Haataꞌinge 14 - Tataroha Diana

Mo Sinolai Mwane Oodotaꞌi Kire Kanalie Kana Haalu Nana God

¹ Oto nou heꞌi lio loꞌu na no ko leesie a Kalei Sipu e uure i lengine toloi henue i Saeon. Na tangalau peꞌie hai aawalai sinolai iinoni mwana hai kire uure noꞌone peꞌie. Kire mani uusue satana a Kalei Sipu i naꞌona darada, na kire uusue noꞌone satana Aamana a Kalei Sipu.

² Na nou rongoa nga aawa-aawatai ola paine uure taꞌau i Lengi domana oto aawa-aawatana wai peine ko kone, na domana oto kou-kouhaꞌana lou-lou peine. Aawa-aawatai ola nou rongoa ngeena e rongo diana mala aawa-aawatana mo pesi aawa mwala ko sikiliꞌi.

³ Na mo sinolai iinoni ngeena kire ko kanalie kana haalu i naꞌona naunekume na i naꞌona e hai ola mauri na mo rato ni mwane ngeena. Na taꞌe mo sinolai iinoni nge a Kalei Sipu e tapa oolisire mwaanie walumalau mola kire sai kanalie kana haalu ngeena.

⁴ Mo mwane ienini kire kinetaꞌinire maraada hunie kire ke iiꞌo rereꞌa taꞌingelu mala mo iini nge kire kaꞌa hele roroꞌanga ike peꞌie nga keni. Na kire lulu i sulie a Kalei Sipu aana ahutana mo tolahai ola diana ingeie. E tapa oolisire mwaanie walumalau, na ikire oto domana niinge aani hiki-olanga nge niileni e lae hunie a God na a Kalei Sipu.

⁵ Kire kaꞌa dau wala aaela ike aani eeronga, taꞌe kire tohungei iiꞌo oodotaꞌi taꞌingelu mola.

E Oolu Ensel Ko Haꞌapasulie Mwala Uri A God Kei Leire

⁶ Oto nou heꞌi leesie loꞌu ngaeta ensel e loho taꞌau i salo huni tarohaꞌinie mei wala aana Tataroha Diana nge kei iiꞌo huu. Ko tarohaꞌinie oto hunie ahutana mo iinoni i laona walumalau, hunie taꞌena nga mwala, na taꞌena nga aapoloa, na taꞌena nga ere-erenga, na taꞌena nga komu.

⁷ Ensel ngeena ko ere aana mei wala paine uuri, “Omu ke haꞌamaꞌu aana God na omu ke haꞌapainaꞌaa. E hule oto aana maholo a God huni leie ahutana mwala. Oto omu ke haꞌamanikuluꞌaa God aana ingeie oto iini nge e haꞌaholaa salo, na aano huu, na aasi, na mo huulaa mauri, na taꞌena nga ola loꞌu i laona walumalau.”

⁸ Oto ruana nga ensel e lae mai sulie na ko heꞌi teꞌuri loꞌu, “Huilume paine i Babilon e aaꞌoho oto. !E waetaꞌi oto! Mala i Babilon oto i naꞌo, huilume paine ngeena e hari hunie mola aaelanga na e da uri taꞌena nga hanue aana walumalau noꞌone ke inu mehiri oto mala ingeie. Oto a God ko saewasulire.”

⁹ Oto oolune nga ensel e lae loꞌu mei sulie e ro iini i naꞌo, na ko unue mei wala paine uuri, “Kei aaela oto liutaa hunie iinoni nge ko pouruuru i naꞌona ola loo-looꞌa ngeena na nunune. Kei aaela oto hiitoꞌo hunie ahutana mo iini nge haꞌa-ara aana ola loo-looꞌa ngeena i darana wa aana nimana.

