Tataroha Diana I Sulie A Jisas Kraes Nge A Jon E Uusue 15 - Tataroha Diana

A Jisas Oto Tohungei Ai Grep

¹ Oto a Jisas e heꞌi unue loꞌu hunie mo pwaarongoisuli ingeie uuri, “Ineu oto ai grep toꞌohuu, na Aamaku oto iini ko esuie hohola ni grep.

² Ingeie oto ko taꞌaasie taꞌena nga sasarai ola aaku nge e kaꞌa hungu ike aani hue-huei ola. Na aana ko lio i suli diana aana hohola ingeie, nge mo sasarai ola kire ko hungu eeni hue-huei ola diana, ingeie ko si olo aasie taꞌena nga aaelanga mwaaniꞌi hunie kire ke rereꞌa na ke hungu oto loꞌu hiitoꞌo.

³ Iꞌomu, omu rereꞌa mango oto, aana nga taa nge nou haꞌa-uusuliꞌomu aana.

⁴ Omu ke iiꞌo susu oto aaku, na ineu ne kei iiꞌo susu oto noꞌone aamiu. Nga sasarai ola e saꞌa hungu ike aani hue-huei ola mola maraana, na oto e kaꞌa lado aana tohungana ai. Oto e urine loꞌu aana iꞌomu, aana omu saꞌa hungu ike aani hue-huei ola na oto omu kaꞌa iiꞌo aaku.

⁵ “Ineu oto ai grep toꞌohuu na iꞌomu oto mo sasarana. Iini ko iiꞌo susu oto aaku na ineu noꞌone aana, nge ke si hungu oto loꞌu liutaa. Aena aana aahoꞌa aaku, omu saꞌa roroꞌa ni da ike nga mei ola diana.

⁶ Aana nga iini e kaꞌa iiꞌo susu eeku, aasilana kei lae mola mala sasarai ola aaela, oto ko nunulu mola. Na mo sasarai ola urine, kire ke soꞌokoniꞌi na aasileni ke lae mola i laona dunge hunie ke waru tetehu.

⁷ Mala uri omu ke iiꞌo susu oto aaku na walaku ke iiꞌo susu oto aamiu, nge omu sai sukaa taꞌena nga mei ola saemiu hunie, na niilana kei lae oto huniꞌomu.

⁸ Omu ke hungu diana huni haataꞌinie uri iꞌomu mo pwaarongoisuli ineu, na aena urine nge mwala ke si lio saie manikuluhaꞌana Aamaku.

⁹ “Ineu nou manata diana huniꞌomu oto mala a Mamaꞌa e manata diana hunieu. Omu ke iiꞌo susu oto i laona manata-diananga ineu.

¹⁰ Mala omu ko tola i sulie mo haꞌatolanga ineu, haꞌalaa omu ko iiꞌo susu i laona manata-diananga ineu, mala oto ineu nou lulu i sulie mo haꞌatolanga Aamaku na nou iiꞌo i laona manata-diananga ingeie.

¹¹ No ko unue walu ola ienini huniꞌomu uri hunie omu ke toꞌo aana taꞌa-taꞌa taungei ilenimwaꞌenga nge ineu nou toꞌo aana, na uri hunie ilenimwaꞌenga iꞌomu ke paine loꞌu liutaa.

¹² Haꞌatolanga ineu oto ie, uri omu ke manata diana huniꞌomu heiliu, mala oto ineu nou manata diana huniꞌomu.

¹³ Nga iini e kaꞌa haataꞌinie ike nga mei manata-diananga ke paine loꞌu liutaa aana iini ko niie maurihaꞌana hunie mo malahune.

¹⁴ Na iꞌomu oto mo malahuku, mala uri omu ke dau i sulie nga taa nou unue huniꞌomu.

¹⁵ Nou kaꞌa saiꞌomu ike loꞌu aana mo koni-konihe, aena aana koni-konihe e kaꞌa saie ike nga taa aalaha ingeie ko loꞌo-loꞌongaꞌinie. Taꞌe no ko saiꞌomu uri maeni malahuku, na ahutana walu ola nou rongoꞌi mwaanie Aamaku, nou haꞌarongoꞌomu oto aani.

