Tataroha Diana I Sulie A Jisas Kraes Nge A Luk E Uusue 2 - Tataroha Diana

A Josep E Toolea A Meri I Betlehem

¹ Aana maholona, inemauri peine ni Rom, a Ogastas, e neꞌie haꞌatolanga hunie ahutana mwala aana mo henue i mamalutana. Haꞌatolanga ngeena e unue uri ahutana iinoni ke mani uusu sata huni toolea wilinge mwaanire.

² Uusu-satanga ie nge eetana nga iini e rau aana maholo a Kuaerinias e aalaha aana poꞌo ni henue i Siria.

³ Oto ahutana mwala ko meni lae oto huni uusu sata aana mo henue ikire, nga iini ni oto aana hanue ingeie.

⁴ Oto a Josep e uure i Nasaret, ngaeta huilume wau aana poꞌo ni henue i Kalili, ko lae oto hunie huilume i Betlehem wau aana poꞌo ni henue i Jiudia, huilume nge a Deved Inemauri e hute aana. E lae wau i leune aena aana ingeie e uure aana komu a Deved Inemauri.

⁵ A Josep e lae huni uusu sata peꞌie a Meri, keni nge e ere ruru peꞌie huni toꞌo aana. Maholona na a Meri ko hiꞌe-hiꞌe oto.

⁶ Maholo ikirerue ue i Betlehem na ko hule oto aana pongine a Meri huni meuri eeni mwela.

⁷ Oto ko haꞌahutaa oto naꞌohai mwela ingeie, ko uloa aani sala na ko haꞌa-enohie aana leu ni haꞌangau puluke, aana nga leu haꞌike talada i nume ni awataa.

Mo Kakali Sipu Kire Haꞌapainaꞌaa A Jisas

⁸ Oto aana hai rodona ngaeta mo mwane kire iiꞌo poꞌoi sinaha kaꞌa haꞌatau loꞌu mwaanie huilume aana kire ko kakalie mo sipu ikire.

⁹ Oto ensel a God e lae mai saada na manikuluhaꞌana a God ko raa kali-kelire. Oto kire ko si tohungei meꞌu oto liutaa.

¹⁰ Oto ensel ngeena ko teꞌuri hunire, “!Mwaanie omu meꞌu-meꞌu! Nou toolea mai tataroha diana namiu na ilenimwaꞌenga oto liutaa hunie ahutana mo iinoni.

¹¹ Iini nge kei haꞌa-uuriꞌomu e si kele hute oto molana aana hanue a Deved. Ingeie oto a Kraes, Aalaha ikie.

¹² Na tolimaa nge kei haꞌawalaimoliꞌaa walaku huniꞌomu nge uri, omu kei lio oodoie kele wee-wee kire uloa aani sala i laona leu ni haꞌangau puluke.”

¹³ Na oto mola lau-leu, pulitaa ni ensel uure taꞌau i Lengi oto peꞌie iini nge ko ere-ere ngeena, kire ko meni paalahea God, kire ko teꞌuri,

¹⁴ “Manikuluꞌanga hunie a God i Lengi, na hanuelamanga mai aano hunie mo iini e ilenimwaꞌe haahire.”

¹⁵ Oto maholo mo ensel kire aalihoꞌi i Lengi mwaanire, mo kakali sipu ko si ere hailiu hunire uuri, “Kolu ke lae kaꞌu i Betlehem huni leesie nga taa nge a Aalaha e unue hunikolu ie.”

¹⁶ Oto kire ko tolana lae lau-leu oto wau, na kire ko leesie a Meri na a Josep peꞌie kele wee-wee, na e eno mola aana leu ni haꞌangau puluke.

¹⁷ Maholo mo kakali sipu kire lae wau i leesie kele wee-wee na e eno aana leu ni haꞌangau puluke, oto kire ko si ladoa nga taa ensel e unue hunire i sulie kele wee-wee ngeena.

¹⁸ Ahutana mwala ko si pangataꞌi aana kire ko rongoa nga taa mo kakali sipu kire ko ladoa.

¹⁹ Taꞌe a Meri e neꞌie walu ola ienini mola i saena, na ko si talei loꞌo-loꞌongaꞌi mwa-mwanoto mola i suliꞌi maraana.

