Kalesia 5 - Tataroha Diana

A Kraes E Luhesikie Oto

¹ A Kraes e luhesikie oto uri hunie kie ke suꞌuri iiꞌo loꞌu i mamalutana mo Haꞌatolanga a Mosis. Oto omu ke uure maꞌutaꞌa na mwaanie omu toliꞌaasie nga iini e da omu heꞌi neꞌi koni-konihe loꞌu nana mo Haꞌatolanga.

² Ineu a Pol no ko unue oto huniꞌomu, mala uri omu kei ooli takoie mo Haꞌatolanga aana omu toliꞌaasiꞌomu maraamiu hunie torihesiꞌonga, a Kraes e saꞌa peꞌiꞌomu oto eena.

³ Na no ko heꞌi unue loꞌu huniꞌomu, mala uri nga iini ko toliꞌaasie oto maraana hunie haꞌatolanga aana torihesiꞌonga aana ko sare neꞌi iinoni oodotaꞌi i maana God, nge ke lulu i sulie oto noꞌone ahutana mo Haꞌatolanga.

⁴ Iini nge ko sare lulu i sulie mo Haꞌatolanga a Mosis hunie uri ke oodotaꞌi i naꞌona God, iini urine ko oopaa oto mwaanie a Kraes, na ko aatopuri oto aana niinge a God e niie hunie.

⁵ Taꞌe Liꞌoa Maaꞌi ko haꞌawalaimoliꞌaa hunikie uri a God ko haꞌa-oodohikie aena aana kie norutoꞌo mola aana a Jisas.

⁶ Aana maholo iinoni e lado oto peꞌie a Jisas Kraes, nge maꞌalana e torihesiꞌo wa haꞌike, taꞌe e sada mola na e kaꞌa roroꞌa ike. Taꞌa-taꞌa leu mola e roroꞌa, na leune mola hiiwalaimolinge ikie aana a Jisas Kraes ke si haataꞌi aana manata-diananga hunie mo iinoni.

⁷ Holaꞌinaꞌo omu lae-lae kohi taane oto peꞌie hiiwalaimolinge aana a Kraes. ?A tei ni e heꞌi da loꞌu omu rohu mwaanie lulu i sulilana mo wala toꞌohuu ngeena?

⁸ A God haꞌike ni e haꞌa-olaꞌomu nge omu huꞌiteꞌi ngeena, aena aana ingeie kaꞌu e holaꞌi lio hilisiꞌomu hunie tala oodo.

⁹ !Omu ke lio talamiu! Kele mei iis oto mola mwai-mwei e sai haꞌahanea mola nimei pulaoa laku, na urine loꞌu nga kele haꞌa-uusulinge aaela e sai haꞌatakaloa mola mwala oto hunge.

¹⁰ Taꞌe aana nou norutoꞌo aana a Aalaha, nou hiiwalaimoli uri omu saꞌa hiiwalaimoli ike loꞌu aana mo loꞌongaꞌinge aaopa ngeena. Na iini nge ko kotahiꞌomu aana mo loꞌongaꞌinge urine, a God kei haꞌaloie taane.

¹¹ Maeni eesiku maaꞌi, omu ke loꞌongaꞌi keꞌu i sulie laeliwalanga ineu. ?Mala uri no ko lae-lae mola ue peꞌi laeliwalanga aana torihesiꞌonga, e ue kaꞌu mo Jiu ko si teu-teungeꞌinieu mola? Mala uri leune ke toꞌohuu, haꞌalaa kire saꞌa saewasulieu ike loꞌu haahie laeliwalanga i sulie maelana a Kraes i lengine poꞌu-poꞌu.

¹² !Taꞌe torihesiꞌonga e kaꞌa neꞌie ike nga mei ola! !Saeku uri mo iini ko lae peꞌi kotahiꞌomu aana haꞌa-uusulinge i sulie torihesiꞌonga ngeena, kire ke lae taraꞌasi na kire ke tori aasire mola maraada!

Mwaanie O Lae-lae Mola I Sulie Saemu, Taꞌe O Ke Lulu I Sulie Tolahana Liꞌoa Maaꞌi

¹³ Iꞌomu, maeni eesiku maaꞌi, a God e soiꞌomu uri hunie omu ke iiꞌo luhetaꞌi mwaanie mo Haꞌatolanga a Mosis. Taꞌe mwaanie omu loꞌongaꞌinie uri omu iiꞌo luhetaꞌi huni oorahaꞌaa mola mala saemiu. !Haꞌike! Omu ke peꞌiꞌomu aani manata-diananga huniꞌomu heiliu.

