Tataroha Diana I Sulie A Jisas Kraes Nge A Jon E Uusue 3 - Tataroha Diana

A Nikodimas E Lae Mai Saana Jisas

¹ Oto ngaeta naꞌohai mwane haahie mo Jiu nge satana a Nikodimas, na ingeie noꞌone aana pulitaa mo Parise,

² e lae mai saana Jisas aana ngaeta hai rodo, oto ko teꞌuri, “Haꞌa-uusuli, melu leesie tolimaa aana mo huꞌi-huꞌite o ko esuiꞌi ngeena, na melu manataꞌinie uri iꞌoe nga haꞌa-uusuli uure oto mwaanie a God. Aana nga taꞌa-taꞌa iinoni e saꞌa roroꞌa ni esuie ike mo huꞌi-huꞌite o ko esuiꞌi ngeena, na uri a God kaꞌa peꞌie.”

³ Oto a Jisas ko aalamie ko teꞌuri, “No ko unue oto toꞌohuu huniꞌo uri nga taꞌa-taꞌa iinoni e saꞌa roroꞌa ni lio mangine Aalahanga a God na e kaꞌa hute haalu loꞌu.”

⁴ Oto a Nikodimas ko teꞌuri hunie a Jisas, “?Nge iinoni e repo oto, kei hute uri taa loꞌu? ?Uri kei sili eelihoꞌi loꞌu iiana nikana hunie ke si hute haꞌarue loꞌu?”

⁵ Oto a Jisas ko aalamie uuri, “No ko unue oto toꞌohuu huniꞌo uri mala nga iini e kaꞌa hute aani wei na loꞌu aana Liꞌoa Maaꞌi, nge e saꞌa roroꞌa ni sili ike i laona Aalahanga a God.

⁶ Iini nge e hute mola aani iinoni, nge ingeie kei toꞌo aana mauringe noꞌone mola mala iinoni. Taꞌe iini e hute aana Liꞌoa Maaꞌi a God, nge ingeie kei toꞌo aana maurihe oto mala ngaeta kalena God.

⁷ O ke suꞌuri papangataꞌi aana no ko unue huniꞌo uri omu ke haro hute haalu loꞌu haꞌalaa.

⁸ Liꞌoa Maaꞌi a God e urihana iiru nge ko ooru-ooru mola aana taꞌena nga leu i sulie saena. O ko rorongoa taane aawa-aawatana, taꞌe o kaꞌa saie ike uri e uure mai i tei, wa ko lae pwau i tei. E urine noꞌone maholo Liꞌoa Maaꞌi a God ko niie maurihe huu nana nga iini, aana o kaꞌa saie e rau uri taa, taꞌe o si saie mola uri e toꞌohuu.”

⁹ Oto a Nikodimas ko dolosi uuri, “?Haꞌalaa leune kei reu uri taa eena?”

¹⁰ A Jisas ko aalamie ko teꞌuri, “!Haꞌike eena! Iꞌoe oto haꞌa-uusuli peine i Israel. ?Oto e ue kaꞌu o kaꞌa lio saie leune?

¹¹ No ko ere toꞌohuu oto huniꞌo uri melu ko ere oto i sulie nga taa melu manataꞌinie, na melu ko unu tahangaꞌinie oto oodoiꞌomu nga taa melu leesie. Taꞌe nga iini eemiu e kaꞌa sare hiiwalaimoli ike mola aana.

¹² ?Mala uri omu kaꞌa hiiwalaimoli oto aaku aana no ko ere i sulie mo ola ko reu-reu mei aano i leu, omu ke si hiiwalaimoli eeku uri taa eena aana uri ne kei ere i sulie mo ola ko reu taꞌau i Lengi?

¹³ Aana nga taꞌa-taꞌa iini aaopa loꞌu e kaꞌa lae ike ue taꞌau i Lengi hunie ke haꞌarongoꞌomu aana, mwaanieu a Kale Ni Iinoni nge nou uure taꞌau i Lengi.

¹⁴ “Oto i naꞌo maholo mo mwaa ala-ala oto hunge kire ko alaie mo Israel i laona hanuesala, a God e unue hunie a Mosis ke asuie mwaa aana bras hunie ke taꞌea i lengi peꞌie hai ei. Oto taꞌena nga iini ko lio takoie, nge haꞌa-uurilana ko lae oto. Nge e urine noꞌone aana ineu a Kale Ni Iinoni, kire kei taꞌeau i lengi peꞌie hai ei,

¹⁵ uri hunie taꞌena nga iini ko hiiwalaimoli eeku kei helesie maurihe huu.”

A Kalena God E Lae Mai Huni Haꞌa-uurie Walumalau

¹⁶ A God e tohungei manata diana hunie walumalau, hule aana e uusungeꞌinie taꞌa-taꞌa mwela mouteꞌi ingeie ke mae oalana, hunie taꞌena nga iini ko hiiwalaimoli aana ke suꞌuri eiꞌaa, taꞌe ke helesie maurihe huu i tehulaꞌana.

¹⁷ Aana a God e kaꞌa uusungeꞌinie ike a Kalena i laona walumalau hunie ke leie walumalau, taꞌe hunie haꞌa-uurilana walumalau ke lae aana.

¹⁸ A tei nge ko hiiwalaimoli aana a Kale, leilana e saꞌa lae ike. Taꞌe a tei nge e kaꞌa sare hiiwalaimoli aana, nge leilana e pwani lae oto, aena aana e kaꞌa hiiwalaimoli ike aana taꞌa-taꞌa mwela mouteꞌi a God.

