Tataroha Diana I Sulie A Jisas Kraes Nge A Jon E Uusue 11 - Tataroha Diana

A Lasaros E Mae

^1-2 Oto nga mwane satana a Lasaros e oꞌoꞌo peꞌie e ro keni eesine, a Meri na a Maata, aana ngaeta huilume satana i Betani aana poꞌo ni henue i Jiudia karaꞌinie huilume paine i Jerusalem. A Meri ienini, ingeie nge keni e huie aeꞌaena a Jisas aana rumu e tohungei wesu diana, na e hulo aꞌate aana aeꞌaena aana iihune pwaune. Oto a Lasaros ngeena ko mweri,

³ na e ro mwaasine keni kirerue hai uusungeꞌi hunie a Jisas uuri, “Poro paine, iini o manata diana hunie ko mweri.”

⁴ Maholo a Jisas e rongo urine, e si teꞌuri, “Mwaringe ngeena kaꞌa ola ike hunie a Lasaros ke maesie, taꞌe ko reu urine huni haataꞌinie manikuluhaꞌana God na huni haꞌamanikuluꞌaa a Kalena.”

⁵ A Jisas e manata diana hunie a Maata na keni eesine a Meri, na mwane aasiderue a Lasaros,

⁶ oto aena urine, maholo e rongoa uri a Lasaros ko mweri, e si heꞌi iiꞌo loꞌu e ro hai dinge wau i leune.

⁷ Oto purihaꞌana, ko si unue hunie mo pwaarongoisuli uuri, “Kolu ke aalihoꞌi loꞌu hunie poꞌo ni henue i Jiudia.”

⁸ Oto mo pwaarongoisuli ko aalamie a Jisas uuri, “Haꞌa-uusuli, mo naꞌohai mwane mo Jiu oto wau na hule aana kire ko eriꞌapasie uri kire ke uuꞌi maesiꞌo aani heu mola aana mo dinge e si mango haona. ?Oto uri o ko sare aalihoꞌi loꞌu taꞌau i saada?”

⁹ Oto a Jisas ko si teꞌuri hunire, “Mwaanie omu meꞌu-meꞌu, aana maholo haꞌike ue hunie sato ke suu ni ngeena. A Mamaꞌa e holosie maholo ineu huni esu nana, mala e holosie noꞌone uri ke dai-dengi hunie aawalai maholoi sato mwana rue suli dinge. Oto kira tei ko walo liu maholo e dai-dengi ue, kire saꞌa tataro ike.

¹⁰ Taꞌe a tei ko walo liu aana rodo, e sai tataro mola aena aana nga mei ola hunie ke raa talana haꞌike.”

¹¹ A Jisas e ere mango urine, e si teꞌuri loꞌu hunire, “Malahukaelu a Lasaros ko maꞌahu eelisuu oto, na no ko lae oto huni haꞌalioa.”

¹² Oto mo pwaarongoisuli ko aalamie uuri, “Mala uri ko maꞌahu oto, Poro paine, nge e haataꞌinie uri ko aehota awaa oto.”

¹³ Loꞌongaꞌinge a Jisas aana e ere urine, uri a Lasaros e mae oto, taꞌe ikire mo pwaarongoisuli kire loꞌongaꞌinie uri ko ere i sulie maꞌahunge mola toꞌohuu.

¹⁴ Oto a Jisas ko si unu tahangaꞌinie oodoire uuri, “A Lasaros e mae oto.

¹⁵ Taꞌe no ko ilenimwaꞌe mola uri nou kaꞌa iiꞌo ike i saana, aena aana nga taa ko reu ienini kei peꞌiꞌomu hunie omu ke hiiwalaimoli eeku. Oto kolu ke lae oto i saana.”

¹⁶ Oto a Tomas, nge ingeie ngaeta iini aana e ro iu, e si teꞌuri hunie mo pwaarongoisuli oana, “Kolu ke lae oto noꞌone peꞌie a Haꞌa-uusuli hunie kolu ke mae tararuru oto peꞌie.”

A Jisas Ko Ere Haꞌasusue Mo Keni Eesine A Lasaros

¹⁷ Maholo a Jisas e hule taꞌau i Betani e si rongoa uri kire haitoli aana a Lasaros e hai hei dinge e mango oto.

¹⁸ I Betani e kaꞌa haꞌataulie ike i Jerusalem, ola mala e oolu kilomita mola,

¹⁹ na mwala hunge aana mo naꞌohai uluhe ni iinoni ikire mo Jiu, kire lae noꞌone mai leune i saana Meri na a Maata, huni iiꞌo haꞌasusurerue i purine aasiderue e mae.

²⁰ Maholo a Maata e rongoa uri a Jisas ko lae mai, e si iisitaa honosie, taꞌe a Meri e oore mola hai nume.

