Kalesia 4 - Tataroha Diana

Ikie Mo Kalena God Toꞌohuu, Na Kie Kaꞌa Neꞌi Koni-konihe Loꞌu

¹ Ne ke heꞌi ere luhesie loꞌu mola uuri. Maholo mwela e mwai-mwei ue, e saꞌa hele aana ike ue toꞌo-toꞌolana aamana. Na maꞌalana uri aamana e mae oto na e toꞌo aana taane oto walu ola ngeena, taꞌe mwala aaopa kire kei haro lio i sulie mwela ngeena mala ngaeta koni-konihe mola.

² Na kire kei lio i sulie noꞌone walu ola ingeie hunie, na ingeie kei iiꞌo mola i mamalutana mo haꞌa-uusuli ingeie na mo iini kire ko lio i sulie. Oto kei iiꞌo i mamalutada lae hule aana maholo aamana e unue kaꞌu e malisine kire ke oopaa poꞌo ni iini ingeie hunie.

³ Ikie e urine noꞌone. Maholo kie kaꞌa saie ue a God, kie iiꞌo noꞌone mola mala mo koni-konihe i mamalutana mo haꞌatolanga aana walumalau ie.

⁴ Taꞌe e lae mai hule aana maholo oto hunie, nge a God e uusungeꞌinie mai a kalena i laona walumalau. E hute mai aani iinoni na e iiꞌo oto i mamalutana mo Haꞌatolanga a Mosis.

⁵ A God e asuie leune urine, uri huni tola aalihoꞌi aana mo iini kie iiꞌo i mamalutana mo Haꞌatolanga hunie kie ke lae mai neꞌi tohungei mwela oto ingeie.

⁶ Oto huni haataꞌinie uri kie neꞌie oto mo kalena a God toꞌohuu, a God e uusungeꞌinie mai Liꞌoa Maaꞌi aana a Kalena hunie ke iiꞌo i laona maurihaꞌaka. Na Liꞌoa ngeena ko si haataꞌinie uri kie sai soie a God Aamaka aana “Mamaꞌa.”

⁷ Oto omu kaꞌa neꞌi koni-konihe ike loꞌu, taꞌe omu neꞌi kalena oto toꞌohuu. Na aena aana omu neꞌi kalena mone oto, nge a God kei niie maurihe nge e unue mo mwela ingeie ke toꞌo aana oto huniꞌomu.

Mo Kalesia Ko Karaꞌi Huꞌiteꞌi Huni Iiꞌo I Mamalutana Mo Haꞌatolanga A Mosis

⁸ I naꞌo maholo omu kaꞌa sai diana aana ue a God, omu neꞌi koni-konihe mola na omu talei euꞌesu mola nana mo god eero-eero.

⁹ Taꞌe maholo ienini, omu sai diana aana oto a God, na nga taa nge e diana loꞌu liutaa, nge a God e sai diana aamiu oto. ?Oto e ue? ?Uri omu ko sare ooli loꞌu i mamalutana mo haꞌatolanga aana mo liꞌoa ni welumalau, nge hule aana kire mamaelaꞌa mola na kire neꞌie mola mei ola mwaakule? ?Wa saemiu omu ke neꞌi koni-konihe loꞌu mola nada mala holaꞌinaꞌo?

¹⁰ No ko dolosi eemiu urine, aena aana omu ko sare lulu i sulie oto taꞌena nga haꞌatolanga aana mo Dinge Paine mo Jiu, na mo waro-waro, na mo maholoi helisi.

¹¹ Oto no ko tohungei maarara mola mwaanie uri nou haꞌaweoau mola peꞌiꞌomu.

¹² Oto no ko eitanaiꞌomu, maeni eesiku maaꞌi, uri omu ke uusulieu aana iiꞌonga luhetaꞌi mwaanie mo Haꞌatolanga a Mosis. Omu ke aamasitoꞌo kaꞌu aana waite, maholo nou eeliꞌu huni lae i sulie a Jisas, nou toliꞌaasie mola mo Haꞌatolanga a Mosis, na urine e urihana nou uusuliꞌomu noꞌone mo Aapoloa Aaopa aana iiꞌonga luhetaꞌi mwaanie mo Haꞌatolanga a Mosis ngeena. Uure aana maholo nou holaꞌi oodoiꞌomu, ikolu taꞌa-taꞌa mei sae mola na omu kaꞌa dau aaelasie ike nga mei ola aaku.

