Tataroha Diana I Sulie A Jisas Kraes Nge A Jon E Uusue 7 - Tataroha Diana

Mo Eesine A Jisas Kire Kaꞌa Hiiwalaimoli Ike Aana

¹ Oto purihaꞌana walu ola ienini, a Jisas e si lae-lae hailiu mola i laona poꞌo ni henue i Kalili. E kaꞌa sare lae hailiu ike i laona poꞌo ni henue i Jiudia aena aana mo Jiu taꞌau kire ko eriꞌapasie kire ke horo maesie.

² Maholona na ko karaꞌinie oto mo dinge paine ikire mo Jiu huni deu i sulie Houlaa Ni Aapa-aapa.

³ Oto mo mwane aasine a Jisas kire mani hute, kire ko teꞌuri hunie, “O ke lae oto mwaanie i leu, na o ke lae taꞌau hunie poꞌo ni henue paine i Jiudia uri hunie mo pwaarongoisuli iꞌoe kire ke leesie oto mo huꞌi-huꞌite nge o ko esuiꞌi ngeena.

⁴ Nga iini kaꞌa mumumunie ike nga taa ko esuie, mala uri saena hunie ke neꞌi mwane paine na hunie ahutana mwala ke sai diana aana. Oto aana o ko sare asuie mo ola ngeena, o ke lae taꞌau i uure haadaꞌi i naꞌona walumalau.”

⁵ Mo eesine a Jisas kire ere urine, aena aana ikire na kire kaꞌa hiiwalaimoli ike noꞌone aana.

⁶ Oto a Jisas ko teꞌuri hunire, “Pongiku e kaꞌa hule ue, taꞌe iꞌomu, omu ke lae mola aena aana taꞌena nga maholo e diana mola huniꞌomu.

⁷ Mwala aana walumalau ie kire saꞌa maalelediꞌomu ike, taꞌe ineu ni kire ko maaleledieu, aena aana no ko lae peꞌi unu haataꞌinie uri nga taa kire ko esuie e aaela.

⁸ Iꞌomu, omu ke lae mola taꞌau aana Houlaa Ni Aapa-aapa ngeena. Ineu, nou saꞌa lae ike ue taꞌau aana houlaa ngeena, na e kaꞌa hule ue aana maholo ineu.”

⁹ A Jisas e ere urine mango, oto e si oore mola hao aana poꞌo ni henue i Kalili.

A Jisas E Haꞌa-uusulie Mwala Aana Maholo Houlaa Ni Aapa-aapa

¹⁰ Oto i purine mo mwane aasine kire lae mango taꞌau i Jerusalem aana houlaa, nge a Jisas ko si lae loꞌu i sulire. Taꞌe e kaꞌa sare lae haadaꞌi ike hunie mwala ke leesie.

¹¹ Oto mo naꞌohai mwane mo Jiu taꞌau i Jerusalem, kire ko hei-heitalea peꞌi dolosinge hailiu uuri, “?A mwaena ni i tei?”

¹² Mwala oto hunge ikire taꞌau i leune, na mo iini hunge aada ko talei kele sasawaru taane hailiu hunire i sulie a Jisas uuri, “Ingeie mwane diana ni ngeena.” Ngaeta mwala kire ko ere oolisire uuri, “Haꞌike, aana ko eeroa mola mwala.”

¹³ Taꞌe nga iini aada e kaꞌa sare ere haadaꞌi loꞌu, aena aana kire ko meni meꞌuteꞌinie mola mo naꞌohai mwane ikire.

¹⁴ Maholo ko hule oto i denumana e hiu hei dinge aana houlaa ngeena, nge a Jisas e si hanetaa taꞌau i laona lolata aana Nume Maaꞌi Peine na ko aehota haꞌa-uusulie oto mwala i leune.

¹⁵ Mo naꞌohai mwane mo Jiu ngeena kire ko tohungei pangataꞌi aana kire ko rongoa mo haꞌa-uusulinge a Jisas. Oto kire ko teꞌuri, “A mwane ie nga iini e kaꞌa haꞌa-uusulie ike. ?Oto e sai diana aana walu ola ienini kaꞌu uri taa?”

¹⁶ Oto a Jisas e aalamire ko teꞌuri, “Mo ola no ko haꞌa-uusuli eeni ie, kaꞌa mo ola ike tohuku. Haꞌa-uusulinge ineu e uure mai mwaanie a God, iini e uusungeꞌinieu mei.

¹⁷ Mala nga iini ko neꞌisae mouteꞌi huni deu i sulie saena God, nge haꞌalaa ke si lio saie haꞌa-uusulinge ineu. Na ke si saie uri ohe e uure mai mwaanie a God wa ohe e uure mola mwaanie mo loꞌongaꞌinge ineu maraaku.