¹⁶ Iꞌomu, omu kaꞌa lio hilisieu ike, taꞌe ineu ni nou lio hilisiꞌomu. Na nou niie mei esunge ie namiu, hunie omu ke hungu eeni hue-huei ola diana nge e sai iiꞌo huu. Oto aena leune, taꞌena nga mei ola omu ko sukaa mwaanie a Mamaꞌa aena aana omu norutoꞌo aaku, a Mamaꞌa ke si niie huniꞌomu.

¹⁷ Oto no ko unue loꞌu huniꞌomu uri omu ke manata diana huniꞌomu heiliu.”

A Jisas E Haꞌapasulie Mo Pwaarongoisuli Uri Walumalau Kei Sereꞌinire

¹⁸ Oto a Jisas e heꞌi unue loꞌu uuri, “Mala uri walumalau ko ngiduupu oto huniꞌomu, omu ke manataꞌinie uri e holaꞌi ngiduupu oto hunieu wau i naꞌo.

¹⁹ Mala uri omu ke neꞌie mo iinoni aana walumalau, haꞌalaa walumalau e sai manata diana oto huniꞌomu, mala e manata diana hunie ahutana mo iini ingeie nge kire kaꞌa lae ike i sulie a God. Taꞌe aena aana omu kaꞌa uure ike aana walumalau, taꞌe nou lio hilisiꞌomu mwaanie walumalau, oto aena mei olana nge walumalau ko si ngiduupu huniꞌomu.

²⁰ Omu ke aamasitoꞌo aana mei wala nou unue kaꞌu huniꞌomu uri nga koni-konihe e kaꞌa paine ike loꞌu liutaa aana aalaha ingeie. Oto mala uri mwala aana walumalau ngeena ko teungeꞌinieu, nge kire kei teungeꞌiniꞌomu noꞌone. Mala uri kire ke tola i sulie mo haꞌatolanga ineu, haꞌalaa kire kei tola i sulie noꞌone mo haꞌatolanga iꞌomu.

²¹ Taꞌe kire kei teungeꞌiniꞌomu mola aena aana omu ko norutoꞌo aaku, na aana kire kaꞌa saie ike iini e uusungeꞌinieu mei.

²² Mala uri ne ke suꞌuri lae mai laona walumalau huni ere-ere nada, haꞌalaa mo oorahaꞌaanga ikire saꞌa iiꞌo haadaꞌi ike urine. Taꞌe maholo ienini, e aasa oto hunie nga iini kei mumunie nga mo oorahaꞌaanga ingeie.

²³ Nga iini ko ngiduupu hunieu, nge ko ngiduupu oto noꞌone hunie Aamaku.

²⁴ Mala uri ne ke suꞌuri lae mai esuie mo ola nge nga iini aaopa e kaꞌa asuiꞌi ue ngeena i matolada, haꞌalaa mo oorahaꞌaanga ikire saꞌa iiꞌo haadaꞌi ike urine. Taꞌe oto ie kire leesie taane mo huꞌi-huꞌite, na kire saronai ngiduupu mola ue huniꞌemereꞌi Aamaku.

²⁵ Taꞌe walu ola ienini ko reu oto urine, huni haꞌa-oaie nga taa uusulana e lae i laona mo Uusu-uusu Maaꞌi uuri, Kire talei ngiduupu hunieu mola mwaakule. Sam 35:19

²⁶ “Iꞌemereꞌi a Mamaꞌa mere kei uusungeꞌinie mai seemiu nga iini huni peꞌiꞌomu, na ingeie oto Liꞌoa aani walaimolinge. Maholo kei lae mai, ke si unu haadaꞌi eeku,

²⁷ na iꞌomu noꞌone omu ke unu haadaꞌi eeku oodoie mwala, aena aana omu oꞌoꞌo oto peꞌieu uure oto i aehotalana.