Tataroha Diana I Sulie A Jisas Kraes Nge A Luk E Uusue 11 - Tataroha Diana

A Jisas E Haꞌa-uusuli I Sulie Aarengaꞌinge

¹ Ngaeta hai dinge a Jisas e lai iiꞌo aana ngaeta leu, oto ko aarengaꞌi. Maholo e aarengaꞌi mango oto, nge ngaeta iini aana mo pwaarongoisuli ingeie ko si teꞌuri hunie, “Aalaha ineu, o ke haꞌasaiꞌemeelu noꞌone aana tolahana aarengaꞌinge, oto mala a Jon e haꞌasaie kaꞌu mo pwaarongoisuli ingeie.”

² Oto a Jisas ko teꞌuri hunire, “Maholo omu ko aarengaꞌi, omu ke ere uurini. Mamaꞌa, Mwala ke haꞌamaꞌu aana satamu. Aalahanga iꞌoe ke lae mai.

³ O ke niie mai huniꞌemi suli hei dinge, mo ngeulaa e adona dinge ngeena.

⁴ O ke saeꞌaasie huniꞌemi mo oorahaꞌaa iꞌemi, aana emi ko saeꞌaasie noꞌone mo roroꞌanga taꞌena nga iini ko deu huꞌisiꞌemi. Na mwaanie o toliꞌaasiꞌemi huni oorahaꞌaa maholo malaahongalamami ko lae.”

⁵ Na a Jisas e teꞌuri hunie mo pwaarongoisuli ingeie, “Mala uri nga iini hikemiu ke lae i saana a malahune i upui rodo, oto ko teꞌuri hunie, ‘Malahuku, o ke niie nga oolu ho ngeulaa hunieu,

⁶ aana ngaeta malahuku ko lae i suli henue, na e si kele hule taꞌau i nume ineu oto molana, taꞌe nga mei ola hunie ne ke niie ana haꞌike.’

⁷ Oto uri a malahumu ke aalamiꞌo uure wau i nume uuri, ‘!Suꞌuri kotahieu! Maa e hono oto, na ahutameelu melu ko maꞌahu oto. Oto nou saꞌa taꞌelaꞌi ike loꞌu huni niie nga mei ola amoreꞌi.’

⁸ ?Oto nga taa eena? No ko unue oto huniꞌomu, maꞌalana e unue uri e saꞌa taꞌelaꞌi loꞌu huni niie nga kele ho ngeulaa huniꞌo aena aana iꞌoe oto malahune, taꞌe kei taꞌelaꞌi taane na kei haro niie mola mo ola saemu huniꞌi, aena aana o kaꞌa masa ike huni deu suꞌu-suꞌuie.

⁹ “Oto no ko unue huniꞌomu uri omu ke susuke aana a God, na ingeie ke si niie huniꞌomu. Omu ke hai-heitalea i saana God, na omu ke si lio oodoie. Na omu ke iiki-iiki i kolune maa ingeie, na ingeie ke si tahanie maa talamiu.

¹⁰ Aana taꞌena nga iini ko sukaa nga mei ola aana a God, nge kei niie oto hunie. Na taꞌena nga iini ko heitalea nga mei ola aana a God, kei lio oodoie oto. Na taꞌena nga iini ko iiki-iiki ikolune maa ingeie, nge a God kei taha maa talana oto.

¹¹ ?E ue aana iꞌomu mo mamaꞌa? ?Mala uri kalemu ko sukaa nga ho iiꞌe aamu, o sai niie mola nga mwaa ana?

¹² ?Wa uri ko sukaa nga ho maꞌopu, o kei niie mola nga hari-heri ana? !Haꞌike!

¹³ Iꞌomu mo iinoni oorahaꞌaa, taꞌe hule aana omu sai niie mo ola diana hunie mo mwela iꞌomu. ?Ilisie Aamamiu i Lengi iini e diana liutaa aana taꞌena nga iinoni, uri e saꞌa niie Liꞌoa Maaꞌi hunie nga mo iini ko suke aana?”

A Jisas E Nanama Liutaa Aana A Satan

¹⁴ Ngaeta maholo a Jisas ko oohe aasie liꞌoa aaela mwaanie mwane e kaꞌa sai ere ike. Maholo liꞌoa aaela ngeena e iisitaa oto mwaanie a mwaena, nge ko si ere-ere loꞌu. Mwala oto hunge kire loko i leune na kire ko tohungei pangataꞌi.