²⁰ Oto mo kakali sipu kire si eelihoꞌi takoie mo sipu ikire peꞌi soi haꞌamanikuluꞌaa God na peꞌi paalahenga aena aana walu ola ensel e unuꞌi hunire, kire leesiꞌi uri kire toꞌohuu oto.

Kire Toolea A Jisas I Nume Maaꞌi Peine Huni Niie Hunie A God

²¹ Oto wiki e ahu i purine kele wee-wee e hute, nge kire si esuie torihesiꞌonga aana kele wee-wee i sulie mo Haꞌatolanga a Mosis, na kire haaraꞌinie aana a Jisas, satai ola nge ensel e unue kaꞌu oto maholo na e kaꞌa lodo ue i iiana nikana.

²² Na lae-lae, e haro hule oto aana maholo huni haꞌarereꞌanga a Meri i purine haꞌahutanga i sulie mo Haꞌatolanga a Mosis. Oto a Josep na a Meri kirerue si toolea taꞌau kele wee-wee i Jerusalem, huni niie hunie a Aalaha,

²³ oto mala uusulana e lae i laona Haꞌatolanga a God uuri, Niie ahutana taꞌena nga naꞌohai mwela mwane hunie a Aalaha. Eksodas 13:2

²⁴ Oto a Josep na Meri kire lae huni esuie uunu-olanga mala Haꞌatolanga a God e unue, aana e ere uuri, O ke niie e ro hiroikuu wa e ro kalei urou. Levitikas 12:8

A Propet Simeon E Paalahea God Haahie A Jisas

²⁵ Aana maholona, ngaeta mwane satana a Simeon e oꞌoꞌo noꞌone i Jerusalem. A mwane ngeena ingeie nga mwane oodotaꞌi, na e iiꞌo mola peꞌi palolana a God, na Liꞌoa Maaꞌi noꞌone peꞌie. A Simeon e maa-maaꞌoohie a Kraes nge a God e haiholotaꞌi huni uusungeꞌinie mai huni haꞌa-uurie mwala ni Israel.

²⁶ Aana Liꞌoa Maaꞌi e unue hunie uri e saꞌa mae ue na e kaꞌa haro leesie a Haꞌa-uuri.

²⁷ Oto Liꞌoa Maaꞌi e naꞌona a Simeon hunie Nume Maaꞌi Peine, na maholona a Josep na Meri ko toolea noꞌone mai a Jisas huni deu i sulie Haꞌatolanga a Mosis.

²⁸ Oto a Simeon e aapalaa kele wee-wee, e si paalahea God, ko teꞌuri,

²⁹ “Hahuꞌana Aalaha, ineu oto koni-konihe iꞌoe, na oto ie ne kei mae ni henuelama. Aana o deu oto i sulie haiholotaꞌinge iꞌoe hunieu.

³⁰ Aana nou leesie oto aana maaku a Haꞌa-uuri nge o uusungeꞌinie mai.

³¹ Ingeie oto kei haꞌa-uurie mwala iꞌoe.

³² Ingeie oto raa-raa hunie mo Aapoloa Aaopa, na kei toolea mai manikuluꞌanga hunie mo iinoni iꞌoe mo Israel.”

³³ Aamana a Jisas na nikana, kirerue ko tohungei pangataꞌinie mo ola nge a Simeon ko unuꞌi i sulie kele wee-wee.

³⁴ Oto a Simeon e si haꞌadianaꞌaraelu, na ko teꞌuri hunie a Meri, “Kele wee-wee ienini a God e lio hilisie huni haꞌa-uurie mo iini hunge ni Israel. Taꞌe ingeie kei haꞌatekehie noꞌone mo iini hunge loꞌu, aena aana ingeie kei neꞌie tolimaa a God nge kire sereꞌi lae i sulie.

³⁵ Na mo loꞌongaꞌinge mumuni mwala ngeena ke si haataꞌi i leune. Oto iꞌoe, o kei saehuu na o kei hii aaela oto mala kire otomie saemu aana naihi.”

