Tataroha Diana I Sulie A Jisas Kraes Nge A Luk E Uusue 23 - Tataroha Diana

Mo Jiu Kire Toolea A Jisas I Naꞌona A Paelat Hunie Ke Leie

¹ Oto kire mani taꞌelaꞌi, kire ko toolea oto a Jisas i naꞌona a Paelat.

² Na kire ko aehota unue oto mo ola hunge i sulie a Jisas uuri, “Melu deu oodoie oto a mwane ienini ko haꞌatakaloa mwala iꞌemi mo Jiu, na ko ere aada mwaanie nii-toꞌohanga hunie aalahanga ni Rom, peꞌie ko unue uri ingeie oto a Kraes, Inemauri iꞌemi mo Jiu.”

³ Oto a Paelat e dolosi aana a Jisas, ko teꞌuri, “?Uri iꞌoe ni oto Inemauri mo Jiu?” Oto e aalamie a Paelat ko teꞌuri, “Nge kaꞌu oto o ko unuena.”

⁴ Oto a Paelat ko teꞌuri hunie mo naꞌohai pris na ahutana mwala, “Nou kaꞌa lio oodoie ike nga mei roroꞌanga aana a mwane ienini.”

⁵ Taꞌe kire ko meni rara oto uuri, “A mwane ngeena ko talei kotahie mola iꞌemi mo Jiu aana haꞌa-uusulinge ingeie i sulie mo henue, uure oto hao aana poꞌo ni henue i Kalili, na hule oto mai aana poꞌo ni henue i Jiudia.”

A Paelat E Uusungeꞌinie A Jisas I Saana A Herod Hunie Ke Leie

⁶ Maholo a Paelat e rongo urine, ko si dolosi aada uuri, “?Uri a mwane ienini ingeie nga mwane ni Kalili?”

⁷ Maholo e rongoa uri a Jisas e uure mwaanie poꞌo ni henue nge a Herod Antipas ko aalaha haahie, e si uusungeꞌinie i saana a Herod, aena aana maholona a Herod ingeie noꞌone i Jerusalem.

⁸ A Herod e tohungei ilenimwaꞌe oto hiitoꞌo maholo e leesie a Jisas, aena aana e talei rorongo tarohana na e sasare leesie ko tewa oto mai. Na uri hunie a Jisas ke asuie kaꞌu nga huꞌi-huꞌite hunie ke leesie.

⁹ Oto a Herod e dolosie mo ola hunge aana a Jisas, taꞌe a Jisas kaꞌa aalamie ike oto ooꞌoo.

¹⁰ Mo naꞌohai pris na mo haꞌa-uusuli aana mo Haꞌatolanga a Mosis kire mani lae noꞌone mai, oto kire ko meni rara oto aani unulana taꞌena nga ola honosie a Jisas.

¹¹ Oto a Herod na mo ramo ingeie kire ko si haꞌamwasi mola aana Jisas, na kire ko ere mwakataꞌinie. Kire haꞌatoꞌonie aana toꞌoni tetewa nonoroꞌa mala mo aalaha ko hoꞌo-hoꞌosiꞌi, kire si uusungeꞌi eelihoꞌi loꞌu aana i saana a Paelat.

¹² Aana hai dingena a Paelat na a Herod kirerue ko si heꞌimalahune loꞌu, taꞌe holaꞌinaꞌo ikirerue e ro maelonga ni ngeena.

A Paelat E Lei Mae Aana A Jisas

¹³ Oto a Paelat e lokoa mo naꞌohai pris, na mo rato ni mwane, na ahutana mwala,

¹⁴ ko si teꞌuri hunire, “Omu toolea mai mwane ienini i seeku aana omu ko unue uri ko haꞌatakaloa mwala aani hei polanga honosie aalahanga ni Rom. Taꞌe lio kaꞌu. Nou dodolosi oto aana i naꞌomiu na nou kaꞌa lio oodoie ike nga mei roroꞌanga omu unue a mwane ie e dau huꞌisie.

¹⁵ A Herod na e kaꞌa lio oodoie ike noꞌone nga mei roroꞌanga aana, kaꞌu e uusungeꞌi eelihoꞌi aana mola mai seeku. E lio mala uri a mwane ienini e kaꞌa dau huꞌisie ike nga mei ola adona maenga.

¹⁶ Oto ne kei repusie mola, na no ko toliꞌaasie ke iiꞌo luhetaꞌi oto.”

¹⁷

¹⁸ Taꞌe ahutana mwala ko si meni tea paine mola aana maholona na kire ko unue uuri, “!Horo maesie mola! A Barabas ni melu saetoꞌo aana o ke luhesie.”

¹⁹ (A Barabas ko iiꞌo i nume ni hoꞌo aena aana e horo maesie nga mo iini i Jerusalem maholo pulitaa ingeie kire haiseuni honosie aalahanga ni Rom.)

