Jemes 1 - Tataroha Diana

Mei Wala Ni Saediananga

¹ Saediananga mwaanieu a Jemes, koni-konihe a God na a Jisas Kraes Aalaha ikie, huniꞌomu ahutemiu mwala a God nge omu oopa hailiu i laona walumalau.

Mo Malaahonga Ko Haꞌa-aꞌailaꞌaa Hiiwalaimolinge Ikie

² Maeni eesiku maaꞌi, omu ke ilenimwaꞌe mola maholo mo malaahonga hai-aaopaꞌi kei haro hite aamiu,

³ aena aana omu saie oohongilana hiiwalaimolinge iꞌomu kei esuie hiiwalaimolinge iꞌomu ke si aꞌailaꞌa loꞌu, na kei peꞌiꞌomu hunie omu ke asu susuleꞌi.

⁴ Na e malisine omu ke asu susuleꞌi taraureꞌi hunie omu ke iiꞌo oodotaꞌi na walamango, na nga mei ola aana tolaha diana e saꞌa ooreꞌomu ike.

⁵ Taꞌe mala nga iini hikemiu ko saetoꞌo aana saenanaunge, nge ke suke aana a God. Sulie a God e mwaꞌe-mwaꞌe huni nii, na e sai niie saenanaunge huniꞌomu, na e saꞌa asuie ike omu ke hii aaela aani sukanga.

⁶ Taꞌe mala o ko suke aana God, o ke hiiwalaimoli aana haꞌalaa. O ke suꞌuri loꞌongaꞌinie o kei noru dile aana, sulie iini ko hii mwaka e urihana naho nge ko aaꞌaro hailiu wai eesi aana iiru.

⁷ Iini urine ke suꞌuri loꞌongaꞌinie uri kei lio oodoie nga mei ola uure mwaanie a God.

⁸ Sulie neꞌisaenga ingeie e rue-ruaꞌa, nge tolahana e sai esu olo-olo mola i sulie taꞌena nga ola.

Kira Toꞌo-toꞌo Ke Suꞌuri Toohaꞌinire Maraada

⁹ Mala uri nga iinoni a Kraes ko meitale, nge ke ilenimwaꞌe mola aana e saie uri a God e niie oto hunie mo toꞌo-toꞌonga ni Lengi.

¹⁰ Taꞌe mala uri nga iini loꞌu e toꞌo-toꞌo, nge ke ilenimwaꞌe mola aana e tohungei meitale hule aana e saetoꞌo aana oto a God ke niie oodotaꞌinge hunie. Sulie mwane nge e toꞌo-toꞌo, mei ola kei mae mola mala tatakana hahalisi.

¹¹ Maholo sato ko hane, oto ko madoro na ko weruhie hahalisi. Oto tatakani ko eehuhu na launihaꞌani ko waetaꞌi oto. E urine loꞌu mola aana mwane e toꞌo-toꞌo. Maholo e kaꞌa loꞌongaꞌinie ike maenga taꞌe ko loꞌongaꞌi hiitoꞌo mola i sulie tari-olanga ingeie, nge kei mae mola.

Mo Malaahonga Hunie Oorahaꞌaa E Kaꞌa Uure Ike Mwaanie A God

¹² Mala uri nga iini nge oohongilana ko lae na ko uure maꞌutaꞌa mola, nge ke ilenimwaꞌe mola. Aena aana i purine oohongilana hiiwalaimolinge ingeie ko lae urine, nge a God kei waaie aana rorodara ni meurihe huu, nge e haiholotaꞌinie hunie mo iini nge kire manata diana hunie.

¹³ Mala malaahonga ko hule aana nga iini huni deu aaela, nge iinonine ke suꞌuri ere uuri, “A God ni nge ko malaahongaku ie.” Aena aana nga mei ola e saꞌa malaahongana ike a God huni esuie aaelanga. Na a God maraana e saꞌa malaahongana ike nga iini noꞌone hunie aaelanga.

¹⁴ Taꞌe aaelanga nge iinoni e saetoꞌo aana, mei aaelanga ngeena nge ko malaahongana iinonine. Aena aana saehanalinge aaela ingeie ni e naꞌona huni esuie aaelanga ngeena.

