Tataroha Diana I Sulie A Jisas Kraes Nge A Jon E Uusue 2 - Tataroha Diana

A Jisas E Asuie Wai E Neꞌie Waen

¹ Oto loꞌu mola i purine e ro hai dinge e mango, ngaeta ngauhe aana haꞌarurunge e rau aana huilume i Kena aana poꞌo ni henue i Kalili. Nikana Jisas noꞌone i leune,

² na kire haꞌarongoa mai noꞌone a Jisas na mo pwaarongoisuli ingeie hunie ngauhe ngeena.

³ Oto i sulie tolahada, kire ko inu-inu waen aana ngauhe aana haꞌarurunge, na lae-lae waen ikire e mango oto. Oto maholo waen ikire e mango, nge nikana Jisas ko si teꞌuri hunie, “Waen e mango oto mwaanire.”

⁴ Oto a Jisas ko aalamie uuri, “?Hunie kure ke ue kaꞌu, Teite, na e kaꞌa hule ue aana maholo ineu hunie ne ke haataꞌinie manikuluhaꞌaku?”

⁵ Taꞌe a nikana e unue mola hunie mo koni-konihe uuri, “Nga mei taa ko unue huniꞌomu, omu ke dau mola i sulie.”

⁶ Na i sulie tolahana mo Jiu huni hodalie walu ola hunie maurihaꞌada ke maaꞌi, kire neꞌie e oono ho ateꞌa hau peine i leune. Na kire mani adona ola mala tangalai lita aani wei nga hue.

⁷ Oto a Jisas ko teꞌuri hunie mo koni-konihe, “Omu ke dedeie mo ho ateꞌa ngeena aani wei.” Oto kire dedeiꞌi na kire mani honu makeato oto.

⁸ Oto a Jisas ko teꞌuri loꞌu hunie mo koni-konihe, “Omu ke taluhie nga leu mwaanie ngaeta ho ateꞌa, na omu ke toolea hunie naꞌohai koni-konihe nge ko lio i sulie mo ngeulaa aana ngauhe.” Oto kire si toolea kao-kao ngeena hunie.

⁹ Maholo naꞌohai koni-konihe e mami aahongana, na wai ngeena e neꞌi waen oto. A porona e kaꞌa saie ike uri waen ngeena e uure i tei, taꞌe mo koni-konihe haꞌalaa kire saie. Oto naꞌohai koni-konihe ngeena e soie poro haalu,

¹⁰ ko si teꞌuri hunie, “No ko tohungei pangataꞌiniꞌo, aana taꞌena nga iinoni loꞌu, kire ko holaꞌi nii-niie kaꞌu tohungei waen diana ana mwala. Oto maholo mwala kire inu hiitoꞌo oto, nge kire ko si niie loꞌu waen nge e kaꞌa tohungei diana ike ngeena. Taꞌe iꞌoe, tohungei waen diana ienini o ko si lae peꞌi niie mai puri.”

¹¹ Eetana nga mei tolimaa aana nanamanga a Jisas ienini, e asuie i Kena aana poꞌo ni henue i Kalili. I leune e haataꞌinie manikuluhaꞌana, nge mo pwaarongoisuli ingeie e si hiiwalaimoli aana.

¹² I purine ngauhe aana haꞌarurunge ngeena e mango, e si lae hunie i Kapaneam peꞌie nikana, na mo eesine mwane kire mani hute, na mo pwaarongoisuli ingeie. Oto kire iiꞌo loꞌu i leune hunie ngaeta mo hei dinge.

Eetana Nga Maholo A Jisas E Oohea Mwala Haꞌa-haꞌaholi Mwaanie Nume Maaꞌi Peine

¹³ Maholona ko karaꞌinie mone oto hai dinge paine ikire mo Jiu huni esuie Houlaa Ni Liumwaanie, oto a Jisas e hanetaa taꞌau i Jerusalem.

¹⁴ E lae taꞌau i Nume Maaꞌi Peine na ko leesie mwala ko haꞌaholingeꞌinie mo ola mauri hunie mo uuraaꞌinge. Mwala ko haꞌaholingeꞌinie mola mo puluke na mo sipu na mo hiroikuu taꞌau i laona lolata aana Nume Maaꞌi Peine. Na mwala nge kire ko ooli-oolisi toꞌoha aana mo henue hai aaopaꞌi hunie toꞌoha ikire mo Jiu, kire iiꞌo oto noꞌone taꞌau i sulie mo taetahe ikire.

¹⁵ Oto a Jisas e asuie nga ola huni reu-repu aana iieli walo, ko si oohe aasie mo puluke na mo sipu ngeena mwaanie lolata aana Nume Maaꞌi Peine. Na ko korasie oto mo toꞌoha mwala ko ooli-oolisi toꞌoha ngeena, na ko pwelusie oto mo taetahe ikire i aano.

¹⁶ Oto a Jisas ko teꞌuri hunie mo iini ko haꞌa-haꞌaholi hiroikuu, “!Omu ke taꞌaasie mo ola ienini mwaanie i leu! !Omu ko tohungei waelie mola nume Aamaku, aana omu ko da ko neꞌi leu ni haꞌaholi!”

¹⁷ Maholo nge a Jisas e ere urine, mo pwaarongoisuli ingeie ko si aamasitoꞌo aana Uusu-uusu Maaꞌi e unue uuri, Neꞌisaenga paine haahie nume iꞌoe God, ko weru oto mala dunge i manataku. Sam 69:9

¹⁸ Oto mo mwane paine mo Jiu kire lae mai saana Jisas, kire ko si teꞌuri hunie, “?Nga huꞌi-huꞌite uri taa o sai esuie mala nga tolimaa huni haataꞌinie aameelu uri o toꞌo aana nanamanga huni esuie leune?”

¹⁹ Oto a Jisas e aalamire mola uuri, “Mala uri omu kei ohoie Nume Maaꞌi ienini i aano, taꞌe ineu ne kei taꞌe aalihoꞌi aana loꞌu mola aana e oolu aata hai dinge.”

²⁰ Oto kire ko teꞌuri, “!Haꞌike eena! E hai aawalai helisi mwana oono nge mwala kire tohue Nume Maaꞌi Peine ie i suliꞌi. ?Oto uri iꞌoe o kei taꞌea loꞌu mola aana e oolu aata hai dinge?”

²¹ Taꞌe nume maaꞌi nge a Jisas e ere rarangana uri sapena mola maraana ni ngeena.

²² Oto maholo e taꞌelaꞌi mwaanie maenga, nge mo pwaarongoisuli ingeie kire si aamasitoꞌo aana e ere urine. Na kire si hiiwalaimoli aana mo Uusu-uusu Maaꞌi na oto aana mei wala nge a Jisas e unuena.

²³ Oto aena aana a Jisas e haataꞌinie mo tolimaa aana nanamanga ingeie maholo e oꞌoꞌo i Jerusalem aana Houlaa Ni Liumwaanie ngeena, mwala oto hunge kire hiiwalaimoli uri ingeie oto a Kraes, iini kire ko maa-maaꞌoohie.

²⁴ Taꞌe a Jisas e kaꞌa tohungei norutoꞌo ike aada, aena aana e saie mone tolahana ahutana iinoni.

²⁵ Oto maꞌalana nga iini e kaꞌa unue loꞌu tolahana mwala oodoie, taꞌe ingeie e saie mola nga taa i laona manatada.