¹⁹ Na leilada kei lae mola aena aana raa-raa e lae oto mai laona walumalau, taꞌe kire hari hunie mola rodohono liutaa aana raa-raa, aena aana helelada e tataꞌala.

²⁰ Mo iini helelada e tataꞌala kire tohungei leledie raa-raa, aena aana kire sereꞌinie uri haataꞌinilana mo tataꞌalanga ikire ke lae haadaꞌi.

²¹ Taꞌe iini nge helelana e diana aana ko euꞌesuie mo ola aana walaimolinge haliꞌite, nge ingeie e saetoꞌo aana raa-raa, aena aana raa-raa ko haataꞌinie uri a God ni ko peꞌie huni esuie ahutana mo esunge ingeie.

A Jon Loto Maaꞌi E Ere Haꞌapainaꞌaa Loꞌu A Jisas

²² Oto purihaꞌana, a Jisas na mo pwaarongoisuli ingeie kire si lae wau mwaanie mo huilume na kire oꞌoꞌo kaꞌu weu aana poꞌo ni henue i Jiudia i leune haꞌataulie mo huilume. Oto mwala ko si lae mai i saada, na kire ko lae peꞌi loto maaꞌi aana mwalana.

^23-24 Na aana maholona, a Herod e kaꞌa neꞌie ike ue a Jon Loto Maaꞌi i nume ni hoꞌo, taꞌe a Jon ko lae ue peꞌi loo-loto maaꞌi aana mwala i laona mo lama i Aenon karaꞌinie huilume i Salim, aena aana mo huulaa ni wei e hunge i leune. Mwala oto hunge kire ko lae oto mai saana, na e loto maaꞌi oto aada.

²⁵ Oto erenga haitapali ko aehota lae oto i matolana mo pwaarongoisuli a Jon na ngaeta mwane ni Jiu haahie mo Haꞌatolanga a Mosis i sulie haꞌahili-hilinge aani lotonga rereꞌa.

²⁶ Lae-lae, kire lae mai i saana Jon na kire ko haꞌarongoa uuri, “?Haꞌa-uusuli, o saie mwane nge e oꞌoꞌo peꞌiꞌo i reune wai i Jodan aana aapa poꞌo wau, nge o ere-ere i sulie? A mwaena ko loo-loto maaꞌi oto, na ahutana mwala ko meni lae oto i saana.”

²⁷ Oto a Jon ko aalamire uuri, “Taꞌena nga ola nga iini e toꞌo aana, e toꞌo aana mola aena aana a God taꞌau i Lengi e niie nana. Oto nou saꞌa saehanalie ike asunge a porona, wa ne ke upwesie mwala nge kire ko lae oto i saana.

²⁸ Iꞌomu maraamiu omu rongoa kaꞌu oto aana nou unue uri Ineu a Kraes haꞌike, taꞌe ineu iini a God e uusungeꞌinieu mola huni deu aakau aana tala loosie a Kraes ni ie.

²⁹ Maholo haꞌarurunge ko lae, a poro haalu oto iini nge ko toꞌo keni. Taꞌe tohungei malahune poro haalu ngeena nge e naꞌona laeha hunie tola-keninge, ingeie ko si ilenimwaꞌe mola haahie haꞌarurunge a poro haalu ngeena. Oto ineu domana malahune poro haalu ngeena, na ilenimwaꞌenga ineu ko lae mola mai oa urine.

³⁰ Ingeie ke pai-peine oto, na ineu ne ke mwai-mwei oto.”

A Kraes E Paine Oto Liutaa Aana E Lae Mai Uure Taꞌau I Lengi

³¹ Iini nge e lae mai uure taꞌau i Lengi, ingeie oto e paine liutaa aana ahutana mwala. Iini nge e uure mola mai mwaanie walumalau mai aano i leu, iini oto mai aano eena aana walumalau, na ko ere-ere mola i sulie walu ola ko reu-reu mai aano aana walumalau ie. Taꞌe iini nge e lae mai uure taꞌau i Lengi, ingeie oto e paine haahie ahutada mango.

³² E uure taꞌau i Lengi na ko unu-unu tahangaꞌinie mo ola e leesiꞌi na e rongoꞌi, taꞌe tootaꞌi iini mola kire hiiwalaimoli loꞌu aana walana.

³³ Taꞌe mo iini nge kire ko hiiwalaimoli aana walana, kire haataꞌinie uri kire hiiwalaimoli aana nga taa a God e unue e tohungei toꞌohuu.

³⁴ Aana iini nge a God e uusungeꞌinie mai uure taꞌau i Lengi ngeena ko unu-unue walana God oto tarau, aena aana a God e nii taꞌingelu aana Liꞌoa Maaꞌi ingeie oto hunie.

³⁵ A Mamaꞌa e manata diana hunie a Kalena, na e niie ahutana walu ola mango oto i laona nimana huni lio i suliꞌi.

³⁶ Oto iini ko hiiwalaimoli aana a Kale e hele aana oto maurihe huu eena. Taꞌe iini nge e kaꞌa hiiwalaimoli ike aana a Kale, e saꞌa roroꞌa ni hele aana oto maurihe ngeena, taꞌe kei iiꞌo huu oto i mamalutana saewasunge a God.