¹⁵ Na saehanalinge ko lodoa na ko haꞌahutaa oorahaꞌaanga. Na maholo oorahaꞌaanga ko peine, oto ko haꞌahutaa loꞌu maenga.

¹⁶ Maeni eesiku diana, omu ke suꞌuri toliꞌaasie nga iini ke eeroꞌomu aana mo haꞌananaunge ienini.

¹⁷ Ahutana mo ola diana na mo ola oodotaꞌi kire uure mai mwaanie i Lengi, mwaanie iini nge e haꞌaholaa sato, na waro-waro, na mo heeꞌu. Na raa-raangana e kaꞌa urihana ike mo ola ngeena aana kire ko hei-hei-oolisi mola, taꞌe tolahai ola diana ingeie e saꞌa kele hai-oolisi ike oto ooꞌoo.

¹⁸ Uure oto aana hari-huninge ingeie, nge kolu neꞌi kalena. E haꞌahutekie aana mei wala toꞌohuu ingeie, hunie kie ke mani neꞌie oto naꞌohai ola aana ahutana mo ola nge e haꞌaholaꞌi.

Mwaanie O Rorongo Aasie Mola Walana God, Taꞌe O Ke Tola I Sulie

¹⁹ Maeni eesiku, omu ke loꞌongaꞌi kohi i sulie mo ola ienini. Omu ke mwaꞌe-mwaꞌe huni hehurongo, na haro loꞌongaꞌi omu ke si ere. Suꞌuri saewasu oto lau-leu,

²⁰ aena aana saewasunge mo iinoni saꞌa roroꞌa ni peꞌiꞌomu ike hunie iiꞌonga aana mauringe diana nge a God e saetoꞌo aana.

²¹ Oto omu ke neꞌi aasie mwaaniꞌomu ahutana mo ola tataꞌala na taꞌena nga ola aaela nge ko peine hailiu. Na omu ke haꞌamwai-mweiꞌaꞌomu hunie omu ke tola i sulie mo haꞌananaunge maaꞌi a God nge hasileni e lae oto i manatamiu, aana kire sai haꞌa-uuriꞌomu.

²² Taꞌe omu ke asuie nga taa nge a God e unue huniꞌomu, na omu ke suꞌuri talei rorongo aasie mola, aana ko urine nge omu ko haꞌapweuꞌomu mola maraamiu ni ngeena.

²³ Mala uri nga iinoni ko rongoa mo haꞌananaunge aana walana God, na e kaꞌa dau oto i suliꞌi, nge e urihana mwane e leesie maana i laona iiro-iiro

²⁴ taꞌe e kaꞌa asu kohie nga mei ola e si leesie ngeena, aana e lae na ko tolana pulongosie oto maana e lio uri taa.

²⁵ Taꞌe a God e sai haꞌadianaꞌaa mo iini nge ko lio hahuroto i laona haꞌatolanga ingeie. Haꞌatolanga ngeena e tohungei diana, na e sai luhesie mo iinoni hunie kire ke iiꞌo luhetaꞌi mwaanie oorahaꞌaa. Oto iinoni nge ko rongo hunie mo haꞌananaunge a God, na ko loꞌongaꞌi i suliꞌi taraureꞌi, na e saꞌa pulongosie nga taa e rongoa, taꞌe ko hele i sulie nga taa a God e unue, nge a God e sai haꞌadianaꞌaa aana nga taa nge ko esuie.

O Ke Haꞌapainaꞌaa A God Aana Tolaha Toꞌohuu

²⁶ Mala nga iini ko loꞌongaꞌinie uri ingeie nga mwane aana soihaadaꞌinge, taꞌe e kaꞌa kinetaꞌinie erenga aana meana, nge urine ko talei haꞌapweue mola maraana, na asunge ingeie aana soihaadaꞌinge, nga ola toꞌohuu haꞌike.

²⁷ Taꞌe asunge toꞌohuu aana soihaadaꞌinge nge a God Aamaka e saetoꞌo aana oto uri huni peꞌie mo reiꞌinge, na mo nao nge kire maitale, na huni kinetaꞌiniꞌo maraamu mwaanie tataꞌalanga aana walumalau.