Haataꞌinge 2 - Tataroha Diana

Uusu-uusu Hunie Soihaadaꞌinge Wau I Epesas

¹ Oto a mwaena e unue loꞌu hunieu uuri, “O ke uusue hunie naꞌohai mwane aana soihaadaꞌinge wau i Epesas oto uuri. “Ineu iini nge nou hele aana e hiu ho heeꞌu aana ninime i pwalo-pwaloku, na no ko lae-lae i matolana e hiu ola kol talai laite nge no ko ere huniꞌomu ie.

² “Nou saie taane nga taa omu esuie, na uri omu esu hiitoꞌo nakue, na uri omu hele susuleꞌi aani hiiwalaimolinge aaku. Nou saie noꞌone uri omu leledie mo iini nge ko lae i sulie mo tolahai ola aaela, na uri omu oohongie oto mo iini nge kire ko unue uri ikire mo hurulaꞌaa ineu taꞌe haꞌike mola, na uri omu deu oodoie uri kire ko eero mola.

³ Nou saie taane uri omu uure maꞌutaꞌa na omu kaꞌa toliꞌaa ike maꞌalana mwala kire taungeꞌiniꞌomu i tehulaꞌaku.

⁴ “Taꞌe nga taa nge nou lio oodoie aamiu na nou kaꞌa saetoꞌo aana mola uri omu kaꞌa manata diana ike oto hunieu mala holaꞌinaꞌo.

⁵ Omu ke loꞌongaꞌi eelihoꞌi loꞌu aana tolahai iinoni diana iꞌomu holaꞌinaꞌo, hunie omu ke aaliꞌu mwaanie mo oorahaꞌaa iꞌomu, na hunie omu ke asu peꞌie manata-diananga hunieu loꞌu mala omu euꞌesuie kaꞌu holaꞌinaꞌo. Mala uri omu kaꞌa aaliꞌu oto mwaanie mo oorahaꞌaa iꞌomu, nge ne kei lae mai seemiu na ne kei taꞌaasie oto ola talai laite iꞌomu ngeena mwaanie leu nge e iiꞌo aana.

⁶ “Taꞌe ngaeta mei ola diana omu ko esuie taane noꞌone, aana omu ko leledie tolahai ola aaela aana mo iini ko lae i sulie haꞌa-uusulinge tataꞌala a Nikolas, mala oto ineu noꞌone nou leledie leune.

⁷ “Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire ko aꞌailaꞌa taraꞌasi honosie aaelanga, nge ne kei toliꞌaasie kire ke lae mai i laona hohola a God hunie kire ngaue hue-huana ai nge e sai niie maurihe huu.”

Uusu-uusu Hunie Soihaadaꞌinge Wau I Smina

⁸ Oto a mwaena e heꞌi unue loꞌu hunieu uuri, “O ke uusue hunie naꞌohai mwane aana soihaadaꞌinge wau i Smina oto uuri. “Ineu oto aehotalana walu ola na haꞌamangolani. Ineu oto iini nou mae kaꞌu, taꞌe ie nou meuri loꞌu na no ko unue huniꞌomu uuri.

⁹ “Nou saie taane mo aasanga iꞌomu na uri omu meitale. Taꞌe omu tohungei toꞌo-toꞌo taane aana hiiwalaimolinge. Nou saie taane mwala ko ere aaelasiꞌomu aana kire unue uri ikire oto mo iini a God e saetoꞌo aada. Taꞌe haꞌike. Ikire, kire ko haꞌapainaꞌaa mola a Satan ni ngeena.

¹⁰ Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.

¹¹ “Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire kei aꞌailaꞌa taraꞌasi honosie aaelanga, kire saꞌa sapesalu ike i laona dunge ko weru oto di nge uri ruana nga maenga ni ngeena.”

Uusu-uusu Hunie Soihaadaꞌinge Wau I Pegamam

¹² Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Pegamam uuri. “Ineu, iini nge nou toꞌo aana naihi e ala rue-rue, no ko unue huniꞌomu uuri.

¹³ “Nou saie taane uri omu iiꞌo aana leu nge naunekume a Pwelu Eero-eero e iiꞌo aana, taꞌe maꞌalana e urine omu hele paipesi toꞌohuu aana sataku. I Pegamam nge leu kire horo maesie a Antipas aana, iini e tohungei sai houleꞌinieu. Taꞌe maꞌalana aana maholo aaela urine, na omu kaꞌa toliꞌaasie ike hiiwalaimolinge iꞌomu eeku i matolana mwala aana hanue a Pwelu Eero-eero ngeena.

¹⁴ “Taꞌe tootaꞌi kele mei ola mola nou kaꞌa saetoꞌo aani eemiu. Aana ngaeta mwala ikire peꞌiꞌomu kire ko hele i sulie haꞌa-uusulinge aaela a Balaam, iini nge e haꞌa-uusulie a Balak oto waite aana tala huni naꞌona mwala ni Israel hunie oorahaꞌaa. Aana e da kire ngaa mo ngeulaa kire uunuꞌi i saana mo nunui ola mo liꞌoa aaela, na hunie kire ke hele roroꞌanga peꞌi keni na peꞌi mwane.

¹⁵ Ngaeta mo iini eemiu ko deu aaela noꞌone mola urine aana kire ko hele paipesi i sulie haꞌa-uusulinge tataꞌala a Nikolas.

