Tataroha Diana I Sulie A Jisas Kraes Nge A Jon E Uusue 18 - Tataroha Diana

Mo Ramo Kire Tapolie A Jisas

¹ Maholo a Jisas e aarengaꞌi mango urine, e si iisitaa peꞌie mo pwaarongoisuli ingeie na kire ko lae holosie darimwaꞌa i Kedron. Poꞌo taꞌau aana dari ngeena, nga hohola aani ei olif e iiꞌo taꞌau i leune. Oto kire ko lai sili taꞌau i laona hohola ngeena.

^2-5 A Jiudas e saie mone mola leune aana kire lae-lae tarau peꞌie a Jisas aana. Oto aana a Jiudas ko pweloa Jisas hunie mo maelonga ingeie, nge e si lae i haꞌarongoa mo Parise na mo naꞌohai pris. Oto kire ko uusungeꞌinie mai pulitaa paine aani ramo mo Rom, peꞌie mo mwane ni Jiu e kakakali aana Nume Maaꞌi Peine, na a Jiudas e naꞌoda hunie leu a Jisas e iiꞌo aana. Kire lae taꞌau peꞌi laite, na peꞌi sine, na oto peꞌie walu ola huni heiseuni. A Jisas mone e saie mola nga taa kei reu aana, ko si iisitaa honosire na ko dolosi oto aada uuri, “?A tei ni nge omu ko loꞌohiena?” Oto kire ko aalamie uuri, “A Jisas ni Nasaret.” Oto a Jisas ko si teꞌuri hunire, “Ineu kaꞌu oto ie.”

⁶ Maholo a Jisas e unue hunire uuri, “Ineu kaꞌu oto ie,” kire duꞌe aalihoꞌi na kire ko ladamaꞌi oto i aano.

⁷ Oto ko heꞌi dolosi loꞌu aada uuri, “?A tei ni omu ko loꞌohiena?” Kire aalamie, oto kire ko teꞌuri, “A Jisas ni Nasaret.”

⁸ Oto a Jisas ko heꞌi unue loꞌu hunire uuri, “Nou unue kaꞌu oto huniꞌomu uri ineu oto ingeie. Mala uri omu ko loꞌohieu toꞌohuu, nge omu ke toliꞌaasie mo pwaarongoisuli ineu ie kire ke lae.”

⁹ Ko ere urine huni haꞌa-oaie mei wala nge e unue uuri, “Nou kaꞌa dau tekelaꞌinie ike nga iini hikana mo iini nge o maire nakue.”

¹⁰ Oto a Saemon Pita ko si darasie naihi ingeie na ko lama mousie aalinge i pwalo-pwalona a Malakas, koni-konihe a Naꞌohana Mo Naꞌohai Pris.

¹¹ Oto a Jisas ko teꞌuri hunie a Pita, “O ke neꞌi eelihoꞌi aana naihi iꞌoe i talana. A Mamaꞌa ni e unue leune ke rau urine, na ne kei tola oto i sulie maꞌalana ne ke sapesalu oto uri taa.”

Kire Toolea A Jisas I Naꞌona Ngaeta Naꞌohai Pris, A Anas

¹² Oto naꞌohai ramo haahie sinolai ramo ni Rom, peꞌie ngaeta mo ramo ingeie, na mo mwane kakakali ikire mo Jiu, kire mani lae mai tapolie a Jisas na kire ko pwesue oto.

¹³ Oto kire ko holaꞌi toolea oto i naꞌona a Anas aana ingeie repo mwane hungaona a Kaiapas, Naꞌohana Mo Naꞌohai Pris aana maholo ngeena.

¹⁴ Na a Kaiapas oto iini e haꞌananaue mo naꞌohai mwane mo Jiu uri e lae otoi diana liutaa hunie nga taꞌa-taꞌa iinoni mola ke mae honotana ahutana mwala.

A Pita E Taateingeꞌinie A Jisas

¹⁵ A Saemon Pita na ngaeta pwaarongoisuli loꞌu kirerue ko holo maholo i tala taane mola i sulie pulitaa ni ramo nge kire tapolie a Jisas. Oto ngaeta pwaarongoisuli ngeena mone e sai diana aana naꞌohai pris ngeena a Anas, oto ko si lai sili peꞌie a Jisas taꞌau i laona lolata aana nume ingeie.

