Tataroha Diana I Sulie A Jisas Kraes Nge A Jon E Uusue 13 - Tataroha Diana

A Jisas E Hodalie Aeꞌaena Mo Pwaarongoisuli Ingeie

¹ Oto mola i naꞌona Houlaa Ni Liumwaanie, a Jisas e manataꞌinie uri e hule oto aana maholo hunie ke hoꞌalaꞌi mwaanie walumalau ie, na ke ooli i saana Aamana. A Jisas e manata diana oto tarau hunie mo iini ingeie nge kire ko lulu i sulie mai welumalau, na e hahuꞌei manata diana hunire lai hule oto aana ooretalana.

² Oto e hule aana maholo a Jisas na mo pwaarongoisuli ingeie kire ko ngeu i seulehi, taꞌe a Pwelu Eero-eero e pwani neꞌie oto mei neꞌisaenga ni pweloa a Jisas i saena a Jiudas Iskariot, kalena Saemon.

³ A Jisas e manataꞌinie oto uri Aamana e toliꞌaasie ahutana walu ola mango oto i laona nimana. Na e saie noꞌone uri e uure mai mwaanie a God, na uri ko eelihoꞌi loꞌu takoie a God.

⁴ Oto e taꞌelaꞌi mwaanie leu nge kire ko ngeu aana, e si taꞌaasie toꞌoni tetewa ingeie, na e hele aana maamango, oto ko hoꞌosie i denumana.

⁵ Oto e huie mei wei i laona nime, ko si aehota hodalie aeꞌaena mo pwaarongoisuli ingeie na ko maamango aꞌate aana aeꞌaeda aana maamango nge e hoꞌosie i denumana.

⁶ Na maholo e lae mai hule aana a Saemon Pita, a Pita ko si teꞌuri hunie, “!Haꞌike eena, Poro paine! ?Uri iꞌoe, mwane paine o ko sare hodalie aeꞌaeku?”

⁷ A Jisas e aalamie, oto ko teꞌuri, “Oto molana o kaꞌa lio saie ike nga taa no ko esuie, taꞌe aana nga maholo o ke si lio saie taane.”

⁸ Oto a Pita ko teꞌuri hunie, “!O saꞌa roroꞌa hodalie ike aeꞌaeku oto ooꞌoo!” A Jisas e aalamie a Pita, oto ko teꞌuri, “Mala uri nou kaꞌa hodalie oto e ro aeꞌaemu, iꞌoe nga pwaarongoisuli ineu haꞌike loꞌu.”

⁹ Oto a Saemon Pita ko si teꞌuri hunie, “Ko urine, Poro paine, nge o ke suꞌuri hodalie mola e ro aeꞌaeku, taꞌe o ke hodalie noꞌone e ro kiꞌiku na pwauku.”

¹⁰ A Jisas e aalamie, oto ko teꞌuri, “Iini e loto ahu oto, sapena e rereꞌa oto. Maholo ko lae hailiu, nge e ro aeꞌaena mola ke si hodaliꞌi loꞌu na e rereꞌa taꞌingelu oto loꞌu. Iꞌomu, saemiu e rereꞌa mango oto, taꞌe ahutemiu haꞌike.”

¹¹ A Jisas e saie oto a tei kei pweloa, na aena urine e si unue uuri, “Ahutemiu omu kaꞌa mani rereꞌa ike.”

¹² Oto maholo e hodalie aeꞌaeda mango, e si hoꞌosie loꞌu toꞌoni tetewa ingeie, na ko lai iiꞌo loꞌu i aano aana leu kire ko ngeu aana. I leune a Jisas ko si teꞌuri, “?Uri omu saie taane mei ola nge nou si esuie huniꞌomu ie?

¹³ Omu ko sasaieu aana ‘Haꞌa-uusuli’ na ‘Aalaha,’ na e toꞌohuu oto, aena aana ineu nou urine oto.

¹⁴ Oto ineu, Aalaha iꞌomu na Haꞌa-uusuli iꞌomu, nou si haꞌamwai-mweiꞌaau huni hodalie oto aeꞌaemiu. Oto iꞌomu, omu ke hoda-hodalie aeꞌaemiu heiliu noꞌone urine.

¹⁵ Aana nga taa nou esuie ienini e neꞌie oto nga haꞌamalanga huniꞌomu, hunie omu ke haimaanie tolahaku, na omu ke haꞌamwai-mweiꞌaꞌomu mola hunie omu ke peꞌi-peꞌiꞌomu heiliu.

¹⁶ No ko unue toꞌohuu oto huniꞌomu uri nga koni-konihe e kaꞌa paine ike loꞌu liutaa aana Aalaha ingeie, wa hurulaꞌaa ke liutaa aana iini e uusungeꞌinie.

¹⁷ Omu saie oto walu ola ienini, oto omu ke asuiꞌi. Aana a God kei haꞌadianaꞌaꞌomu haahiꞌi.”

A Jisas E Ere Lalai I Sulie Pwelolana

¹⁸ Oto a Jisas e heꞌi unue loꞌu uuri, “Taꞌe nou kaꞌa ere ike i sulie ahutemiu eena, aana nou saie mola mo iini nou lio hilisire. Taꞌe Uusu-uusu Maaꞌi nge e unue uuri, Iini ko ngeu tararuru peꞌieu nge kei pweloau oto, Sam 41:9 ko karaꞌi oa oto ienini.

