Epesas 5 - Tataroha Diana

Kie Ke Iiꞌo Oodotaꞌi Aana Ikie Mwala Aana Raa-raa

¹ Mala mo mwela ko heimaanie mo aamada, nge iꞌomu noꞌone omu ke haimaanie Aamamiu i Lengi, nge e tohungei manata diana hiitoꞌo huniꞌomu.

² Manata-diananga oto ke paine i laona mau-meuringe iꞌomu, mala a Kraes e manata diana hunikie na e toliꞌaasie maraana hunie ke mae honotaka. Maenga ingeie hunikie e urihana nga uunu-olanga huni taꞌaasie oorahaꞌaa ikie, na a God e ilenimwaꞌe oto liutaa haahie, mala iinoni ko ilenimwaꞌe haahie dango wau-wesu nge e tohungei wesu mangoni.

³ Oto aeni-olanga peꞌie nga iinoni, wa taꞌena nga masinge loꞌu urine, wa saehanalilana toꞌo-toꞌolana ngaeta mwala, e kaꞌa tohungei adongamiu ike. Omu ke iiꞌo haꞌataulie mola taꞌena nga ola urine, hule aana nga iini kaꞌa sai kele siho aamiu aana nga mei ola urine, aana iꞌomu mo iinoni a God.

⁴ Na e kaꞌa adona ike noꞌone uri omu ke talei unu-unue mo wala aaela, wa mo erenga ni pweu, wa mo haꞌa-eeronga aaela. Taꞌe nga taa e malisine uri omu ke ere i sulie oto, huni paalahea mola a God.

⁵ Iꞌomu, omu saie oto maraamiu uri mwala nge kire ko talei deu taꞌewau mola peꞌie taꞌena nga iinoni, na kire ko lae peꞌi esuie mola taꞌena nga ola aaela urine, kire kaꞌa toꞌo aana ike nga leu talada i laona mauringe nge a Kraes na a God kirerue ko aalaha haahie. Na e urine noꞌone hunie mo iini nge kire ko talei sae-saehanalie mola toꞌo-toꞌolana ngaeta mwala, aana mo iini urine kire ko paloa mola mo god eero-eero ni ngeena.

⁶ Omu ke suꞌuri toliꞌaasie nga iini ke haꞌapweuꞌomu uri mo ola ngeena kire kohi mola, aana a God kei saewasulie mwala nge kire kaꞌa sai tola i sulie, na kei haꞌaloire haahie kire ko esuie mo ola urine.

⁷ Oto omu ke suꞌuri tekuhie mwala urine.

⁸ Holaꞌinaꞌo iꞌomu maraamiu omu oꞌoꞌo kaꞌu noꞌone i laona rodohono, taꞌe aena aana omu neꞌi iinoni oto a Aalaha, oto omu iiꞌo oto i laona raa-raa. Oto omu ke dau diana oto mala mwela aana raa-raa,

⁹ aena aana tolahana raa-raa nge e sai da taꞌena nga ola ke lae diana, na ke oodo, na ke toꞌohuu.

¹⁰ Na omu ke dau aahonga huni lio saie walu ola nge a Aalaha e saetoꞌo aani.

¹¹ Omu ke suꞌuri esuie mo ola aana rodohono nge kire neꞌi ola aaela. Taꞌe omu ke haataꞌinie mola aana mwala uri tolahai ola ngeena e kaꞌa kohi ike.

¹² Walu ola nge kira haitohe kire ko esu mumuni eeni, maꞌalana uri kie ke ere loꞌu i sulie, taꞌe e neꞌi ola ni masanga oto ni ngeena.

¹³ Taꞌe maholo raa-raa ko sinelie nga mei ola, nge mwala ke si lio saie mei ola ngeena e uri taa, aana raa-raa e si haataꞌinie oto.

¹⁴ Oto omu ke haꞌa-haꞌasinelie mwala aana tolahai ola diana hunie kire ke haimaaniꞌomu na kire ke aaliꞌu loꞌu mwaanie rodohono hunie kire ke neꞌie raa-raa oto noꞌone mala iꞌomu. Aena urine kaꞌu nga iini e ere uuri, “Omu ke lio oto, mo iini omu sai maꞌahu. Omu ke lio oto mwaanie maenga, hunie a Kraes ke si raangiꞌomu.”

¹⁵ Oto omu ke lio talamiu aana iiꞌonga iꞌomu. Omu ke suꞌuri oꞌoꞌo oto mola mala mwala e puꞌosasu, taꞌe omu ke iiꞌo oto mala mwala e saenanau.

