Epesas 6 - Tataroha Diana

Mo Mwela Ke Tola I Suli, Na Mo Mamaꞌa Ke Toli Rako Peꞌire

¹ Iꞌomu mo mwela, e tohungei diana uri omu ke tola i sulie mo aamamiu na mo nikemiu, aana ikire oto a Aalaha e neꞌire haahiꞌomu.

² Eetana nga Haꞌatolanga nge haiholotaꞌinge e lae noꞌone peꞌie, e unue uuri, O ke haꞌamaꞌu aana aamamu na nikemu,

³ hunie walu ola ke si diana huniꞌo na hunie o ke si iiꞌo tewa aana walumalau. Eksodas 20:12

⁴ Huniꞌomu mo mamaꞌa noꞌone, omu ke toli rako peꞌie mo mwela iꞌomu na mwaanie omu talei haꞌa-haꞌasaewasuliꞌara. Omu ke lio i suli diana aada mola, na omu ke haꞌa-uusulire mola i sulie tolahana a Aalaha.

Mo Mwane Auꞌesu Ke Asu Diana, Na Mwaanie Mo Poro Paine E Haꞌamaꞌusire

⁵ Iꞌomu mo koni-konihe, omu ke tola i sulie mo poro paine iꞌomu mei welumalau, na omu ke maꞌuteꞌinire peꞌi haꞌamaꞌunge aada. Na omu ke tola i sulire oto mala omu ko tola i sulie a Kraes peꞌie mei sae toꞌohuu.

⁶ Mwaanie omu totola i sulire mola aana maholo kire ko lio-lio uri hunie omu ke haꞌa-olara mola. Taꞌe omu ke dau aahonga oto tarau huni esuie nga taa a God e saetoꞌo aana, aena aana iꞌomu mo koni-konihe a Kraes.

⁷ Omu ke ile-ilenimwaꞌe mola haahie asunge iꞌomu, aena aana omu kaꞌa asu ike mola nana mo iinoni, taꞌe omu ko esu nana Aalaha ikie.

⁸ Omu ke dau diana urine aana omu saie oto uri Aalaha Paine ikie ngeena ni kei waaie ahutana mo iini ko esu diana, maꞌalana nga koni-konihe wa nga iini e kaꞌa iiꞌo ike i mamalutana nga iini.

⁹ Na iꞌomu mo poro paine, iꞌomu noꞌone omu ke lulu i sulie tolahai ola diana hunie mo koni-konihe iꞌomu. Mwaanie omu haꞌamaꞌusire, taꞌe omu ke aamasitoꞌo aana uri iꞌomu na mo koni-konihe iꞌomu ngeena, omu meni toꞌo aana mola taꞌa-taꞌa Aalaha. Na ingeie, e iiꞌo mola taꞌau i Lengi, na e kaꞌa sai rara haahie ike mola nga iini.

Kie Ke Ooho Honosie A Pwelu Eero-eero Peꞌie Mo Reisinge A Liꞌoa Maaꞌi

¹⁰ Oto taꞌa-taꞌa mei ola no ko sare unue loꞌu. Omu ke uure maꞌutaꞌa peꞌie aꞌailaꞌanga a Aalaha nge omu lado oto peꞌie, aana ingeie oto e toꞌo aana nanamanga e paine liutaa.

¹¹ Omu ke hoꞌosie mo talo hai aaopaꞌi iꞌomu nge a God e niiꞌi namiu, hunie omu ke si melisine uure-honosilana mo oalaꞌinge aaela a Pwelu Eero-eero.

¹² Aana kie kaꞌa ooho ike honosie mo iinoni, taꞌe kie ko ooho honosie mo liꞌoa aaela, na mo aalahanga aana mo liꞌoa tataꞌala, na mo nanamanga aana rodohono, na taꞌena nga iini aana mae a Pwelu Eero-eero.

¹³ Oto omu ke hoꞌosie mo talo hai aaopaꞌi nge a God e sai niiꞌi ngeena. Aana urine nge omu sai uure honosie maelonga ngeena, maꞌalana nga taa loꞌu ke lae mai huni seuniꞌomu. Na omu sai heiseuni mola lai hule i haꞌamangolana, na omu sai uure aꞌailaꞌa mola tarau.

¹⁴ Oto omu ke uure aakau. Omu ke hoꞌosie oto walaimolinge mala rorotoꞌoni iꞌomu, na omu ke toꞌoni oto haahiꞌomu aana oodo-oodonga mala toꞌoni ni oohotaa nge ko kinetaꞌinie sae.

¹⁵ Omu ke iiꞌo aakau huni tarohaꞌinie Tataroha Diana i sulie hanuelamanga peꞌie a God, aana urine domana uri omu hoꞌosie oto mo hoꞌohaahiꞌae iꞌomu.

¹⁶ Na omu ke hele-hele aana hiiwalaimolinge aana a Jisas mala talo honosie mo oomo aani dunge nge a Pwelu Eero-eero ko uuꞌileꞌiniꞌi mei.

¹⁷ Omu ke hoꞌo-hoꞌosie noꞌone haꞌa-uuringe a God mala paraimaa ni oohotaa haahie pwaumiu, na omu ke hele aana walana God mala omu hele aana naihi nge a Liꞌoa Maaꞌi e niie mai.

¹⁸ Na omu ke aarengaꞌi tarau na omu ke suke aana a God hunie ke peꞌiꞌomu i suli maholo. Na omu ke iiꞌo aani aarengaꞌinge aana nanamanga a Liꞌoa Maaꞌi. Oto omu ke lio-lio diana, na mwaanie omu toitoliꞌaasie aarengaꞌinge tarau talana ahutana mo iinoni a God.

¹⁹ Na omu ke aarengaꞌi noꞌone talaku, hunie a God ke niie mo wala huni tarohaꞌiniꞌi hunieu. Mala uri kei lae urine, nge nou saꞌa maꞌu ike maholo ne kei tarohaꞌinie Tataroha Diana nge e iiꞌo mumuni kaꞌu mwaanie mo iinoni ni welumalau.

²⁰ Ineu i laona nume ni hoꞌo aana maholo ie aena aana nou tarohaꞌinie Tataroha Diana ngeena mala mwane auꞌesu oalana a God. Oto omu ke aarengaꞌi talaku mwaanie uri nou meꞌu ni tarohaꞌi loꞌu.

Mei Wala Ooreta A Pol Hunie Mo Epesas

^21-22 No ko uusungeꞌinie wau a Tikikas i seemiu hunie ke haꞌarongoꞌomu aana mo ola i suliꞌemeelu. Ingeie tohungei malahukaelu toꞌohuu, aana ingeie ngaeta mwane auꞌesu diana aana asunge a Aalaha ni ngeena. Oto a Tikikas nge ke si haꞌarongoꞌomu aana mo tataroha i sulieu na ke haꞌadodoa saemiu aana walana.

²³ Maeni eesiku maaꞌi, no ko eitanaie a God Aamaka na Aalaha ikie a Jisas Kraes, hunie ke asuie hanuelamanga, na manata-diananga peꞌie hiiwalaimolinge ke paine loꞌu eemiu.

²⁴ Na no ko eitanaie a God noꞌone uri ke haataꞌinie hahuꞌana manata-diananga ingeie huniꞌomu, mo iini nge manata-diananga iꞌomu hunie Aalaha ikie a Jisas Kraes e kaꞌa sai mou-mou ike aana taꞌena nga maholo.