¹⁹ Oto no ko holaꞌi unue oto nga taa kei reu oodoiꞌomu, hunie uri ko si reu na omu ke hiiwalaimoli aana uri ineu oto nou iiꞌo huu.

²⁰ No ko unue oto huniꞌomu uri a tei ko tekuhie nga iini no ko uusungeꞌinie wau, nge ko tekuhieu noꞌone oto. Na a tei ko tekuhieu, ko tekuhie noꞌone iini e uusungeꞌinieu mei.”

²¹ Oto i purine a Jisas e ere mango urine, saena ko si hiꞌe, na ko ere haadaꞌi oto uuri, “No ko unue oto toꞌohuu huniꞌomu uri nga iini hikemiu oto kei pweloau.”

²² Oto mo pwaarongoisuli ko si toꞌomaaire hailiu aana kire kaꞌa saie ike iini a Jisas ko ere i sulie.

²³ Na ngaeta iini aana mo pwaarongoisuli, iini nge a Jisas e manata diana hiitoꞌo hunie, e iiꞌo mola i sulie a Jisas.

²⁴ Oto a Saemon Pita e salohie aana kiꞌine na ko unue uuri, “O ke dolosi kaꞌu aana. ?A tei ni ko ere-ere oalana?”

²⁵ Oto pwaarongoisuli ngeena e ada karaꞌinie a Jisas, ko si dolosi uuri, “?Poro paine, a tei mwane ni ngeena?”

²⁶ A Jisas e aalamie ko si teꞌuri, “Iini nge ne kei toongaꞌinie mei bred i laona nime na ne kei niie hunie, a mwaena otona.” Oto e da mei bred, ko toongaꞌinie i laona nime, ko si niie hunie a Jiudas Iskariot, kalena a Saemon.

²⁷ Oto mola i purine a Jiudas e hele aana mei bred ngeena mango, a Pwelu Eero-eero e si sili i lalo aana. Oto a Jisas ko si teꞌuri hunie, “Nga taa o ko sare asuie, o ke asuie oto lau-leu.”

²⁸ Nga taꞌa-taꞌa iini hikana mwala ko ngeu ngeena na e kaꞌa saie loꞌu uri aena nga mei taa nge a Jisas e ere urine hunie a Jiudas aana.

²⁹ Ngaeta mo iini aana mo pwaarongoisuli kire loꞌongaꞌinie e ere urine aena aana a Jiudas mone ko lio i sulie mei toꞌoha ikire, oto ohe a Jisas e unue hunie uri ke lai holie nga mo ola kire saetoꞌo aani hunie houlaa, wa huni niie nga mo ola hunie kira maitale.

³⁰ A Jiudas e hele aana mola mei bred nge a Jisas e niie hunie, oto e tolana iisitaa oto i sinaha. Na e rodo oto.

A Jisas E Ere Lalai Uri A Pita Kei Taateingeꞌinie

³¹ Oto i purine a Jiudas e iisitaa, a Jisas ko si teꞌuri, “Oto molana a God kei haataꞌinie manikuluhaꞌaku a Kale Ni Iinoni, na lio sailana manikuluhaꞌana a God kei lae oto noꞌone aana nga taa ineu a Kale Ni Iinoni ne kei esuie.

³² Na aana ne kei haataꞌinie nanamanga na manikuluhaꞌana a God, nge a God ke si haataꞌinie manikuluhaꞌaku a Kale noꞌone, na kei esuie oto molana.

³³ “Maeni mwela ineu, nou saꞌa iiꞌo tewa ike loꞌu peꞌiꞌomu. E saꞌa tewa oto, na omu kei tola haitaleau, taꞌe omu saꞌa oodoieu ike. Aana no ko unue loꞌu huniꞌomu nga taa nou unue kaꞌu hunie mo naꞌohai mwane mo Jiu, uri kire saꞌa roroꞌa ni lae ike aana leu no ko lae aana ie.

³⁴ “Oto ie no ko niie haꞌatolanga haalu huniꞌomu. Omu ke manata diana huniꞌomu heiliu. Mala oto ineu, nou manata diana kaꞌu huniꞌomu, nge iꞌomu noꞌone omu ke manata diana huniꞌomu urine.

³⁵ Mala uri omu kei manata diana huniꞌomu heiliu urine, nge ahutana mwala ke si saie uri iꞌomu mo pwaarongoisuli ineu toꞌohuu.”

³⁶ Oto a Saemon Pita ko si teꞌuri hunie a Jisas, “?Poro paine, oto iꞌoe, o ko lae i tei?” A Jisas e aalamie, oto ko teꞌuri, “Leu no ko lae aana ie, o saꞌa lae ike i sulieu aana oto molana, taꞌe o ke si lae taane i sulieu aana nga maholo.”

³⁷ Oto a Pita ko dolosi aana uuri, “?Poro paine, e ue kaꞌu nou kaꞌa sai lae peꞌiꞌo oto molana? !Nou mwaꞌe-mwaꞌe mola huni mae honotamu!”

³⁸ Oto a Jisas e aalamie, ko teꞌuri, “?Uri o mwaꞌe-mwaꞌe taane toꞌohuu huni mae honotaku? No ko unue toꞌohuu oto huniꞌo uri i naꞌona kue kei ngara i rodo siꞌiri, o kei saronai taateingeꞌinieu haꞌa-oolu uri o kaꞌa manataꞌinieu ike.”