²⁰ Taꞌe a Paelat e sare toliꞌaasie mone a Jisas ke iiꞌo luhetaꞌi, oto ko heꞌi haꞌarongoa loꞌu mwala aana leune.

²¹ Taꞌe kire ko meni soi peine loꞌu mola uuri, “!Horo maesie! !Horo maesie mola i lengine poꞌu-poꞌu!”

²² Oto oolune nga maholo a Paelat ko heꞌi unue loꞌu hunire uuri, “?Aana e ue? ?Haꞌalaa nga mei taa ni e dau aaelasie? Nou kaꞌa lio oodoie ike nga mei ola huni horo maesie i tehulaꞌana. Aena urine, ne kei repusie mola na no ko toliꞌaasie oto ke iiꞌo luhetaꞌi.”

²³ Taꞌe kire ko si heꞌi soi peine loꞌu mola uri a Paelat ke horo maesie a Jisas i lengine poꞌu-poꞌu. Na lae-lae walada e hane haahie oto a Paelat.

²⁴ Oto a Paelat e si tolatahangaꞌinie leinge ingeie uri mei ola kire saetoꞌo aana kei lae oto urine.

²⁵ E luhesie a Barabas, mwane e haiseuni na e horo mwaanie nume ni hoꞌo, na e si toliꞌaasie a Jisas i laona nimada hunie kire ke dau mala saeda aana.

Kire Horo Maesie A Jisas

²⁶ Maholo mo ramo kire toolea a Jisas mwaanie nume a Paelat, na kire ko oodoie nga mwane satana a Saemon, mwane aana huilume i Saerin, e si uure mola mwaanie hohola. Oto kire si deu rarahie mola hunie ke aangaꞌinie poꞌu-poꞌu i sulie a Jisas.

²⁷ Na mwala oto hunge kire ko lulu i sulie a Jisas noꞌone aana maholona. Na mo keni hunge ko lae peꞌi ngarasie a Jisas lae-laeꞌi.

²⁸ Oto a Jisas e aaliꞌu takoire, ko teꞌuri hunire, “!Maeni keni ni Jerusalem! Omu ke suꞌuri ngara-ngarasieu, taꞌe omu ke ngara-ngarasiꞌomu mola maraamiu na mo kalemiu.

²⁹ Aana mo dinge ko lae maine mwala kei unue uuri, ‘Deidehie mo iini e amara, na mo iini kaꞌa haꞌahute, na mo iini nge mo wee-wee haꞌike ikire huni haꞌasusuhire.’

³⁰ Na aana maholona nge mwala ke si unue uuri, ‘Iꞌomu mo toloi henue ngeena, omu ke aaꞌoho mola mai haahiꞌemi haꞌalaa e diana.’ Na kire kei unue noꞌone hunie mo uuwo uuri, ‘Iꞌomu, mo uuwo ngeena, omu ke aanomiꞌemeelu mola.’ Hosea 10:8

³¹ Ineu nou urihana ai nge e mauri, aana nou kaꞌa dau huꞌisie nga mei ola, taꞌe maꞌalana e urine walu ola aaela ko reu oto aaku ienini. ?Oto kei uri taa taane huniꞌomu, mo iinoni oorahaꞌaala? Kei tohungei aaela oto liutaa huniꞌomu aana omu urihana mola ai nge e mae aakau oto loosie aasilana i laona dunge.”

³² Na mo ramo kire toolea noꞌone ngaeta ro mwane horopeli huni horo maesirerue peꞌie a Jisas.

³³ Maholo kire lai hule oto aana leu sailana uuri “Leu ni Rarata,” kire si repu taalengasie a Jisas i lengine poꞌu-poꞌu. Na e ro mwane horopeli ngeena kire ko repu taalengasirerue noꞌone i lengine ngaeta ro poꞌu-poꞌu. Oto kire ko si neꞌie nga iini i pwalo-pwalona a Jisas, na nga iini i meu-meuline.

^34-35 Oto a Jisas e teꞌuri, “Mamaꞌa, o ke neꞌisae-aasie leu ie mwaanire, aana kire kaꞌa saie ike uri nga taa kire ko da.” Na maholo mwala ko maa-maa ni ola ue aana maelana e oolu mwane, mo ramo kire ko si inie daes huni leesie iini uri taa aada kei toꞌo aana mo sala a Jisas. Na mo rato ni Jiu ko haꞌamwasi aana a Jisas, kire ko teꞌuri, “E roroꞌa haꞌa-haꞌa-uurie mwala aaopa. Kolu ke lio kaꞌu ohe ko haꞌa-uurie maraana, mala ko neꞌie a Kraes toꞌohuu, inemauri a God e lio hilisie hunikie mo Jiu.”

³⁶ Mo ramo noꞌone na kire haꞌamwasi aana a Jisas. Kire lae mai saana, oto kire ko niie waen ahaꞌi hunie ke inuhie.