¹⁶ Omu ke toliꞌaasie oto mo tolahai ola aaela urine. Mala uri omu kaꞌa toliꞌaasie oto mo tolahai ola urine, nge ne kei lae oto mola mai lau-leu huni horoꞌie mwala ngeena aana naihi nge e maau mwaanie ngiduku.

¹⁷ “Omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge. Mo iini nge kire kei aꞌailaꞌa taraꞌasi honosie aaelanga, nge ne kei niie ngaulaa uure i Lengi ada, ola nge mwala aana pongine a Mosis kire kaꞌa lio saie neꞌisaenga aana. Na ne kei haꞌa-adora aani heu rereꞌa nge uusulana satai ola haalu e lae aana. Satai ola haalu ngeena nga taꞌa-taꞌa iini aaopa e kaꞌa saie loꞌu, taꞌe iini nge niilana ho heu ngeena e lae hunie.”

Uusu-uusu Hunie Soihaadaꞌinge Wau I Taeataera

¹⁸ Oto a mwaena e heꞌi unue loꞌu hunieu uuri, “O ke uusue oto hunie naꞌohai mwane aana soihaadaꞌinge wau i Taeataera uuri. “Ineu, Kalena a God, iini nge e ro maaku domana oto eeso-eesohai dunge, na mo aeꞌaeku kire wana-wana oto mala hau e sae ni pelu-pelu, no ko unue huniꞌomu uuri.

¹⁹ “Nou saie taane manata-diananga iꞌomu, na hiiwalaimolinge iꞌomu, na asunge diana iꞌomu aani peꞌilemiu heiliu, na hele-susuleꞌinge iꞌomu eeku maꞌalana ke aasa loꞌu uri taa. Iau, nou saie taane mo ola diana omu ko esuiꞌi ngeena, na uri omu ko esuiꞌi loꞌu liutaa aana mo iini nge omu esuiꞌi keꞌu holaꞌinaꞌo.

²⁰ “Taꞌe taꞌa-taꞌa mei ola mola nou kaꞌa saetoꞌo aana aamiu. Aana omu ko lio toliꞌaasie huꞌe aaela ngeena ko iiꞌo ue peꞌiꞌomu, maꞌalana e urihana mola a Jesepel oto waite na ko lae peꞌi eeroa mwala uri ingeie nga propet a God. Taꞌe ingeie ko haꞌa-uusuli aaelasie mola mo koni-konihe ineu, na ko naꞌoda mola takoie aeni-olanga na ngaulana mo ngeulaa kire uunuꞌi i saana mo god eero-eero.

²¹ Nou niie maholo oto hunie a keine uri hunie ke oonisae mwaanie mo oorahaꞌaa ingeie, taꞌe e kaꞌa sare aaliꞌu ike loꞌu mwaanie aeni-olanga ngeena nge ko esuie hailiu peꞌie mwala.

²² Oto aena urine ne kei haꞌa-enohie taane i lengine hulite peꞌie mo iini e saetoꞌo aada. Taꞌe kire saꞌa aeꞌaeni ola ike mala waite, aena aana kire kei meni sape raramea mola aana leune. Oto mala uri mo iini urine kire kaꞌa aaliꞌu ike mwaanie aaelanga a huꞌena, na ne kei aasire oto i laona haꞌamotaahinge paine.

²³ Na ne kei horo maesie noꞌone mo iini ko lulu i sulie, hunie ahutana mo soihaadaꞌinge kire ke saie uri ineu oto nou lio saie mola ahutana neꞌisaenga na hari-huninge mo iinoni. Na ne ke si waaie huniꞌomu, nga iini oto maraana i sulie asunge ingeie.

²⁴ “Taꞌe mo iini eemiu mo Taeataera nge omu kaꞌa lae ike i sulie haꞌa-uusulinge aaela ngeena na omu puꞌotaꞌinie mola nga taa kire unu-unue aana “Saenanaunge mumuni a Pwelu Eero-eero,” nge no ko unue oto huniꞌomu uri nou saꞌa neꞌie ike loꞌu nga hiꞌelaa haahiꞌomu.

²⁵ Taꞌe omu ke hele maꞌutaꞌa mola aana nga taa nge omu toꞌo aana oto, lai hule aana ne kei ooli loꞌu mei.

²⁶ “Na hunie mo iini nge kei aꞌailaꞌa taraꞌasi honosie aaelanga na kire kei lae peꞌi esuie mola mo esunge ineu lai hule aana ooretalana, nge ne kei niie nanamanga hunire hunie kire kei aalaha haahie ahutana mo aapoloa aana walumalau.

²⁷ Kei urine oto aana ne kei niie hunire taꞌa-taꞌa taungei nanamanga mala a Mamaꞌa e niie oto hunieu, aana uusulana e lae kaꞌu uuri, Kire kei aalaha haahie ahutana mo aapoloa aana walumalau, na kire kei uure aꞌailaꞌa oto liutaa honosie mo heitelilinge. Na kire kei ohoie nanamanga aana mo aapoloa ngeena mala iinoni ko pwaasie kao-kao. Sam 2:8-9

²⁸ Nge ne kei niie noꞌone hunire Madala ni Maahuꞌo-huꞌo.

²⁹ “Oto omu ke pwaarongo diana, hunie omu ke rongo saie nga taa nge Liꞌoa Maaꞌi ko unu-unue hunie mo soihaadaꞌinge.”