Tataroha Diana I Sulie A Jisas Kraes Nge A Luk E Uusue 1 - Tataroha Diana

Mei Wala Ni Saediananga Hunie A Tiopilas

¹ Mwala hunge kire dau-deu aahonga huni uusu-uusu i sulie nga moi taa nge kire oa i saakaelu.

² Kire uusue mo ola kire rongoꞌi mwaanie mo iini e lae-laeliwala nameelu aana nga taa kire leesie oto aana maada, uure mai aehotalana laladonga i sulie a Jisas.

³ Oto ineu maraaku noꞌone, poro paine Tiopilas, aena aana nou heitalengaꞌinie na nou sai diana aana walu olana uure oto mai aehotalana, nou loꞌongaꞌinie uri ne ke uusu samangaꞌiniꞌi oto namue.

⁴ No ko uusuꞌi urine hunie o ke sai diana aana uri nga moi taa nge haꞌa-uusulilemu e lae aani mo ola toꞌohuu.

Ensel Gebrel E Haataꞌi Aana A Sekaraea

⁵ A Sekaraea ingeie ngaeta pris aana maholo nge a Herod e aalaha haahie i Israel. Ingeie aana poꞌo ni iinoni a Abaeja aana komu ni pris. Na satana huꞌe ingeie a Elisabet. Ingeie noꞌone e uure mwaanie komu a Eron, ikire mo pris.

⁶ Tolahadarue e tohungei oodotaꞌi na kirerue hele i sulie ahutana mo haꞌatolanga God.

⁷ E ro mauꞌana ngeena kirerue kaꞌa toꞌo mwela ike, aena aana a Elisabet e amara. Na kirerue ko meni repo oto hiitoꞌo.

⁸ Oto aana ngaeta maholo e hule oto loꞌu hunie poꞌo ni iinoni a Sekaraea huni esu mala pris i laona Nume Maaꞌi Peine a God i Jerusalem.

⁹ Oto mala tolahana mo pris, kire inie daes huni leesie iini uri taa aada nge a God e lio hilisie huni uunue dango wau-wesu i lengine ora ni uunu-uunu aana Hahuꞌana Leu Maaꞌi i laona Nume Maaꞌi a God. Oto aana hai dingena, lio-hilisilana a Sekaraea e lae.

¹⁰ Na aana maholo a Sekaraea ko uunue dango wau-wesu, ahutana mwala mola poꞌoi sinaha peꞌi aarengaꞌinge.

¹¹ Oto ensel a God e haataꞌi aana a Sekaraea, e uure karaꞌinie pwalo-pwalona ora ni uunu-uunue dango wau-wesu.

¹² Maholo a Sekaraea e leesie ensel ngeena, ko si teipuꞌo-puꞌo na ko tohungei meꞌu oto hiitoꞌo.

¹³ Taꞌe ensel e teꞌuri hunie, “!Mwaanie o meꞌu-meꞌu Sekaraea! A God e rongoa oto aarengaꞌinge iꞌoe, na huꞌe iꞌoe a Elisabet kei haꞌahutaa oto kele mwela mwane, na o ke haaraꞌinie satana aana a Jon.

¹⁴ O kei ile-ilenimwaꞌe na o kei sae-saediana oto liutaa haahie. Mwala hunge noꞌone kire kei ilenimwaꞌe haahie aana kei hute.

¹⁵ A Jon kei neꞌie tohungei iinoni peine a God. Niilana kei lae hunie a God, na huni haataꞌinie urine aana mwala, e saꞌa roroꞌa ni inu waen ike wa nga mei wei ni mehiri. Kei honu oto aana Liꞌoa Maaꞌi uure i iiana nikana.

¹⁶ Kei peꞌie mo iini hunge aana mwala ni Israel huni haꞌa-aaliꞌure takoie a God, Aalaha ikire.

¹⁷ Ingeie maraana kei lae i naꞌona a Aalaha huni deu aakau aana mwala loosie laenga ingeie mai. A Jon kei tohungei aꞌailaꞌa na kei nanama aani Liꞌoa mala a Propet Elaeja. Ingeie kei da hanuelamanga i matolana mo heꞌi aamana, na kei haꞌa-aaliꞌue kira haitohe takoie tala ni loꞌongaꞌinilana oodotaꞌinge.”

