Tataroha Diana I Sulie A Jisas Kraes Nge A Jon E Uusue 19 - Tataroha Diana

A Paelat E Lei Mae Aana A Jisas

¹ Oto a Paelat e si unue hunie mo ramo uri kire ke toolea a Jisas na kire ke rapusie.

² Na kire ko haꞌatoꞌonie mala inemauri huni haꞌamwasi aana. Kire asuie rorodara aani walo kau-keu, kire ko si neꞌie i pweune a Jisas, na kire ko haꞌatoꞌonie aana toꞌoni tetewa nonoroꞌa mala mo aalaha ko hoꞌo-hoꞌosiꞌi.

³ Oto kire ko si haꞌa-haꞌamwasi aana uuri, “!Lahea inemauri mo Jiu!” Na kire ko hide-hidelie papaline.

⁴ Mango urine a Paelat e heꞌi iisitaa loꞌu taꞌau i saada mo naꞌohai mwane ni Jiu, ko si teꞌuri hunire, “Lio kaꞌu, ne kei toolea oto poi seemiu i sinaha i leu, uri hunie omu ke saie uri nou kaꞌa lio oodoie ike nga mei ola aaela aana huni lei mae aana haahie.”

⁵ Oto kire toolea a Jisas poi i sinaha, na e hoꞌosie oto rorodara aani walo kau-keu i pweune na e toꞌoni oto aani toꞌoni noro. Oto a Paelat ko si teꞌuri hunire, “!Lio kaꞌu! !A mwaena kaꞌu oto ie!”

⁶ Maholo mo naꞌohai pris na mo mwane kakakali kire leesie a Jisas, oto kire ko si tea oto paine uuri, “!Horo maesie! !Horo maesie i lengine poꞌu-poꞌu!” Oto a Paelat ko teꞌuri hunire, “Iꞌomu, omu ke toolea hunie omu ke lai horo maesie i lengine poꞌu-poꞌu maraamiu, aana ineu nou kaꞌa lio oodoie ike nga mei ola ke dau huꞌisie.”

⁷ Oto mo Jiu ko aalamie a Paelat uuri, “Haꞌatolanga iꞌemeelu e unue uri e malisine oto ke mae, aana ko unue uri ingeie Kalena God.”

⁸ Maholo a Paelat e rongo urine ko si tohungei meꞌu oto hiitoꞌo.

⁹ Oto e sili loꞌu taꞌau i nume ni aalahanga, ko si dolosi aana a Jisas uuri, “?Iꞌoe, o uure mai i tei?” Taꞌe a Jisas e kaꞌa aalamie ike.

¹⁰ Oto a Paelat ko heꞌi teꞌuri loꞌu hunie, “?Aana e ue kaꞌu o kaꞌa sare ere ike peꞌieu? ?Uri o saie taane nou toꞌo aana nanamanga huni toliꞌaasiꞌo, wa huni horo maesiꞌo i lengine poꞌu-poꞌu?”

¹¹ A Jisas e aalamie, oto ko teꞌuri, “Mala uri a God ke suꞌuri niie nanamanga ngeena huniꞌo, haꞌalaa o kaꞌa toꞌo aana ike noꞌone nga nanamanga haahieu. Aena urine, iini nge e pweloau huniꞌo, oorahaꞌaanga ingeie e paine oto loꞌu liutaa.”

¹² Maholo a Paelat e rongo urine, ko si eriꞌapasie uri ke toliꞌaasie a Jisas. Taꞌe mo Jiu ko si tea paine loꞌu mola uuri, “Mala uri o kei luhesie a mwane ngeena, iꞌoe nga malahune a inemauri peine i Rom haꞌike. Aana taꞌena nga iini ko unue maraana uri ingeie inemauri, nge ko heukama honosie a inemauri peine i Rom ni ngeena.”

¹³ Maholo a Paelat e rongoa kire ko ere urine, e si toolea a Jisas i sinaha na ko iiꞌo i aano i lengine naunekume ni leinge aana leu sailana uuri, “Leu kire hataaꞌi heu aana” na aana erenga mo Jiu uuri, “Gabata.”

¹⁴ Maholona na ko karaꞌinie oto maholo sato e ngara e oono i maahuꞌo-huꞌo aana hai dinge talamaꞌinge loosie Houlaa Ni Liumwaanie. Oto a Paelat ko teꞌuri hunie mo Jiu, “!Inemauri iꞌomu oto ie!”

