Jemes 5 - Tataroha Diana

Kira Toꞌo-toꞌo Ke Suꞌuri Haꞌa-haꞌamaꞌusie Kira Maitale

¹ Iꞌomu mwala omu toꞌo-toꞌo, omu ke rongo i sulie nga taa no ko unue huniꞌomu. Omu ke sae-saehuu na omu ke ngara-ngara, sulie aaelanga kei tooleꞌomu oto.

² !Lio kaꞌu! Toꞌo-toꞌonga iꞌomu e osalaꞌa oto, na mo toꞌoni iꞌomu mo kokorosi kire ngauꞌi oto.

³ Mo kol na mo siliva iꞌomu kire rastaa aaela oto. Na rastaa aani ngeena kei ngeue hasiꞌomiu mala dunge ko weru, aena aana ikire oto kire kei unu tahangaꞌinie aana dinge ooreta uri omu takalo. Omu ko durue ue mo toꞌo-toꞌonga iꞌomu, taꞌe mo dinge ooreta oto ie.

^4-5 Omu ko haꞌapoteꞌomu maraamiu mala poo huni horoꞌilana. Omu eeroa mwala kire auꞌesu nemiu, aana omu kaꞌa holire ike. Kire soꞌo konie mo hohola iꞌomu peꞌie ngaranga aana omu kaꞌa holire. Na a God Hahuꞌana Nanama e rongoa oto ngaranga ikire. Mauringe iꞌomu mai aano e honu oto mola aana toꞌo-toꞌonga, na omu ko deu mola i sulie ahutana mo ola mala saemiu.

⁶ Omu leie kira oodotaꞌi hunie maenga, na omu horoꞌire, taꞌe ikire, kire kaꞌa uure honosiꞌomu ike.

O Ke Maaꞌoohi Susutoꞌo

⁷ Maeni eesiku, omu ke maaꞌoohi susutoꞌo lai hule aana a Jisas kei ooli loꞌu mei. Ikolu, kolu meni saie uri mo mwane nge ko esuie hohola kire sai maaꞌoohi susutoꞌo hule aana nemo kei da hohola ikire ke repo diana malisine soꞌokoninge.

⁸ Na iꞌomu noꞌone omu ke maaꞌoohi susutoꞌo urine. Na omu ke suꞌuri aakohe aani maaꞌoohinge susutoꞌo, sulie e karaꞌinie oto Aalaha ikie kei ooli mei.

⁹ Omu ke suꞌuri upwesiꞌomu heiliu, maeni eesiku, mwaanie a God e leiꞌomu. Na leinge e karaꞌinie oto kei lae mai.

¹⁰ Kolu meni saie oto, maeni eesiku, uri mo propet maaꞌi nge kire ere hunie a God oto i naꞌo, sapesalunge paine e hule oto aada. Taꞌe ikire, kire maaꞌoohi susutoꞌo mola, na e malisine ikolu, kolu ke lulu i sulie uuri-uurite ikire aani maaꞌoohi-susutoꞌonga noꞌone mala ikire.

¹¹ Kolu unue uri kire iiꞌo ni saediananga, sulie kire kaꞌa mamalo ike mwaanie asunge a God. Omu rongoa kaꞌu uri a Job e maaꞌoohi susutoꞌo, na omu saie taane uri a God e nii sapeie loꞌu hunie aana toꞌo-toꞌonga ingeie i puri. Oto omu meni saie oto uri a God e honu aana aamasinge na manata-diananga.

O Ke Haro Loꞌongaꞌi Diana Kaꞌu, Nge O Ke Si Ere

¹² Maeni eesiku, ngaeta mei ola loꞌu e paine liutaa, nge uri omu ke suꞌuri tohe aana nga taa omu ko unue. Suꞌuri tohe takoie taꞌau i Lengi, wa takoie mai aano, wa taꞌena nga ola loꞌu. Taꞌe mala omu ko neꞌisae ni unue, “Iau,” nge omu ke unue mola, “Iau,” wa mala omu ko neꞌisae ni unue, “Haꞌike,” nge omu ke unue mola “Haꞌike,” mwaanie leilemiu e lae.

Aarengaꞌinge E Toꞌo Aana Nanamanga Paine

¹³ Na mala uri nga iini eemiu ko lae oodoie aasanga, nge ke aarengaꞌi. Wa uri nga iini eemiu saena e ilenimwaꞌe, nge ke kana ni paalahenga.

¹⁴ Na mala nga iini eemiu nge ko, nge ke haꞌatola hunie mo rato aana soihaadaꞌinge, hunie kire ke aarengaꞌi talana, na kire ke suuhie aani rumu aana satana a Jisas Aalaha ikie.

¹⁵ Aana aarengaꞌinge aani hiiwalaimolinge e sai haꞌa-uurie mo mae-maeaꞌa, aana a God kei haꞌa-uurie na kei saeꞌaasie mo oorahaꞌaanga ingeie.

¹⁶ Aena urinena, nge omu ke haꞌahoue mo oorahaꞌaa iꞌomu oodoiꞌomu heiliu, na omu ke aarengaꞌi talamiu heiliu hunie omu ke awaa. Sulie aarengaꞌinge mwane oodotaꞌi e tohungei nanama, na e sai esuie mo ola paine.

¹⁷ Mala a Elaeja, ingeie ngaeta mwane noꞌone mola mala ikolu. Ingeie e aarengaꞌi susuleꞌi hunie ke suꞌuri nemo, oto e kaꞌa nemo ike hunie oolu helisi na e oono waro-waro.

¹⁸ Oto a Elaeja e heꞌi aarea God loꞌu hunie ke nemo, na nemo e teke loꞌu uure i lengi, oto mwakano e si eehu diana loꞌu.

O Ke Tola Aalihoꞌi Aana Mo Iini Kire Lae Takalo Mwaanie Walaimolinge

¹⁹ Maeni eesiku, mala uri nga iini hikemiu ko lae takalo mwaanie walaimolinge, nge omu ke tola aalihoꞌi loꞌu mei aana.

²⁰ Sulie omu saie oto uri mala nga iini ko tola aalihoꞌi mei aana nga iini e oorahaꞌaa mwaanie mo takalonga ingeie, nge ko haꞌarereꞌaa mwaanie taꞌena nga oorahaꞌaa ingeie na ko haꞌa-uurie maurihaꞌana mwaanie maenga.