Tataroha Diana I Sulie A Jisas Kraes Nge A Jon E Uusue 20 - Tataroha Diana

Kilipweꞌu E Pwala-pwala Oto

¹ Oto i maahuꞌo-huꞌo aana eetana nga dinge i purine Dinge Maaꞌi Mo Jiu, maholo e rorodoꞌa ue, a Meri ni Makdala e lae i saana kilipweꞌu. Maholo e lae wau i hule aana kilipweꞌu, na ko leesie hau nge kire hono-honoa kilipweꞌu aana, taꞌaasilana e lae oto.

² Oto e huru, ko lae oto i saana Saemon Pita na ngaeta pwaarongoisuli loꞌu, iini nge a Jisas e manata diana hunie. Oto ko haꞌarongorarue uuri, “Kire toolea oto rae aana Aalaha mwaanie kilipweꞌu na melu kaꞌa saie ike uri kire lai konie i tei.”

³ Oto a Pita na ngaeta pwaarongoisuli loꞌune, kirerue huru oto i saana kilipweꞌu.

⁴ Na pwaarongoisuli loꞌune e huru liutaa aana a Pita, na e holaꞌi hule oto aana kilipweꞌu.

⁵ E aongaꞌi hao i laona kilipweꞌu, na ko leesie mo sala rereꞌa kire uloa aani kire iiꞌo laku taane. Taꞌe e kaꞌa sili ike hao i laona.

⁶ Oto a Saemon Pita e hule loꞌu hao i sulie, ko sili taraꞌasi oto i laona kilipweꞌu, na ko leesie mo sala rereꞌa kire uloa aani kire iiꞌo laku taane.

⁷ Na e leesie noꞌone mei sala nge kire ereaꞌinie ahuie pwaune a Jisas. E kaꞌa iiꞌo ike peꞌie mo sala kire uloa aani, taꞌe e iiꞌo aaopa mola na lulungilana e lae oto.

⁸ Oto ngaeta pwaarongoisuli loꞌune, iini nge e holaꞌi hule aana kilipweꞌu, e heꞌi sili loꞌu hao, na e leesie walu olana, ko si hiiwalaimoli uri a Jisas e taꞌelaꞌi toꞌohuu mwaanie maenga.

⁹ Uure oto wau i naꞌo kire kaꞌa hiiwalaimoli ike aana mo Uusu-uusu Maaꞌi nge e unue uri a Kraes kei saronai taꞌelaꞌi mwaanie maenga, taꞌe aana maholona nge kire si aehota hiiwalaimoli.

¹⁰ Oto e ro pwaarongoisuli ngeena kire si eelihoꞌi takoie leu kire ko oꞌoꞌo aana.

A Jisas E Haataꞌi Aana A Meri Ni Makdala

¹¹ Taꞌe a Meri ni Makdala e uure mola poꞌoi sinaha aana kilipweꞌu, ko ngara-ngara. Maholo ko ngara-ngara ngeena, e aongaꞌi taꞌau i laona kilipweꞌu.

¹² Oto ko leesie e ro ensel kire toꞌoni rereꞌa na kire iiꞌo aana leu nge rae aana a Jisas e oꞌoꞌo aana kaꞌu, nga iini hatarie pwaulungana na ngaeta iini hatarie aaliꞌaena.

¹³ Oto kirerue ko si dolosi aana uuri, “?Keine, e ue ni o ko ngara-ngara?” A Meri e aalamirerue, oto ko teꞌuri, “Kire toolea oto aalaha ineu, na nou kaꞌa saie ike leu kire lai neꞌie aana.”

¹⁴ Maholo a Meri e ere mango urine, ko si eeliꞌu na ko leesie a Jisas e uure oto i leune, taꞌe e kaꞌa saie ike uri ingeie a Jisas.

¹⁵ Oto a Jisas ko teꞌuri hunie, “?Keine, e ue ni o ko ngara-ngara? ?A tei ni o ko heitalea?” Oto aana a Meri e loꞌongaꞌi uri ingeie mwane ko lio i sulie hohola ngeena nge kilipweꞌu e iiꞌo i laona, nge ko si teꞌuri hunie, “Poro paine, mala uri o toolea rae aana, nge o ke unue oodoieu leu o lai neꞌie aana, hunie ne ke lai toolea.”

¹⁶ Oto a Jisas e soie aana satana uuri, “!Meri!” A Meri e si eeliꞌu takoie na ko ere aana erenga mo Jiu uuri, “!Raboni!” (Loꞌongaꞌinge aana uuri, “Haꞌa-uusuli.”)

