Hibru 8 - Tataroha Diana

A Jisas Oto Hahuꞌana Naꞌohai Pris Ikie

¹ Tohungei loꞌongaꞌinge aana nga taa melu ko unu-unue huniꞌomu e uuri. Kie toꞌo aana oto Hahuꞌana Naꞌohai Pris nge ko iiꞌo aana iiꞌo-iiꞌoha nanama i pwalo-pwalo aana naunekume ni menikuluꞌanga a God taꞌau i Lengi.

² Ingeie ko esu mala Hahuꞌana Naꞌohai Pris i laona tohungei leu maaꞌi ngeena, i laona tohungei nume maaꞌi taꞌau i Lengi nge nga iinoni e kaꞌa asuie ike, taꞌe a God nge e asuie.

³ Ahutana mo naꞌohai pris lio hilisilada e lae hunie kire ke mani niie mo uuraaꞌinge na uunu-olanga i saana God. Oto e malisine uri Hahuꞌana Naꞌohai Pris ikie ngeena ke toꞌo aana noꞌone nga mo ola huni niiꞌi.

⁴ Mala uri Hahuꞌana Naꞌohai Pris ikie ngeena ke iiꞌo mai aano i leu, haꞌalaa e kaꞌa neꞌi pris ike loꞌu, aena aana kie toꞌo aana oto mo pris hunge peꞌikie huni niie mo uuraaꞌinge hunie a God i sulie mo Haꞌatolanga a Mosis.

⁵ Asunge ikire mala mo pris ngeena ola domana mola nunune nga taa e toꞌohuu oto taꞌau i Lengi ni ngeena. Na kie saie oto leune, aena aana maholo a God e unue uri a Mosis ke asuie nume maaꞌi susulu, nge e haꞌapasulie oto uuri, O ke ariꞌapasie oto uri o ke asuie walu ola ke tohungei sada oto mala nga taa nou haataꞌinie aamu taꞌau i lengine toloi henue. Eksodas 25:40

⁶ Taꞌe asunge aana tolahai pris nge niilana e lae hunie a Jisas ngeena, e paine loꞌu liutaa aana taungei esunge nge niilana e lae oto i naꞌo ngeena. Na loꞌu, mei heiholotaꞌinge haalu nge a Jisas e toolea mai mwaanie a God hunie mwala ingeie ngeena, e diana loꞌu liutaa aana iini lalahuꞌe, na kei iiꞌo huu oto aena aana mo tohenga a God ko haꞌamaꞌutaꞌaa.

⁷ Mala uri nga mei ola ke suꞌuri aaela aana haiholotaꞌinge lalahuꞌe ngeena, haꞌalaa nga haiholotaꞌinge haalu e kaꞌa lae ike loꞌu mei puri eena.

⁸ Taꞌe a God maraana e lio saie uri e kaꞌa tohungei diana ike, nge e si teꞌuri, Ko karaꞌinie oto maholo hunie ne kei esuie nga haiholotaꞌinge haalu peꞌie mwala ni Israel na peꞌie mwala ni Jiuda.

⁹ Taꞌe e saꞌa urihana ike haiholotaꞌinge nge nou esuie peꞌie mo weuwada, maholo nou haꞌa-iisitaangaꞌinire mwaanie i Ijip. Aena aana kire kaꞌa tola i sulie ike haiholotaꞌinge nge nou esuie peꞌire ngeena, na aena leune nge nou si toliꞌaasire.

¹⁰ Taꞌe haiholotaꞌinge haalu nge ne kei esuie peꞌie mwala ni Israel kei uuri. Aana maholo ko lae maine, ne kei neꞌie mo haꞌatolanga ineu i laona manatada, na ne kei uusuꞌi noꞌone loꞌu i laona saeda. Ineu oto ne kei neꞌie God ikire, na ikire kire kei neꞌie oto mwala ineu.

¹¹ Nga taꞌa-taꞌa iini aada e saꞌa haꞌa-uusulie loꞌu nga auhenue ingeie, wa nga aasine hunie ke unue uuri, “Saemu ke tahanie a Aalaha.” !Haꞌike! Taꞌe aana maholona, kire kei meni manataꞌinieu, uure aana mo iini mwei-mwei lai hule aana mo iini e peine.

¹² Ne kei saeꞌaasie hunire mo oorahaꞌaanga ikire, na nou saꞌa heꞌi neꞌisae loꞌu aana mo deu aaelanga ikire. Jeremaea 31:31-34

¹³ Maholo a God e haaraꞌinie mei heiholotaꞌinge ienini uri mei ola haalu, e loꞌongaꞌinie uri mei heiholotaꞌinge nge e asuie holaꞌinaꞌo ngeena, e lalahuꞌe oto. Na taꞌena nga mei ola nge e lalahuꞌe oto na e iiꞌo tewa oto urine, karaꞌinie oto kei eehutata mola.