¹⁴ Ahutana walu ola i laona mo Haꞌatolanga a Mosis, kire mani loko mola i laona taꞌa-taꞌa haꞌatolanga nge e unue uuri, O ke manata diana hunie auhenue iꞌoe oto mala huniꞌo maraamu. Levitikas 19:18

¹⁵ Taꞌe mala uri omu ko heꞌi polahiꞌomu loꞌu mola hailiu mala mo usu ni meꞌesu, nge omu ke lio talamiu, mwaanie omu horo suuheꞌiniꞌomu mola taꞌingelu.

¹⁶ Oto no ko unue huniꞌomu uri omu ke lulu i sulie mola Liꞌoa Maaꞌi aana ahutana mau-meuringe iꞌomu, urine nge omu saꞌa lae loꞌu i sulie mo tolahai iinoni aaela.

¹⁷ Aana nga taa nge tolahai iinoni aaela e saetoꞌo aana, e tohungei aaopa oto hiitoꞌo mwaanie nga taa nge Liꞌoa Maaꞌi e saetoꞌo aana. Na nga taa nge Liꞌoa Maaꞌi e saetoꞌo aana e tohungei aaopa oto loꞌu mwaanie nga taa nge tolahai iinoni aaela e saetoꞌo aana. Aena urine nge kirerue ko maelonga hunirerue hailiu, na halinge ikirerue ngeena ko toꞌohie taꞌena nga mei ola o ko sare asuie.

¹⁸ Oto omu ke lulu i sulie mola Liꞌoa Maaꞌi, urine nge omu saꞌa asuie ike mo tolahai iinoni aaela ngeena, na omu saꞌa iiꞌo ike loꞌu i mamalutana mo Haꞌatolanga a Mosis nge ko uure honosie mo tolahai iinoni aaela ngeena.

¹⁹ Na nga taa nge tolaha ni iinoni ko esuie, e matapwa taane mola, aana mwala nge ko lae mola i sulie saeda, kire ko mesi, na kire ko aeni ola, na kire ko deu mola i sulie taꞌena nga hari-huninge aana sape.

²⁰ Kire ko paloa mola mo god eero-eero, na kire ko deu i sulie mola mo liꞌoa aaela. Kire ko esuie mola maelonganga hunire hailiu, na haiseuninge, na heotaꞌinge. Kire ko maaola-ola aani saewasunge, na kire ko loꞌongaꞌinire mola maraada, na kire ko esuie mola oopanga, na kire neꞌie oto ngaeta pulitaa haꞌa-haꞌa-ere.

²¹ Kire ko saehanalie mola toꞌolana ngaeta iinoni, na kire ko mehiri mola aana inu wei ni pweunge, na kire ko deu mola taꞌewau aana mo houlaa ni inunge ikire. Na walu ola urine noꞌone nge kire ko euꞌesuiꞌi. No ko unue oto loꞌu huniꞌomu mala nou unue kaꞌu oto holaꞌinaꞌo uri mwala nge kire ko deu i sulie mo tolahai ola mala ngeena, kire saꞌa helesie ike mo haꞌadianaꞌanga aana Aalahanga a God.

²² Taꞌe hue-huei ola aana Liꞌoa Maaꞌi nge manata-diananga, na ilenimwaꞌenga, na hanuelamanga, na saemamae, na aamasinge, na diananga. A Liꞌoa Maaꞌi ko da kie ke neꞌi iinoni nou-norue,

²³ na kie ke neꞌi iinoni maneko, na kie ke neꞌi iinoni e sai nihisie tolahana mwaanie aaelanga. Nga taꞌa-taꞌa haꞌatolanga e kaꞌa uure honosie ike walu ola ienini wa ke unue uri kire aaela.

²⁴ Taꞌe mo iinoni nge kire toꞌo aana a Jisas Kraes i lalo aada, kire neꞌi aasie oto mo tolaha ni iinoni aaela, aana e urihana kire rapu taalengasie noꞌone ahutana mo tolahai iinoni aaela ikire i lengine poꞌu-poꞌu, na kire horo maesiꞌi oto.

²⁵ Oto aana a Liꞌoa Maaꞌi e niie maurihe hunikie nge kie ke lio i sulie maurihaꞌaka hunie kie ke mani aato ae toꞌohuu peꞌie a Liꞌoa Maaꞌi.

²⁶ Mala uri kei toꞌohuu hunikie urine, nge nga iini aaka e saꞌa toohaꞌinie ike maraana, wa ke haꞌasaewasuliꞌaa nga iini, wa ke saehanalie toꞌolana nga iini.