¹⁵ Taꞌe ngaeta mo iini aana mwala ngeena, kire ko unue mola uuri, “A Bielsebul, naꞌohana mo liꞌoa aaela nge e niie nanamanga ngeena hunie huni oohe aasie mo liꞌoa aaela urine.”

¹⁶ Na ngaeta mwala loꞌu kire ko sare lupweꞌi oohongie mola a Jisas aana kire loꞌongaꞌinie uri e kaꞌa uure ike mwaanie a God, oto kire ko unue hunie uri ke da nga huꞌi-huꞌite hunie kire ke leesie.

¹⁷ Taꞌe a Jisas mone e saie mola nga taa kire ko loꞌo-loꞌongaꞌinie, oto ko si teꞌuri hunire, “Taꞌena nga aalahanga kei oopa aani heiseuninge honosie maraana, nge kei naꞌonga oto. Na nga nume nge kei oopaa aani heiseuninge honosie maraana, nge kei eiꞌaa oto.

¹⁸ Iꞌomu, omu ko unue uri no ko oohe aasi liꞌoa aaela aana nanamanga a Bielsebul, taꞌe omu ke rongo kaꞌu. ?Mala uri aalahanga a Satan kei heiseuni honosie loꞌu mola maraana, nge aalahanga ingeie ke si iiꞌo susu uri taa eena?

¹⁹ ?Mala uri ineu no ko oohe aasi liꞌoa aaela aana nanamanga a Bielsebul, oto nga nanamanga uri taa kaꞌu nge mo pwaarongoisuli iꞌomu ko oohe aasi liꞌoa aaela aana? Mo pwaarongoisuli iꞌomu kire haataꞌi diana aana uri iꞌomu ni omu takalo.

²⁰ Taꞌe ineu, no ko oohe aasie mo liꞌoa aaela aana nanamanga a God. Na leune e haataꞌi diana aana oto uri Aalahanga a God e hule oto i seemiu.”

²¹ Oto a Jisas ko heꞌi ere ni aalahuunge loꞌu i sulie nanamanga ingeie e saka liutaa aana Satan, na ko teꞌuri, “Mala uri nga mwane aꞌailaꞌa e toꞌo aana mo reisinge huni heiseuni na a mwaena ko kakalie nume ingeie, nge ahutana mo ola i laona nume ingeie kei iiꞌo pupupu.

²² Taꞌe mala uri ngaeta mwane e aꞌailaꞌa loꞌu liutaa aana kei polahie na kei horoꞌie oto, nge mwane aꞌailaꞌa liutaa ngeena kei leue oto mo reisinge a mwaena e puu-puutoꞌo aani ngeena, na ke si niie mola walu ola e tooleꞌi mwaanie nume ngeena hunie mo malahune.

²³ “Nga iini oto e kaꞌa lulu i sulieu, ingeie oto maelonga ineu. Na nga iini oto e kaꞌa peꞌieu huni toolea mai mo iinoni takoie a God, ingeie e urihana uri ko peesie mola mwala mwaanie a God.”

²⁴ Oto a Jisas ko heꞌi teꞌuri loꞌu, “Maholo nga liꞌoa ni oorahaꞌaa ko iisitaa mwaanie nga iinoni, kei waloliu i laona hanuesala ni lio hunie nga leu ni mamalo ingeie. Mala uri e kaꞌa lio oodoie oto nga leu, nge ke si teꞌuri hunie maraana, ‘Ohe ne kei ooli loꞌu mola takoie nume ineu, iini nou iisitaa kaꞌu mwaanie.’

²⁵ Oto e ooli taꞌau na ko lio oodoie a mwaena e urihana nume nge kire tala rereꞌa aana, na kire hataaꞌi diana aana mo ola i laona.

²⁶ Oto ko si lae loꞌu huni toolea mai ngaeta hiu liꞌoa ni oorahaꞌaa aaela loꞌu liutaa aana ingeie. Oto kire lae, kire ko si lae oto iiꞌo huu i laona iinonine. Oto aana haꞌamangolana, tolahana iinonine loꞌu mei puri ko si tohungei aaela oto hiitoꞌo liutaa aana tolahana holaꞌinaꞌo.”

²⁷ Maholo a Jisas ko ere-ere ue urine, na ngaeta keni aana mwala e ruru ngeena ko teꞌuri hunie, “!Deidehie oto a nikemu!”

²⁸ Taꞌe a Jisas e aalamie uuri, “Iau, taꞌe ilenimwaꞌenga oto liutaa hunie ahutana mo iini ko rongoa walana God na kire ko lulu i sulie.”

