Tataroha Diana I Sulie A Jisas Kraes Nge A Luk E Uusue 13 - Tataroha Diana

Mo Iini Kire Kaꞌa Oonisae Kei Mae Oto Huu

¹ Aana maholona ngaeta mwala e oꞌoꞌo peꞌie a Jisas, kire haꞌarongoa aana mwala ni Kalili nge a Paelat e horo maesire aana maholo kire uunu-uunu ola i saana God.

² Oto a Jisas ko teꞌuri hunire, “?Ohe omu ko loꞌo-loꞌongaꞌinie uri mwala ni Kalili ngeena kire mae urine, e haataꞌinie uri kire oorahaꞌaala loꞌu liutaa aana ahutana mwala aaopa ni Kalili?

³ !Haꞌike oto ooꞌoo! Na no ko unue oto huniꞌomu uri mala omu kaꞌa oolisie saemiu na omu ke toliꞌaasie tolahai iinoni aaela iꞌomu ngeena, omu kei meni mae noꞌone mola mala ikire.

⁴ ?E ue aana aawalai iinoni mwana walu ni Jerusalem nge kire mae aana saohai nume e aaꞌoho haahire i Saeloam? ?Omu loꞌongaꞌinie uri mwala ngeena kire oorahaꞌaala liutaa aana loꞌu ahutana mo iini nge kire iiꞌo noꞌone i Jerusalem?

⁵ !Haꞌike oto ooꞌoo! Na no ko unue oto huniꞌomu uri mala omu kaꞌa oolisie saemiu na tolahamiu, omu kei meni mae noꞌone mola mala ikire.”

⁶ Oto a Jisas ko ere ni aalahuunge hunire uuri, “Nga mwane e hasie ai hungu-hungu i laona hohola ingeie. Ahutana maholo a mwaena ko lae mai lio-lio hunie ohe ai ngeena ko hungu-hungu taane, taꞌe haꞌike mola.

⁷ Oto a mwaena ko teꞌuri hunie koni-konihe ingeie nge ko lio i sulie hohola, ‘No ko talei lio-lio hunie ohe ai ngeena ko hungu-hungu taane aani hue-huei ei suli maholo, taꞌe oolune nga halisi loꞌu ie na e kaꞌa sai hungu ike. E lae otoi diana uri o ke tohu aasie mola mwaanie e waelie mei mwakano kohi ngeena.’

⁸ Taꞌe koni-konihe ingeie e aalamie uuri, ‘O ke toliꞌaasie kaꞌu, aalaha ineu, hunie ne ke eli mwakano kaꞌu loꞌu i aeꞌaena, na ne ke lio diana i sulie loꞌu hunie nga taꞌa-taꞌa halisi.

⁹ Mwaanie ohe ne kei esu urine aana, kei hungu taane aana halisi meine. Mala uri e kaꞌa hungu loꞌu, nge o ke si tohu aasie taane.’ ”

A Jisas E Haꞌa-uurie Keni Kolune E Kokosu

¹⁰ Aana ngaeta Dinge Maaꞌi Mo Jiu, a Jisas e haꞌa-uusulie mwala i laona nume ni palo-palo mo Jiu.

¹¹ Maholona na ngaeta keni liꞌoa aaela e hite aana ingeie noꞌone i leune. A keine, kolune e kokosu oto, na e kaꞌa sai uure hala-hala ike loꞌu. E iiꞌo mola urine hunie aawalai helisi mwana walu.

¹² Maholo a Jisas e leesie a keine, oto ko soie mai saana na ko teꞌuri hunie, “Keine, mei maelaa iꞌoe e aiꞌaa oto mwaaniꞌo.”

¹³ Oto a Jisas e hele i sapena a keine, na a keine ko tolana uure oodo oto peꞌi haꞌamanikuluꞌaa God.

¹⁴ Maholo naꞌohai mwane haahie nume ni palo-palo ngeena e leesie a Jisas e haꞌa-uurie a keine aana Dinge Maaꞌi Mo Jiu, oto ko saewasu na ko teꞌuri hunie mwala, “E oono aata hai dinge mola kolu sai deu esunge aani. Oto omu ke lae mola mai aana e oono hai dinge ngeena. Omu ke suꞌuri lae mai hunie haꞌa-uurilemiu aana Dinge Maaꞌi.”

¹⁵ Oto a Jisas ko aalamie uuri, “!Iꞌomu oto mwala mola huni lupweꞌi deu-deu! Ahutemiu omu ko luluhesie kaꞌu mola mo puluke na mo dongki iꞌomu, na omu ko too-tooleꞌi kaꞌu mola i wei huni inu-inu aana ahutana dinge, maꞌalana uri aana Dinge Maaꞌi.

¹⁶ A keni nge nou haꞌa-uurie ie, ingeie keni aasikaelu noꞌone mo Jiu, na a Satan e hele aana oto hunie aawalai helisi mwana walu. ?Oto e ue? ?Uri e kaꞌa diana ike huni haꞌa-uurie aana Dinge Maaꞌi?”

¹⁷ Maholo a Jisas e ere urine, oto mo maelonga ingeie kire ko tohungei masa oto hiitoꞌo, taꞌe ahutana mwala ko si meni ilenimwaꞌe mola haahie walu ola manikuluꞌe nge a Jisas ko esuiꞌine.

A Jisas E Aalahuu Aana Litana Ai Na Aana Iis

¹⁸ Oto a Jisas ko dolosi aana mwala uuri, “?Aalahanga a God e urihana nga taa? ?Nga taa ni ne kei haꞌamalaa aana?

