Kolosi 1 - Tataroha Diana

Mei Wala Ni Saediananga

¹ Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa nana a Jisas Kraes. Iꞌemereꞌi aasikaelu a Timoti

² mere ko uusu-uusu ienini huniꞌomu, maeni eesiku maaꞌi, nge omu ko lulu i sulie a Jisas toꞌohuu wau aana huilume i Kolosi. Melu ko eitanaie a God Aamaka uri hahuꞌana manata-diananga na hanuelamanga ingeie ke iiꞌo peꞌiꞌomu.

A Pol E Aarengaꞌi Peꞌi Paalahenga Haahie Mo Kolosi

³ Oto tarau maholo melu ko aarengaꞌi talamiu, melu ko paalahea a God, Aamana Aalaha ikie a Jisas Kraes,

⁴ aana melu rongoa uri omu ko hiiwalaimoli aana a Jisas Kraes, na omu ko manata diana hunie ahutana mo iinoni maaꞌi a God.

⁵ Omu ko deu diana oto urine, aana omu ko maaꞌoohi susutoꞌo mola hunie ilenimwaꞌenga nge a God e neꞌi diana aana oto loosiꞌomu taꞌau i Lengi ngeena. Haiholotaꞌinge a God huniꞌomu ngeena, omu holaꞌi rongoa oto mo wala toꞌohuu i sulie maholo omu aehota ni rongo i sulie Tataroha Diana a Jisas.

⁶ Tataroha Diana e hule aamiu ngeena ko tatangasie oto walumalau, na taꞌena nga leu ko hule aana, nge ko haꞌa-uurie mo iinoni mwaanie maenga huu na ko haꞌa-aꞌailaꞌaa maurihaꞌada, mala e asuie noꞌone aamiu uure oto i naꞌo aana hai dinge omu holaꞌi manataꞌinie uri a God ko tohungei manata diana liutaa hunie mo iinoni.

⁷ Omu rongoa walu ola ngeena mwaanie a Epapras, iini melu tohungei manata diana hunie mala ngaeta koni-konihe a Kraes peꞌiꞌemeelu. Ingeie ngaeta mwane ni nou-norue na ko esu loko-loko peꞌiꞌemeelu tarau huniꞌomu.

⁸ Ingeie noꞌone nge e haꞌarongoꞌemeelu uri a Liꞌoa Maaꞌi e peꞌiꞌomu oto hunie omu ke manata diana huniꞌomu heiliu.

⁹ Aena urinena, uure aana hai dinge melu rongoa tataroha i suliꞌomu, melu ko lae peꞌi aarengaꞌi talamiu. Na melu ko eitanaie a God uri omu ke sai diana aana nga taa a God e saetoꞌo aana omu ke asuie, na uri omu ke honu mola aana saenanaunge na lio sai-olanga a Liꞌoa Maaꞌi e sai niie hunikolu.

¹⁰ Melu ko eiꞌeitanai urine hunie omu ke iiꞌo oto aana tolahai ola e malisine mo iinoni maaꞌi a Aalaha, na hunie asunge iꞌomu ke toꞌohie saena a God. Urine nge omu ke si haꞌahungeꞌaa loꞌu taꞌena nga asunge diana, na omu ke sai diana aana a God.

¹¹ Melu ko eiꞌeitanaie a God hunie ke haꞌa-aꞌailaꞌaꞌomu aana nanamanga ingeie e saka na e manikuluꞌe, mwaanie omu aakohe maholo siꞌohaꞌanga kei hite aamiu, taꞌe omu ke maaꞌoohi susutoꞌo mola peꞌie ilenimwaꞌenga.

¹² Na maꞌalana omu ke siꞌohaꞌa loꞌu uri taa, taꞌe omu ke paa-paalahea mola a Mamaꞌa aana e da kie ke malisine nga aapa aana nga taa a God e loohaꞌinie hunie mwala ingeie taꞌau i laona Aalahanga ni Matapwanga.

¹³ Aana e haꞌa-uurikie mwaanie nanamanga aana rodohono, na e toolekie i laona Aalahanga a Kalena, iini e tohungei manata diana hunie.

¹⁴ Na ingeie oto e holikie aana maelana, na i tehulaꞌana ingeie mone a God e si saeꞌaasie mo oorahaꞌaa ikie.

A Kraes E Roroꞌa Oto Liutaa

¹⁵ A Kraes oto iini lio sailana a God e sai lae aana, aana e tohungei sada oto peꞌie Aamana nge nga iini kaꞌa sai leesie ike. Maholo haꞌaholanga haꞌike ue, taꞌe a Kraes e iiꞌo oto, na e paine oto liutaa haahie taꞌena nga ola aana haꞌaholanga ngeena.

¹⁶ Ingeie oto e haꞌaholaa taꞌena nga ola. E haꞌaholaa taꞌena nga ola taꞌau i Lengi, na mo ola mai aano, na mo ola kie sai leesiꞌi, na mo ola kie kaꞌa sai leesiꞌi ike. Ingeie oto e haꞌaholaa taꞌena nga ensel, na taꞌena nga liꞌoa, na taꞌena nga aalaha, na mo aalahanga ikire, na taꞌena nga iini e nanama loꞌu. Ahutana walu ola ngeena haꞌaholalani e lae aana a Kraes, na nana a Kraes.