Mo Parise Kire Sukaa Nga Huꞌi-huꞌite

²⁹ Na maholo mwala hunge ko ruru mei saana a Jisas, oto ko si ere uuri hunire, “Iꞌomu mwala aana maholo ienini, tolahamiu e tohungei aaela. Omu ko sukaa uri omu ke leesie mola nga huꞌi-huꞌite mwaanie a God. Taꞌe nou saꞌa asuie ike. Taꞌa-taꞌa huꞌi-huꞌite nou sai haataꞌinie aamiu oto nga taa e rau aana a Propet Jona oto waite.

³⁰ Aena aana nga taa e rau aana a Jona ngeena, e haataꞌinie uri a God ni nge e uusungeꞌinie a Jona i saada mwala ni puꞌo i Ninive. Na e urine noꞌone aana ineu a Kale Ni Iinoni, aana nga taa kei reu eeku kei haataꞌinie uri a God ni e uusungeꞌinieu mei huniꞌomu, mwala aana maholo ienini.

³¹ Aana dinge ni leinge Toro ni Siba kei taꞌelaꞌi noꞌone honosiꞌomu aana pwaunge ienini, na kei ere aamiu uri omu tohungei takalo oto liutaa. Aana ingeie e uure haꞌatau oto i ngongoꞌana walumalau huni lae mai rongoa mo haꞌa-uusulinge ni saenanaunge a Solomon Inemauri. Na no ko unue oto huniꞌomu uri ngaeta iini e paine loꞌu liutaa aana Solomon taane i matolamiu i leu, taꞌe omu ko leledie mola.

³² Na aana dinge ni leinge, mo Ninive noꞌone kei taꞌelaꞌi honosie mwala aana maholo ienini. Oto kire kei haataꞌinie uri omu tohungei takalo oto hiitoꞌo, aena aana maholo a Jona e laeliwala nana mwalana, kire oonisae oto. Taꞌe lio kaꞌu, ngaeta iini e paine liutaa aana a Jona kaꞌu taane oto ie, na omu kaꞌa oonisae ike.”

Hari-hunilana Mo Ola Ni Lengi E Urihana Raa-raa

³³ Oto a Jisas ko heꞌi teꞌuri loꞌu, “Maholo nga iini ko haꞌakaunie nga laite, e saꞌa neꞌi mumuni ike aana wa ke pwaohaꞌinie luluꞌe haahie. !Haꞌike! Taꞌe kei neꞌi haadaꞌi aana oto taꞌau i lengi, hunie mwala ko sili mei nume na kire ke leesie oto rarangana laite ngeena.

³⁴ Oto maamu e urihana raa-raa hunie sapemu. Mala uri maamu e manola, nge ahutana sapemu kei matapwa oto, taꞌe mala uri maamu e kaꞌa manola, nge ahutana sapemu kei rodohono oto.

³⁵ Lio diana aana, mwaanie o unu-unue uri saemu e manola taane, taꞌe e rodohono mola.

³⁶ Aana ahutana sapemu kei honu aana raa-raa na nga leu aana kaꞌa rodohono loꞌu, nge e urihana maholo laite e raangiꞌo na ahutana sapemu e matapwa mango.”

A Jisas E Ere Aana Mo Parise

³⁷ Maholo a Jisas e ere-ere mango, nge ngaeta Parise ko si haaraie uri huni lai ngeu peꞌie i nume ingeie. Oto a Jisas e lae peꞌie na maholo kirerue hule wau i nume a mwaena, a Jisas e iiꞌo mola i aano huni ngeu

³⁸ na e kaꞌa holaꞌi hodalie ike kiꞌine i sulie tolahada mo Parise. Oto Parise ngeena ko tohungei pangataꞌi aana e leesie urine.

³⁹ Oto a Aalaha ko teꞌuri hunie, “Iꞌomu mo Parise omu urihana mola mo nime na mo kao-kao kire hoda rereꞌa aana aapa poꞌoi sinaha, taꞌe wau i laona e honu mola aana ngaulaa e kasu. Omu ko sasare lio kohi i maana mwala, taꞌe hule aana saemiu e honu oto mola aana horo-pelinge na taꞌena nga loꞌongaꞌinge aaela.

⁴⁰ !Omu tohungei pweu! ?Ohe omu ko loꞌongaꞌinie uri iini e haꞌaholaa poꞌoi sinaha, e kaꞌa haꞌaholaa ike poꞌoi lalo noꞌone?

