Tataroha Diana I Sulie A Jisas Kraes Nge A Jon E Uusue 17 - Tataroha Diana

A Jisas E Aarengaꞌi Talana Maraana

¹ Oto i purine a Jisas e ere mango urine, e si lio taꞌau i Lengi na ko aarengaꞌi uuri, “Mamaꞌa, maholoi sato e hule oto. O ke haꞌamanikuluꞌaau a Kalemu, hunie ineu a Kalemu ne ke si haꞌamanikuluꞌaꞌo loꞌu.

² Aana o niie oto mai hunieu nanamanga haahie ahutana iinoni, uri ne ke si niie maurihe huu nana mo iini o niire nakue.

³ Na loꞌongaꞌinge aana maurihe huu ngeena, uri hunie mwala ke sai diana aamu, taꞌa-taꞌa God oto toꞌohuu, na uri kire ke saieu noꞌone, a Jisas Kraes, iini o uusungeꞌinie mai.

⁴ Nou haꞌamanikuluꞌaꞌo oto mai aano i leu aana nou haꞌamangoa oto mei esunge o niie hunieu uri ne ke asuie.

⁵ Oto ie, Mamaꞌa, o ke haꞌamanikuluꞌaau aana mei menikuluꞌanga ngeena nou toꞌo aana kaꞌu oto peꞌiꞌo i naꞌona haꞌaholalana walumalau.”

A Jisas E Aarengaꞌi Talana Mo Pwaarongoisuli Ingeie

⁶ Oto a Jisas e si heꞌi aarengaꞌi loꞌu uuri, “Mamaꞌa, nou haataꞌinie oto walu ola i suliꞌo hunie mo iini o maire nakue mwaanie walumalau ie. Ikire mo iinoni iꞌoe, na o maire oto nakue. Oto kire tola oto i sulie walamu,

⁷ na kire si saie uri taꞌena nga ola o niie hunieu e uure oto mai mwaaniꞌo toꞌohuu.

⁸ Aana mo haꞌa-uusulinge o nii-niiꞌi hunieu, nou niiꞌi oto hunire na kire tooleꞌi oto. Kire manataꞌinie oto toꞌohuu uri nou uure mai mwaaniꞌo, na kire hiiwalaimoli oto aana uri iꞌoe o uusungeꞌinieu mei.

⁹ Oto no ko eitanaiꞌo talada. Nou kaꞌa aitanaiꞌo ike talana mwala aana walumalau ie, taꞌe no ko eitanaiꞌo talana mo iini o maire oto nakue, aena ikire mo iini iꞌoe ni ngeena.

¹⁰ Ahutana walu ola nou toꞌo aani, mo ola iꞌoe, na ahutana walu ola iꞌoe, mo ola ineu. Na i tehulaꞌana mo mwane ikure ngeena, nge mwala ke si leesie manikuluhaꞌaku.

¹¹ Ineu no ko lae oto taꞌau i seemu. Nou saꞌa iiꞌo ike loꞌu mei welumalau, taꞌe ikire haꞌalaa kire ko oꞌoꞌo ue mai welumalau. Mamaꞌa Maaꞌi, o ke kinetaꞌinire aana nanamanga iꞌoe, nanamanga nge o niie hunieu, hunie uri kire ke neꞌie nga taꞌa-taꞌa iinoni oto mala ikure.

¹² Maholo nou oꞌoꞌo peꞌire, nou koni diana aada aana nanamanga aana satamu, nanamanga nge o niie kaꞌu hunieu. Nou lio i suli diana aada, hule aana nga taꞌa-taꞌa iini aada e kaꞌa aiꞌaa, taꞌe taꞌa-taꞌa iini mola e adona oto ke aiꞌaa huni haꞌa-oaie mo Uusu-uusu Maaꞌi.

¹³ “Taꞌe ie no ko lae oto taꞌau i seemu, na no ko unue walu ola ienini taꞌau huniꞌo maholo ineu ue mai welumalau uri hunie saena mo mwane ienini ke honu aana ilenimwaꞌenga ineu.

