Kalesia 3 - Tataroha Diana

Lulu I Sulilana Mo Haꞌatolanga E Saꞌa Haꞌa-uurie Ike Nga Iini

¹ !Iꞌomu mo mweꞌu-mweꞌule ni Kalesia! Haꞌarongolamiu e lae haadaꞌi kaꞌu taane oto i sulie maelana a Jisas i lengine poꞌu-poꞌu. ?Oto e ue omu ko si aatopuri aana? ?Ohe nga iini e siꞌohiꞌomu hunie pwaumiu ke aaela urine?

² Taꞌa-taꞌa mei ola mola nou saetoꞌo aana omu ke unue oodoieu. ?Ohe omu hele aana Liꞌoa Maaꞌi a God aani lulu i sulilana mo Haꞌatolanga a Mosis, wa aani rongolana Tataroha Diana peꞌi hiiwalaimolinge aana?

³ ?E ue ni omu si lae otoi pweu hiitoꞌo urine? Omu aehotaa kaꞌu oto mau-meuringe diana iꞌomu aana Liꞌoa a God. ?Oto uri saemiu omu ke haꞌamangoa loꞌu mola haꞌa-uurilemiu aana nanamanga iꞌomu ni iinoni maraamiu? !E aasa!

⁴ Omu tohungei sapesalu oto hiitoꞌo aana mau-meuringe iꞌomu hunie a Kraes. ?Uri nga mo ola mwaakule mola ni ngeena? !Nou hiiwalaimoli uri haꞌike!

⁵ ?Uri a God e niie Liꞌoa huniꞌomu na ko esuie mo huꞌi-huꞌite i matolamiu aena aana omu tola i sulie mo Haꞌatolanga a Mosis, wa aena aana omu rongoa Tataroha Diana na omu hiiwalaimoli aana?

⁶ Uure oto wau i naꞌo Uusu-uusu Maaꞌi e unue uuri, A Ebraham e hiiwalaimoli aana God, na aena urinena nge e neꞌi iinoni oodotaꞌi i maana a God. Jenesis 15:6

⁷ Oto e malisine omu ke sai diana aana uri mwala nge kire hiiwalaimoli, ikire oto mo tohungei kalena Ebraham.

⁸ Oto wau i naꞌo, mo Uusu-uusu Maaꞌi e holaꞌi ere taane oto i sulie uri a God kei haꞌa-oodohie mo Aapoloa Aaopa aani hiiwalaimolinge. Aena mei olana nge a Ebraham e holaꞌi rongoa oto aana Tataroha Diana uuri, A God kei da hunie komu iꞌoe ke haꞌadianaꞌaa ahutana mwala ni welumalau i tehulaꞌamu. Jenesis 12:3

⁹ Aena urine nge a God ko si haꞌadianaꞌaa mo iini nge kire hiiwalaimoli aana, mala e haꞌadianaꞌaa kaꞌu a Ebraham aana e hiiwalaimoli.

¹⁰ Taꞌe mo iini nge kire ko norue oto mola lulu i sulilana mo Haꞌatolanga a Mosis huni haꞌa-oodohilada, nge a God kei leire. Aana mo Uusu-uusu Maaꞌi e unue uuri, taꞌena nga iini nge e kaꞌa tola i sulie ahutana mo ola nge uusuleni e lae i laona Puke ni Haꞌatolanga ienini, nge leilana kei lae. Diutronomi 27:26 Na e aasa hunie nga iini kei tola i sulie ahutana mo Haꞌatolanga taꞌingelu.