¹⁸ Aana iinoni nge ko ere mola tohune, ingeie ngeena ko loꞌohie mola haꞌapainaꞌalana maraana ni ngeena. Taꞌe a tei nge ko sare haꞌapainaꞌaa iini e uusungeꞌinieu mei, nge iini urine ko ere toꞌohuu na nga mei eeronga haꞌike loꞌu aana.

¹⁹ A Mosis e niie kaꞌu oto mo Haꞌatolanga huniꞌomu, taꞌe nga taꞌa-taꞌa iini eemiu e kaꞌa lulu i suliꞌi ike. ?Oto e ue kaꞌu omu ko si eriꞌapasie uri omu ke horo maesieu?”

²⁰ Oto mwala e loko ngeena kire ko aalamie a Jisas uuri, “!Mwae! !O ko tohungei pweu! ?Kira tei ni ko sare horoꞌiꞌo? !Saꞌa mola, liꞌoa aaela oto aamu!”

²¹ A Jisas e aalamire oto ko teꞌuri, “Taꞌa-taꞌa mei ola kaꞌu nou esuie aana Dinge Maaꞌi ikie mo Jiu aana nou haꞌa-uurie mwane e toꞌu ngeena, taꞌe omu ko si meni upwesieu mola.

²² Taꞌe iꞌomu noꞌone omu sai esu mola aana mo Dinge Maaꞌi. Mo aamamiu oto wau i naꞌo kire aehotaa tolahai torihesiꞌonga, na loꞌu mei puri a Mosis e si haꞌa-uuresie loꞌu haꞌatolanga i sulie torihesiꞌonga ngeena. Oto aana omu ko sare tola i sulie mo Haꞌatolanga a Mosis, maꞌalana tohungei maholo hunie torihesiꞌonga e hule aana nga Dinge Maaꞌi, taꞌe iꞌomu, omu ko lae peꞌi esuie mola torihesiꞌonga ngeena.

²³ Oto maꞌalana Dinge Maaꞌi, taꞌe iꞌomu maraamiu, omu ko esuie torihesiꞌonga aana hai dingena hunie kele mwela mwane ngeena ke diana i sulie Haꞌatolanga a Mosis. ?Oto e ue kaꞌu omu ko si saewasulieu haahie haꞌa-uuringe nou esuie hunie ahutana sapena ngaeta mwane ke diana aana Dinge Maaꞌi?

²⁴ Mwaanie omu lei-leie taꞌena nga mei ola mola i sulie liotana, taꞌe omu ke lei oto i sulie nga taa e toꞌohuu.”

Mwala Hunge Ko Unue Ohe A Jisas Ingeie A Kraes, Taꞌe Mo Naꞌohai Mwane Kire Sereꞌinie

²⁵ Oto nga mo iini aana mwala ni Jerusalem ko teꞌuri, “Mwane nge mo rato ko eriꞌapasie uri kire ke horo maesie ni oto ie.

²⁶ !Taꞌe lio kaꞌu! Ko ere-ere oto nana mwala, taꞌe mo rato ngeena kaꞌa si unu-unue nga mei ola aana. ?Mwaanie ohe kire ko loꞌo-loꞌongaꞌinie uri a mwane ngeena ni oto a Kraes?

²⁷ Taꞌe maholo a Kraes kei lae mai, nga taꞌa-taꞌa iini e saꞌa saie ike uri e uure i tei. A mwane ngeena kolu meni saie kaꞌu mola hanue ingeie.”

²⁸ Oto a Jisas ko si ere paine maholo ko haꞌa-uusuli taꞌau i laona lolata aana Nume Maaꞌi Peine, “Iau, omu saieu, na omu saie taane leu nou uure aana. Taꞌe nou kaꞌa lae ike mola mai tohuku, na omu kaꞌa saie ike iini nge e uusungeꞌinieu mei, na ingeie e kaꞌa sai eero ike.

²⁹ Ineu haꞌalaa nou manataꞌinie, aena aana nou uure oto mwaanie na ingeie e uusungeꞌinieu mei.”

³⁰ Oto kire ko si eriꞌapasie uri kire ke tapolie, taꞌe e aasa mola, aena aana e kaꞌa hule ue aana maholo hunie ke mae.

³¹ Taꞌe mo iini hunge aana mwala ngeena kire hiiwalaimoli aana Jisas, na kire ko dodolosi aada hailiu uuri, “?Maholo a Kraes kei lae mai, uri kei esuie nga mo tolimaa hunge liutaa aana mo iini a mwane ie ko esuiꞌine?”

³² Oto mo Parise kire rongoa mwala ko kele sasawarungeꞌinie walu olana i sulie a Jisas, oto ikire na mo naꞌohai pris kire ko si uusungeꞌinie mo ramo kakakali aana Nume Maaꞌi Peine huni lae i tapolie a Jisas.

³³ Oto a Jisas ko teꞌuri hunire, “No ko kele iiꞌo oꞌoruꞌe mola peꞌiꞌomu, na no ko lae oto loꞌu i saana iini e uusungeꞌinieu mei.