A Propet Anna E Paalahea God Haahie A Jisas

³⁶ Na ngaeta mei nao keni satana a Anna ingeie noꞌone aana maholona. A huꞌena ingeie nga propet noꞌone na ingeie kalena a Panueli, mwane aana komu a Asa. E toꞌo-toꞌo poro taane, taꞌe e iiꞌo mola peꞌie poro ingeie hunie e hiu aata halisi,

³⁷ na poro ingeie ko mae oto mwaanie, oto e si iiꞌo mola maraana. A keine e walu-aawalai helisi mwana hai e mango oto aana, na e talei oꞌoꞌo mola i Nume Maaꞌi na e palo-paloa mola a God susue aatowaa na rodo aani oolongaunge na aani aarengaꞌinge.

³⁸ Oto mola aana taꞌa-taꞌa maholoi satona, nge a huꞌena e lae mai saada na ko talaꞌai paalahea God. Oto aana mo dinge loꞌu i puri, a huꞌena ko si haꞌa-haꞌarongoa mwala uri a Jisas ingeie oto a Haꞌa-uuri. E ere urine hunie ahutana mo iini nge kire ko maaꞌoohie uri a God kei tapa oolisie mwala ni Israel.

³⁹ A Josep na Meri kirerue haro asu mangoa mo ola i sulie haꞌatolanga a Aalaha, nge kire si ooli takoie huilume ikire i Nasaret hao i Kalili.

⁴⁰ Oto kele wee-wee ko peine taꞌe oto hao. E paine aꞌailaꞌa, na e honu aani saenanaunge, na haꞌadianaꞌanga a God e iiꞌo oto aana.

A Mwaꞌune E Lai Ere Peꞌie Mo Haꞌa-uusuli I Nume Maaꞌi Peine

⁴¹ E ro mauꞌana a Jisas kirerue ko lae-lae i Jerusalem i suli helisi hunie Houlaa Ni Liumwaanie.

⁴² Oto maholo a Jisas e hule aana aawalai helisi mwana rue, kiraelu ko lae oto loꞌu mala kirerue ko lae-lae i suli helisi.

⁴³ Maholo mo dinge paine ngeena kire mango oto, nge mwala ko si ooli takoie mo henue ikire. Taꞌe a Jisas e oore mola ue i puri taꞌau i Jerusalem, na aamana na nikana kaꞌa saie.

⁴⁴ Kirerue ko loꞌo-loꞌongaꞌi uri ingeie taane peꞌire i laona laeha. Kire ko lae oto hunie hai dinge laku, oto i seulehi kirerue ko si aehota loꞌohie i saana mwala ikire na mo malahude.

⁴⁵ Kirerue loꞌo-loꞌohie na kirerue kaꞌa lio oodoie, oto kirerue ko eelihoꞌi loꞌu hunie i Jerusalem.

⁴⁶ Oto i purine e oolu hei dinge e saro mango oto, nge kirerue ko si lai lio oodoie i matolana mo haꞌa-uusuli ni Jiu taꞌau i laona Nume Maaꞌi Peine, na ko rorongo i sulire peꞌi dodolosi ola aada.

⁴⁷ Na ahutana mwala nge kire rorongoa ere-erenga ingeie, kire ko tohungei pangataꞌinie saenanaunge ingeie oto hiitoꞌo na mo aalaminge e dauꞌine.

⁴⁸ Aamana na nikana kirerue lae taꞌau i lio oodoie, kirerue ko tohungei pangataꞌi oto hiitoꞌo. Oto a nikana ko teꞌuri hunie, “?Kaleku, e ue ni o ko teꞌurine aamereꞌi? Ineu na aamamu, mere ko tohungei heitaleꞌo peꞌi saehuunge oto hiitoꞌo.”

⁴⁹ Oto a Jisas ko aalamirerue uuri, “?E ue nge more ko heitaleau urine? ?Uri more kaꞌa saie ike leu i sapeku hunie ne ke iiꞌo i nume Aamaku?”

⁵⁰ Taꞌe kirerue kaꞌa rongo saie ike nga taa e unue.

⁵¹ Oto a Jisas e si eelihoꞌi peꞌirerue hunie i Nasaret, aana e tola i sulirerue. A nikana ko talei loꞌo-loꞌongaꞌi mola i sulie mo ola e rau ngeena i saena.

⁵² Oto a Jisas ko si peine taꞌe peꞌi saenanaunge oto loꞌu liutaa. Na a God ko tohungei saemango oto hiitoꞌo haahie, na mwala ko meni ilenimwaꞌe oto noꞌone haahie.