Tataroha Diana I Sulie A Jisas Kraes Nge A Jon E Uusue 1 - Tataroha Diana

A Jisas Ingeie Mei Wala Ni Meurihe

¹ Aana aehotalana walu ola na walumalau haꞌike ue, a mei Wala e pwani iiꞌo oto, na a mei Wala ngeena oto i saana God, na a mei Wala ngeena ingeie tohungei God oto noꞌone.

² Ingeie oto i saana God uure i aehotalana.

³ Haꞌaholalana taꞌena nga ola e si lae noꞌone mola aana. Nga taꞌa-taꞌa mei ola nge haꞌaholalana e lae, e kaꞌa lae ike aahoꞌa aana.

⁴ A mei Wala ngeena oto aahuꞌine maurihe, na maurihe ngeena oto raa-raa hunie mo iinoni aana walumalau.

⁵ A Raa-raa ngeena ko raa i laona rodohono, na rodohono e kaꞌa aꞌailaꞌa ike liutaa aana hunie ke mwaꞌasie.

⁶ Oto a God e uusungeꞌinie nga mwane satana a Jon.

⁷ Na ingeie ienini, e lae mai huni haꞌarongoa mwala aana a Raa-raa ngeena, hunie kire ke mani rongoa tataroha aana, na kire ke hiiwalaimoli aana.

⁸ A Jon maraana, ingeie a Raa-raa ngeena haꞌike, taꞌe e lae mola mai huni ere i sulie a Raa-raa ngeena.

⁹ A Jon e unue uri a tohungei Raa-raa ko lae oto mai laona walumalau, na ingeie oto kei raangie ahutana iinoni i laona walumalau.

¹⁰ A mei Wala ngeena e lae oto mai i laona walumalau, na haꞌaholalana walumalau e lae taane oto aana, taꞌe walumalau e kaꞌa manataꞌinie ike.

¹¹ Maꞌalana tohungana mwala ingeie mo Jiu, taꞌe kire kaꞌa takuhie ike.

¹² Taꞌe ngaeta mo iini kire takuhie taane, na kire hiiwalaimoli oto aana. Oto e asuie uri ikire oto, kire ke neꞌie mo kalena God.

¹³ Kire kaꞌa neꞌi kalena God ike aana hutanga nge e uure mwaanie hari-huninge ni sape i sulie tolaha ni iinoni, taꞌe kire hute haalu oto aana God maraana.

¹⁴ A mei Wala ngeena e lae oto mai na e neꞌi iinoni. E oꞌoꞌo oto i matolameelu na melu leesie oto manikuluhaꞌana, mei menikuluꞌanga oto paine aena aana ingeie oto taꞌa-taꞌa mwela mouteꞌi a God. Ingeie oto ko niie ahutana hahuꞌana manata-diananga a God hunikie, na ko unu-unue ahutana walaimolinge a God hunikie.

¹⁵ A Jon e ere i sulie a mei Wala ngeena, na e soi oto paine uuri, “Iini nge nou ere-ere rarangana kaꞌu ienini, nge nou unue uuri ‘Iini kei lae mai sulieu e paine loꞌu liutaa aaku, aana ingeie e pwani iiꞌo oto na ineu nou kaꞌa hute ue.’ ”

¹⁶ Oto aena aana e tohungei honu aana manata-diananga na walaimolinge, nge ko nii-niie mai ngaeta mo niinge diana loꞌu hunie ke oolisie niinge diana wau i naꞌo ngeena.

¹⁷ Aana waite a God e niie mo Haꞌatolanga hunie a Mosis hunie ke heꞌi niiꞌi loꞌu hunie mwala, taꞌe a Jisas Kraes maraana ko niie mai manata-diananga na walaimolinge hunikie.

¹⁸ Nga taꞌa-taꞌa iini e kaꞌa leesie ike ue a God. Taꞌe taꞌa-taꞌa mwela mouteꞌi ingeie ko oꞌoꞌo peꞌie Aamana, na aana ingeie tohungei God noꞌone, ingeie oto e haataꞌi diana aana a God hunikie.

A Jon Loto Maaꞌi E Unue Uri A Jisas Oto A Haꞌa-uuri Nge Kire Haaraꞌinie Noꞌone A Kraes

¹⁹ Oto laladonga i sulie laeliwalanga a Jon e lae uuri. Mo naꞌohai mwane ni Jiu i Jerusalem kire uusungeꞌinie ngaeta mo pris na ngaeta mo iini aana komu a Livae i saana Jon huni dolosi aana uuri, “?A tei ni iꞌoe? ?Mwaanie ohe iꞌoe a Kraes?”

²⁰ Oto a Jon e kaꞌa eero ike, taꞌe e tola tahangaꞌinie mola uuri, “Ineu a Kraes haꞌike.”