⁴¹ Taungei hoda-olanga urine e kaꞌa roroꞌa ike. Taꞌe mala omu ke nii ola mola i laona mo nime na mo kao-kao ngeena ana kira maitale, haꞌalaa ahutana walu ola ngeena ke si meni rereꞌa toꞌohuu huniꞌomu.

⁴² !Aama-aamasilemiu mo Parise! Aana omu sai niie tangahuluꞌana tari-olanga iꞌomu hunie a God, na hule aana omu ko niie noꞌone tangahuluꞌana mo kele takai ei mwei-mwei uure mwaanie mo hohola iꞌomu. Taꞌe hunie haꞌa-oodohilemiu peꞌie mwala na huni manata diana hunie a God, nge omu kaꞌa sai aapwasu ike aana. Mo naꞌohai ola uri hunie omu ke dau i suliꞌi kaꞌu ienini. Na loꞌu mwaanie omu pulongosie mo haꞌa-uusulinge mwai-mwei mala niilana tangahuluꞌana tari-olanga iꞌomu.

⁴³ !Aama-aamasilemiu mo Parise! Aana omu ko heri hunie mo naꞌohai iiꞌo-iiꞌoha haliꞌite i laona mo nume ni palo-palo, na uri mwala ke haꞌapainaꞌaꞌomu aana maholo omu ko walo liu i laona mo leu ni uusiꞌe.

⁴⁴ !Aama-aamasilemiu! Aana omu urihana mola mo kilipweꞌu kire aano oto, aana aapa poꞌoi sinaha e lio diana taane na mwala saꞌa lio saie ike uri rae kire aanomie i leune.”

⁴⁵ Oto ngaeta iini hikana mo haꞌa-uusuli aana mo Haꞌatolanga a Mosis ko aalamie a Jisas uuri, “Haꞌa-uusuli, o ko ere urine, o ko ere aaelasiꞌemi oto noꞌone ni ngeena.”

⁴⁶ Oto a Jisas ko aalamie ko teꞌuri, “!Aama-aamasilemiu noꞌone mo haꞌa-uusuli aana mo Haꞌatolanga! Iꞌomu, omu ko da ludaa e hiꞌe aana mo haꞌatolanga hunie mwala. Taꞌe hule aana iꞌomu maraamiu na omu saꞌa nii kiꞌi huni peꞌie mwala huni suluꞌie ludaa ngeena.

⁴⁷ !Aama-aamasilemiu! Aana omu esu diana aana mo kilipweꞌu talana mo propet nge mo aamamiu e horo maesire.

⁴⁸ Aena urinena, iꞌomu, omu ko haꞌawalaimoliꞌaa nga taa nge mo aamamiu kire asuie eena. Aana ikire, nge kire horoꞌie mo propet, na iꞌomu, omu ko esuie mo kilipweꞌu huni aamasitoꞌo aana horoꞌilada.

⁴⁹ Aana e urine kaꞌu, a God e ere ni saenanaunge uuri, ‘Ne kei uusungeꞌinie mai mo propet na mo hurulaꞌaa i saada. Na kire kei horo maesie nga mo iini aada, na kire kei teungeꞌinie nga mo iini.’

⁵⁰ Oto haꞌaloilemiu pwaunge siꞌiri kei lae haahie maelana mo propet nge horoꞌilada e lae kaꞌu uure oto i aehotalana walumalau.

⁵¹ Haꞌaloilemiu kei lae haahie horoꞌilada, aehota peꞌie a Ebol lae hule aana a Sekaraea, iini horoꞌilana e lae karaꞌinie ora ni uunu-uunu aana Nume Maaꞌi Peine. Toꞌohuu no ko unue oto huniꞌomu uri iꞌomu pwaunge siꞌiri ie a God kei haꞌaloiꞌomu haahie horoꞌilana ahutada mango.

⁵² !Aama-aamasilemiu mo haꞌa-uusuli aana mo Haꞌatolanga! Aana omu ko mumunie kii huni tahanie maa aana nume ni saenanaunge i sulie tolahana a God. Na iꞌomu maraamiu noꞌone hule aana omu kaꞌa sare sili ike i laona numena, na omu ko deu honosie mo iini ko sare sili i nume.”

⁵³ Maholo a Jisas ko iisitaa oto mwaanie leune, mo haꞌa-uusuli aana mo Haꞌatolanga a Mosis na mo Parise ko si aehota ere aaelasie oto hiitoꞌo, na uure aana maholona kire ko talaꞌai dolosie oto mo ola hunge aana,

⁵⁴ aena aana kire sare lupweꞌi da mola uri hunie ke unue nga mei wala huni waelie maraana.