²¹ Oto a Maata ko teꞌuri hunie a Jisas, “Poro paine, mala uri o ke iiꞌo i leu, haꞌalaa aasiku e kaꞌa mae ike.

²² Taꞌe nou saie taane uri maꞌalana e urine, na nga taa o kei sukaa aana a God, kei niie mola huniꞌo.”

²³ Oto a Jisas e unue hunie a Maata uuri, “Aasimu kei taꞌelaꞌi na kei meuri oto loꞌu.”

²⁴ A Maata e aalamie a Jisas oto ko teꞌuri, “Nou saie taane uri kei taꞌelaꞌi na kei meuri loꞌu aana dinge ooreta.”

²⁵ Oto a Jisas e si teꞌuri hunie, “Ineu oto iini e sai taꞌelaꞌinie mo iini kire mae oto, na ineu oto aahuꞌine maurihe. Iini ko hiiwalaimoli eeku, maꞌalana e mae oto, taꞌe kei heꞌi taꞌelaꞌi loꞌu.

²⁶ Na taꞌena nga iini e mauri ue na e hiiwalaimoli eeku, e saꞌa heꞌi mae loꞌu. ?Uri o hiiwalaimoli taane urine?”

²⁷ Oto a Maata e aalamie ko teꞌuri hunie, “Iau, Poro paine, nou hiiwalaimoli aana uri iꞌoe oto a Kraes, Kalena God nge a God e uusungeꞌinie mai huni haꞌa-uurie walumalau.”

²⁸ Na maholo a Maata e ere mango urine, e si eelihoꞌi ko lai haꞌarongoa a Meri keni eesine mola mwa-mwanoto uuri, “A Haꞌa-uusuli e hule oto na ko dodolosi ohiꞌo.”

²⁹ Maholo a Meri e rongo urine, oto e tolana taꞌelaꞌi na ko lae oto i saana.

³⁰ A Jisas e kaꞌa hule ike ue mai laona huilume, taꞌe ingeie ue poꞌoi sinaha aana leu a Maata e lai oodoie aana.

³¹ Maholona na mo uluhe ni Jiu ngeena, nge kire iiꞌo peꞌie a Meri huni haꞌasusue, ikire ue hai nume. Oto maholo kire leesie mola a Meri e taꞌelaꞌi na ko iisitaa oto lau-leu, kire si meni lulu i sulie aana kire unue ko lai ngara i saana kilipweꞌu.

³² Taꞌe a Meri e lae mola i saana leu nge a Jisas aana. Maholo e leesie a Jisas oto e si pouruuru i naꞌona, na ko teꞌuri hunie, “Poro paine, mala uri o ke iiꞌo i leu haꞌalaa aasiku e kaꞌa mae ike.”

³³ A Jisas e leesie a Meri ko ngara na mwala peꞌie noꞌone urine, nge saena e si makaka oto aana saehuunge.

³⁴ Oto ko si dolosi aada uuri, “?Omu heitolingeꞌinie i tei?” Na kire aalamie uuri, “Lae mai na o ke leesie, Poro paine.”

³⁵ Oto a Jisas ko ngara ni saehuunge,

³⁶ na maholo kire leesie urine mo Jiu kire ko teꞌuri, “!Leesie kaꞌu! A Jisas e tohungei manata diana hunie a mwane ngeena.”

³⁷ Taꞌe ngaeta mo iini aada ko teꞌuri, “A mwane ie kaꞌu e tahanie maana mwane e ulu. ?Oto e ue kaꞌu e kaꞌa uure honosie a Lasaros mwaanie e mae?”

A Jisas E Taꞌea Lasaros Mwaanie Maenga

³⁸ Oto a Jisas e hule aana kilipweꞌu, na saena e si makaka oto loꞌu. Kilipweꞌu ngeena nga hahale, na hau oto paine kire honoa maa aana.

³⁹ Oto a Jisas ko teꞌuri, “Omu ke taꞌaasie kaꞌu hau ngeena.” A Maata, keni eesine mwane e mae ngeena ko aalamie uuri, “Poro paine, e hai hei dinge oto ko mango aana ienini, na ko kesu oto ni ngeena.”

⁴⁰ Oto a Jisas ko teꞌuri hunie a Maata, “O ke hiiwalaimoli mola, aana nou unue kaꞌu oto huniꞌo uri o ko hiiwalaimoli haꞌalaa, o ke si leesie manikuluhaꞌana a God.”

⁴¹ Kire taꞌaasie hau ngeena mwaanie maana kilipweꞌu, oto a Jisas e lio i lengi ko si teꞌuri, “Mamaꞌa, no ko paalaheꞌo haahie o ko rorongo hunie aarengaꞌinge ineu.