¹³ Omu saie oto uri aena mei maelaa e hite aaku, nge nou holaꞌi hule i seemiu na nou tarohaꞌinie oto Tataroha Diana huniꞌomu.

¹⁴ Oto maꞌalana mei mweringe ni sape ineu ngeena e neꞌi malaahonga huniꞌomu hunie omu ke maaleledieu wa hunie omu ke oohe aasieu, taꞌe omu kaꞌa dau urine ike. Omu tohungei tolakonieu mola oto mala nga ensel a God, na oto mala uri omu ko tolakonie a Jisas Kraes maraana.

¹⁵ Aana maholona, omu ko ile-ilenimwaꞌe mola ni esuie taꞌena nga mei ola hunieu, hule aana omu ko karaꞌi aakanie mola maamiu hunie omu ke niiꞌi hunieu mala uri ke peꞌieu. ?Taꞌe nga taa nge e rau aana ilenimwaꞌenga i matolakaelu ngeena?

¹⁶ ?Uri i sulie no ko unue mo ola toꞌohuu huniꞌomu nge omu kaꞌa sare lio loꞌu takoieu, wa omu ko loꞌongaꞌinieu mala uri ineu maelonga iꞌomu?

¹⁷ Ngaeta mwala aaopa kire ko tohungei heri hunie taane hikunge peꞌiꞌomu, taꞌe hikunge ikire ngeena e kaꞌa mei ola diana ike huniꞌomu. Kire ko sare oopaꞌomu mola mwaanieu ni ngeena, hunie uri omu ke sereꞌinieu na omu ke hari hunie mola haꞌa-uusulinge ikire.

¹⁸ Ineu maraaku nou saꞌa hii aaela ike mala uri omu ko heri hunie nga mei ola diana. Aana e malisine uri leune ke toꞌohuu urine aamiu oto tarau, na e kaꞌa ilisie ike mola maholo ineu peꞌiꞌomu.

¹⁹ Taꞌe omu ke lio talamiu, maeni mwela ineu, aana nga taa kire ko haꞌa-uusuliꞌomu aana e kaꞌa diana ike. No ko tohungei sapesalu i suliꞌomu oto mala huꞌe ko sapesalu aani mwela. Na ne kei sapesalu oto urine hule aana maholo omu kei neꞌi rato oto toꞌohuu aana tolahana a Kraes.

²⁰ !Oo, maeni mwela ineu! Saeku uri ne ke iiꞌo peꞌiꞌomu oto molana. Haꞌalaa e kohi, hunie uri ne ke suꞌuri ere raramaa urine huniꞌomu, taꞌe ne ke haataꞌinie oto hiinge ineu takoiꞌomu aani erenga aani wawa oto peꞌiꞌomu. Taꞌe aana nou iiꞌo haꞌatau uurini, nou kaꞌa saie uri ne kei loꞌongaꞌi loꞌu uri taa i suliꞌomu.

A Hega Na A Sera Domana E Ro Taungei Tala

²¹ Ngaeta mo iini eemiu ko sare talamaꞌinie mo Haꞌatolanga a Mosis huni lulu i suliꞌi. ?Oto e ue? ?Uri omu sai diana aana taane tohungana loꞌongaꞌinge aana mo Haꞌatolanga ngeena?

²² Uusulana e lae i laona mo Uusu-uusu Maaꞌi uri a Ebraham e toꞌo aana e ro mwela mwane. Nga iini e hute mola aana huꞌe auꞌesu ingeie, na ngaeta iini e hute aana tohungei huꞌe oto ingeie kire toolea nana. Tohungei huꞌe ingeie e kaꞌa auꞌesu ike mala koni-konihe, taꞌe e iiꞌo luhetaꞌi mola mwaanie asunge urine.

²³ Kele mwane nge e hute aana huꞌe auꞌesu ngeena, e lodo na e hute oto mola mala ahutana mo mwela. Taꞌe iini nge e hute aana tohungei huꞌe oto a Ebraham, haꞌalaa e hute oto i sulie haiholotaꞌinge a God e asuie hunie.