¹⁷ Aana ingeie e iiꞌo oto i naꞌona walu ola, na ingeie oto e hele lokoa taꞌena nga ola.

¹⁸ Mo iinoni aana soihaadaꞌinge, kire urihana sapena Kraes, na ingeie oto pwaune soihaadaꞌinge, aena aana ingeie oto aahuꞌine maurihe. Ingeie oto eetana nga iinoni huni taꞌelaꞌi mwaanie maenga peꞌie maurihe nge ko iiꞌo oto huu, hunie uri taꞌe ingeie haliꞌite ke neꞌie naꞌohai iini haahie ahutana walu ola.

¹⁹ Iau, e urine oto aana a God e neꞌisae huni iiꞌo taꞌingelu i lalo aana Kalena, hunie kire ke sada na nga mei aapa ingeie ke suꞌuri eiꞌaa mwaanie a Kalena.

²⁰ Na a God e neꞌisae hunie Kalena ke asuie uure-rurunge hunie ahutana walu ola aana haꞌaholanga e sai lae loꞌu mei i saana. Oto maelana a Kraes i lengine poꞌu-poꞌu e si tola aalihoꞌi mei aana ahutana oto walu ola takoie a God maraana, walu ola mai aano na walu ola taꞌau i Lengi.

²¹ Iꞌomu, holaꞌinaꞌo omu haꞌataulie a God oto hiitoꞌo na omu neꞌi maelonga mola hunie, aana mo loꞌongaꞌinge tataꞌala iꞌomu na mo ola aaela omu euꞌesuiꞌi.

²² Taꞌe a Kalena e neꞌi iinoni na e mae honotamiu, na aena urinena a God e si da hunie omu ke uure ruru oto peꞌie. A God e asuie urine hunie uri ke tooleꞌomu mei saana mala mo iinoni e maaꞌi oto, nge nga mei ola e kaꞌa aaela ike loꞌu aada, na nga mei ola hunie a God ke leire haahie haꞌike loꞌu.

²³ Taꞌe kei toꞌohuu urine aamiu mola mala uri omu ko tohungei uure aꞌailaꞌa taraꞌasi aani hiiwalaimolinge peꞌi norutoꞌonga, na omu ke maaꞌoohi susutoꞌo mola hunie haiholotaꞌinge a God huniꞌomu nge omu rongoa oto aana Tataroha Diana. Na nou hiiwalaimoli kei toꞌohuu oto urine aamiu. Na tarohaꞌinilana taꞌa-taꞌa Tataroha Diana ngeena ko lae aana taꞌena nga leu i laona walumalau, na ineu a Pol, nou neꞌie koni-konihe aana Tataroha Diana ngeena huni lae peꞌie laeliwalanga aana.

A Pol E Asu Hiitoꞌo Nana Soihaadaꞌinge

²⁴ Oto maꞌalana no ko sapesalu oto ienini i tehulaꞌamiu, taꞌe no ko ilenimwaꞌe mola, aena aana sapesalunge aana sapeku ienini kei peꞌiꞌomu. A Kraes e sapesalu hiitoꞌo waite huni peꞌie soihaadaꞌinge, aena aana sapena ni otona. Oto ineu no ko sapesalu noꞌone urine aana sapeku huni haꞌamangoa kele leu e oore ue aana sapesalunge a Kraes arengaku.

²⁵ A God ni e lio hilisieu hunie ne ke neꞌi iinoni euꞌesu aana soihaadaꞌinge huni peꞌiꞌomu urine. Na asunge ineu oto huni unu tahangaꞌinie taꞌena nga ola aana Tataroha Diana.

²⁶ Mei tataroha ngeena, mei saehaahinge a God otona, na waite e mumunie ue mwaanie ahutana iinoni uure oto mai aehotalana walumalau. Taꞌe maholo ienini a God ko si unu haadaꞌi aana hunikie mo iinoni maaꞌi ingeie.

²⁷ E asuie leune hunie iꞌomu mo Aapoloa Aaopa, omu ke manataꞌinie uri a Kraes e sai iiꞌo oto i lalo aamiu, na ko haꞌawalaimoliꞌaa huniꞌomu uri iꞌomu noꞌone omu sai iiꞌo peꞌie i laona manikuluhaꞌana. Mei saehaahinge a God nge e iiꞌo mumuni keꞌu ni otona, na e tohungei diana hunikie na e lio manikuluꞌe.

²⁸ Aena urine, melu ko tarohaꞌinie Tataroha Diana ienini i sulie a Jisas Kraes hunie taꞌena nga iinoni. Oto aana saenanaunge diana a God, melu ko lae peꞌi haꞌapasulire na peꞌi haꞌananaure uri hunie kire ke lae mai saana God, na hunie kire ke mani neꞌi rato i sulie tolahana a Kraes.

²⁹ Oto huni esuie leune, no ko tohungei esu waaꞌiniꞌini oto liutaa. Na asunge ineu e aꞌailaꞌa taraꞌasi mola urine aena aana no ko esu aana nanamanga nge a Kraes e niie hunieu.