⁴² Nou saie taane uri o ko rorongo hunieu taraureꞌi, taꞌe i tehulaꞌana mwala ienini nge no ko unue walu ola ie uri hunie kire ke hiiwalaimoli aana uri iꞌoe oto o uusungeꞌinieu mei.”

⁴³ Purine e aarengaꞌi mango urine, e si soi peine uuri, “!Lasaros, o ke iisitaa mai!”

⁴⁴ Oto a Lasaros, iini e mae kaꞌu, e si iisitaa mai, na mo sala kire uloa aani ikire ue haahie mo kiꞌine na mo aeꞌaena, na leu haahie maana. Oto a Jisas ko si unue hunire uuri, “Omu ke luhesie mo sala mwaanie sapena, na omu ke toliꞌaasie ke lae-lae.”

Mo Naꞌohai Mwane Aana Mo Jiu Kire Oalaꞌi Huni Horo Maesie A Jisas

⁴⁵ Oto mo iini hunge aana mo Jiu e lae mai saana Meri kire leesie walu ola nge a Jisas e asuiꞌi ngeena, kire si hiiwalaimoli aana.

⁴⁶ Taꞌe ngaeta mo iini aada kire ooli i saana mo Parise na kire haꞌarongora aana nga taa nge a Jisas e asuie.

⁴⁷ Oto mo naꞌohai pris peꞌie mo Parise kire lokoa mwala lei-lei, kire ko si dodolosi uuri, “?Kolu kei ue eena? A mwane ie ko haataꞌinie mo tolimaa nanama aana ko esuie mo huꞌi-huꞌite hunge oto mala iini ie.

⁴⁸ Mala uri kolu kei toliꞌaasie ke lae mola peꞌi esuie walu ola urini, ahutana mwala kei meni hiiwalaimoli oto aana, na kire kei sare asuie ke neꞌi inemauri ikie oolisie inemauri ni Rom. Oto mo Rom kei ooho honosikie, na kire kei lae oto mai oho aasie Nume Maaꞌi Peine ikie, na kire kei horo suuheꞌinie oto ahutaka mo Jiu eena.”

⁴⁹ Aana halisi ngeena, Naꞌohana Mo Naꞌohai Pris satana a Kaiapas. Oto a Kaiapas e si teꞌuri hunire, “!Omu tohungei puꞌosasu oto hiitoꞌo!

⁵⁰ Omu kaꞌa lio saie ike uri e lae otoi diana hunie nga taꞌa-taꞌa iini ke mae mola honotana mwala mwaanie uri ahutana mwala ko meni mae.”

⁵¹ A Kaiapas e kaꞌa loꞌongaꞌinie leune mola tohune. Taꞌe aana ingeie mone Naꞌohana Mo Naꞌohai Pris aana halisine, oto a God e da uri ke holaꞌi unu tahangaꞌinie uri a Jisas kei mae honotana mwala ni Jiu.

⁵² Na e kaꞌa ike mola honotana mo Jiu hahaiteli, taꞌe huni lokoa ahutana mo iinoni a God nge kire iiꞌo tatanga i laona walumalau hunie kire ke neꞌie taꞌa-taꞌa iinoni.

⁵³ Oto uure aana maholo nge a Kaiapas e ere urine, kire si aehota oalaꞌi huni horo maesie a Jisas.

⁵⁴ Aena urine, a Jisas e kaꞌa lae-lae haadaꞌi ike loꞌu i matolana mo henue nge mo mwane paine mo Jiu kire sai leesie. Oto e uure mola mwaanie leune na e lae mola karaꞌinie hanuesala aana huilume i Ifrim. Na e iiꞌo oto i leune peꞌie mo pwaarongoisuli ingeie.

⁵⁵ Oto maholo ko karaꞌinie oto Houlaa Ni Liumwaanie ikire mo Jiu, mo iini hunge aana mo henue hailiu kire hanetaa taꞌau i Jerusalem i naꞌona Houlaa Ni Liumwaanie hunie haꞌarereꞌalada i sulie mo Haꞌatolanga a Mosis.

⁵⁶ Oto mwala ngeena kire ko si lio-lio hunie a Jisas. Na maholo kire loko oto taꞌau i laona lolata aana Nume Maaꞌi Peine, kire ko si dodolosi heiliu aada uuri, “?Ohe kei lae taane mai aana houlaa? ?Wa omu ko loꞌo-loꞌongaꞌi uri taa?”

⁵⁷ Taꞌe mo naꞌohai pris na mo Parise kire niie oto haꞌatolanga uri mala nga iini ko saie leu a Jisas e iiꞌo aana, nge ke haꞌarongora hunie uri kire ke tapolie.