Kalesia 1 - Tataroha Diana

Mei Wala Ni Saediananga Hunie Mo Kalesia

^1-2 Saediananga mwaanieu a Pol Hurulaꞌaa huniꞌomu mo iini aana mo soihaadaꞌinge wau aana poꞌo ni henue i Kalesia. A Jisas Kraes na a God Aamaka, kirerue soieu uri hunie ne ke neꞌi hurulaꞌaa, na soileku e kaꞌa lae ike mola aani iinoni wa mwaanie nga pulitaa ni iinoni. !Haꞌike! A God nge e taꞌea a Jisas Kraes aalihoꞌi mwaanie maenga ni e asuie leune urine hunieu. Ahutameelu mo mwaasine aana hiiwalaimolinge mai leu, melu ko niie saediananga iꞌemeelu huniꞌomu,

³ na melu ko eitanaie a God Aamaka na Aalaha ikie a Jisas Kraes uri hahuꞌana manata-diananga na hanuelamanga ingeie ke iiꞌo peꞌiꞌomu.

⁴ Mala a God Aamaka e saetoꞌo aana, a Kraes e toliꞌaasie maraana uri hunie ke mae huni taꞌaasie mo oorahaꞌaa ikie, na hunie ke haꞌa-uurikie hunie kie ke iiꞌo luhetaꞌi mwaanie tolaha tataꞌala ni welumalau.

⁵ Aena urine, kie ke soi haꞌamanikuluꞌaa God taraureꞌi na oto di. Iau, ke urine oto.

Nga Tala Aaopa Huni Lae I Saana God Haꞌike Loꞌu

⁶ No ko tohungei pangataꞌi aana omu tolana toliꞌaasie oto a God, iini e soiꞌomu aana manata-diananga a Kraes huni neꞌi iinoni ingeie. Taꞌe ie omu toliꞌaasie oto, na omu ko eeliꞌu loꞌu mola huni rongo i sulie ngaeta taungei tataroha diana aaopa.

⁷ Taꞌe tataroha diana aaopa ngeena, nge pweai ola mola ni ngeena. Nou saie mola uri nga mwala ni mola kire ko sare huꞌisie Tataroha Diana a Kraes, na kire ko haꞌataipuꞌo-poꞌuꞌomu mola aana haꞌa-uusulinge takalo ikire.

⁸ Taꞌe mala uri nga iini, wa maꞌalana uri iꞌemeelu, wa nga ensel uure taꞌau i Lengi ko tarohaꞌinie loꞌu nga tataroha diana aaopa mwaanie iini nge melu tarohaꞌinie kaꞌu oto huniꞌomu, nge e malisine lei-maesilana ke lae aana dunge ni haꞌamotaahinge.

⁹ Oto mala melu unue kaꞌu, na no ko heꞌi unue loꞌu uri mala nga iini ko tarohaꞌinie nga mei tataroha diana aaopa loꞌu mwaanie nga taa omu hiiwalaimoli oto aana, e malisine lei-maesilana ke lae aana dunge ni haꞌamotaahinge.

¹⁰ ?Uri no ko ere urine aana no ko sare da mola mwala ke saetoꞌo aaku? ?Wa ohe omu loꞌongaꞌinie uri no ko sare haꞌasaedianaꞌaa mola mo iinoni? !Haꞌike oto ooꞌoo! Mala uri no ko sare haꞌasaedianaꞌaa mola mo iinoni, nge e tohungei aasa hunie ne kei neꞌi mwane auꞌesu nana a Kraes. Taꞌe ineu, no ko sare haꞌasaedianaꞌaa mola a God.

Haꞌa-uusulinge A Pol E Toꞌohuu Aana A God Oto E Lio Hilisie Hunie Ke Neꞌi Hurulaꞌaa

¹¹ Maeni eesiku maaꞌi, nou saetoꞌo aana omu ke sai diana aana uri Tataroha Diana nge no ko taro-tarohaꞌinie ienini e kaꞌa uure ike mola mwaanie mo iinoni.

¹² Nou kaꞌa rongoa ike mwaanie nga iinoni wa uri nga iinoni ke haꞌa-uusulieu aana. A Jisas Kraes oto maraana ni e haataꞌinie aaku.

¹³ Omu rongoa kaꞌu oto tolahaku i naꞌo aana maholo nou lae-lae i sulie tolahana mo Jiu. Na aena aana nou tohungei saetoꞌo aana haꞌa-uusulinge mo Jiu, nge nou tohungei leledie ahutana mo haꞌa-uusulinge aaopa. Oto liutaa, nou tohungei sereꞌinie haꞌa-uusulinge a Jisas, na nou lae peꞌie taungeꞌinilana soihaadaꞌinge a God oto hiitoꞌo, na nou eriꞌapasie ohoilana.

¹⁴ Nou esu aꞌailaꞌa oto hiitoꞌo noꞌone aani lulu i sulilana tolahana mo weuwameelu mo Jiu oto i naꞌo, oto hule aana nou esu diana loꞌu mola liutaa aana mo iini aana pwaunge ineu.

¹⁵ !Taꞌe lae-lae, a God e oolisie manataku! Aana manata-diananga a God e paine hunieu, na aana ko ilenimwaꞌe ni esuie urine, nge uure oto aana maholo na nou kaꞌa hute ue, taꞌe a God e oopaau oto huni esu nana.

¹⁶ Oto e haataꞌinie a Kalena kaꞌu hunieu, hunie mauringe ineu ke tarohaꞌinie Tataroha Diana ingeie hunie mo Aapoloa Aaopa. Na maholo a God e soieu urine, ingeie maraana e niie walana hunieu hunie ne ke tarohaꞌinie, na nou kaꞌa toolea ike loꞌu nga mo haꞌananaunge mwaanie nga iinoni.

¹⁷ Nou kaꞌa lae ike noꞌone loꞌu taꞌau i Jerusalem huni leesie mo iini nge kire neꞌi hurulaꞌaa oto wau i naꞌoku. !Haꞌike! Nou oodo oto mola hunie poꞌo ni henue i Arabia. Oto loꞌu mei puri nge nou si eelihoꞌi hunie huilume i Damaskas.

¹⁸ Oto e oolu helisi e saro mango i purine nou eeliꞌu huni lae i sulie a Jisas, nge nou si lae hunie i Jerusalem huni leesie a Pita, na nou iiꞌo peꞌie mola hunie aawalai hei dinge mwana lime.

¹⁹ Nou kaꞌa leesie ike loꞌu ngaeta mo hurulaꞌaa, taꞌe a Jemes aasine a Aalaha mola nou leesie.

²⁰ !E toꞌohuu oto mala i Lengi! !Nou kaꞌa eero ike!

²¹ Oto purine maholona, nou lae iiꞌo haꞌatau loꞌu mwaanie mo hurulaꞌaa i Jerusalem aana nou lae hunie mo poꞌo ni henue i Siria na i Silisia.

²² Aana maholona, mwala aana mo soihaadaꞌinge i Jiudia kire kaꞌa manataꞌinieu ike ue.

²³ Kire ko si rongoa mola uuri, “Iini nge e taungeꞌinikie kaꞌu, ko tarohaꞌinie loꞌu Tataroha Diana nge e ariꞌapasie kaꞌu ke ohoie.”

²⁴ Na kire ko si soi haꞌamanikuluꞌaa God haahie nga taa nge e asuie aaku aana e huꞌisie tolahaku urine.