¹¹ Oto loꞌu, e matapwa taane uri nga iini haꞌa-oodohilana e kaꞌa lae-lae ike i naꞌona a God i tehulaꞌana lulu i sulilana mo Haꞌatolanga, aena aana mo Uusu-uusu Maaꞌi e unue noꞌone uuri, Iinoni e oodotaꞌi i maana God i tehulaꞌana hiiwalaimolinge, nge haꞌalaa kei meuri huu. Habakuk 2:4

¹² Na Haꞌatolanga a Mosis mei ola aana hiiwalaimolinge haꞌike, taꞌe ola mola aana asunge, aana e unue uuri, Iinoni nge ko sare toꞌo aana maurihe huu haahie tola i sulilana mo Haꞌatolanga ienini, nge ke dau oto i sulie ahuteni haꞌalaa. Levitikas 18:5

¹³ Taꞌe mo Haꞌatolanga a Mosis ko uesie mo iini kire kaꞌa dau i suliꞌi. Aamasitoꞌo kaꞌu aana Uusu-uusu Maaꞌi nge e unue uuri, A God ko uesie taꞌena nga iini nge kire ko aaroroa i lengine nga ai.Diutronomi 21:23 Oto mei olana nge e rau aana a Jisas honotaka, na aena leune nge uesinge aana mo Haꞌatolanga e lae hunie a Jisas. Taꞌe aena leune noꞌone a Jisas e haꞌa-uurikie mwaanie uesinge aana iiꞌonga loꞌu i mamalutana mo Haꞌatolanga.

¹⁴ A Kraes e asuie leune urine, hunie uri mo Aapoloa Aaopa noꞌone ke hele aana nga taa nge a God e haiholotaꞌi huni niie nana a Ebraham. Na ko lae urine hunie mo iini kie hiiwalaimoli aana Jisas, uri kie ke hele aana Liꞌoa Maaꞌi nge a God e haiholotaꞌinie oto hunikie.

Mo Haꞌatolanga Kire Kaꞌa Oolisie Ike Haiholotaꞌinge A God

¹⁵ Maeni eesiku maaꞌi, ne ke asuie kaꞌu nga haꞌamalanga i sulie mau-meuringe siꞌiri. Mala uri nga iinoni ko heiholotaꞌi peꞌie ngaeta iinoni na uri kirerue ko ere maꞌutaꞌa oto, nga taꞌa-taꞌa iini e saꞌa heꞌi uure honosie loꞌu, wa ke sapeie loꞌu aana nga mo erenga.

¹⁶ Na aapa hatarie hiiwalaimolinge e urine noꞌone, aana a God e unue mo heiholotaꞌinge ngeena hunie a Ebraham peꞌie a weuwana.Jenesis 13:15 Oto, omu ke loꞌo-loꞌongaꞌi kohi i sulie leune aena aana Uusu-uusu Maaꞌi e kaꞌa unue ike “peꞌie mo weuwana” hunie ke rongo mala mo iini hunge aana mo iini kire uure mwaanie komu a Ebraham, taꞌe e unue mola “peꞌie a weuwana.” Oto e rongo mala ko ere liutaa mola i sulie e taꞌa-taꞌa iinoni, na iinine oto a Kraes.

¹⁷ Oto nga taa nou sasare unue uri holaꞌinaꞌo a God e asuie nga haiholotaꞌinge maꞌutaꞌa peꞌie a Ebraham, na e hai tangalau peꞌie e oolu aawalai helisi loꞌu mola mai puri, na mo Haꞌatolanga a Mosis ko taꞌelaꞌi oto. Oto mo Haꞌatolanga nge kire si lae mola mai puri urine, kire saꞌa roroꞌa oolisie ike haiholotaꞌinge a God peꞌie a Ebraham, wa ke waelie nga mei ola aana.

¹⁸ Na e toꞌohuu oto, aana mala uri kie kei lae oto mola i sulie Haꞌatolanga huni hele aana nga taa nge a God e niie mai hunie a Ebraham, nge e lio mala uri e saꞌa lae oto i sulie haiholotaꞌinge eena. Taꞌe e saꞌa mwadaꞌu ike urine, aena aana a God e tohungei nii mwaakule mola aana haꞌadianaꞌanga ingeie hunie a Ebraham aena aana e asuie haiholotaꞌinge oto peꞌie.