¹⁸ Oto a Sekaraea ko teꞌuri hunie ensel, “?Uri ne kei manataꞌinie leu o ko unuena uri e toꞌohuu uri taa? Aana ineu nou repo oto, na huꞌe ineu e repo oto noꞌone.”

¹⁹ Ensel ko aalamie uuri, “Ineu a Gebrel, na nou uure i naꞌona God. Na ingeie oto ni e uusungeꞌinieu mei huni ere peꞌiꞌo, na ni haꞌarongoꞌo aana tataroha diana ie.

²⁰ Na nga taa no ko unue ie kei saro lae taane mai oa, aana maholo hunie. Taꞌe iꞌoe aena aana o kaꞌa hiiwalaimoli ike aana walaku, o saꞌa ere-ere ike, lai hule aana hai dinge walu ola ienini kei oa.”

²¹ Aana maholona na mwala ko maa-maaꞌoohie ue a Sekaraea taꞌi sinaha. Kire ko papangataꞌi oto aana ko iiꞌo tewa oto wau i Nume Maaꞌi.

²² Maholo a Sekaraea e iisitaa poi sinaha, na e kaꞌa sai ere oto peꞌire, taꞌe ko haꞌa-haꞌamalaa ola mola aana nimana. Oto kire si saie uri e leesie oto nga aanoa wau i Nume Maaꞌi.

²³ Maholo mo dinge ingeie huni deu esunge i Nume Maaꞌi mala pris e haro mango, nge e si eelihoꞌi taꞌau i nume ingeie.

²⁴ E kaꞌa tewa ike loꞌu i purine leune e rau, na huꞌe ingeie a Elisabet ko hiꞌe-hiꞌe oto. Na e iiꞌo hahuroto mola i nume ikirerue hunie e lime waro-waro. Oto a Elisabet ko teꞌuri,

²⁵ “Leesie kaꞌu nga taa a Aalaha e da hunieu. Mwala ineu kire maa-masa kaꞌu i tehulaꞌaku aana nou amara, taꞌe ie a Aalaha e aamasieu na e taꞌaasie oto mei masanga ngeena mwaanieu.”

Ensel Gebrel E Haataꞌi Aana A Meri

²⁶ Aana oonona nga waro-waro i purine a Elisabet ko hiꞌe-hiꞌe oto, a God e uusungeꞌinie ensel Gebrel hunie huilume i Nasaret aana poꞌo ni henue i Kalili.

²⁷ Ensel ngeena e toolea mai tataroha hunie nga keni raoriꞌi, na a keine e ere ruru oto huni toꞌo aana mwane satana a Josep aana komu a Deved Inemauri. Satana a keine a Meri.

²⁸ Oto ensel e sili mei saana ko teꞌuri, “Saediananga a God huniꞌo. A Aalaha e iiꞌo oto peꞌiꞌo.”

²⁹ Oto a Meri saena ko si liki i tehulaꞌana walana ensel ngeena, na ko loꞌongaꞌi hiitoꞌo i sulie uri nga taa ni loꞌongaꞌinge aana mo wala ngeena.

³⁰ Oto ensel ko teꞌuri hunie, “Mwaanie o maꞌu-meꞌu Meri. A God ko tohungei ilenimwaꞌe oto hiitoꞌo haahiꞌo.

³¹ Na o kei hiꞌe-hiꞌe aani mwela, oto o kei haꞌahutaa kele mwane, na o ke haaraꞌinie satana aana a Jisas.

³² Ingeie kei neꞌi mwane paine, na mwala kei haaraꞌinie uri ingeie Kalena iini e Paine Liutaa. Na a God Aalaha ikie kei haꞌa-aalahaa noꞌone mala weuwana, a Deved Inemauri.

³³ Oto ingeie kei aalaha taraꞌasi oto haahie mwala ni Israel, na aalahanga ingeie e saꞌa mango oto ooꞌoo.”

³⁴ Oto a Meri ko unue hunie ensel uuri, “?Mo ola ienini ke si reu uri taa eena, na nou kaꞌa saie ike nga mwane?”

³⁵ Oto ensel ko aalamie uuri, “Liꞌoa Maaꞌi kei siho i lengimu, na nanamanga iini e Paine Liutaa kei melusiꞌo. Na aena ngeena kele wee-wee iꞌoe kei maaꞌi na sailana kei lae uri ingeie Kalena a God.