¹⁶ Taꞌe a Pita e oore mola taꞌau i aena maa aana para poꞌoi sinaha. Oto pwaarongoisuli ngeena nge a naꞌohai pris e sai diana aana, e aalihoꞌi loꞌu poi sinaha, ko si ere peꞌie keni ko kakalie maa na ko toolea taꞌau a Pita i laona lolata.

¹⁷ Oto a keine ko teꞌuri hunie a Pita, “Saꞌa mola iꞌoe ngaeta iini noꞌone aana mo pwaarongoisuli a mwane ie.” Oto a Pita ko aalamie a keine uuri, “Ineu haꞌike.”

¹⁸ Maholona wawai e tohungei peine, oto mwala auꞌesu na mo mwane kakakali ngeena, kire rurue dunge aani loilohi, kire si uure kali-kelie aana kire ko rakani. Na a Pita noꞌone loꞌu peꞌire, e uure ko rarakani.

Naꞌohai Pris E Dodolosi Aana Jisas

¹⁹ Oto aana maholona Naꞌohana Mo Naꞌohai Pris ko si dolosi aana a Jisas i sulie mo pwaarongoisuli ingeie na i sulie haꞌa-uusulinge ingeie.

²⁰ A Jisas e aalamie, oto ko teꞌuri, “Nou talei ere-ere haadaꞌi keꞌu hunie ahutana walumalau. Nou haꞌa-haꞌa-uusuli keꞌu i laona mo nume ni palo-palo na i laona Nume Maaꞌi Peine, mo leu ahutana mo Jiu ko loo-loko aani. Nou kaꞌa ere-ere mumuni ike aana nga mei ola.

²¹ ?E ue o ko dolosi urine aaku? O ke dolosi aana mo iini e rongoa mo haꞌa-uusulinge ineu, uri nga moi taa ni nou unu-unuꞌi hunire. Ikire, kire saie nga taa nou unu-unue.”

²² Na maholo e ere mango urine, oto ngaeta iini aana mo mwane kakakali nge kire uure peꞌie i leune, ko si lae mai hidelie maana a Jisas, na ko teꞌuri hunie, “?Uri o malisi ni ere urine hunie Naꞌohana Mo Naꞌohai Pris?”

²³ Oto a Jisas ko aalamie uuri, “Mala uri no ko ere takalo aana nga mei ola, o ke haataꞌinie takalonga ineu aana mwala. ?Taꞌe mala uri no ko ere toꞌohuu, na e ue o ko hidelieu?”

²⁴ Oto a Anas ko si uusungeꞌinie a Jisas i saana a Kaiapas, Naꞌohana Mo Naꞌohai Pris, na kire pwasue ue.

A Pita E Heꞌi Taateingeꞌinie Loꞌu A Jisas

²⁵ Maholo na a Saemon Pita e uure ko rarakani ue, kire ko si teꞌuri hunie, “Saꞌa mola iꞌoe ngaeta iini noꞌone aana mo pwaarongoisuli a mwane ngeena.” Taꞌe a Pita ko taateingeꞌinie loꞌu mola, na ko teꞌuri, “Ineu haꞌike.”

²⁶ Oto ngaeta iini aana mo koni-konihe a Naꞌohana Mo Naꞌohai Pris, iini e takihana mwane nge a Pita e lama mousie aalingana, ko si teꞌuri, “Saꞌa mola nou leesiꞌo noꞌone peꞌie a Jisas oto taꞌau i hohola.”

²⁷ Oto a Pita ko si heꞌi taateingeꞌinie loꞌu, na kue ko tolana ngara oto.

Kire Toolea A Jisas I Naꞌona Paelat

²⁸ Oto mola i waꞌalie i maahuꞌo-huꞌo, kire si toolea a Jisas mwaanie nume a Kaiapas hunie nume paine ni aalahanga mo Rom. Mo mwane paine ikire mo Jiu, kire ko haꞌahili-hili aena aana kire sare iiꞌo rereꞌa malisine Houlaa Ni Liumwaanie. Oto kire kaꞌa sare sili ike i laona nume ni aalahanga ngeena mwaanie kire waelie haꞌatolanga ikire aana kire sili i laona nume mo Aapoloa Aaopa, na urine kire loꞌuhangaꞌa oto.