¹⁵ Oto kire ko si tea paine mola uuri, “!Horo maesie! !Horo maesie! !Horo maesie i lengine poꞌu-poꞌu!” Oto a Paelat ko dolosi aada uuri, “?Uri omu saetoꞌo aana uri ne ke horo maesie inemauri iꞌomu?” Mo naꞌohai pris e aalamie, oto kire ko teꞌuri, “Taꞌa-taꞌa inemauri mola emi toꞌo aana oto a inemauri peine i Rom.”

¹⁶ Oto a Paelat e si toliꞌaasie a Jisas hunire huni horo maesie i lengine poꞌu-poꞌu. Oto mo ramo kire si toolea a Jisas,

Kire Horo Maesie A Jisas I Lengine Poꞌu-poꞌu

¹⁷ na kire ko deu rarahie uri ke aangaꞌinie poꞌu-poꞌu maraana, na e iisitaa taꞌau takoie leu sailana uuri, “Leu ni Rarata,” na aana erenga mo Jiu uuri, “Golgata”

¹⁸ Oto kire rapu taalengasie a Jisas wau i leune i lengine poꞌu-poꞌu. Na ngaeta ro mwane loꞌu kire ko horo maesirerue i lengine mo poꞌu-poꞌu peꞌie, nga iini aana nga aapa, na a Jisas i matoladarue.

¹⁹ Na a Paelat e uusue mo wala uuri, A Jisas Ni Nasaret, Inemauri Mo Jiu, oto ko si neꞌie i pweune poꞌu-poꞌu a Jisas.

²⁰ Mwala hunge aana mo Jiu kire saaie mo wala ngeena, aena aana leu nge kire neꞌie poꞌu-poꞌu a Jisas aana, e kaꞌa haꞌataulie ike loꞌu huilume, na kire uusue aana e oolu erenga—erenga mo Jiu, na erenga mo Rom, na erenga mo Krik.

²¹ Oto mo naꞌohai pris mo Jiu ko si teꞌuri hunie a Paelat, “O ke suꞌuri uusue, ‘Inemauri mo Jiu,’ taꞌe o ke uusue mola uuri, ‘A mwane ie e unue uri ingeie inemauri mo Jiu.’ ”

²² A Paelat e aalamire, oto ko teꞌuri, “Nga taa nou uusue, nou uusue oto.”

²³ Maholo mo ramo kire uie a Jisas mango i lengine poꞌu-poꞌu, oto kire ko si da mo toꞌoni ingeie, kire ko oa aana e hai aapa, nga leu ni oto nga ramo. Leu ooreta kire toolea noꞌone ngaeta toꞌoni ingeie nge nga maai teu-teurite haꞌike aana, aena aana ola kire hao haꞌileku mola aana.

²⁴ Oto kire ko si teꞌuri hunire maraada, “Kolu ke suꞌuri hakasie loꞌu, taꞌe kolu ke inie daes mola hunie, huni leesie uri a tei kei toꞌo aana.” Leune e rau urine uri huni haꞌa-oaie Uusu-uusu Maaꞌi nge e unue uuri, Kire oa aana mo toꞌoni ineu, na kire inie daes hunie ngaeta mo toꞌoni ineu. Sam 22:18 Nga taa mo ramo kire asuie aana mo toꞌoni a Jisas otona.

²⁵ Ngaeta mo iini kire uure karaꞌinie poꞌu-poꞌu a Jisas nge a nikana, na keni eesine a nikana, na a Meri huꞌe a Klopas, na a Meri ni Makdala.

²⁶ A Jisas e leesie a nikana na pwaarongoisuli e tohungei manata diana hunie, kirerue uure mola karaꞌini, ko si teꞌuri hunie a nikana, “Teite, o ke leesie a mwane ngeena oto mala a kalemu.”

²⁷ Oto ko teꞌuri loꞌu hunie pwaarongoisuli ngeena, “O ke leesie, a nikemu oto ngeena.” Oto uure aana maholona, pwaarongoisuli ngeena e si toolea a Meri, nikana Jisas, na ko lio oto i sulie i nume ingeie.

A Jisas E Mae

²⁸ Mango urine, a Jisas mone e manataꞌinie oto uri walu ola e mango tee-tee oto. Oto huni haꞌa-oaie mo Uusu-uusu Maaꞌi, nge ko si teꞌuri, “No ko maarou.”