³⁶ O ke leesie kaꞌu keni tekihemu a Elisabet, e tohungei repo aaela oto. Taꞌe ingeie noꞌone ko hiꞌe-hiꞌe aani mwela. Ahutana mwala kire mani loꞌongaꞌi uri e saꞌa toꞌo mwela loꞌu, taꞌe ko hiꞌe-hiꞌe oto na e oono waro-waro e mango oto aana.

³⁷ Aana taꞌe-taꞌena nga mei ola e saꞌa aasaie ike a God huni esuie.”

³⁸ Oto a Meri ko si unue hunie ensel uuri, “Ineu oto koni-konihe a Aalaha. Leune ke oa oto hunieu mala o ko unuena.” Oto ensel e si lae mwaanie.

A Meri E Lae Huni Leesie A Elisabet

³⁹ Oto loꞌu mola i purine, a Meri e tauleꞌi, oto ko tolana lae oto hunie ngaeta huilume taꞌau i lengine mo uuwo i Jiudia.

⁴⁰ E lae taꞌau i sili i nume a Sekaraea, oto ko ere ni saediananga hunie a Elisabet.

⁴¹ Maholo a Elisabet e rongoa mola mei wala ni saediananga a Meri, oto kele mwela i iiana ko esuleꞌi na ko lalaaꞌi sape oto. Na maholona Liꞌoa Maaꞌi ko siho oto i lengine a Elisabet,

⁴² na ko unue oto uuri, “A God ke haꞌadianaꞌaꞌo liutaa aana ahutana mo keni, na ke haꞌadianaꞌaa kele wee-wee o ko hiꞌe-hiꞌe aana ngeena.

⁴³ Iꞌoe oto nikana a Aalaha ineu, na o lae mai seeku. ?Aana e ue kaꞌu mei ola diana urini ko reu eeku?

⁴⁴ Maholo nou rongoa walamu, oto kele wee-wee e si lalaaꞌi sape oto peꞌie ilenimwaꞌenga i iieku.

⁴⁵ Deidehiꞌo keine, aana o hiiwalaimoli uri nga taa a Aalaha e unue huniꞌo kei oa oto.”

A Meri E Kana Ni Soi Haꞌamanikuluꞌaa God

⁴⁶ Oto a Meri ko teꞌuri, “Saeku ko soi haꞌamanikuluꞌaa Aalaha,

⁴⁷ Na maurihaꞌaku ko ilenimwaꞌe aana God, a Haꞌa-uurileku,

⁴⁸ aana a God e loꞌongaꞌinieu mei iinoni reu ingeie. Uure siꞌiri pwau weu ahutana mwala kei saieu uri keni deidehie,

⁴⁹ aana a God, iini e nanama na e maaꞌi, e da mo ola e hiꞌe hunieu.

⁵⁰ A God e aamasie mo iini kire haꞌamaꞌu aana, uure oto aana mo pweunge i naꞌo lae mai hule siꞌiri na mo pweunge ue mai.

⁵¹ E haataꞌinie ramolana aana nimana, aana e tatangaꞌinire mwala e sai toohaꞌinire aani loꞌongaꞌinilada maraada.

⁵² E haꞌasihoa mo aalaha mwaanie mo neunekume ikire, na e sulu alaꞌa aana mo mei iinoni reu.

⁵³ E niie mo ola diana hunie mo iini kire hiolo, taꞌe mo iini e toꞌo-toꞌo e uusungeꞌi mwaakule mola aada.

⁵⁴ E hule oto mai huni peꞌie mwala ingeie mo Israel, mo koni-konihe ingeie. E kaꞌa pulongosie ike haiholotaꞌinge ingeie huni aamasie mwala ingeie,

⁵⁵ aana e da oto nga taa e haiholotaꞌinie hunie mo weuwaka, hunie a Ebraham na hunie mo kalena, uri kei aamasire oto tarau.”

⁵⁶ A Meri e iiꞌo peꞌie a Elisabet hunie ola mala e oolu waro-waro, oto e si eelihoꞌi loꞌu i henue ingeie.

Hutelana A Jon Loto Maaꞌi

⁵⁷ Oto e hule aana pongine a Elisabet, ko si haꞌahutaa kele mwela mwane.