³⁴ Omu kei loꞌohieu, taꞌe omu saꞌa lio oodoieu ike, aena aana omu saꞌa lae ike i hule aana leu ne kei lai iiꞌo aana.”

³⁵ Oto mo naꞌohai mwane mo Jiu kire ko lae peꞌi ere-ere maraada uuri, “?A mwane ie kei lae i tei ni uri kolu saꞌa lio oodoie loꞌu? ?Mwaanie ohe kei lae i saana mwala ikolu aana mo poꞌo ni henue mo Krik, wa ohe kei lae huni haꞌa-uusulie mo Aapoloa Aaopa?

³⁶ Aana e unue uri kolu kei loꞌohie taꞌe kolu saꞌa lio oodoie ike, na uri kolu saꞌa lae ike i hule aana leu kei lai iiꞌo aana. ?Nga mei taa ni e ere urine aana?”

³⁷ Oto aana dinge ooreta, nge e neꞌi dinge paine oto liutaa aana houlaa ngeena, a Jisas e uure, oto ko ere paine uuri, “Mala uri nga iini ko maarou, nge ke lae mai seeku hunie ke inu.

³⁸ Mala oto mo Uusu-uusu Maaꞌi e unue uri Iini ko hiiwalaimoli eeku, nge huulaa aani wei nge ko niie maurihe kei hureꞌitaa mai mwaanie saena.”

³⁹ Maholo a Jisas e ere urine, e ere rarangana Liꞌoa Maaꞌi a God nge kei iiꞌo i lalo aana mo iini kire ko hiiwalaimoli aana. Aana maholona niilana Liꞌoa Maaꞌi e kaꞌa lae ike ue, aena aana haꞌamanikuluꞌalana a Jisas e kaꞌa lae ike noꞌone ue.

⁴⁰ Oto maholo mwala ngeena kire rongoa ko ere urine, ngaeta mo iini aada kire ko si teꞌuri, “A mwane ie ni oto propet paine nge kolu ko maa-maaꞌoohiena.”

⁴¹ Ngaeta mo iini loꞌu kire ko unue uuri, “Ingeie ni oto a Kraes.” Taꞌe ngaeta mo iini kire ko unue mola uuri, “?Uri a Kraes kei lae mai uure i Kalili? !Haꞌike!

⁴² Aana mo Uusu-uusu Maaꞌi e unue uri a Kraes kei uure oto aana komu a Deved Inemauri, na kei hute oto i Betlehem, aana huilume nge a Deved Inemauri e oꞌoꞌo aana.”

⁴³ Oto mwala ngeena kire ko si oopa i tehulaꞌana Jisas. Nga mo iini ko ere haꞌadianaꞌaa, taꞌe nga mo iini ko ere aaelasie mola.

⁴⁴ Nga mo iini aada ko sare tapolie oto a Jisas, taꞌe nga iini kaꞌa tari mwadaꞌu ike aana.

⁴⁵ Maholo mo ramo kakakali kire aalihoꞌi taꞌau i saana mo naꞌohai pris na mo Parise, oto kire ko dolosi aada uuri, “?E ue omu kaꞌa toolea oto poi a Jisas?”

⁴⁶ Oto kire ko aalamire uuri, “!Nga iinoni hunie ke ere ni saenanaunge loꞌu mala a mwaena, haꞌike oto ooꞌoo!”

⁴⁷ Oto mo Parise ko aalamire uuri, “?Mwaanie ohe a mwaena e pweloꞌomu noꞌone mola?

⁴⁸ ?Uri nga iini aana mo naꞌohai mwane wa mo Parise kire hiiwalaimoli aana?

⁴⁹ !Haꞌike! Taꞌe pulitaa ni iinoni reu mola kire hiiwalaimoli aana. Taꞌe ikire, kire kaꞌa saie ike nga mei ola aana mo Haꞌatolanga a Mosis, na a God ke si haꞌaloire.”

⁵⁰ Oto a Nikodimas, ngaeta mwane aana mo Parise nge e lae kaꞌu i leesie a Jisas i naꞌo, na ingeie nga iini aana mo mwane paine ngeena ko teꞌuri hunire,

⁵¹ “?Uri mo Haꞌatolanga ikie e sai toliꞌaasie hunie kie ke lei mae aana nga iinoni na kie kaꞌa holaꞌi rongo diana aana, na lio oodoie nga taa nge e dau aaelasie? Nou saie haꞌike.”

⁵² Oto kire aalamie, kire ko si teꞌuri, “?Uri iꞌoe noꞌone o uure i Kalili? O ke lio diana aana kaꞌu mo Uusu-uusu Maaꞌi, na o ke leesie nga taꞌa-taꞌa propet e kaꞌa lae ike mai uure mwaanie i Kalili.”

⁵³ Oto kire mani taꞌelaꞌi, kire ko si eelihoꞌi takoie mo nume ikire.