¹⁰ Mo iini urine kire kei meni hiingeꞌinie saewasunge a God oto toꞌohuu aana e saꞌa pwaidoraa ike saewasunge ingeie peꞌie nga kele mei ola ni aamasinge hunire, taꞌe kei haꞌa-aahesie mola apude. A God kei aasire mola i laona dunge ni haꞌamotaahinge aana mo heu eeso-eeso i naꞌona mo ensel maaꞌi ingeie na a Kalei Sipu.

¹¹ Pwaꞌulana dunge ni sapesalunge ikire ngeena e saꞌa mou-mou ike loꞌu, taꞌe kei taꞌelaꞌi taraꞌasi mola susue aatowaa na rodo. Oto nga mamalonga haꞌike loꞌu hunie mo iini nge kire haꞌapainaꞌaa ola loo-looꞌa ngeena na nunune, wa mo iini nge kire toꞌo aana haꞌa-ara aana satana.”

¹² Oto aena urinena, e malisine mo iini maaꞌi a God ke hele susuleꞌi aana hiiwalaimolinge ikire i lalo aana Jisas na aana tola i sulilana mo haꞌatolanga a God.

¹³ Oto nou rongoa loꞌu mei wala uure mwaanie i Lengi ko teꞌuri, “O ke uusue uri aehota siꞌiri pwau weu, mo iini nge kire mae i lalo aana Aalaha kire deidehie oto liutaa.” Na a Liꞌoa e teꞌuri, “Iau, e toꞌohuu oto. Kire kei ile-ilenimwaꞌe mola maholo kire kei mamalo oto taꞌau i Lengi mwaanie mo esunge e aasa ikire, aena aana waaitada haahie mo esunge diana kire asuiꞌi ngeena e iiꞌo aakau oto hunire.”

Mo Ensel Kire Soꞌokonie Hohola Aana Walumalau

¹⁴ Oto nou lio-lio na no ko leesie loꞌu nga iini e lio mala iinoni e iiꞌo i lengine mei uuru. E hoꞌosie rorodara aani kol i pweune, na e hele aana naihi e ala huni soꞌokoni.

¹⁵ Na ngaeta ensel e lae loꞌu mei mwaanie nume maaꞌi, na ko soi takoie iini nge e iiꞌo i lengine mei uuru ngeena uuri, “O ke toolea naihi iꞌoe na o ke soꞌokoni oto, aena aana hohola aana walumalau e repo diana oto, na maholo hunie soꞌokoninge e hule oto.”

¹⁶ Oto iini nge e iiꞌo i lengine mei uuru ngeena e salea walumalau aana naihi lama-lama ingeie, na soꞌokonilana mo iinoni oodotaꞌi aana walumalau e lae oto.

¹⁷ Oto nou leesie ngaeta ensel e lae loꞌu mei mwaanie nume maaꞌi taꞌau i Lengi, na ensel ngeena noꞌone e toꞌo aana naihi e ala huni soꞌokoni.

¹⁸ Oto ensel nge ko lio-lio i sulie dunge aana ora ni uunu ola, e lae mai mwaanie ora ni uunu-uunu na ko soi weu hunie ensel nge e hele aana naihi uuri, “O ke toolea naihi iꞌoe na o ke lae oto i soꞌo niu, aena aana mo niu i laona pariki aana walumalau kire ulu-ulu oto.”

¹⁹ Oto ensel ngeena e salea walumalau aana naihi lama-lama ingeie na soꞌokonilana mo iinoni oorahaꞌaa aana walumalau e lae oto. Mala mo niu e toli nge mwala ko soꞌohiꞌi huni arasiꞌi, nge ensel ngeena e soꞌohie kira oorahaꞌaa mai i saana saukae aana saewasunge a God.

²⁰ E toolera mola i sinaha mwaanie huilume, na arasilada ko lae oto. Oto e losie nimei hero ngeena, na apu mola ko aahe mwaanie ai loi-losi ngeena. Apune kira oorahaꞌaa e aahe ngeena na e kone mala wai ko kone, na totoho aana apu e aahe ngeena e lae haꞌatau hunie oolu tangalai kilomita, na e kokoro nga tahanga.