Tataroha Diana I Sulie A Jisas Kraes Nge A Jon E Uusue 21 - Tataroha Diana

Mo Pwaarongoisuli Kire Heꞌi Leesie Loꞌu A Jisas I Reune Aasi I Kalili

¹ Ngaeta maholo loꞌu i puri, a Jisas e haataꞌi loꞌu maraana hunie mo pwaarongoisuli ingeie wau i reune Aasi I Kalili, na laladonga aana e lae uuri.

² A Saemon Pita, na a Tomas (nge ingeie ngaeta iini aana e ro iu), na a Nataniel (iini e uure aana huilume i Kena aana poꞌo ni henue i Kalili), na e ro kalena Sebedi, na ngaeta ro pwaarongoisuli loꞌu a Jisas, kire mani loko.

³ Oto a Saemon Pita ko teꞌuri hunire, “Ne kei lae oto i weesi eena.” Oto kire ko unue hunie uuri, “Oo, kolu kei meni lae oto.” Oto kire mani lae oto aana iiola, taꞌe aana hai rodona kire kaꞌa saunie ike nga ho iiꞌe.

⁴ Maholo na sato ko pwaa oto aana e dangi hoꞌowa, a Jisas e uure hao i oone, taꞌe mo pwaarongoisuli kaꞌa saie ike uri ingeie a Jisas.

⁵ Oto ko dolosi aada uuri, “?E ue eena mo saanau, omu weesi taane?” Kire aalamie uuri, “!Haꞌike oto ooꞌoo!”

⁶ Oto a Jisas ko unue hunire uuri, “Omu ke aatongie loꞌu huꞌo iꞌomu i eesi aana rau iiola i pwalo-pwalo na omu kei weesi oto.” Oto kire aatongie loꞌu huꞌo na kire kaꞌa saie oto uri kire kei weꞌi eelihoꞌi aana uri taa, aena aana e honu oto hiitoꞌo aani iiꞌe.

⁷ Oto pwaarongoisuli nge a Jisas e manata diana hunie ngeena, ko si teꞌuri hunie a Pita, “!A Aalaha ni otona!” Maholo a Pita e rongoa uri a Aalaha ni e uure hai oone ngeena, oto ko si tolana hoꞌosie loꞌu toꞌoni tetewa e taꞌaasie kaꞌu aana ko weesi, na ko pola oto i eesi huni oolo wau i saana.

⁸ Iiola ikire ngeena e kaꞌa haꞌataulie ike i oone, ola mala lime aawalai tahanga mola. Oto mo pwaarongoisuli oana a Pita ngeena kire lae mai oone aana iiola i sulie, na kire ko weꞌinie oto huꞌo e honu aani iiꞌe.

⁹ Oto kire siho i oone na kire ko leesie dunge aani loilohi oto i leune, na ho iiꞌe i laona peꞌie nga ho bred.

¹⁰ Oto a Jisas ko teꞌuri hunire, “Omu ke toolea mai nga mo iiꞌe aana mo iiꞌe omu si huꞌoꞌi ngeena.”

¹¹ A Pita e lae, ko si lai taꞌe i laona iiola na ko weꞌinie mai huꞌo e honu aani iiꞌe paine. Kire iidumie e tangalai ho iiꞌe peꞌie e lime aawala mwana oolu, na maꞌalana kire hunge urine, taꞌe huꞌo e kaꞌa haka ike.

¹² Oto a Jisas ko si teꞌuri hunire, “Omu ke lae mai hunie ngaunge ni hoꞌowa.” Na nga taꞌa-taꞌa iini aana mo pwaarongoisuli kaꞌa neꞌisae loꞌu huni dolosi aana uuri, “?Iꞌoe a tei?” aena aana kire saie mola uri ingeie oto a Aalaha.

¹³ Oto a Jisas e lae mai da ho bred ngeena ko si haꞌa-adora aana, na mo iiꞌe oto noꞌone urine.

¹⁴ Ie oolune nga maholo a Jisas ko haataꞌi aana mo pwaarongoisuli ingeie i purine e taꞌelaꞌi mwaanie maenga.