²¹ Oto kire ko heꞌi dolosi loꞌu aana uuri, “?Oto iꞌoe a tei keꞌu? ?Wa ohe iꞌoe a Propet Elaeja?” Oto a Jon ko aalamire mola uuri, “Ineu haꞌike.” Oto kire ko dolosi loꞌu aana uuri, “?Mwaanie ohe iꞌoe oto propet paine mala a Mosis nge emi ko maa-maaꞌoohie?” Oto ko aalamire loꞌu uuri, “Haꞌike noꞌone.”

²² Aena urine kire ko si teꞌuri hunie, “?Oto iꞌoe nga iinoni uri taa kaꞌu? O ke unu diana aana oodoiꞌemeelu hunie melu ke lai haꞌarongoa mo iini kire uusungeꞌiniꞌemeelu mei.”

²³ Oto a Jon e si aalamire mola aana walana Propet Aesaea uuri, “Ineu kaꞌu oto iini ko soi-soi peine i laona hanuesala uuri, ‘Omu ke haꞌa-oodohie tala loosie laenga mai a Aalaha.’ ” Aesaea 40:3

²⁴ Oto mo iini aana pulitaa ngeena nge ikire mo Parise kire uusungeꞌinire mai ngeena,

²⁵ kire ko si dolosi aana a Jon uuri, “?Mala uri iꞌoe a Kraes haꞌike wa a Elaeja wa a propet paine ngeena, na e ue kaꞌu o ko loo-loto maaꞌi oto aana mwala?”

²⁶ Oto a Jon ko aalamire uuri, “Ineu, nou toꞌo aana nanamanga taane huni loto maaꞌi aana mwala aani wei. Taꞌe nga iini omu kaꞌa lio saie ike uri ingeie a tei, ingeie taane mola i matolakaelu.

²⁷ Ingeie oto iini nge no ko deu aakau aana tala loosie, na ingeie oto e tohungei peine loꞌu liutaa aaku, hule aana ineu, na nou kaꞌa diana ike malisine ne ke asu mala koni-konihe huni luhesie hoꞌohaahiꞌae ingeie.”

²⁸ Walu erenga ienini kire rau oto wau aana leu a Jon e loto maaꞌi aana, nge e karaꞌinie huilume i Betani poꞌo wau hatarie sato pwaa aana wai i Jodan.

A Jisas Oto Iini Nge Ko Taꞌaasie Oorahaꞌaa Aana Walumalau

²⁹ Oto hai dinge loꞌu mola i purine, a Jon e leesie a Jisas ko lae mai saana, oto ko si teꞌuri, “!Lio kaꞌu! A mwane ngeena, ingeie oto Kalei Sipu a God, aena aana ingeie ni ko taꞌaasie oorahaꞌaa aana walumalau.

³⁰ Iini nge nou ere-ere i sulie kaꞌu oto ngeena, aana maholo nou unue uuri, ‘Nga iini kei lae mai sulieu, taꞌe ingeie e paine loꞌu liutaa aaku aana ingeie e pwani iiꞌo oto na ineu nou kaꞌa hute ue.’

³¹ Ineu na nou kaꞌa saie ike noꞌone holaꞌinaꞌo uri ingeie a tei. Taꞌe maꞌalana e urine nou lae peꞌi loo-loto maaꞌi aana mwala mola aani wei loosie maholo kei hule, hunie uri mwala ni Israel kire ke si lio saie uri ingeie a tei maholo ko hule ngeena.”

^32-33 Oto a Jon ko si unu tahangaꞌinie hunie mwala uuri, “A God e uusungeꞌinieu mei huni loto maaꞌi aana mwala aani wei loosie iini nge kei lae ue mai. Aana maholona, ineu nou kaꞌa sai diana aana ike ue uri ingeie a tei. Taꞌe a God e unue hunieu uuri, ‘Iini o ko leesie Liꞌoa Maaꞌi ko siho i lengine na ko iiꞌo oto i lengine, ingeie otona iini kei loto maaꞌi aana mwala aana Liꞌoa Maaꞌi.’ Oto no ko unu tahangaꞌinie uri ingeie oto mwane nou leesie Liꞌoa Maaꞌi e siho mai uure i Lengi oto mala hiroikuu na e iiꞌo oto i lengine.

³⁴ Nou leesie oto, na no ko unue oto huniꞌomu uri ingeie oto Kalena God.”

E Ro Pwaarongoisuli Kire Talaꞌai Lulu I Sulie A Jisas

³⁵ Oto hai dinge loꞌu i sulie, a Jon e uure loꞌu weu i leune peꞌie ngaeta ro pwaarongoisuli ingeie.

³⁶ Maholo e leesie a Jisas ko tapaliu oto ko teꞌuri hunie e ro mwaena, “!Lio kaꞌu! Kalei Sipu a God, kaꞌu oto waune.”

