Hibru 12 - Tataroha DianaAana A God Oto Aamaka, Nge Ko Haꞌa-haꞌaloikie Mwaanie Kie Dau Aaela Loꞌu 1 Oto pulitaa oto paine ienini kire haataꞌi diana aana tala aana hiiwalaimolinge ngeena, na kire loko kali-kelikie oto huni toꞌo-toꞌomaaie hurunge ni hiiwalaimolinge ikie. Aena urine, kie ke toliꞌaasie taꞌena nga ola ko liu-liu honosikie mwaanie hiiwalaimolinge aana God, na kie ke toliꞌaasie noꞌone mo walo ni oorahaꞌaa nge ko hiriꞌikie oto tarau. Oto kie ke huru aꞌailaꞌa taraꞌasi aana hurunge nge a God e totohoa oto naka huni huru aana. 2 Kie ke lae peꞌi lio hahuroto aana a Jisas uri ingeie ni e aehotaa mei hiiwalaimolinge ikie, na ingeie oto ko lio i sulie hiiwalaimolinge ikie lai hule aana haꞌamangolana. Maꞌalana maenga i lengine poꞌu-poꞌu mei ola ni masanga oto paine, taꞌe ingeie e neꞌisae mwai-mweisie mola masanga ngeena na e lae peꞌi aꞌailaꞌa mola maꞌalana kire horoꞌie i lengine poꞌu-poꞌu urine. Ingeie oto e mwaꞌe-mwaꞌe ni mae urine aena aana e neꞌisae paine oto haahie ilenimwaꞌenga nge kei hele aana mai puri, na aana maholo ienini, e iiꞌo oto i pwalo-pwalona God huni aalaha peꞌie. 3 Oto omu ke loꞌongaꞌi keꞌu i sulie a Jisas, aana maꞌalana mwala e oorahaꞌaala ngeena kire talei teungeꞌinie taꞌe e kaꞌa mamalo ike. E lae peꞌi aꞌailaꞌa mola. Oto urine, iꞌomu na ke urine noꞌone. Omu ke suꞌuri mamaelaꞌa, na omu ke suꞌuri toliꞌaasie hiiwalaimolinge iꞌomu. 4 Iꞌomu, omu ko lae peꞌi ooho taane honosie mo tolahai ola ni oorahaꞌaa, taꞌe nga iini hikemiu e kaꞌa ooho aꞌailaꞌa ue lae hule aana ke maesie leune. 5 E lio oto mala omu pulongosie mola mei wala ni haꞌa-aꞌailaꞌaꞌomu nge a God e unue. Aana e soiꞌomu mala mo kalena, na e unue uuri, Kaleku, maholo o ko deu aaela na ineu a Aalaha no ko haꞌaloiꞌo hunie o ke lae oodo, mwaanie o loꞌo-loꞌongaꞌinie uri nga mei ola mwaakule mola ni ngeena. Na maholo no ko ere aamu hunie uri o ke lio saie mo takalonga iꞌoe, mwaanie saemu e wawai wa o aakohetaꞌinie tala diana ngeena. 6 Aena aana nou sai haꞌaloie mola mwala nou manata diana hunire, na nou sai haꞌa-oodohie mola mo iini no ko toolera mala mo kaleku. Provebs 3:11-12 7 Oto omu ke uure maꞌutaꞌa mola maholo mo aasanga ko hite aamiu, aana e urihana haꞌaloinge mola ni ngeena, na leune e haataꞌinie uri a God ko lio i suliꞌomu oto mala mo kalena. Aana ahutana mo mamaꞌa kire ko haꞌa-haꞌaloie mo kaleda. 8 Na a God e urine noꞌone, aana e sai haꞌaloie taꞌena nga mwela ingeie. Mala uri e kaꞌa sai haꞌaloiꞌomu ike, na iꞌomu nga mo tohungei kalena haꞌike, taꞌe saꞌa mola nga mo kaleni aro-aro mola. 9 Aana aapa hatarie mo aamaka mai welumalau, kire haꞌa-haꞌaloikie kaꞌu taane, taꞌe kie haꞌamaꞌu mola aada haahie leune. Oto e urine loꞌu, na e tohungei diana liutaa uri kie ke tola i sulie Aamaka i Lengi, hunie kie ke mauri oto peꞌie. 