²⁴ Laladonga ienini e haꞌasaikie aana e ro mei ola hai-aaopaꞌi. E ro huꞌe ngeena domana uri e ro mei heiholotaꞌinge i matolana a God na mwala ingeie. Satana huꞌe auꞌesu ngeena, a Hega, na ingeie domana mola nga haiholotaꞌinge nge a God e asuie i lengine toloi henue i Saenae aana maholo e niie mai mo Haꞌatolanga hunie a Mosis. Oto ahutana mwala ni Jiu nge kire ko lulu i sulie mo Haꞌatolanga ngeena, kire urihana mola mo mwela aana huꞌe auꞌesu ngeena, na ikire mo iinoni auꞌesu mola noꞌone.

²⁵ Kalena a Hega wau i naꞌo ngeena a Ismael, ingeie nge e aehotaa hanue kire haaraꞌinie aana Arabia. Oto leune kie sai leesie oto uri a Hega domana mola mo Haꞌatolanga, aana kire uure oto mwaanie toloi henue i Saenae wau aana hanue i Arabia. Na a Hega domana noꞌone nga nunui ola mola aana hanue paine i Jerusalem siꞌiri ni ngeena, aena aana mwala ni Jerusalem na oto ahutana mo Jiu kire mani neꞌi koni-konihe oto mola i sulie mo Haꞌatolanga a Mosis hule siꞌiri.

²⁶ Taꞌe a Sera, e urihana Jerusalem taꞌau i Lengi nge e iiꞌo luhetaꞌi mwaanie mo Haꞌatolanga ngeena, na ingeie oto domana nikana ahutana mo iini kie ko hiiwalaimoli aana haiholotaꞌinge a God. Na aena leune nge kie iiꞌo luhetaꞌi oto noꞌone mwaanie mo Haꞌatolanga.

²⁷ Na neꞌisaenga aana nge uusulana e lae i laona mo Uusu-uusu Maaꞌi uuri, O ke ile-ilenimwaꞌe mola keine, iini o amara. O kaꞌa sapesalu ike ue aani toꞌo-mwelanga, taꞌe o kei aawara taane, na o kei kana. Aena aana maꞌalana o iiꞌo maraamu aana o kaꞌa haꞌahutaa nga mwela oto i naꞌo, taꞌe o kei toꞌo mwela hiitoꞌo liutaa aana keni nge e maꞌahu peꞌie poro iꞌoe. Aesaea 54:1

²⁸ Oto ienini, maeni eesiku maaꞌi, kie urihana loꞌu a Aesak, aana kie mani hute haalu mala mo tohungei kalena God oto i sulie haiholotaꞌinge ingeie, mala kaꞌu a Aesak noꞌone e hute i sulie haiholotaꞌinge a God hunie a Ebraham.

²⁹ Aamasitoꞌo kaꞌu aana a Ismael, kalena a Ebraham nge e hute mola mala ahutana mo mwela, e talei teungeꞌinie kaꞌu a Aesak, iini nge e hute oto i sulie walana Liꞌoa Maaꞌi a God. Na kei urine loꞌu hunikie mo iini nge kie hute haalu aana Liꞌoa Maaꞌi a God, aana mo iini nge kire ko lulu i sulie mo Haꞌatolanga, kire kei tohungei teungeꞌinikie noꞌone urine.

³⁰ Taꞌe aamasitoꞌo kaꞌu aana nga taa nge mo Uusu-uusu Maaꞌi e unue loꞌu mei puri aana e unue uuri, Uusungeꞌi aasie mola huꞌe auꞌesu ngeena peꞌie a kalena. Aana kalena huꞌe auꞌesu e saꞌa toꞌo tararuru ike peꞌie kalena tohungei huꞌe aana nga mei ola aana toꞌo-toꞌolana aamana. Jenesis 21:10

³¹ Oto, maeni eesiku maaꞌi, kie saie oto uri ikie mo kalena huꞌe auꞌesu ngeena haꞌike loꞌu na mo Haꞌatolanga e saꞌa roroꞌa loꞌu hunikie. Taꞌe ikie mo kalena oto tohungana huꞌe nge e iiꞌo luhetaꞌi mwaanie mo Haꞌatolanga, na haꞌa-oodohilaka e lae oto peꞌie a God aena aana hiiwalaimolinge ikie.