Mo Haꞌatolanga Kire Uure Huni Toolekie I Saana A Jisas

¹⁹ ?Oto nga taa kaꞌu mo Haꞌatolanga e uure hunie? A God e niie loꞌu mei mo Haꞌatolanga ngeena uri huni haataꞌi diana aana loꞌu takalonga mo iinoni. Na e loꞌongaꞌinie uri mo Haꞌatolanga ngeena kei iiꞌo kaꞌu urine lai hule aana iini nge haiholotaꞌinilana e lae kaꞌu kei lae mai. Mo Haꞌatolanga ngeena, mo ensel ni kire niiꞌi mei hunie a Mosis, na ingeie ni e haꞌa-uuresiꞌi hunie mwala aana e asu keꞌu mala ngaeta haꞌa-uureruru i matolana a God na mo iinoni.

²⁰ Taꞌe nga haꞌa-uureruru e saꞌa asu ike maholo taꞌa-taꞌa iini mola ko heiholotaꞌi, na i leune kie sai leesie aaopanga i matolana mo Haꞌatolanga nge a Mosis e haꞌa-uuresiꞌi na haiholotaꞌinge a God hunie a Ebraham, aana haiholotaꞌinge a God hunie a Ebraham ngeena, a God e asuie mola maraana.

²¹ ?Oto uri mo Haꞌatolanga e uure honosie mo heiholotaꞌinge a God? !Haꞌike! Aana mala uri a God ke niie mai nga haꞌatolanga nge e sai niie maurihe huu, nge taꞌena nga iini ko tola i sulie haꞌatolanga ngeena kei neꞌi iinoni oodotaꞌi oto peꞌie a God eena.

²² Taꞌe e kaꞌa urine ike, aena aana mo Uusu-uusu Maaꞌi e unue uri oorahaꞌaa e roroꞌie ahutana mwala aana walumalau. Oto aena urinena nga tala loꞌu hunie kie ke helesie mo heiholotaꞌinge a God haꞌike loꞌu, taꞌe hiiwalaimolinge aana a Jisas Kraes oto haꞌalaa.

²³ Taꞌe maholo kie kaꞌa hiiwalaimoli ike ue, nge mo Haꞌatolanga e uure aꞌailaꞌa oto hiitoꞌo honosikie, na kie iiꞌo mola i mamaluteni lae mai hule aana maholo a God e haataꞌinie tala ni hiiwalaimolinge aana a Jisas.

²⁴ Na aena urine nge mo Haꞌatolanga kire liu honosikie lai hule aana a Kraes e lae mai hunie haꞌa-oodohilaka peꞌie a God aani hiiwalaimolinge aana.

²⁵ Taꞌe ienini, tolaha ni hiiwalaimolinge e hule mone oto, nge mo Haꞌatolanga kaꞌa liu honosikie loꞌu.

Kie Mani Neꞌi Kalena God Mola Aena Aana Kie Hiiwalaimoli Oto Aana A Jisas

²⁶ Oto omu meni neꞌi kalena a God oto aana omu lado peꞌie a Jisas Kraes aena aana omu hiiwalaimoli aana.

²⁷ Aana ahutemiu nge omu lado toꞌohuu peꞌie a Kraes aana loto-maaꞌinge, nge omu toꞌo aana noꞌone mau-meuringe a Kraes i lalo aamiu.

²⁸ Oto nga mei ola hunie ke aaopa i matolamiu mo Jiu na mo Aapoloa Aaopa haꞌike loꞌu, wa i matolana mo koni-konihe na mo aalaha, wa i matolana mo mwane na mo keni. Omu meni neꞌie oto e taꞌa-taꞌa iinoni i lalo aana a Kraes Jisas.

²⁹ Oto mala uri iꞌomu mo iinoni a Kraes, nge omu neꞌie oto mo kalena Ebraham eena, na omu kei haro hele aana maurihe nge a God e haiholotaꞌi huni niie nana Ebraham.