10 Mo aamaka mai welumalau ngeena, kire ko haꞌa-haꞌaloikie i sulie saeda hunie kele maholo mola oꞌoruꞌe. Taꞌe a God ko haꞌaloikie aani peꞌilaka oto toꞌohuu, hunie kie ke iiꞌo maaꞌi oto mala ingeie. 11 Aana maholo a God ko haꞌaloikie, kie sai sapesalu aana leune taane, na kie saꞌa ilenimwaꞌe ike. Taꞌe purihaꞌana, nge mo iini a God e haꞌaloikie aana tala ngeena, kie sai iiꞌo ni henuelama aana kie iiꞌo oodotaꞌi oto i maana God. 12 Oto aena leune, omu ke haꞌa-aꞌailaꞌaa mo aeꞌaemiu nge kire ko weo hunie omu ke huru loꞌu, na omu ke haꞌa-aꞌailaꞌaa mo kiꞌimiu nge kire weo kaꞌu hunie omu ke hele maꞌutaꞌa loꞌu. 13 Na omu ke huru i sulie tala e oodo, hunie mo iini nge ko lae mai purimiu ngeena nge hiiwalaimolinge ikire e kaꞌa susu ike ue, kire ke sai kohie tala na mwaanie kire lae takalo. Kei Tohungei Aaela Loꞌu Liutaa Hunie Mo Iini Kire Kaꞌa Tola I Sulie A God 14 Omu ke oꞌoꞌo ni henuelama mola peꞌie ahutana mwala, na omu ke ariꞌapasie noꞌone iiꞌonga oodotaꞌi. Aana nga iini e kaꞌa iiꞌo diana urine, e saꞌa roroꞌa leesie ike a Aalaha. 15 Omu ke lio talamiu mwaanie nga iini eemiu e oore aani hele aana hahuꞌana manata-diananga a God e haataꞌinie oto naka. Na mwaanie omu aehota huni loo-loohaꞌinie loꞌu aaelanga, aana tolahai ola urine e sai waelie mwala oto hunge. 16 Omu ke lio talamiu loꞌu, mwaanie nga iini eemiu e mai-mesi, na mwaanie nga iini e urihana loꞌu a Iso nge e kaꞌa haꞌamaꞌu ike aana God. Aana a Iso ingeie naꞌohai mwela, kaꞌu e malisine haꞌadianaꞌanga a God ke lae hunie na hunie ke neꞌi naꞌohai mwane aana komu oolisie aamana. Taꞌe aana a Iso e hiolo mola aana ngaeta maholo, oto e haꞌaholingeꞌinie mola iiꞌo-iiꞌoha ingeie ngeena hunie a Jekob mola uana taꞌa-taꞌa maai ngeunge. 17 Oto omu saie loꞌu mei puri, a Iso ko si saetoꞌo aana uri aamana ke aiꞌeitanaie a God talana hunie ke haꞌadianaꞌaa, taꞌe e aasa oto. Na a Iso e kaꞌa toꞌo aana ike loꞌu nga tala huni oolisie mei takalonga nge e asuie ngeena, maꞌalana uri e ngara-ngarasie loꞌu aamana hunie ke haꞌadianaꞌaa. 18 Kie ko lae taane oto mai saana God aana maholo ie, taꞌe e aaopa oto liutaa mwaanie waite maholo mo weuwaka kire holaꞌi lae mai saana God. Aana maholona kire lai hule aana ngaeta toloihenue i Saenae nge mo iinoni kire sai leesie aana maada. Oto kire leesie eeso-eesohai dunge ko weru i lengine, na leune e tohungei rodohono pupulu oto, na mawasidengi ko hite oto aana. 19 Na aawatai eehuri ko ngara-ngara, na kire rongoa uri nga mei wala e ere mai hunire. Mei wala ngeena e da kire tohungei meꞌu oto, hule aana kire unue oto uri kire kaꞌa sare rongoa loꞌu nga mei ola urine. 