¹⁶ Omu ke asu diana aana ahutana mo kele maholoi sato omu toꞌo aani ngeena, aena aana maholo ienini, maholo oto aana aaelanga ni ngeena.

¹⁷ Omu ke suꞌuri pweu, taꞌe omu ke lio saie nga taa nge a Aalaha e saetoꞌo aana omu ke asuie.

¹⁸ Mwaanie omu haꞌapweuꞌomu aana wai ni pweunge, ola e sai waeliꞌomu, taꞌe omu ke honu mola aana Liꞌoa Maaꞌi.

¹⁹ Urine maholo omu ko meni loko tararuru, omu ke haꞌasusue saemiu heiliu aana omu ko kanalie mo kana maaꞌi, na mo kana ni lahenga, na mo kana nge Liꞌoa Maaꞌi e niiꞌi mei. Na omu ke kana noꞌone ni lahea Aalaha aana ahutana saemiu.

²⁰ Na omu ke paalahea God Mamaꞌa tarau haahie taꞌena nga ola aana satana Aalaha ikie a Jisas Kraes.

Poro Na Huꞌe Ke Haꞌamaꞌu Hunirerue Hailiu

²¹ Na loꞌu aena aana omu meni neꞌisae paine aana Kraes, nge omu ke mani deu-deu i sulie neꞌisaenga iꞌomu heiliu oto noꞌone.

²² Iꞌomu mo huꞌe, omu ke dau i sulie neꞌisaenga mo poro iꞌomu oto mala omu sai deu i sulie neꞌisaenga Aalaha ikie.

²³ Aana mo poro iꞌomu, ikire oto kire ko lio i suliꞌomu mala pwaune iinoni ko lio i sulie sapena, na mala a Kraes noꞌone ko lio i sulie soihaadaꞌinge nge e haꞌa-uurie oto.

²⁴ Na oto mala soihaadaꞌinge ko lae i sulie a Kraes, oto iꞌomu mo huꞌe, omu ke mwaꞌe-mwaꞌe ni lae i sulie mo poro iꞌomu noꞌone urine.

²⁵ Iꞌomu mo poro, omu ke manata diana hunie mo huꞌe iꞌomu oto mala a Kraes e manata diana hunie soihaadaꞌinge. Aana e urine kaꞌu, a Kraes e toliꞌaasie maraana hunie ke mae huni peꞌie soihaadaꞌinge

²⁶ hunie uri soihaadaꞌinge ke neꞌi iinoni maaꞌi a God. E haꞌarereꞌara urine aana maholo e lotohire aani wei, aena aana kire hiiwalaimoli aana walana.

²⁷ A Kraes e asuie walu ola urine hunie maholo kei toolea mai soihaadaꞌinge i sapena maraana, uri soihaadaꞌinge ke tohungei lio manikuluꞌe, na uri e kaꞌa toꞌo aana nga taꞌa-taꞌa kele mei ola ke aaela aana, taꞌe ke oodotaꞌi mola taꞌingelu.

²⁸ Oto iꞌomu mo mwane, e urine noꞌone, omu ke manata diana hunie mo huꞌe iꞌomu oto mala omu manata diana hunie sapemiu maraamiu. Maholo nga mwane ko manata diana hunie huꞌe ingeie, ko manata diana oto noꞌone hunie maraana.

²⁹ Omu meni saie uri nga taꞌa-taꞌa iini e saꞌa sare waelie ike sapena mola maraana. !Haꞌike! Taꞌe nga iini e sai lio i suli diana aana mola sapena peꞌi ngeulaa na walu ola loꞌu e adona. A Kraes ko lio diana i sulie soihaadaꞌinge urine noꞌone,

³⁰ na ikie oto mo sasarai ola aana sapena Kraes.

³¹ Leune e sada peꞌie nga taa mo Uusu-uusu Maaꞌi e unue uuri, Mwane ke oopa oto mwaanie aamana na nikana, na ke iiꞌo ruru oto peꞌie huꞌe ingeie, na kirerue kei neꞌie oto taꞌa-taꞌa iinoni. Jenesis 2:24

³² Mei loꞌongaꞌinge kokoro e iiꞌo mumuni i leune, na nou lio saie uri ko ere ni aalahuunge i sulie a Kraes na soihaadaꞌinge ingeie.

³³ Taꞌe mo wala ngeena e uure noꞌone huniꞌomu. Oto taꞌe-taꞌena nga poro ke manata diana hunie huꞌe ingeie mala ko manata diana hunie sapena maraana, na taꞌe-taꞌena nga huꞌe ke haꞌamaꞌu aana poro ingeie.