²⁹ Na i leune kire toꞌo aana nga nime e honu aani waen ahaꞌi. Oto kire da mei loi-losi, kire ko haꞌamedoa aana waen ngeena. Kire neꞌie i ngongoꞌana mai ei, kire ko si teelaꞌinie i ngidune a Jisas.

³⁰ Maholo a Jisas e mami aahongana mei waen ahaꞌi ngeena, oto ko si teꞌuri, “E mango oto eena.” Oto e si haꞌatengo-tengoa pwaune na ko mae oto.

³¹ Oto mo naꞌohai mwane mo Jiu kire lai haꞌatohu aana a Paelat uri hunie ke toliꞌaasie mo ramo ke oie mo aeꞌaena e oolu mwane i lengine mo poꞌu-poꞌu ngeena hunie kire ke mae lau-leu, na uri kire ke oohosie mo rae aada i aano. Kire sare sukaa urine aena aana dinge talamaꞌinge ni ngeena, hai dinge huni deu aakau loosie Dinge Maaꞌi loꞌu mola i hoꞌowa. Oto kire kaꞌa saetoꞌo aana ike mo rae aana mo mwaena ke saronai oꞌoꞌo i lengine mo poꞌu-poꞌu aana Dinge Maaꞌi, aana hai dinge ngeena e tohungei maaꞌi oto liutaa.

³² Oto mo ramo ko si lae mai, kire ko oie aeꞌaena eetana nga mwane, na loꞌu aeꞌaena ruana nga mwane nge kire horoꞌie peꞌie a Jisas.

³³ Taꞌe maholo kire lai hule aana a Jisas na kire ko leesie uri e mae oto, nge kire kaꞌa oie ike loꞌu aeꞌaena.

³⁴ Ngaeta iini aana mo ramo e otomie paparaꞌana Jisas aana noma, oto aapu na wai e tolana pwisitaa oto.

³⁵ Na ineu nge no ko uusu-uusu ienini, ineu maraaku nou leesie leune e rau oto toꞌohuu, na no ko unu haꞌa-oaie uri e toꞌohuu oto. No ko ere aana walaimolinge hunie uri iꞌomu noꞌone omu ke hiiwalaimoli.

³⁶ Walu ola ienini e rau urine, uri huni haꞌa-oaie Uusu-uusu Maaꞌi uuri, Nga taꞌa-taꞌa suisuli aana e saꞌa maꞌoi ike. Sam 34:20

³⁷ Na ngaeta Uusu-uusu Maaꞌi e unue loꞌu uuri, Kire kei toꞌomaaie iini kire otomie kaꞌu. Sekaraea 12:10

Kire Haitolingeꞌinie A Jisas

³⁸ Oto i purine walu ola ienini e haro mango, nge a Josep ni Arimatia ko si haꞌatohu aana a Paelat uri ke toolea rae aana a Jisas. A Josep ingeie nga pwaarongoisuli mumuni a Jisas, aena aana e maꞌuteꞌinie mo naꞌohai mwane ni Jiu. A Paelat e toliꞌaasie hunie a Josep, oto e si lae mai, ko toolea rae aana a Jisas.

³⁹ A Nikodimas iini nge e holaꞌi lae kaꞌu i saana Jisas aana ngaeta hai rodo, e lae noꞌone peꞌie a Josep na e toolea ola mala oolu aawalai kilo aani dango wau-wesu, mo ola huni neꞌiꞌi i sapena mo rae.

⁴⁰ E ro mwane ngeena kirerue toolea rae aana a Jisas oto kirerue uloa aani sala rereꞌa peꞌie mo dango wau-wesu oto mala tolahada mo Jiu hunie haitolinge.

⁴¹ Na aana leu nge kire horoꞌie a Jisas aana, nga hohola wau i leune, na i laona hohola ngeena, nga kilipweꞌu haalu i leune, ola kire kaꞌa haitolingeꞌinie ue nga iini i laona.

⁴² Oto aana sato ko karaꞌi suu hunie haꞌamangoa hai dinge ikire mo Jiu hunie dau aakau loosie Dinge Maaꞌi, nge e ro mwane ko neꞌie oto rae aana a Jisas wau i laona kilipweꞌu ngeena, aena aana e kele iiꞌo karaꞌini.