20 Kire tohungei meꞌu aena aana a God e unue uuri, Mala uri nga iinoni wa nga ola mauri ko teelaꞌi mola aana toloihenue ngeena, nge uuꞌi-maesilana kei lae oto aani heu. Eksodas 19:12-13 21 Walu ola kire leesiꞌi ngeena e tohungei lio ni meꞌunge, hule aana a Mosis noꞌone na e unue uuri, “No ko tohungei meꞌu hule aana no ko eriri oto.” Diutronomi 9:19 22 Taꞌe ikie, kie hule kaꞌu oto aana toloihenue kie haaraꞌinie aana i Saeon, na huilume paine a God Mau-meuriꞌe otona. Jerusalem taꞌau i Lengi kaꞌu otona, leu nge mo molani ensel kire palo-paloa a God aana, peꞌi ilenimwaꞌenga oto paine. 23 Kie lae mai aana lokonga aana soihaadaꞌinge ikie mo naꞌohai mwela a God nge sataka oto i laona uusu-uusu aana mo iini kire kei iiꞌo taꞌau i Lengi. Na kie lae oto mai i saana God, iini kei leie ahutana mwala, na kie iiꞌo oto peꞌie maurihaꞌana mwala diana holaꞌinaꞌo nge a God e taꞌaasie oto taꞌena nga aaelanga mwaanire. 24 Na kie lae oto mai i saana Jisas. Ingeie oto iini ko haꞌa-uurerurukie peꞌie a God aana e haꞌa-uuresie haiholotaꞌinge haalu a God peꞌie mo iinoni. Na apune a Jisas nge tataaꞌinilana e lae huni hoda rereꞌa aaka mwaanie oorahaꞌaa e haataꞌinie oto mei ola e diana loꞌu liutaa aana apune a Ebol nge e soi peine mola hunie nga iini ke suꞌue maenga ingeie. 25 Oto omu ke lio talamiu, mwaanie omu sereꞌi rongo hunie a God ko ere-ere mai huniꞌomu ngeena. Mwala holaꞌinaꞌo nge kire kaꞌa sare rongo ike hunie a Mosis aana maholo e haꞌapasulire mai aana walumalau ie, kire kaꞌa sai tehisie ike loꞌu mo haꞌamotaahinge. Taꞌe ie a God e ere mai uure taꞌau i Lengi huni haꞌapasulikie. ?Oto kie ke si tehisie kaꞌu mo haꞌamotaahinge uri taa, mala uri kie ko tolipuri aana walana? !Kei aasa mwae! 26 Oto wau i naꞌo, walana God e nunuie kaꞌu aano huu, taꞌe oto ie, e haiholotaꞌi oto hunikie uuri, Ne kei heꞌi nunuie loꞌu aano huu ngeena loꞌu hautaꞌai aana nga maholo, na ne kei nunuie noꞌone i Lengi aana taꞌa-taꞌa maholona. Hagae 2:6 27 Mo wala ie, “loꞌu hautaꞌai aana nga maholo” kire haataꞌinie uri a God kei nunuie walu ola e haꞌaholaꞌi, na kei taꞌaasiꞌi oto. Na walu ola nge kire kaꞌa sai eenuleꞌi ike nge mola kire kei iiꞌo huu. 28 Aena urine, kie ke paa-paalahea God haahie kie helesie oto aalahanga nge nunuilana e aasa kei lae loꞌu. Kie ke paalahea God tarau na kie ke palo-paloa oto aana tala nge e toꞌohie saena na kie ke haꞌamaꞌu oto aana peꞌi meꞌunge. 29 Aana God ikie ngeena e urihana dunge nge e sai weru suuheꞌinie taꞌena nga ola. |
© 2016, Wycliffe Bible Translators, Inc. All rights reserved.
Wycliffe Bible Translators, Inc.