¹⁷ Oto a Jisas ko si teꞌuri hunie a Meri, “Mwaanie o hele-hele aaku urine aana nou kaꞌa tahelaꞌi ue i saana Aamaku. Taꞌe saeku o ke lae i haꞌarongoa mo pwaarongoisuli ineu uri no ko tahelaꞌi i saana Aamaku na Aamamiu, na God ineu na God iꞌomu.”

¹⁸ Oto a Meri e si lae, ko lai haꞌarongoa mo pwaarongoisuli uri e leesie oto a Aalaha na ko haꞌarongora aana mo ola a Jisas e unuꞌi hunie.

A Jisas E Haataꞌi Aana Mo Pwaarongoisuli Ingeie

¹⁹ Oto mola i seulehi aana eetana nga dinge i purine Dinge Maaꞌi Mo Jiu ngeena, mo pwaarongoisuli kire mani loko na kire hono honosire i nume, aana kire ko meꞌuteꞌinie mo naꞌohai mwane mo Jiu. Kire iiꞌo mola i nume urine na a Jisas e si lae mai uure i matolada, na ko teꞌuri, “Hanuelamanga ke iiꞌo peꞌiꞌomu.”

²⁰ E ere urine mango, ko si haataꞌinie e ro kiꞌine aada na paparaꞌana. Mo pwaarongoisuli ko tohungei ilenimwaꞌe oto liutaa aana kire leesie a Aalaha.

²¹ Oto a Jisas ko heꞌi teꞌuri loꞌu, “Hanuelamanga ke iiꞌo peꞌiꞌomu. No ko uusungeꞌiniꞌomu oto wau mala a Mamaꞌa e uusungeꞌinieu mei.”

²² Maholo e ere urine, e si mango haahire na ko unue uuri, “Omu ke helesie a Liꞌoa Maaꞌi namiu,

²³ na aana ingeie kei naꞌomiu, nge mala uri omu ko saeꞌaasi hunie mwala mo oorahaꞌaanga ikire, nge saeꞌaasileni ke si lae. Na mala uri omu kaꞌa saeꞌaasiꞌi hunire, nge saeꞌaasileni saꞌa lae ike.”

A Jisas E Haataꞌi Aana A Tomas

²⁴ Ngaeta iini hikana aawalai pwaarongoisuli mwana rue, a Tomas, nge ingeie ngaeta iini aana e ro iu, e kaꞌa iiꞌo ike peꞌire aana maholo a Jisas e lae mai saada.

²⁵ Oto mo pwaarongoisuli nge a Jisas e haataꞌi aada kire haꞌarongoa uuri, “!Melu leesie oto a Aalaha!” Taꞌe a Tomas e unue mola hunire uuri, “Mala uri nou kaꞌa leesie ike talahuliꞌana mo waraꞌo i laona kiꞌine, wa ne ke neꞌie riꞌi-riꞌiku oto i talahuliꞌeni, wa ne ke neꞌie nimeku oto i laona malaka i paparaꞌana, nou saꞌa roroꞌa ni hiiwalaimoli ike.”

²⁶ Oto wiki loꞌu i puri, mo pwaarongoisuli a Jisas e heꞌi ruru loꞌu i nume, na a Tomas noꞌone oto peꞌire. Mo maa kire hono maꞌutaꞌa loꞌu, taꞌe a Jisas e lae mola mai nume na e uure oto i matolada, ko si teꞌuri, “Hanuelamanga ke iiꞌo peꞌiꞌomu.”

²⁷ Na ko teꞌuri hunie a Tomas, “O ke toꞌomaaie mo kiꞌiku, na o ke neꞌie riꞌi-riꞌimu oto i laoni. Na o ke lae mai neꞌie nimemu i laona malaka i paparaꞌaku. O ke suꞌuri neꞌisae rue-ruaꞌa taꞌe o ke hiiwalaimoli mola.”

²⁸ Oto a Tomas e tolana aalamie a Jisas, na ko teꞌuri, “!Iꞌoe oto Aalaha ineu, na God ineu!”

²⁹ Oto a Jisas ko si teꞌuri hunie, “Iꞌoe, o hiiwalaimoli eeku mola aena aana o leesieu. Taꞌe deidehie oto liutaa mo iini e kaꞌa leesieu, taꞌe kire hiiwalaimoli.”

A Jon E Ere Luhesie Loꞌongaꞌinge Aana Uusulana Uusu-uusu Ie

³⁰ A Jisas e asuie mo huꞌi-huꞌite oto hunge i maana mo pwaarongoisuli ingeie mala mo tolimaa uri ingeie Kalena God, taꞌe uusuleni e kaꞌa lae ike i laona uusu-uusu ie.

³¹ Mo iini ie uusuleni e lae mola uri hunie omu ke hiiwalaimoli aana a Jisas uri ingeie a Kraes, Kalena God, na hunie omu ke manataꞌinie maurihe huu aani hiiwalaimolinge aana.