A Jisas E Ere Haꞌasusue A Pita

¹⁵ Maholo kire ngau mango oto, nge a Jisas ko si teꞌuri hunie a Saemon Pita, “?Saemon, kalena Jon, uri o manata diana taane hunieu liutaa aana mo iini ie kire manata diana hunieu?” Oto a Pita e aalamie ko teꞌuri, “Iau, Poro paine, o saie kaꞌu oto uri nou manata diana huniꞌo.” Oto a Jisas ko si teꞌuri hunie, “O ke nii-nii ana mo kalei sipu ineu.”

¹⁶ Oto a Jisas ko ruana dolosi loꞌu aana a Pita uuri, “?Saemon, kalena Jon, uri o manata diana taane hunieu?” Oto a Pita ko aalamie uuri, “Iau, Poro paine. O saie kaꞌu oto uri nou manata diana huniꞌo.” A Jisas ko si teꞌuri hunie, “O ke lio i suli diana aana mo sipu ineu.”

¹⁷ Oto oolune nga maholo a Jisas ko heꞌi unue loꞌu hunie a Pita uuri, “?Saemon, kalena Jon, uri o manata diana taane hunieu?” Oto a Pita ko si saehuu oto hiitoꞌo aana a Jisas ko dolosi haꞌa-oolu oto aana uuri, “?O manata diana taane hunieu?” Oto e aalamie a Jisas, ko si teꞌuri, “Aalaha ineu, o manataꞌinie oto walu ola, na o saie kaꞌu oto uri nou manata diana huniꞌo.” A Jisas e aalamie oto ko si teꞌuri hunie, “O ke nii-nii ana mo sipu ineu.

¹⁸ No ko unue oto huniꞌo uri maholo o oꞌoꞌo saanau o hoꞌo-hoꞌo toꞌoni mola maraamu na o talei lae-lae oto mola i sulie saemu. Taꞌe aana maholo o kei repo oto, nga mo iini aaopa oto kei hoꞌo haahiꞌo hunie o ke hii aaela, na kire kei tooleꞌo aana leu o kaꞌa sare lae ike aana, na kire kei da o kei tahangaa e ro kiꞌimu.”

¹⁹ A Jisas e ere urine huni haataꞌinie uri kire kei horo maesie a Pita uri taa, na uri maenga ngeena kei tohungei haꞌamanikuluꞌaa oto a God. Oto a Jisas e ere mango urine, ko si teꞌuri hunie, “O ke lulu i sulieu mola.”

²⁰ A Pita e aaliꞌu na ko leesie pwaarongoisuli nge a Jisas e manata diana hunie ko lae poi puridarue. Pwaarongoisuli ngeena oto iini e eno hatarie a Jisas aana maholo kire ngau tararuru na e dolosi aana uuri, “?Poro paine, a tei ni kei pweloꞌo?”

²¹ Maholo a Pita e leesie pwaarongoisuli ngeena, oto ko dolosi aana a Jisas uuri, “?Poro paine, oto a mwane ie kei ue?”

²² A Jisas e aalamie, oto ko teꞌuri, “?Mala uri no ko saetoꞌo aana uri ke oꞌoꞌo mola hule aana ne kei ooli loꞌu mei, e ue o ko tolahiꞌe aana? Iꞌoe, o ke lulu i sulieu.”

²³ Oto mei wala ko taro i matolana mo pwaarongoisuli a Jisas uri pwaarongoisuli ngeena e saꞌa mae ike. Taꞌe a Jisas e kaꞌa unue ike uri e saꞌa mae, taꞌe e unue mola uuri, “?Mala no ko saetoꞌo aana ke oꞌoꞌo mola hule aana ne kei ooli loꞌu mei, e ue o ko tolahiꞌe aana?”

Mei Wala Ooreta

²⁴ Ineu oto pwaarongoisuli ngeena, na nou unu haꞌa-oaie walu ola ienini na nou uusuꞌi oto ie. Na kie mani manataꞌinie uri nga taa nou unue e toꞌohuu oto.

²⁵ Na mo ola hunge aaopa taane loꞌu a Jisas e asuiꞌi. Mala uri uusuleni ke lae mango laloi uusu-uusu, haꞌalaa nou loꞌongaꞌinie uri nga leu talana mo uusu-uusu ngeena haꞌike i laona ahutana walumalau.