌi oto hunie i Jerusalem. Kirerue lae taꞌau na kirerue ko lio oodoie aawalai pwaarongoisuli mwana eeta peꞌie ngaeta mwala loꞌu kire loko.

³⁴ Oto kire ko holaꞌi haꞌarongorarue uuri, “A Aalaha e taꞌelaꞌi oto toꞌohuu na e haataꞌi hunie a Saemon.”

³⁵ Oto kirerue ko ladoa loꞌu nga taa e rau i sulie tala, na aana kirerue lio saie a Jisas maholo e nisie ho bred.

A Jisas E Haataꞌi Aana Mo Pwaarongoisuli Ingeie

³⁶ Maholo kirerue ko haꞌa-haꞌarongora aana mo olana, na a Jisas maraana e uure oto i matolada na ko teꞌuri, “Hanuelamanga ke iiꞌo peꞌiꞌomu.”

³⁷ Oto kire aparaꞌi na kire ko tohungei meꞌu oto, aana kire loꞌongaꞌinie uri kire ko leesie aakalo.

³⁸ Taꞌe a Jisas e teꞌuri hunire, “?E ue ni omu ko lae otoi meꞌu hiitoꞌo urine? ?Na e ue ni saemiu ko rue-ruaꞌa?

³⁹ Omu ke leesie kaꞌu e ro nimeku na e ro aeꞌaeku. Ineu taane ni ie. Omu ke hele kaꞌu i sapeku hunie omu ke saie, aana aakalo kaꞌa toꞌo hasiꞌo ike na kaꞌa toꞌo suisuli ike, mala omu ko leesiꞌi eeku ie.”

⁴⁰ E ere urine mango, ko si haataꞌinie e ro nimana na e ro aeꞌaena aada.

⁴¹ Kire ko tohungei pangataꞌi na kire ko ilenimwaꞌe oto liutaa, taꞌe maꞌalana e urine na kire kaꞌa hiiwalaimoli ike ue aana. Oto a Jisas ko dolosi aada uuri, “?Omu toꞌo aana nga mei ola ni nga i leu?”

⁴² Oto kire ko niie mei iiꞌe maadoꞌo hunie,

⁴³ na e hele aana, ko si ngaa i maada huni haataꞌinie uri ingeie nga aakalo haꞌike.

⁴⁴ Oto ko teꞌuri hunire, “Mei ola nge e rau eeku ngeena, nou unu mangoa oto oodoiꞌomu maholo nge nou oꞌoꞌo ue peꞌiꞌomu. Aana nou unue uri ahutana walu ola uusuleni e lae i sulieu i laona Haꞌatolanga a Mosis na aana mo Uusu-uusu Maaꞌi mo propet na aana Puke ni Kana, kire kei saronai oa mango.”

⁴⁵ Oto a Jisas e si tahanie manatada hunie kire ke lio saie mo Uusu-uusu Maaꞌi.

⁴⁶ Na ko teꞌuri hunire, “Uusulana e lae oto uurini. A Kraes kei saronai sapesalu na kei saronai taꞌelaꞌi loꞌu mwaanie maenga aana oolune nga hai dinge.

^47-48 Kire unue noꞌone uri mei wala i sulieu ke lae hunie ahutana mo iinoni ni welumalau ke aaliꞌu takoie God hunie ke saeꞌaasie mo oorahaꞌaa ikire. Oto omu ke lai haꞌarongoa mwala aana walu olana, aehota mai i Jerusalem, lae hule aana ahutana mo komu ni welumalau.

⁴⁹ Na ineu maraaku, ne ke si uusungeꞌinie mai haahiꞌomu nga taa nge Aamaku e haiholotaꞌinie. Taꞌe omu ke iiꞌo kaꞌu i Jerusalem hule aana omu kei hele aana nanamanga ngeena uure i Lengi.”

A Jisas E Aalihoꞌi I Lengi

⁵⁰ Oto a Jisas e toolera taꞌau mwaanie i Jerusalem hule i hoorana huilume i Betani, e si susueꞌinie e ro nimana, ko haꞌadianaꞌara.

⁵¹ Maholo ko ere-ere ni haꞌadianaꞌara ue, na ko oopa oto mwaanire aana a God e tahelaꞌinie oto taꞌau i Lengi,

⁵² na kire ko mani pouruuru ni haꞌamaꞌunge aana. Oto kire si eelihoꞌi peꞌie saemangonga oto liutaa taꞌau i Jerusalem.

⁵³ Na kire si iiꞌo mola suli maholo taꞌau i Nume Maaꞌi Peine peꞌi paalahelana God.