¹⁹ Ne kei haꞌamalaa aana kele litei ola aana ai mastad nge iinoni e toolea, oto e hasie i laona hohola ingeie. Oto maholo e pwito poi na ko peine, ko neꞌi ei oto, na mo menu ko si lae mai tola niuꞌi i lengine mo sasarana.”

²⁰ Na ko heꞌi dolosi loꞌu uuri, “?Nga taa ni ne kei haꞌamalaa Aalahanga a God aana?

²¹ E urihana noꞌone kele mei iis nge huꞌe e pwaie i laona nimei pulaoa oto paine, na ahutana e haro poꞌo mango mola aana e hane.”

A Jisas E Aalahuu Aana Maa E Kokohisi

²² Oto a Jisas ko lae peꞌi haꞌa-uusulie mwala aana mo huilume paine na mo iini mwai-mwei aana ko lae hunie i Jerusalem.

²³ Na ngaeta iini e dolosi aana uuri, “?Poro paine, e nite iinoni ni haꞌa-uurilada kei lae? ?Mwaanie nga tootaꞌi iini mola nge a God kei haꞌa-uurire?” Oto a Jisas ko aalamire uuri,

²⁴ “Omu ke dau aahonga toꞌohuu huni sili i sulie maai para e kokohisi, aana no ko unue oto huniꞌomu uri mo iini hunge kei eriꞌapasie silinge wau, taꞌe e saꞌa mwadaꞌusire ike.

²⁵ Na maholo mwane e toꞌo aana nume kei honoa maa aana nume ingeie, omu kei uure mola poꞌoi sinaha, na omu kei talei iiki-iiki mola peꞌie erenga uuri, ‘Poro paine, o ke tahamaa talameelu.’ Oto kei aalamiꞌomu mola uuri, ‘Nou kaꞌa manataꞌiniꞌomu ike. ?Omu uure i tei?’

²⁶ Oto omu kei heꞌi teꞌuri loꞌu hunie, ‘Iꞌemeelu kaꞌu melu ngeu-ngeu na melu inu-inu peꞌiꞌo, na o haꞌa-uusuliꞌemi aana mo henue iꞌemi.’

²⁷ Taꞌe a mwaena ke si heꞌi teꞌuri loꞌu mola huniꞌomu, ‘Nou kaꞌa tohungei saiꞌomu ike wa ne ke saie mo henue iꞌomu. Omu ke tahi mwaanieu, iꞌomu mo iinoni aaela.’

²⁸ “I leune omu kei iiꞌo ni saehuunge mola peꞌie ngaranga. Aana omu kei leesie a Ebraham, na a Aesak, na a Jekob peꞌie mo propet oto i naꞌo ikire i laona Aalahanga a God, na iꞌomu, aasilemiu kei lae mola poꞌoi sinaha mwaanie leune.

²⁹ Na mwala hunge kei ruru mei mwaanie ahutana mo henue i laona walumalau. Kire kei iiꞌo i aano hunie ngauhe aana Aalahanga a God.

³⁰ Oto mo iini nge kire iiꞌo aana mo iiꞌo-iiꞌoha mwai-mwei aana mauringe siꞌiri, kire kei toꞌo aana mo iiꞌo-iiꞌoha paine aana maurihe ue mai. Na mo iini nge kire iiꞌo aana mo iiꞌo-iiꞌoha paine siꞌiri, kire kei iiꞌo aana mo iiꞌo-iiꞌoha mwai-mwei aana maurihe ue mai.”

A Jisas E Ngarasie Mo Jerusalem Aana Kire Kaꞌa Hiiwalaimoli Aana

³¹ Oto aana maholona, ngaeta mo Parise kire lae mai saana Jisas, oto kire ko teꞌuri hunie, “!O ke tahi oto mwaanie i leu! A Herod ko sare horo maesiꞌo.”

³² Oto a Jisas ko aalamire uuri, “E aasa hunie a Herod ke waelie asunge ineu, aana ingeie nga kele usu ni meꞌesu mola. Omu ke lai haꞌarongoa uri aana mo dinge ienini, no ko haꞌa-uurie mo mae-maeaꞌa na no ko oohe aasi liꞌoa aaela mwaanie mo iinoni. Taꞌe aana nga dinge e saꞌa tewa taane loꞌu, ne ke si haꞌamangoa taane asunge ineu ie.

³³ Taꞌe aana e urine na ne kei saro lae ue i sulie asunge ineu ie siꞌiri, i hoꞌowa, na i weite. Aana e kaꞌa diana ike uri hunie nga propet horo-maesilana ke lae aana nga leu aaopa, mwaanie oto i Jerusalem haꞌalaa.”

³⁴ Oto a Jisas ko si teꞌuri, “!Aaia Jerusalem, Jerusalem! Iꞌomu oto omu ko horo suuheꞌinie mo propet na omu ko uuꞌi maesie mo iini a God e uusungeꞌinire mai huniꞌomu. Mo maholo hunge nou sasare peꞌiꞌomu mala pwa-pwa ni kue ko lokoa mo kalena i hahana apa-apana huni haꞌa-uurire. Taꞌe omu kaꞌa saetoꞌo aaku ike.

³⁵ Oto omu ke saie, a God kei toliꞌaasie hanue iꞌomu, na kei naꞌonga oto. Na no ko unue oto huniꞌomu uri omu saꞌa heꞌi leesieu loꞌu lai hule aana omu kei ere i sulieu uuri, God o ke haꞌadianaꞌaa iini ko lae mai nunuhaꞌana satana Aalaha.” Sam 118:26