³⁷ E ro pwaarongoisuli ngeena e rongoa a Jon ko ere urine, oto kirerue aaliꞌu, kirerue ko lulu i sulie oto a Jisas.

³⁸ A Jisas e aaliꞌu na ko leesie e ro mwane ko lae i sulie. Oto ko dolosi aadarue uuri, “?Nga taa more saetoꞌo aana?” Oto kirerue ko aalamie uuri, “?O ko oꞌoꞌo i tei, Rabae?” (Mei wala “Rabae” ngeena, ngaeta mei wala aana erenga mo Jiu, loꞌongaꞌinge aana uri “Haꞌa-uusuli.”)

³⁹ Oto a Jisas ko teꞌuri hunirerue, “More ke lae mai na more ke leesie oto maraamoreꞌi.” E ere urine mola hunire ola mala maholo sato e ngara aawala haahuu i hoꞌowa aana hai dingena. Oto kirerue si lae peꞌie hunie leu nge ko oꞌoꞌo aana, na kirerue ko iiꞌo oto peꞌie aana hai dinge ngeena.

⁴⁰ Ngaeta mwane aana e ro mwane ngeena, a Andru, aasine a Saemon Pita.

⁴¹ Oto a Andru ko tolana loꞌohie oto aasine, a Saemon, na ko haꞌarongoa oto uuri, “Mere lio oodoie oto a Mesaea.” (Mei wala “Mesaea” ngeena, ngaeta mei wala aana erenga mo Jiu, loꞌongaꞌinge aana uri “Kraes,” iini nge a God e haiholotaꞌi ni uusungeꞌinie mai huni haꞌa-uurie walumalau.)

⁴² Oto a Andru e toolea Saemon i saana Jisas. A Jisas e toꞌomaaie a Saemon, e si teꞌuri, “Iꞌoe oto a Saemon kalena Jon, taꞌe haaraꞌinilemu kei lae oto aana a Sipas.” (Satai ola aana erenga mo Jiu ngeena e sada mola peꞌie satai Pita aana erenga ni Krik, na loꞌongaꞌinge aana uri “a Hau” aana a Jisas e saie uri a Pita kei neꞌie mwane kei uure maꞌutaꞌa diana mala hau e susu.)

A Jisas E Soie A Pilip Na A Nataniel Huni Lulu I Sulie

⁴³ Oto hai dinge loꞌu i sulie, a Jisas e neꞌisae huni lae hao i Kalili. E lio oodoie a Pilip, oto ko teꞌuri hunie, “O ke lae mai lulu i sulieu.”

⁴⁴ A Pilip ingeie mwane ni Betsaeda, huilume noꞌone a Andru na Pita.

⁴⁵ Oto a Pilip e lae haitalea a Nataniel, ko si teꞌuri hunie, “Melu lio oodoie oto a Kraes nge a Mosis e uusu-uusu i sulie i laona uusu-uusu aana mo Haꞌatolanga, na mo propet noꞌone kire uusu-uusu i sulie. Ingeie oto a Jisas ni Nasaret, kalena a Josep.”

⁴⁶ Oto a Nataniel ko dolosi aana uuri, “!Haꞌike eena! ?Uri nga mei ola diana uri taa ni kei uure mai mwaanie i Nasaret?” A Pilip ko aalamie uuri, “Lae mai na o ke leesie oto maraamu.”

⁴⁷ Maholo a Jisas e leesie a Nataniel ko lae mai takoie, ko si ere oalana uuri, “A mwane ie tohungei mwane ni Israel toꞌohuu nge e saꞌa hahuꞌei eeroa ike nga iini.”

⁴⁸ Oto a Nataniel e dolosi aana Jisas uuri, “?O manataꞌinieu keꞌu uri taa?” A Jisas e aalamie uuri, “Nou leesiꞌo kaꞌu weu i aeꞌaena ai fik, na a Pilip e kaꞌa soiꞌo ue.”

⁴⁹ Oto a Nataniel ko si teꞌuri hunie a Jisas, “!Poro paine, iꞌoe oto Kalena God! !Iꞌoe oto inemauri nana mo Israel!”

⁵⁰ Oto a Jisas ko dolosi aana a Nataniel uuri, “?Uri o ko hiiwalaimoli mola aena aana nou unue huniꞌo uri nou leesiꞌo i mamalutana ai fik ngeena? O kei leesie taane mo ola paine loꞌu liutaa aana leu ienini.”

⁵¹ Na ko heꞌi unue loꞌu hunire uuri, “No ko unue oto toꞌohuu huniꞌomu uri omu kei leesie mo ola paine loꞌu liutaa, hule aana omu kei leesie i Lengi kei taha na mo ensel a God ko walo-waloliu taꞌau na mai aano i seeku a Kale Ni Iinoni.”