²⁹ Oto a Paelat ko iisitaa taꞌau i saada i sinaha, na ko teꞌuri, “?Nga mei ola aaela uri taa ni a mwane ie e asuie?”

³⁰ Kire aalamie a Paelat, oto kire ko teꞌuri, “Mala uri ke suꞌuri deu aaela, haꞌalaa melu kaꞌa niie ike taꞌau i nimemu urine.”

³¹ Oto a Paelat ko si teꞌuri hunire, “Omu ke toolea, na omu ke leie maraamiu i sulie mo haꞌatolanga iꞌomu.” Oto mo Jiu kire aalamie uuri, “Taꞌe e kaꞌa adona ike mo haꞌatolanga iꞌomu mo Rom hunie iꞌemi mo Jiu emi ke horo maesie nga iinoni i tehulaꞌana leinge iꞌemi.”

³² Leune e rau urine huni haꞌa-oaie nga taa a Jisas e unue maholo e ere lalai uri kire kei horo maesie i sulie tolahana mo Rom.

³³ Oto a Paelat e heꞌi sili eelihoꞌi loꞌu weu i nume ni aalahanga ngeena, na ko soie a Jisas, ko si dolosi aana uuri, “?Uri iꞌoe ni oto inemauri mo Jiu?”

³⁴ A Jisas e aalamie, oto ko teꞌuri, “?Uri o ko dolosi aaku urine tohumu, wa ohe nga mwala aaopa e unueu i seemu?”

³⁵ Oto a Paelat e aalamie a Jisas uuri, “?Uri o ko loꞌo-loꞌongaꞌi uri ineu nga mwane ni Jiu? Mwala iꞌoe maraada na oto mo naꞌohai pris ni kire tooleꞌo mai seeku ie. ?Nga taa ni o deu aaelasie?”

³⁶ Oto a Jisas ko teꞌuri, “Aalahanga ineu nga ola aana walumalau ienini haꞌike. Mala uri ne ke urihana mo inemauri ni welumalau, haꞌalaa mo koni-konihe ineu kire ooho honosieu mwaanie uri mo mwane paine aana mo Jiu kire tooleau. Taꞌe haꞌike, aana aalahanga ineu e aaopa oto mwaanie i leu.”

³⁷ Oto a Paelat ko si teꞌuri hunie, “!Oto iꞌoe ngaeta inemauri taane!” A Jisas e aalamie, oto ko teꞌuri, “Nge kaꞌu oto o ko unuena, uri ineu inemauri. Na aena aana aalahanga ineu ngeena mone nou hute. Na nou lae mai uri hunie ne ke toolea walaimolinge mai i laona walumalau. Taꞌena nga iini ko mwaꞌe-mwaꞌe huni lulu i sulie walaimolinge, nge e sai rongo hunie walaku.”

³⁸ Oto a Paelat ko si dolosi uuri, “?Nga taa ni walaimolinge?” Na e ere mango urine, e si heꞌi iisitaa loꞌu i saana mo Jiu taꞌi sinaha, na ko teꞌuri hunire, “Nou kaꞌa lio oodoie ike nga mei ola aaela aana a mwane ie.

³⁹ Taꞌe oto i sulie tolahamiu suli maholo aana Houlaa Ni Liumwaanie, nou sai luhesie nga iini huniꞌomu mwaanie nume ni hoꞌo. ?Oto e ue? ?Uri omu saetoꞌo aana ne ke luhesie huniꞌomu mwane ie kire haaraꞌinie aana ‘Inemauri mo Jiu?’ ”

⁴⁰ Oto kire ko si meni tea paine mola uuri, “!A mwane ie haꞌike! !Taꞌe a Barabas ni melu saetoꞌo aana!” (A Barabas ie ingeie nga horopeli nge e ooho honosie mo Rom).