¹⁴ Nou nii mangoa oto mo haꞌa-uusulinge iꞌoe hunire, na walumalau e ngiduupu hunire aena aana ikire mo iinoni aana walumalau haꞌike, oto mala ineu nga iinoni aana walumalau haꞌike.

¹⁵ Nou kaꞌa sukaa ike uri o ke taꞌaasire mwaanie walumalau, taꞌe hunie o ke kinetaꞌinire mwaanie iini tataꞌala, a Pwelu Eero-eero.

¹⁶ Aana ikire nga mo iini haꞌike aana walumalau, oto mola mala ineu nga iinoni aana walumalau haꞌike.

¹⁷ Saeku uri o ke haꞌa-uusulire aana walamu, aena aana walaimolinge ni otona, na walaimolinge ngeena e sai peꞌire hunie kire ke oopara maraada mwaanie oorahaꞌaa, na hunie kire ke iiꞌo maaꞌi mola namue.

¹⁸ Mala kaꞌu ie o uusungeꞌinieu mei laona walumalau, nge no ko uusungeꞌinire oto i laona walumalau.

¹⁹ Na i tehulaꞌada, nou oopaau oto huni esunge mola namue, hunie ikire noꞌone, kire ke oopara maraada mwaanie taꞌena nga oorahaꞌaa huni esunge noꞌone namue.”

A Jisas E Aarengaꞌi Talana Ahutana Mo Iini Kire Ko Hiiwalaimoli Aana

²⁰ Oto a Jisas e si heꞌi aarengaꞌi loꞌu uuri, “Mamaꞌa, nou kaꞌa aitanaiꞌo ike mola talana mo iini ie hahaiteli, taꞌe noꞌone talana mo iini e hiiwalaimoli eeku i tehulaꞌana mo haꞌa-uusulinge ikire.

²¹ Oto no ko eitanaiꞌo Mamaꞌa, uri hunie kire ke mani neꞌie taꞌa-taꞌa iinoni, mala oto iꞌoe i lalo aaku na ineu i lalo aamu. No ko eitanaiꞌo uri hunie kire ke iiꞌo noꞌone i lalo aakarue, hunie walumalau ke hiiwalaimoli aana uri iꞌoe o uusungeꞌinieu mei.

²² Oto mei menikuluꞌanga nge o niie hunieu, nou heꞌi niie loꞌu hunire, uri hunie kire ke neꞌie oto nga taꞌa-taꞌa iini mala oto ikure taꞌa-taꞌa iinoni.

²³ Iꞌoe o iiꞌo i lalo aaku, na ineu ne ke iiꞌo i lalo aada, uri hunie kire ke tohungei neꞌie oto taꞌa-taꞌa iinoni. Oto walumalau ke si lio saie uri iꞌoe ni taane o uusungeꞌinieu mei, na uri o manata diana hunire oto mala o manata diana hunieu.

²⁴ “Mamaꞌa, nou saetoꞌo aana mo iini nge o maire oto nakue, kire ke iiꞌo oto peꞌieu aana leu no ko iiꞌo aana. Saeku hunie uri kire ke leesie manikuluhaꞌaku, mei menikuluꞌanga nge o niie nakue aana o manata diana hunieu oto wai naꞌona haꞌaholalana walumalau.

²⁵ “Mamaꞌa, iꞌoe oto o tohungei oodotaꞌi, na maꞌalana uri walumalau e kaꞌa saiꞌo, taꞌe ineu nou saiꞌo mola, na mo iini ineu ie kire saie taane uri iꞌoe ni o uusungeꞌinieu mei.

²⁶ Nou haataꞌiniꞌo taane oto aada, na ne kei heꞌi haꞌasaire loꞌu aana walu ola i suliꞌo, hunie uri mei manata-diananga nge o manata diana hunieu aana, ke iiꞌo i lalo aada na hunie uri ineu noꞌone ne ke iiꞌo i lalo aada.”