⁵⁸ Mo euhenue ingeie na mo tekihana kire rongoa uri a Aalaha e haꞌa-oaie aamasinge ingeie hunie a Elisabet urine, kire si meni ilenimwaꞌe peꞌie.

⁵⁹ Oto wiki e ahu i purine kele wee-wee e hute, kire si meni loko hunie torilana na hunie kire ke haaraꞌinie aana aamana, a Sekaraea.

⁶⁰ Taꞌe a nikana e unue uuri, “Haꞌike, omu ke haaraꞌinie satana aana a Jon.”

⁶¹ Oto mwala a nikana ko teꞌuri hunie, “Taꞌe more kaꞌa toꞌo aana ike nga satai ola urine aana komu iꞌomoreꞌi.”

⁶² Oto kire ko si haꞌamalaa hunie aamana uri e sare haaraꞌinie satana aana a tei.

⁶³ Oto a Sekaraea e sukaa ola ni uusu-uusu, ko si uusue uuri, “Satana a Jon.” I leune kire ko si meni pangataꞌinie oto hiitoꞌo.

⁶⁴ Oto mola aana maholoi satona, a Sekaraea ko si aehota ere-ere oto loꞌu, na ko paalahea God.

⁶⁵ Oto mo euhenue ikirerue kire ko si meꞌu oto hiitoꞌo, na tataroha aana mo olana e si tarohie ahutana mo henue taꞌau i lengine mo uuwo i Jiudia.

⁶⁶ Na ahutana mo iini e rongoa mo olana, kire ko si loꞌo-loꞌongaꞌi i suliꞌi na kire ko unue uuri, “?A mwaꞌu ie kei ue taane? Aana e lio mala uri nanamanga a Aalaha oto aana.”

A Sekaraea E Soi Haꞌamanikuluꞌaa God

⁶⁷ Oto a Sekaraea, aamana a Jon, e honu aana Liꞌoa Maaꞌi, e si ere rarangana walana God uuri,

⁶⁸ “Kolu ke paalahea God, Aalaha ikie mo Israel, aana e lae mai huni peꞌikie mo iinoni ingeie, na e tapa-oolisikie.

⁶⁹ Na uure mwaanie komu a Deved koni-konihe ingeie, e niie iini nanama huni haꞌa-uurikie.

⁷⁰ Uure oto mai naꞌo, e unue kaꞌu aana mo propet maaꞌi ingeie

⁷¹ uri kei haꞌa-uurikie mwaanie mo maelonga ikie, na mwaanie nimada kira ngiduupu hunikie.

⁷² E unue kei haataꞌinie aamasinge hunie mo weuwaka, huni aamasitoꞌo aana haiholotaꞌinge maaꞌi ingeie,

⁷³ nge e haiholotaꞌinie hunie a Ebraham aamaka.

⁷⁴ Aana e haiholotaꞌi uri kei haꞌa-uurikie mwaanie mo maelonga ikie, mwaanie kie maꞌuteꞌinire. Taꞌe kie ke asu mamanutoꞌo mola nana,

⁷⁵ uri hunie kie ke iiꞌo maaꞌi na iiꞌo oodotaꞌi i naꞌona, i suli hei dinge aana maurihaꞌaka.

⁷⁶ “Na iꞌoe wee-wee ineu, sailemu kei lae uri nga propet nana iini e Paine Liutaa, aana o kei lae i naꞌona Aalaha huni salea tala ingeie loosie.

⁷⁷ Na huni haꞌarongoa mwala ingeie uri ingeie kei haꞌa-uurire aani saeꞌaasilana mo roroꞌanga ikire.

⁷⁸ Aena aana aamasinge a God ikie mone, ingeie kei siho mai uure taꞌau i Lengi mala sato ko pwaa,

⁷⁹ huni raangie mo iini kire iiꞌo i laona rodohono na i mamalutana maenga, na huni haꞌa-oodohie aeꞌaeka i sulie tala ni henuelama.”

⁸⁰ Oto kele mwelana e paine taꞌe, na ko manata peꞌi loꞌongaꞌinge diana. E talei oꞌoꞌo mola i laona hanuesala, lai hule aana hai dinge e aehotaa asunge ingeie i matolana mwala ni Israel.