³⁷ Na kire ko teꞌuri, “O ke haꞌa-uuriꞌo kaꞌu, mala o ko neꞌie nga inemauri mo Jiu toꞌohuu.”

³⁸ Na nga taa kire uusue na kire neꞌie i pweune poꞌu-poꞌu a Jisas e ere uuri, INEMAURI MO Jiu KAꞌU IE.

³⁹ Oto ngaeta iini aana e ro mwane horopeli nge aaroroladarue e lae peꞌie, ko ere aaelasie a Jisas na ko teꞌuri, “?Uri iꞌoe ni oto a Kraes wa haꞌike? O ke haꞌa-uurikolu mone.”

⁴⁰ Taꞌe ngaeta iini ko si ere aana mola uuri, “?Uri o kaꞌa maꞌuteꞌinie ike a God? Aana leilemu ko lae tararuru peꞌie a mwane ienini.

⁴¹ Ikure aana e urine, na horoꞌilakarue ko lae oto haahie mo ola kure dau aaelasiꞌi. Taꞌe a mwane ienini, ingeie e kaꞌa dau aaelasie ike nga mei ola oto ooꞌoo.”

⁴² Oto ko si teꞌuri hunie a Jisas, “Jisas, o ke neꞌisae aaku maholo o kei iiꞌo aana aalahanga iꞌoe.”

⁴³ Oto a Jisas ko teꞌuri hunie a mwaena, “No ko unue oto huniꞌo uri siꞌiri o kei iiꞌo peꞌieu i Lengi.”

A Jisas E Mae

⁴⁴ Ola mala i upui aatowaa aana hai dingena, rodohono e dau haahie ahutana hanue lai hule aana sato e ngara e oolu i aapai sato.

⁴⁵ Na sala paine kire lohea honosie Hahuꞌana Leu Maaꞌi wau i laona Nume Maaꞌi Peine, e aꞌari i denumana.

⁴⁶ Oto a Jisas e si soi aana mei wala paine na ko teꞌuri, “Mamaꞌa no ko neꞌie mangoku i laona nimemu.” A Jisas e ere mango urine na ko mae oto.

⁴⁷ Oto naꞌohana mo ramo ni Rom e uure-uure i leune, maholo e leesie mei olana e rau urine, ko si ere ni haꞌamaꞌunge hunie a God, na ko teꞌuri, “Toꞌohuu oto, a mwane ie nga mwane oodotaꞌi.”

⁴⁸ Maholo mwala e loko ngeena kire leesie walu olana e rau, kire ko si meni ooli hunie mo nume ikire peꞌi saehuunge oto hiitoꞌo.

⁴⁹ Taꞌe mo malahune a Jisas peꞌie mo keni nge kire lulu i sulie a Jisas uure oto i Kalili, kire uure mola wau haꞌatau, kire ko haꞌa-haꞌamaesie nga taa ko reu.

Kire Haitolingeꞌinie A Jisas

^50-51 Na a Josep, mwane aana huilume i Arimatia aana poꞌo ni henue i Jiudia, ingeie noꞌone i leune aana maholona. Ingeie mwane diana na e oodotaꞌi, na ko maa-maaꞌoohie Aalahanga a God kei lae mai. A Josep mwane taane noꞌone aana pulitaa ni lei-lei mo Jiu, taꞌe e kaꞌa ilenimwaꞌe ike peꞌie walu ola kire asuiꞌi aana a Jisas.

⁵² Oto a Josep e lae i saana a Paelat, na ko haꞌatohue rae aana a Jisas.

⁵³ Oto e oohosie mwaanie poꞌu-poꞌu, ko si uloa aana mei sala rereꞌa, na ko lai neꞌie i laona kilipweꞌu ingeie. Kilipweꞌu ingeie ngeena, kire didie aana hau, na kire kaꞌa haitolingeꞌinie ue nga iini i laona.

⁵⁴ Na hai dinge ngeena, Dinge Ni Talamaꞌinge, aana ko seulehi mei na Dinge Maaꞌi Mo Jiu ko karaꞌi aehota oto.

⁵⁵ Mo keni nge kire hakusie a Jisas oto uure i Kalili, kire holo maholoi tala mola i sulie a Josep, na kire leesie leu nge kira Josep kire haꞌa-enohie rae aana a Jisas i laona kilipweꞌu.

⁵⁶ Oto kire aalihoꞌi i nume, kire ko si deu aakau aana mo ola wasu mangoni hunie lingisiꞌi i lengine sapena a Jisas. Kire dau-deu aakau taane aana mo rumu wasu mangoni ngeena, taꞌe kire kaꞌa lae loꞌu i saana kilipweꞌu, aena aana e seulehi oto na Dinge Maaꞌi Mo Jiu e aehota oto. Oto kire si mamalo mola aana hai dinge laku ngeena i sulie mo Haꞌatolanga a Mosis.